Ezekiel 32 — Shan

1ၼႂ်းပီႊဢၼ် ထူၼ်ႈထိုင်သိပ်းပၢႆသွင်ပီႊ၊ လိူၼ်သိပ်းသွင်ဝၼ်းၼိုင်ႈ၊ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မႂ်းႁဵတ်းတၢင်းဢၼ်ပွင်ႉၶၢင်းပွင်ႉမိူၼ်ႇ ပုၼ်ႈ ၽႃႇရေႃး ၶုၼ်ႁေႃၶမ်း ဢေႇၵိပ်ႉတူႉ သေလႄႈ လၢတ်ႈတီႈမၼ်းလႄႈဝႃႈ၊ မႂ်းၼႆႉ ပဵၼ်ၸိူဝ်ႉၼင်ႇသၢင်ႇသီႈၼုမ်ႇ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်းလႄႈ ပဵၼ်ၸိူဝ်ႉၼင်ႇငိူၵ်ႈ ဢၼ်ယူႇၵႃႈၼႂ်းၼမ်ႉၼႂ်းၼွင်လႄႈ ယဵပ်ႇၶၢမ်ႈၼမ်ႉႁွင်ႈ ၼမ်ႉၵႄး တင်းလၢႆယူႇ၊ ဢဝ်တိၼ်ႁဵတ်းႁႂ်ႈၼမ်ႉတူင်ႉၼမ်ႉၼိုင်ယူႇ၊ ႁဵတ်းႁႂ်ႈၼမ်ႉၶုၼ်ႇ ၼမ်ႉဢူၼ်ယူႇၼၼ်ႉဢေႃႈ။-

3ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းပႃးမဵဝ်းၵူၼ်း တင်းလၢႆ ဢၼ်ၸူႉၵၼ်တုမ်ၵၼ်ၼၼ်ႉ သေလႄႈ ဢဝ်ၼႅင်ႈၶႄႁူမ်ႇသုမ်ႇမႂ်းလႄႈ ၶဝ်ၼၼ်ႉ တၵ်းဢွၼ်ၵၼ်တိုတ်ႉၸၼ်ဢဝ်မႂ်းပႃးမႃး ၵႃႈၼႂ်းၼႅင်ႈၵဝ် ၶႄၵဝ်ဢေႃႈ။-

4ၵဝ်တၵ်းဢဝ်မႂ်းတၢင်ႇဝႆႉ ၵႃႈၼိူဝ်ၵုင်းလႄႈ ပႅတ်ႈမႂ်းဝႆႉၵႃႈတီႈၼွၵ်ႈတီႈပၢင်ႇဢေႃႈ။ တၵ်းႁႂ်ႈၼူၵ်ႉၵၢင်ႁၢဝ် တင်းသဵင်ႈတင်းလူင် ၸပ်းၵႃႈၼိူဝ်မႂ်းလႄႈ ဢဝ်မႂ်းဢွႆႇပၼ်တူဝ်လိၼ်မိူင်း တင်းသဵင်ႈတင်းလူင် ဢိမ်ႇဢိမ်ႇတဵမ်တဵမ်ဢေႃႈ။-

5ၵဝ်တၵ်းဢဝ် ၼိူဝ်ႉမႂ်းၽႄႇသိူဝ်ႇဝႆႉ ၵႃႈၼိူဝ်လွႆၼိူဝ်ၵုင်းလႄႈ တၵ်းႁႂ်ႈပၢင်ႇႁူၺ်ႈၶူင်ႈႁူၺ်ႈမီးတဵမ်ဝႆႉ တင်းတူဝ်ယႂ်ႇတူဝ်လူင်မႂ်းဢေႃႈ။-

6ၵဝ်တၵ်းႁႂ်ႈ လိၼ်ယမ်းလူၺ်ႈလိူတ်ႈမႂ်း တေႃႇထိုင်ႁွတ်ႈ ပၢႆလွႆၸိၵ်းလွႆလႄႈ ၼမ်ႉႁွင်ႈၼမ်ႉၵႄးၸိူဝ်းၼၼ်ႉ တၵ်းဢွၼ်ၵၼ် လူၼ်ႉတဵမ်ဝႆႉတင်းမႂ်းဢေႃႈ။-

7မိူဝ်ႈဢၼ် ၵဝ်ႁႂ်ႈမႂ်းသုမ်းၸွမ်းၼၼ်ႉၸိုင်၊ ၵဝ်တၵ်းႁူမ်ႇသုမ်ႇၽႃႉၵၢင်ႁၢဝ်လႄႈ ႁႂ်ႈလၢဝ်တင်းလၢႆလပ်းသိင်ႇဢေႃႈ။ ၵဝ်တၵ်းႁႂ်ႈၽႃႉမိုတ်းတီႈၵၢင်ဝၼ်းလႄႈ လိူၼ်ၵေႃႈဢမ်ႇလႆႈပၼ် ဢၼ်လႅင်းမၼ်း။-

8ၵဝ်တၵ်းႁႂ်ႈႁိူၼ်းလႅင်းၵႃႈၼိူဝ်ၽႃႉၵၢင်ႁၢဝ် ၵႃႈမီးၼၼ်ႉ လပ်းသိင်ႇၵွပ်ႈပိူဝ်ႈမႂ်းလႄႈ ဢဝ်လပ်းသိင်ႇသုမ်ႇႁူမ်ႇမိူင်းမႂ်းဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

9မိူဝ်ႈဢၼ် ၵဝ်ႁႂ်ႈလွင်ႈဢၼ်မႂ်းလူႉလႅဝ်ၼၼ်ႉ ႁွတ်ႈထိုင်ၵႃႈၼႂ်း ၵူၼ်းၵူႈၸိူဝ်ႉၵူႈမဵဝ်း ၵႃႈၼႂ်းၵူႈသိုင်ႇၵူႈမိူင်း ဢၼ်မႂ်းဢမ်ႇတွၼ်ႉယၢမ်ႈႁူႉၼၼ်ႉၸိုင်၊ ၵဝ်တၵ်းႁႂ်ႈမဵဝ်းၵူၼ်းၼမ်ၼႃႇ မႆႈၸႂ်ႁွၼ်ႉၸႂ်ဢေႃႈ။-

10ၵဝ်တၵ်းႁႂ်ႈမဵဝ်းၵူၼ်းၼမ်ၼႃႇ ၵႂင်ၸႂ်ယုင်ႈၸႂ် ၵွပ်ႈပိူဝ်ႈမႂ်းလႄႈ ၶုၼ်ႁေႃၶမ်းၶဝ်ၼၼ်ႉ တၵ်းဢွၼ်ၵၼ်တူၵ်းၸႂ်ၼႃႇလူင်လၢင် ၵွပ်ႈပိူဝ်ႈမႂ်း ၼႂ်းမိူဝ်ႈဢၼ်ၵဝ် ဢဝ်လၢပ်ႇလႅဝ်းၵဝ်ငႃ ၵႃႈတီႈၽၢႆႇၼႃႈၶဝ်ၼၼ်ႉဢေႃႈ။ ၼႂ်းမိုဝ်ႉဝၼ်းဢၼ် မႂ်းတူၵ်းသုမ်းတူၵ်းၸွမ်းၼၼ်ႉ၊ ၶဝ်ၼၼ်ႉတၵ်းဢွၼ်ၵၼ် သၼ်ႇၶွၼ်းဝႆယူႇ ၵူႈၸူဝ်ႈၵူႈၵႅပ်ႉ ၵွပ်ႈပိူဝ်ႈ ဢသၢၵ်ႈၶဝ်ႁင်းၽႂ်ႁင်းမၼ်းဢေႃႈ၊ ဝႃႈၼင်ႇၼႆဢေႃႈ။-

11ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ လၢပ်ႇလႅဝ်းၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ တၵ်းႁွတ်ႈထိုင်ၵႃႈၼိူဝ်မႂ်းဢေႃႈ။-

12ၵဝ်တၵ်းႁႂ်ႈၵူၼ်းမႂ်း ဢၼ်ၼမ်ၼႃႇဢၼ်ဝႃႈ မဵဝ်းၵူၼ်းဢၼ်လီၵူဝ်လီႁႄ ၵႃႈမီးၼၼ်ႉ လူမ်ႉတၢႆလူၺ်ႈလၢပ်ႇလူၺ်ႈလႅဝ်း ၶဝ်ၸိူဝ်းဢၼ် ႁႅင်းယႂ်ႇၼႃႇၼၼ်ႉဢေႃႈ။ ၶဝ်ၼၼ်ႉ တၵ်းဢွၼ်ၵၼ် ၶျႃးမႃႇၼႃႉၸႂ်သုင် ဢေႇၵိပ်ႉတူႉ တူၵ်းတီႈတႅမ်ႇလႄႈ ၵူၼ်းဝၢၼ်ႈ ၵူၼ်းမိူင်းမၼ်းဢၼ်ၼမ်ၼႃႇ ၵႃႈမီးၼၼ်ႉ တၵ်းလႆႈၶၢမ်ႇတၢင်းဢၼ် ယႃႉၽဵဝ်ႈပႅတ်ႈဢေႃႈ။-

13ၵဝ်တၵ်းပႄႇၽဵဝ်ႈ တရိၵ်ႈသၢၼ်ႇ ၵႃႈဢၼ်ၵိၼ်ယူႇ ၵႃႈတီႈႁိမ်းၼမ်ႉဢၼ်ၼမ်ၼႃႇၼၼ်ႉ ၸိူဝ်းၼၼ်ႉပႅတ်ႈလႄႈ ၵမ်းလိုၼ်းတိၼ်ၵူၼ်း ဢိၵ်ႇတင်း တိၼ်တရိၵ်ႈသၢၼ်ႇ ဢမ်ႇလႆႈႁဵတ်းႁႂ်ႈၼမ်ႉၼၼ်ႉ ပဵၼ်ဢၼ်ၶုၼ်ႇဢၼ်ဢူၼ်။-

14မိူဝ်ႈၼၼ်ႉ ၵဝ်တၵ်းႁႂ်ႈၼမ်ႉၸိူဝ်းၼၼ်ႉ သႂ်လီလႄႈႁႂ်ႈၼမ်ႉႁွင်ႈၼမ်ႉၵႄးၸိူဝ်းၼၼ်ႉ လႆၵႂႃႇမိူၼ်ၸိူဝ်ႉၼင်ႇၼမ်ႉမၼ်းၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

15မိူဝ်ႈဢၼ် ၵဝ်ႁႂ်ႈမိူင်း ဢေႇၵိပ်ႉတူႉ ပဵၼ်မိူင်းဢၼ်သဵတ်ႇဢၼ်ယဵၼ် ဢၼ်လူႉဢၼ်လႅဝ်၊ မိူင်းဢၼ် ဢုၵ်ႉၸႃႇၵႃႈဢၼ်မီးၵႃႈၼႂ်းမၼ်းသဵင်ႈၵႂႃႇ မူတ်းၵႂႃႇယဝ်ႉၼၼ်ႉ၊ မိူဝ်ႈဢၼ်ၵဝ်ပၼ်တၢမ်ႇ တီႈၵူၼ်းဝၢၼ်ႈၵူၼ်းမိူင်း ၵႃႈမီးၼၼ်ႉၸိုင်၊ ၶဝ်တၵ်းလႆႈႁူႉလွင်ႈ ဢၼ် ၵဝ်ပဵၼ် ထႃႇဝရႃႉၽြႃးဢေႃႈ။-

16ဢၼ်ၼႆႉၸမ်ႉ၊ ပဵၼ်တၢင်းဢၼ်ပွင်ႉၶၢင်းပွင်ႉမိူၼ်ႇ ဢၼ်ၶဝ်တၵ်းလႆႈဢဝ် ပွင်ႉၶၢင်းပွင်ႉမိူၼ်ႇဢေႃႈ။ လုၵ်ႈယိင်းၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉၵေႃႈ တၵ်းဢွၼ်ၵၼ်ဢဝ် ပွင်ႉၶၢင်းပွင်ႉမိူၼ်ႇလႄႈ ဢွၼ်ၵၼ်ပွင်ႉၶၢင်းပွင်ႉမိူၼ်ႇ ပုၼ်ႈမိူင်း ဢေႇၵိပ်ႉတူႉ ဢိၵ်ႇတင်း ၵူၼ်းဝၢၼ်ႈၵူၼ်းမိူင်းမၼ်း ဢၼ်ၼမ်ၼႃႇ ၵႃႈမီးၼၼ်ႉဢေႃႈ။ ထႃႇဝရႃႉၽြႃး မီးဢမိင်ႉဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

17ၼႂ်းပီႊဢၼ် ထူၼ်ႈထိုင်သိပ်းပီႊ၊ သိပ်းပၢႆႁႃႈဝၼ်းၼၼ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

18လုၵ်ႈၵူၼ်းဢိူၺ်း၊ မႂ်းႁဵတ်းတၢင်းဢၼ်ပွင်ႉၶၢင်းပွင်ႉမိူၼ်ႇ ပုၼ်ႈၵူၼ်းမိူင်း ဢေႇၵိပ်ႉတူႉ ဢၼ်ၼမ်ၼႃႇၼၼ်ႉလႄႈ ဢဝ်ၶဝ်ဢၼ်ဝႃႈမၼ်းဢိၵ်ႇလူၺ်ႈၵၼ်တင်း လုၵ်ႈယိင်းၵူၼ်း တၢင်ႇၸိူဝ်ႉတၢင်ႇမဵဝ်း ဢၼ်ႁူင်ႁၢင်းၸိူဝ်းၼၼ်ႉ ၶျႃးတူၵ်းတေႃႇထိုင်ႁွတ်ႈ ၵႃႈတီႈတႂ်ႈ လိၼ် တီႈဢၼ်ၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းႁူးလိၼ်ၶုမ်လိၼ်ၸိူဝ်းၼၼ်ႉတႃႉ။-

19ဢၼ်မႂ်းတၵ်းလႆႈဢွၵ်ႇသူပ်းလႄႈဝႃႈၸမ်ႉ၊ မႂ်းၼႆႉယဵင်ႈၶႅၼ်းႁၢင်ႈလီလိူဝ်တွၼ်းၼႃႇသေၽူႈလႂ်။ မႂ်းလုၵ်ႉၵႂႃႇလႄႈ တူၵ်းတီႈယူႇ တီႈသဝ်းလူၺ်ႈၵၼ်တင်း ၶဝ်ၸိူဝ်းဢၼ်ဢမ်ႇၶၢမ်ႇတၢင်းဢၼ် ထိူဝ်ႁိမ်းၼၼ်ႉတႃႉ။-

20ၶဝ်တၵ်း လႆႈလူမ်ႉတၢႆလူၺ်ႈၵၼ်တင်း ၶဝ်ၸိူဝ်းဢၼ် တၢႆလူၺ်ႈလၢပ်ႇလူၺ်ႈလႅဝ်း ၼၼ်ႉလႄႈ မၼ်းလႆႈၶၢမ်ႇတၢင်းဢၼ် ဢဝ်ဢၢပ်ႈပၼ် တီႈလၢပ်ႇတီႈလႅဝ်းယဝ်ႉ။ ဢွၼ်ၵၼ်တိုတ်ႉၸၼ်ဢဝ်မၼ်း ဢိၵ်ႇတင်း ၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉတႃႉ။-

21ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇသေပိူၼ်ႈ ၸိူဝ်းၼၼ်ႉ တၵ်းဢွၼ်ၵၼ်တၵ်ႉလၢတ်ႈမၼ်း ဢိၵ်ႇလူၺ်ႈၵၼ်တင်း ၶဝ်ၸိူဝ်းဢၼ် ၸွႆႈထႅမ်မႃႉၸႃႉမၼ်းၸိူဝ်းၼၼ်ႉ ၵႃႈၼႂ်းမိူင်းမရၼႃႉၼၼ်ႉဢေႃႈ။ ၶဝ်ၵေႃႈ ဢွၼ်ၵၼ်လူင်းၵႂႃႇယဝ်ႉ။ ၶဝ်ဢၼ်ဝႃႈ ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ထိူဝ်ႁိမ်းလႄႈ လႆႈတၢႆလူၺ်ႈလၢပ်ႇလူၺ်ႈလႅဝ်းၼၼ်ႉ ဢွၼ်ၵၼ်မီးယူႇၵႃႈတီႈၼၼ်ႈဢေႃႈ။-

22ဢႃႇသူႉရီႉ ဢိၵ်ႇတင်း မူႇၽုင်မုၵ်ႉၸိူဝ်းဢၼ်ၸပ်းၸွမ်းမၼ်း ၵႃႈမီးၼၼ်ႉၵေႃႈ ဢွၼ်ၵၼ်မီးၵႃႈတီႈၼၼ်ႈဢေႃႈ။ ပႃႇႁဵဝ်ႈမၼ်း ၸိူဝ်းၼၼ်ႉမီးယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်းလႄႈ ၶဝ်ၵႃႈမီးၼၼ်ႉ ပဵၼ်ဢၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။-

23ပႃႇႁဵဝ်ႈၶဝ်ၼၼ်ႉ မီးတၢင်းဢၼ်ၸႅၼ်ႇယႆၵၼ်ဝႆႉယူႇ ၵႃႈတီႈႁိမ်းပဵမ်ႉၶုမ်ပဵမ်ႉလုၵ်းလႄႈ မူႇၽုင်မုၵ်ႉၸိူဝ်းမၼ်း မီးယူႇၵႃႈတီႈႁိမ်းႁွမ်း လဵပ်ႈႁွပ်ႈပႃႇႁဵဝ်ႈမၼ်းဢေႃႈ။ ၶဝ်ဢၼ်ပဵၼ်ၵေႃႉဢၼ်ၸၢင်ႈႁႂ်ႈပိူၼ်ႈၵူဝ်ႁႄၶဝ် ၵႃႈၼႂ်းတီႈဢၼ် ၶဝ်ၸိူဝ်းဢၼ်ဢသၢၵ်ႈလိပ်းယူႇ သဝ်းၼၼ်ႉ ၵႃႈမီးၼၼ်ႉ ဢွၼ်ၵၼ်လူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။-

24ၵႃႈတီႈၼၼ်ႈ ဢေႇလမ်ႇ ဢိၵ်ႇတင်း ၵူၼ်းမၼ်းဢၼ်ၼမ်ၼႃႇၼၼ်ႉ ဢွၼ်ၵၼ်မီးယူႇၵႃႈတီႈ လဵပ်ႈႁွပ်ႈပႃႇႁဵဝ်ႈမၼ်းလႄႈ ၶဝ်ၵႃႈမီးၼၼ်ႉ လူမ်ႉတၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ၶဝ်ဢၼ်ပဵၼ်ၵေႃႉဢၼ် ၸၢင်ႈႁႂ်ႈပိူၼ်ႈၵူဝ်ႁႄၶဝ် ၵႃႈၼႂ်းတီႈဢၼ် ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉ ပဵၼ်ၵေႃႉဢၼ် ဢမ်ႇၶၢမ်ႇတၢင်းဢၼ်ထိူဝ်ႁိမ်းသေလႄႈ လႆႈလူင်းၵႂႃႇၵႃႈတီႈတႂ်ႈလိၼ်လႄႈ လႆႈၶၢမ်ႇတၢင်းဢၼ်ဢူၵ်းဢၢႆ လူၺ်ႈၵၼ်တင်း ၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းႁူးလိၼ်ၶုမ်လိၼ်ၼၼ်ႉဢေႃႈ။-

25ၶဝ်ဢဝ်တီႈၼွၼ်းဝႆႉ ၵႃႈၼႂ်းၵၢင်ၶဝ် ၸိူဝ်းဢၼ်လႆႈၶၢမ်ႇတၢႆၼၼ်ႉ ပုၼ်ႈမၼ်းဢိၵ်ႇတင်း ၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉလႄႈ ပႃႇႁဵဝ်ႈမၼ်းၸိူဝ်းၼၼ်ႉ မီးယူႇၵႃႈတီႈႁိမ်းႁွမ်းလဵပ်ႈႁွပ်ႈမၼ်းဢေႃႈ။ ၶဝ်ၵႃႈမီးၼၼ်ႉ ပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ တၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ၶဝ်ၸၢင်ႈႁႂ်ႈပိူၼ်ႈၵူဝ်ႁႄၶဝ် ၵႃႈၼႂ်းတီႈဢၼ်ၶဝ်ၸိူဝ်းဢၼ် ဢသၢၵ်ႈလိပ်းၼၼ်ႉယူႇသဝ်းလႄႈ၊ ၶဝ်လႆႈၶၢမ်ႇတၢင်းဢၼ်ဢူၵ်းဢၢႆ လူၺ်ႈၵၼ်တင်းၶဝ်ၸိူဝ်းဢၼ်လူင်းၵႂႃႇ ၵႃႈၼႂ်းႁူးလိၼ်ၶုမ်လိၼ်ၼၼ်ႉဢေႃႈ။ မၼ်းတူၵ်းတီႈယူႇ တီႈသဝ်း လူၺ်ႈၵၼ်တင်းၶဝ်ၸိူဝ်းဢၼ် လႆႈၶၢမ်ႇတၢႆၼၼ်ႉဢေႃႈ။-

26မႄႇသႅၵ်ႉ ဢိၵ်ႇတင်း တူႉပလႃႉ တင်းၵူၼ်းမၼ်းဢၼ်ၼမ်ၼႃႇ ၵႃႈမီးၼၼ်ႉ မီးၵႃႈတီႈၼၼ်ႈလႄႈ ပႃႇႁဵဝ်ႈမၼ်းၸိူဝ်းၼၼ်ႉ မီးယူႇ ၵႃႈတီႈႁိမ်းႁွမ်းလဵပ်ႈႁွပ်ႈမၼ်းဢေႃႈ။ ၶဝ်ၵႃႈမီးၼၼ်ႉ ပဵၼ်ၵေႃႉဢၼ် ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ တၢႆလူၺ်ႈလၢပ်ႇလူၺ်ႈလႅဝ်းဢေႃႈ။ ၶဝ်ၼၼ်ႉ ပဵၼ်ၵေႃႉဢၼ်ႁႂ်ႈပိူၼ်ႈၵူဝ်ႁႄၶဝ် ၵႃႈၼႂ်းတီႈဢၼ် ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉဢေႃႈ။-

27ၶဝ်ၼၼ်ႉတၵ်းလႆႈဢွၼ်ၵၼ် ၼွၼ်းယူႇလူၺ်ႈၵၼ်တင်း ၵူၼ်းယႂ်ႇၵူၼ်းလူင် ဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ လႆႈလူမ်ႉတၢႆလႄႈ ပႃးဢဝ်လၢၵ်ႈၼၢၵ်ႈတိုၵ်းသိုၵ်းၶဝ်ယူႇ သေလႄႈ လူင်းၵႂႃႇၵႃႈၼႂ်းမိူင်းမရၼႃႉလႄႈ ဢဝ်လၢပ်ႇၶဝ်လႅဝ်းၶဝ်မွၼ်ႁူဝ်ၶဝ်ယူႇ၊ ဢပႅတ်ႈၶဝ်တႄႇယူႇၵႃႈၼိူဝ်ၶဝ်ၼၼ်ႉ ဢမ်ႇၸႂ်ႈႁိုဝ်။ ၶဝ်ၼၼ်ႉ ပဵၼ်ၵေႃႉဢၼ် ၸၢင်ႈႁႂ်ႈပိူၼ်ႈၵူဝ်ႁႄ ၵႃႈၼႂ်းတီႈဢၼ် ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉဢေႃႈ။-

28မႂ်းၵေႃႈ တၵ်းလႆႈႁၵ်းလႅဝ် ၵႃႈၼႂ်းၵၢင်ၶဝ်ၸိူဝ်းဢၼ် ၶၢမ်ႇတၢင်းဢၼ်ထိူဝ်ႁိမ်းၼၼ်ႉလႄႈ ၼွၼ်းယူႇလူၺ်ႈၵၼ် တင်းၶဝ်ၸိူဝ်းဢၼ်တၢႆ လူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ။-

29ဢေႇတုမ်ႇ ဢိၵ်ႇတင်း ၶုၼ်ႁေႃၶမ်းမၼ်းတင်းလၢႆ တင်းမူးမၢတ်ႈၽွင်းမိူင်းမၼ်းၵႃႈမီး ဢၼ်ပႃးဢဝ်တင်းၶူဝ်းၶဝ် သေလႄႈ တူၵ်းတီႈယူႇတီႈသဝ်းလူၺ်ႈၵၼ်တင်း ၶဝ်ၸိူဝ်းဢၼ် လႆႈၶၢမ်ႇတၢႆၸိူဝ်းၼၼ်ႉၵေႃႈ လႆႈဢွၼ်ၵၼ်မီးယူႇၵႃႈတီႈၼၼ်ႈလႄႈ လႆႈၼွၼ်းယူႇလူၺ်ႈၵၼ်တင်း ၶဝ်ၸိူဝ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉ ဢိၵ်ႇတင်း ၶဝ်ၸိူဝ်းဢၼ် လူင်းၵႂႃႇၵႃႈၼႂ်းႁူးလိၼ် ၶုမ်လိၼ်ၼၼ်ႉဢေႃႈ။-

30ၶုၼ်မိူင်းတၢင်းႁွင်ႇၵႃႈမီး၊ ၶုၼ် ၸီႉတုမ်ႇ ၵႃႈမီး ဢၼ်လူင်းၵႂႃႇလူၺ်ႈၵၼ်တင်း ၶဝ်ၸိူဝ်းဢၼ်လႆႈၶၢမ်ႇတၢႆၼၼ်ႉ ဢွၼ်ၵၼ်မီး ၵႃႈတီႈၼၼ်ႈဢေႃႈ။ ၶဝ်လႆႈၶၢမ်ႇတၢင်းဢၼ်ဢူၵ်းဢၢႆ ၵွပ်ႈပိူဝ်ႈ တၢင်းၵူဝ်တၢင်းႁႄ ဢၼ်တၼ်းၶူဝ်းၶဝ် ႁႂ်ႈပဵၼ်ၼၼ်ႉယဝ်ႉ။ ၶဝ်ပဵၼ်ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းလႄႈ လႆႈၼွၼ်းယူႇလူၺ်ႈၵၼ်တင်း ၶဝ်ၸိူဝ်းဢၼ် တၢႆလူၺ်ႈလၢပ်ႇလူၺ်ႈလႅဝ်းၸိူဝ်းၼၼ်ႉ လႄႈ လႆႈဢွၼ်ၵၼ် ၶၢမ်ႇတၢင်းဢၼ်ဢူၵ်းဢၼ်ဢၢႆ လူၺ်ႈၵၼ်တင်းၶဝ်ၸိူဝ်းဢၼ် လူင်းၵႂႃႇ ၵႃႈၼႂ်းႁူးလိၼ်ၶုမ်လိၼ်ၼၼ်ႉယူႇဢေႃႈ။-

31ၶုၼ် ၽႃႇရေႃး တၵ်းႁၼ်ၶဝ်ၼၼ်ႉလႄႈ ၸႂ်မၼ်းတၵ်းမီးတၢင်းဢၼ်သၢၵ်ႈသႃႇ ၶႅၼ်းမႃး ၵွပ်ႈပိူဝ်ႈ ၵူၼ်းမၼ်းဢၼ်ၼမ်ၼႃႇ ၵႃႈမီးၼၼ်ႉလႄႈ ၽႃႇရေႃး ဢိၵ်ႇတင်း ပူဝ်ႇပႃႇမၼ်း တင်းသဵင်ႈတင်းလူင် လႆႈၶၢမ်ႇတၢႆလူၺ်ႈလၢပ်ႇလူၺ်ႈလႅဝ်းဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

32ပိူဝ်ႈဢၼ် ၵဝ်ႁဵတ်းႁႂ်ႈပိူၼ်ႈၵူဝ်ႁႄမၼ်း ၵႃႈၼႂ်းတီႈဢၼ်ၶဝ်ၸိူဝ်းဢၼ် ဢသၢၵ်ႈလိပ်းယူႇသဝ်းၼၼ်ႉလႄႈ မၼ်းဢၼ်ဝႃႈ ၶုၼ် ၽႃႇရေႃး ဢိၵ်ႇတင်း ၵူၼ်းမၼ်းဢၼ်ၼမ်ၼႃႇၵႃႈမီးၼၼ်ႉ တၵ်းလႆႈဢွၼ်ၵၼ်ၼွၼ်းယူႇ ၵႃႈၼႂ်းၵၢင်ၶဝ်ၸိူဝ်းဢၼ် ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉ လူၺ်ႈၵၼ်တင်းၶဝ်ၸိူဝ်းဢၼ် လႆႈၶၢမ်ႇတၢႆ လူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။