Ezekiel 18

Shan

← Chapter 17 Jump to: Chapter 19 →

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2မိူဝ်ႈဢၼ် သူသုင်းသွင်ႇ ၵႂၢမ်းထုင်းလူၺ်ႈလွင်ႈ မိူင်း ဢီႉသရေႇလႃႉ လႄႈဝႃႈ၊ ၶဝ်ၸိူဝ်းဢၼ်ပဵၼ်ပေႃႈၼၼ်ႉ ၵိၼ်မၢၵ်ႇၸပိတ်ႈ ဢၼ်သူမ်ႈလႄႈ ၶဝ်ၸိူဝ်းဢၼ်ပဵၼ် လုၵ်ႈပဵၼ်လၢင်းၼၼ်ႉ မီးတၢင်းဢၼ် ၶဵဝ်ႈမူၺ်ႈၶဵဝ်ႈၵႅၼ်းယူႇဢေႃႈ၊ ဝႃႈၼင်ႇၼႆၼၼ်ႉ မီးဢလူဝ်ႇၶႂ်ႈဝႃႈ ၸိူဝ်ႉၼင်ႇႁိုဝ်။-

3ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼင်ႇဢၼ် ၵဝ်ဢသၢၵ်ႈလိပ်းယူႇၼၼ်ႉ၊ ၵမ်းလိုၼ်းသူဢမ်ႇလႆႈမီးလွင်ႈဢၼ် တၵ်းလႆႈ သုင်းသွင်ႇ ၵႂၢမ်းထုင်းၼၼ်ႉ ၵႃႈၼႂ်းမိူင်း ဢီႉသရေႇလႃႉ ။-

4ၵဝ်ဢုပ်ႉပိူင်ႇဝီႉၺိၺ်ႇ တင်းသဵင်ႈတင်းလူင်ဢေႃႈ။ ၸိူဝ်ႉၼင်ႇဢၼ်ၵဝ်ဢုပ်ႉပိူင်ႇဝီႉၺိၺ်ႇ ၵေႃႉဢၼ်ပဵၼ်ပေႃႈၼၼ်ႉ၊ ၵဝ်ဢုပ်ႉပိူင်ႇ ဝီႉၺိၺ်ႇၵေႃႉဢၼ်ပဵၼ်လုၵ်ႈၸၢႆးဢေႃႈ။ ဝီႉၺိၺ်ႇဢၼ်ၽိတ်းပိူင်ႈၼၼ်ႉ တၵ်းလႆႈတၢႆဢေႃႈ။-

5ၵူၼ်းဢၼ်ဝႃႈၸမ်ႉ၊ ပေႃးမီးၸႂ်သၽေႃး ဢၼ်သိုဝ်ႈလီလႄႈ ႁဵတ်းလွင်ႈတၢင်းဢၼ်ၸွမ်းၼင်ႇတြႃး၊ လွင်ႈတၢင်းဢၼ်ၸိုဝ်ႈဢၼ်ၸႂ်ႈလႄႈ၊-

6ဢမ်ႇၵိၼ်ၵႃႈတီႈၼိူဝ်လွႆၼိူဝ်ၵုင်း၊ ဢမ်ႇဢဝ်တႃမၼ်းမုင်ႈလူ မုင်ႈတူၺ်းရုၵ်ႈထူႉ ဢၼ်မဵဝ်း ဢီႉသရေႇလႃႉ ၵူဝ်းၵႂၢႆႇၸိူဝ်းၼၼ်ႉ၊ ဢမ်ႇၽိတ်းပိူင်ႈမေးပိူၼ်ႈ၊ ဢမ်ႇသုတ်ႉၸပ်းသုတ်ႉၸူးမႄႈယိင်း ဢၼ်ႁွတ်ႈဢူႉတူႉ၊-

7ဢမ်ႇၼိၵ်ႈၸၢၵ်ႈငႅၼ်းသႄးၽူႈလႂ်လႃးလႃး၊ ယင်းဢမ်ႇၶိုၼ်းပၼ်ၼီႈၶွတ်ႇ ဢၼ်ပွင်ႇဢၼ်ၵမ်ႉဝႆႉလႄႈ ဢမ်ႇယူႇ၊ ဢမ်ႇႁဵတ်းပႄႉႁဵတ်းၼႅင်ႇ ႁိမ်ဢဝ်ႁူင်ႇဢဝ်ဢုၵ်ႉၸႃႇပိူၼ်ႈ၊ လဵင်ႉလူၵေႃႉဢၼ်ဢိုပ်းဢၼ်ယၢၵ်ႈ လႄႈ ဢဝ်ၶူဝ်းၼုင်ႈၶူဝ်းမႆ ႁူမ်ႇမႆၵေႃႉဢၼ် ဢၼ်ဢမ်ႇမီးၶူဝ်းၼုင်ႈၶူဝ်းမႆၼၼ်ႉယူႇ၊-

8ယင်းဢမ်ႇၵိၼ်ဢတူဝ်းၶီႈမၼ်းလႄႈ ပၼ်ၵူႈပၼ်ယိုမ်ငိုၼ်းယူႇ၊ ယိုတ်းဢဝ်မိုဝ်းမၼ်း ၶိုၼ်းသေၵႃႈတီႈဢမူႉ ဢႃႉထမ်ႇမႃႉလႄႈ ႁဵတ်း တၢင်းဢၼ်ၸီႇယၢင်ႇဢမူႉ ၵႄႈဝူင်ႈၵၢင်သွင်ၽၢႆႇသွင်ပႃႈ ၸွမ်းၼင်ႇတြႃးယူႇ၊-

9ၸွမ်းသဵၼ်ႈတၢင်း ထုင်းၽိင်ႈတြႃး ၵဝ်လႄႈ ၵမ်ၵျၢင်ႉလွင်ႈတၢင်းဢၼ် ၵဝ်ၸီႇယၢင်ႇဝႆႉၸိူဝ်းၼၼ်ႉ ႁႂ်ႈလႆႈပႂ်ႉသဵတ်ႈၸႃႇယူႇၸိုင်၊ ၵေႃႉၼၼ်ႉ ပဵၼ်ၵေႃႉဢၼ်သိုဝ်ႈတေႃႇလႄႈ မၼ်းတၵ်းလႆႈဢသၢၵ်ႈလိပ်း ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

10ၼႂ်းဝႃႈၼၼ်သေၵေႃႈ ပေႃးမၼ်းမီးလုၵ်ႈၸၢႆး ဢၼ်ပဵၼ်ၸူၼ်၊ ဢၼ်ထွၵ်ႇလိူတ်ႈပိူၼ်ႈပႅတ်ႈ၊ ဢၼ်ႁဵတ်းတူႉၸရိူၵ်ႈ ဢၼ်ဝႃႈ မႃးယဝ်ႉဢွၼ်တၢင်းၼၼ်ႉ သေၸိူဝ်ႉသေပိူင်၊-

11ဢၼ်ဢမ်ႇႁဵတ်းသူႉၸရိူၵ်ႈ ဢၼ်ဝႃႈမႃးယဝ်ႉဢွၼ်တၢင်းၼၼ်ႉ သေၸိူဝ်ႉသေပိူင်၊ ဢၼ်ႁဵတ်းတၢင်းဢၼ်ၵိၼ်ၵႃႈတီႈၼိူဝ်လွႆ ၼိူဝ်ၵုင်းယူႇ၊ ဢၼ်ၽိတ်းပိူင်ႈမေးပိူၼ်ႈယူႇ၊-

12ဢၼ်ၼိၵ်ႈၸၢၵ်ႈငႅၼ်းသႄး ၵေႃႉဢၼ်ယၢၵ်ႈဢၼ်ၽၢၼ် ဢၼ်ၸုတ်ႈဢၼ်လုတ်ႈၼၼ်ႉယူႇ၊ ဢၼ်ႁဵတ်းပႄႉႁဵတ်းၼႅင်ႇ ႁိမ်ဢဝ်ႁူင်ႇဢဝ် ဢုၵ်ႉၸႃႇပိူၼ်ႈယူႇ၊ ဢၼ်ယင်းဢမ်ႇၶိုၼ်းပၼ်ဢုၵ်ႉၸႃႇ ဢၼ်ပိူၼ်ႈပွင်ႇၵမ်ႉဝႆႉၼၼ်ႉလႄႈယူႇ၊ ဢၼ်ဢဝ်တႃမၼ်း မုင်ႈလူမုင်ႈတူၺ်းရုၵ်ႈထူႉယူႇ၊ ဢၼ်ႁဵတ်း လွင်ႈတၢင်းဢၼ်လီႁင်ႈဢဵတ်ႇသဵတ်ႇယူႇ၊-

13ဢၼ်ၵိၼ်ဢတူဝ်းၶီႈမၼ်းလႄႈ ပၼ်ၵူႈပၼ်ယိုမ်ငိုၼ်းယူႇၼၼ်ႉၸိုင်၊ ၵေႃႉၼၼ်ႉ တၵ်းလႆႈဢသၢၵ်ႈလိပ်းႁိုဝ်။ မၼ်းဢမ်ႇလႆႈဢသၢၵ်ႈလိပ်း။ ၵွပ်ႈပိူဝ်ႈဢၼ်မၼ်း ႁဵတ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇ ၵႃႈမီးၸိူဝ်းၼႆႉၼၼ်ႉလႄႈ မၼ်းတၵ်းလႆႈၶၢမ်ႇတၢင်းဢၼ် ဢဝ်တၢႆဢမၢၼ်ႇၶၼ်ပဵၼ်ဢေႃႈ။ လိူတ်ႈမၼ်း တၵ်းလႆႈ တူၵ်းႁွတ်ႈၵႃႈၼိူဝ်မၼ်းဢေႃႈ။-

14ၼႂ်းဝႃႈၼၼ်သေၵေႃႈ ပေႃးမၼ်းမီးလုၵ်ႈၸၢႆး ဢၼ်ႁၼ်တူႉၸရိူၵ်ႈ ၵႃႈဢၼ်ပေႃႈမၼ်းႁဵတ်း ၼၼ်ႉလႄႈ ၶႆႈၸႂ်ဝူၼ်ႉၸႂ်သေယဝ်ႉ၊ ဢမ်ႇႁဵတ်းလွင်ႈတၢင်းၸိူဝ်ႉၼင်ႇၼၼ်ၼၼ်ႉ၊-

15ဢၼ်ဢမ်ႇၵိၼ် ၵႃႈတီႈၼိူဝ်လွႆၼိူဝ်ၵုင်း၊ ဢမ်ႇဢဝ်တႃမၼ်း မုင်ႈလူမုင်ႈတူၺ်းရုၵ်ႈထူႉ ဢၼ်မဵဝ်း ဢီႉသရေႇလႃႉ ၵူဝ်းၵႂၢႆႇ ၸိူဝ်းၼၼ်ႉ၊ ဢမ်ႇၽိတ်းပိူင်ႈမေးပိူၼ်ႈ၊-

16ဢမ်ႇၼိၵ်ႈၸၢၵ်ႈငႅၼ်းသႄး ၽူႈလႂ်လႃးလႃး၊ ဢမ်ႇသိမ်းဢဝ်ဢုၵ်ႉၸႃႇ ဢၼ်ပိူၼ်ႈပွင်ႇဝႆႉ ၵမ်ႉဝႆႉၼၼ်ႉ၊ ဢမ်ႇႁဵတ်းပႄႉႁဵတ်းၼႅင်ႇ ႁိမ်ဢဝ် ႁူင်ႇဢဝ်ဢုၵ်ႉၸႃႇပိူၼ်ႈ၊ ႁဵတ်းတၢင်းဢၼ်လဵင်ႉလူ ၵေႃႉဢၼ်ဢိုပ်းယၢၵ်ႈ၊ ဢဝ်ၶူဝ်းၼုင်ႈၶူဝ်းမႆ ႁူမ်ႇမႆပၼ်ၵေႃႉဢၼ် ဢမ်ႇမီးၶူဝ်းၼုင်ႈၶူဝ်းမႆၼၼ်ႉယူႇ၊-

17ယိုတ်းဢဝ်မိုဝ်းမၼ်းသေၵႃႈတီႈ ၵေႃႉဢၼ်ယၢၵ်ႈဢၼ်ၽၢၼ်၊ ဢမ်ႇၵိၼ်ဢတူဝ်းၶီႈမၼ်းလႄႈ ပၼ်ၵူႈပၼ်ယိုမ်ငိုၼ်းယူႇ သေလႄႈ ပႂ်ႉၵမ်ပႂ်ႉၵျၢင်ႉလွင်ႈတၢင်းဢၼ် ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ၸွမ်းသဵၼ်ႈတၢင်း ထုင်းၽိင်ႈတြႃးၵဝ် တင်းလၢႆယူႇၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢႆ ၵွပ်ႈပိူဝ်ႈဢပႅတ်ႈပေႃႈမႄႈဢမ်ႇၸႂ်ႈ၊ တၵ်းလႆႈဢသၢၵ်ႈလိပ်း ဢမၢၼ်ႇၶၼ်ပဵၼ်ဢေႃႈ။-

18ပေႃႈမၼ်းၸမ်ႉ၊ ၵွပ်ႈပိူဝ်ႈဢၼ် မၼ်းၼိၵ်ႈၸၢၵ်ႈငႅၼ်းသႄး ပီႈမၼ်းၼွင်ႉမၼ်း ၶိူဝ်းၶိူဝ်းယႂ်းယႂ်းယူႇ၊ ႁဵတ်းပႄႉႁဵတ်းၼႅင်ႇ ႁိမ်ဢဝ် ႁူင်ႇဢဝ် ဢုၵ်ႉၸႃႇၶဝ်ၼၼ်ႉယူႇသေလႄႈ ႁဵတ်းလွင်ႈတၢင်းဢၼ် ဢမ်ႇလီဢမ်ႇငၢမ်းၵႃႈၼႂ်း ၵူၼ်းမဵဝ်းမၼ်း တင်းလၢႆယူႇၼၼ်ႉလႄႈ မၼ်းတၵ်းလႆႈၶၢမ်ႇတၢင်းဢၼ် ဢဝ်တၢႆၼႂ်းဢပႅတ်ႈမၼ်းဢေႃႈ။-

19ၵူၺ်းၵႃႈ သူဢွၼ်ၵၼ်ထၢမ်လႄႈဝႃႈ၊ ပဵၼ်ၸိူဝ်ႉၼင်ႇႁိုဝ်။ လုၵ်ႈၸၢႆးတၵ်းလႆႈ ၶၢမ်ႇဢပႅတ်ႈပေႃႈဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။ ပေႃးလုၵ်ႈၸၢႆးၼၼ်ႉ ႁဵတ်းလွင်ႈတၢင်းဢၼ်ၸွမ်းၼင်ႇတြႃး၊ လွင်ႈတၢင်းဢၼ်ၸိုဝ်ႈဢၼ်ၸႂ်ႈလႄႈ ပႂ်ႉၸွမ်းထုင်းၽိင်ႈတြႃးၵဝ်ၵႃႈမီးယူႇ၊ ၵမ်ၵျၢင်ႉၸိူဝ်းၼၼ်ႉယူႇၸိုင်၊ မၼ်းတၵ်းလႆႈဢသၢၵ်ႈလိပ်း ဢမၢၼ်ႇၶၼ်ပဵၼ်ဢေႃႈ။-

20ဝီႉၺိၺ်ႇဢၼ်ၽိတ်းပိူင်ႈၼၼ်ႉ တၵ်းလႆႈၶၢမ်ႇတၢႆဢေႃႈ။ လုၵ်ႈၸၢႆးဢမ်ႇလႆႈၶၢမ်ႇဢပႅတ်ႈပေႃႈ၊ ပေႃႈဢမ်ႇလႆႈၶၢမ်ႇဢပႅတ်ႈလုၵ်ႈၸၢႆး။ ၵေႃႉဢၼ်ၸွမ်းတြႃးၼၼ်ႉ တၵ်းလႆႈၶၢမ်ႇဢၵျူဝ်းတၢင်းဢၼ် ႁဵတ်းၸွမ်းၼင်ႇတြႃး ၼၼ်ႉလႄႈ ၵေႃႉဢၼ်ဢမ်ႇၸွမ်းၼင်ႇတြႃးၼၼ်ႉ တၵ်းလႆႈၶၢမ်ႇဢပႅတ်ႈ တၢင်းဢၼ်ဢမ်ႇႁဵတ်းၸွမ်းၼင်ႇတြႃး ၼၼ်ႉဢေႃႈ။-

21ၼႂ်းဝႃႈၼၼ်သေၵေႃႈ ပေႃးၵေႃႉဢၼ်ဢမ်ႇတြႃးၼၼ်ႉ ဝႄႈပႅတ်ႈတူႉၸရိူၵ်ႈ ၵႃႈဢၼ်မၼ်းႁဵတ်းမႅၼ်ႈၼၼ်ႉ သေလႄႈပႂ်ႉၵမ်ပႂ်ႉၸွမ်း ထုင်းၽိင်ႈတြႃးၵဝ်ၵႃႈမီး ၼၼ်ႉလႄႈ ႁဵတ်းလွင်ႈတၢင်းဢၼ်တြႃး၊ လွင်ႈတၢင်း ဢၼ်ၸိုဝ်ႈဢၼ်ၸႂ်ႈၼၼ်ႉယူႇၸိုင်၊ မၼ်းတၵ်းဢမ်ႇလႆႈၶၢမ်ႇတၢႆလႄႈ တၵ်းလႆႈဢသၢၵ်ႈလိပ်း ဢမၢၼ်ႇၶၼ်ပဵၼ်ဢေႃႈ။-

22ဢမ်ႇလႆႈမၢတ်ႈတွင်း တူႉၸရိူၵ်ႈဢပႅတ်ႈ ၵႃႈဢၼ်ႁဵတ်းမႅၼ်ႈၼၼ်ႉယူႇၽၢႆႇၼိုင်ႈတင်းမၼ်း။ မၼ်းတၵ်းလႆႈဢသၢၵ်ႈလိပ်း တၢင်းဢၼ်သိုဝ်ႈတေႃႇ ဢၼ်မၼ်းႁဵတ်းမႅၼ်ႈၼၼ်ႉဢေႃႈ။-

23ၵဝ်မီးတၢင်းဢၼ်မူၼ်ႈပျေႃႇယူႇ ၵႃႈၼႂ်းတၢင်းဢၼ် ၵေႃႉဢၼ်ဢမ်ႇတြႃးၼၼ်ႉ တၢႆၼၼ်ႉႁိုဝ်။ ၵဝ်ယဵင်ႈၶႅၼ်းၶႂ်ႈႁႂ်ႈမၼ်း ဝၢႆႇၶိုၼ်းသေၵႃႈတီႈ သဵၼ်ႈတၢင်းမၼ်းၼၼ်ႉလႄႈ ဢသၢၵ်ႈလိပ်းယူႇၼၼ်ႉဢမ်ႇၸႂ်ႈႁိုဝ်။-

24ၼႂ်းဝႃႈၼၼ်သေၵေႃႈ ပေႃးၵေႃႉဢၼ်တြႃးၼၼ်ႉ ၽွၵ်ႈပျၢၼ်ႇၶိုၼ်းသေ ၵႃႈၼႂ်းတၢင်းဢၼ်သိုဝ်ႈတေႃႇမၼ်းၼၼ်ႉ လႄႈ ႁဵတ်းတူႉၸရိူၵ်ႈယူႇ၊ ၵမ်ၵျၢင်ႉၸွမ်းလွင်ႈတၢင်းဢၼ် လီႁင်ႈဢဵတ်ႇသဵတ်ႇၵႃႈဢၼ် ၵေႃႉဢၼ်ဢမ်ႇတြႃးၼၼ်ႉ ႁဵတ်းၸိူဝ်းၼၼ်ႉယူႇၸိုင် မၼ်းတၵ်းလႆႈဢသၢၵ်ႈလိပ်းႁိုဝ်။ ဢမ်ႇမၢတ်ႈတွင်းလွင်ႈတၢင်း ဢၼ်သိုဝ်ႈတေႃႇၵႃႈဢၼ်မၼ်းႁဵတ်းမႃး မိူဝ်ႈဢွၼ်တၢင်းၼၼ်ႉ လႃးလႃး။ မၼ်းတၵ်းလႆႈၶၢမ်ႇတၢႆ ၼႂ်းတၢင်းဢၼ်ပူၼ်ႉလိူဝ် ဢၼ်မၼ်းပူၼ်ႉလိူဝ်ၼၼ်ႉ ဢိၵ်ႇတင်း တၢင်းဢၼ်ၽိတ်းပိူင်ႈဢၼ်မၼ်း ၽိတ်းပိူင်ႈၼၼ်ႉဢေႃႈ။-

25ၵူၺ်းၵႃႈသူဢွၼ်ၵၼ်လၢတ်ႈလႄႈဝႃႈ၊ တၢင်းဢၼ် ထႃႇဝရႃႉၽြႃး ၸီႇယၢင်ႇၼၼ်ႉ ဢမ်ႇသိုဝ်ႈလီပဵင်းလီ၊ ဝႃႈၼင်ႇၼႆလူင်ပႄႇ။ မဵဝ်း ဢီႉသရေႇလႃႉ ဢိူၺ်း၊ ထွမ်ႇငိၼ်းတႃႉ။ တၢင်းဢၼ် ၵဝ်ၸီႇယၢင်ႇၼႆႉသိုဝ်ႈလီပဵင်းလီလႄႈ တၢင်းဢၼ်ၸီႇယၢင်ႇၼၼ်ႉ ပဵၼ်ဢၼ်ၵူတ်ႉဢၼ်ငွၵ်းဢမ်ႇၸႂ်ႈႁိုဝ်။-

26ပေႃးၵေႃႉဢၼ်တြႃး ၼၼ်ႉ ၽွၵ်ႈပျၢၼ်ႇၶိုၼ်းသေ ၵႃႈၼႂ်းတၢင်းဢၼ်သိုဝ်ႈတေႃႇမၼ်း ၼၼ်ႉလႄႈ ႁဵတ်းတူႉၸရိူၵ်ႈသေလႄႈ တၢႆၵွပ်ႈပိူဝ်ႈဢမူႉၼၼ်ႉၸိုင် မၼ်းတၵ်းလႆႈတၢႆၼႂ်းတူႉၸရိူၵ်ႈ ဢၼ်မၼ်းႁဵတ်းမႅၼ်ႈၼၼ်ႉဢေႃႈ။-

27မိူၼ်ၼင်ႇၼၼ် ပေႃးၵေႃႉဢၼ်ဢမ်ႇတြႃးၼၼ်ႉ ဝႄႈပႅတ်ႈသေ တူႉၸရိူၵ်ႈမၼ်း ဢၼ်မၼ်းႁဵတ်းမႅၼ်ႈၼၼ်ႉလႄႈ ႁဵတ်းလွင်ႈတၢင်းဢၼ်တြႃး၊ လွင်ႈတၢင်းဢၼ်ၸိုဝ်ႈဢၼ်ၸႂ်ႈယူႇၸိုင်၊ မၼ်းတၵ်းလႆႈ ၵႄႇသႄႇၼုၵ်ႈဢဝ် ဢသၢၵ်ႈမၼ်းဢေႃႈ။-

28ၵွပ်ႈပိူဝ်ႈ ဢၼ်မၼ်းၶႆႈၸႂ်ဝူၼ်ႉၸႂ်လႄႈ ပႄႇပႅတ်ႈဢပႅတ်ႈတၢင်းဢၼ်ပူၼ်ႉလိူဝ် ဢၼ်မၼ်းႁဵတ်းမႅၼ်ႈၸိူဝ်းၼၼ်ႉလႄႈ၊ မၼ်းတၵ်းလႆႈ ဢသၢၵ်ႈလိပ်းဢမၢၼ်ႇၶၼ်ပဵၼ်လႄႈ ၵၢင်းလွတ်ႈတင်း တၢင်းတၢႆဢေႃႈ။-

29ၼႂ်းဝႃႈၼၼ်သေၵေႃႈ မဵဝ်း ဢီႉသရေႇလႃႉ ဢွၼ်ၵၼ်လၢတ်ႈလႄႈဝႃႈ၊ တၢင်းဢၼ် ထႃႇဝရႃႉၽြႃး ၸီႇယၢင်ႇၼၼ်ႉ ဢမ်ႇသိုဝ်ႈလီပဵင်းလီ၊ ဝႃႈၼင်ႇၼႆလူင်ပႄႇ။ မဵဝ်း ဢီႉသရေႇလႃႉ ဢိူၺ်း၊ တၢင်းဢၼ်ၵဝ်ၸီႇယၢင်ႇၼၼ်ႉ သိုဝ်ႈလီပဵင်းလီဢမ်ႇၸႂ်ႈႁိုဝ်။ တၢင်းဢၼ်သူၸီႇယၢင်ႇၼၼ်ႉ ပဵၼ်ဢၼ်ၵူတ်ႉဢၼ်ငွၵ်းဢမ်ႇၸႂ်ႈႁိုဝ်။-

30ပိူဝ်ႈဢၼ် ပဵၼ်ၼင်ႇၼႆလႄႈ မဵဝ်း ဢီႉသရေႇလႃႉ ဢိူၺ်း၊ ၵဝ်တၵ်းၸီႇယၢင်ႇသူ ၸွမ်းလူၺ်ႈသဵၼ်ႈတၢင်းသူႁင်းၽႂ်ႁင်းမၼ်းၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။ သူဢွၼ်ၵၼ်ၶၢႆႉပုတ်ႈလႄႈ ၸုၼ်ႉပႅတ်ႈဢပႅတ်ႈ တၢင်းဢၼ်သူ ပူၼ်ႉလိူဝ်ၵႃႈမီးၼၼ်ႉသေတႃႉ။ ၼင်ႇၼၼ်လႄႈ တူႉၸရိူၵ်ႈဢပႅတ်ႈသူ တၵ်းဢမ်ႇပဵၼ်တီႈဢၼ် သူတိူဝ်ႉမႅၼ်ႈလႄႈလူမ်ႉၼၼ်ႉ။-

31သူဢွၼ်ၵၼ် ၸုၼ်ႉပႅတ်ႈဢပႅတ်ႈ တၢင်းဢၼ်ပူၼ်ႉလိူဝ် ၵႃႈဢၼ်သူပူၼ်ႉလိူဝ်ၼၼ်ႉ သေလႄႈ ပွင်ႁဵတ်းပွင်မႄးႁူဝ်ၸႂ်ဢၼ်မႂ်ႇ၊ ၸႂ်သၽေႃးဢၼ်မႂ်ႇတႃႉ။ မဵဝ်း ဢီႉသရေႇလႃႉ ဢိူၺ်း၊ သူၼႆႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မီးဢလူဝ်ႇၶႂ်ႈၶၢမ်ႇတၢႆၼင်ႇႁိုဝ်။-

32ၵဝ်ဢမ်ႇမီးတၢင်းဢၼ်မူၼ်ႈပျေႃႇ ၼႂ်းတၢင်းဢၼ် ၵေႃႉဢၼ်လႆႈၶၢမ်ႇတၢင်းတၢႆၼၼ်ႉ တၢႆၼၼ်ႉ၊ ပိူဝ်ႈၼႆလႄႈ ဢွၼ်ၵၼ်ၶၢႆႉပုတ်ႈလႄႈ ဢသၢၵ်ႈလိပ်းယူႇတႃႉ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။

← Chapter 17 Jump to: Chapter 19 →