Ezekiel 21

Shan

← Chapter 20 Jump to: Chapter 22 →

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

2လုၵ်ႈၵူၼ်းဢိူၺ်း၊ မႂ်းဝၢႆႇၼႃႈမႂ်းၸူးဝဵင်း ယေႇရူႉသလႅမ်ႇ ယူႇ သေလႄႈ ဢွၵ်ႇသူပ်းဝႃႈ ယူႇၽၢႆႇၼိုင်ႈတင်း ထႃႇၼႃႉတီႈဢၼ်မူတ်းၸၢင်ႇ တင်းလၢႆလႄႈ ႁေႃးလၢတ်ႈယူႇၽၢႆႇၼိုင်ႈ တင်းမိူင်း ဢီႉသရေႇလႃႉ တႃႉ။-

3မႂ်းလၢတ်ႈတီႈ မိူင်း ဢီႉသရေႇလႃႉ လႄႈဝႃႈ၊ ထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး။ ၵဝ်ႁဵတ်းတၢင်းဢၼ်ၶတ်းၵၼ်တင်းမႂ်း သေလႄႈ ဢဝ်လၢပ်ႇၵဝ်လႅဝ်းၵဝ် ထွတ်ႇဢွၵ်ႇသေ ၵႃႈၼႂ်းၵပ်းမၼ်းလႄႈ ပႄႇၽဵဝ်ႈၵေႃႉဢၼ်တြႃး ၵေႃႉဢၼ်ဢမ်ႇတြႃးပႅတ်ႈသေ ၵႃႈတီႈမႂ်း ဢေႃႈ။-

4ၼင်ႇၼၼ်လႄႈ ၵွပ်ႈပိူဝ်ႈဢၼ် ၵဝ်တၵ်း ပႄႇၽဵဝ်ႈၵေႃႉဢၼ်တြႃး ၵေႃႉဢၼ်ဢမ်ႇတြႃးပႅတ်ႈသေ ၵႃႈတီႈမႂ်းလႄႈ လၢပ်ႇလႅဝ်းၵဝ် တၵ်းဢွၵ်ႇသေၵႃႈၼႂ်းၵပ်းမၼ်းလႄႈ ယူႇၽၢႆႇၼိုင်ႈတင်းသတ်ႉတဝႃႇ တင်းသဵင်ႈတင်းလူင် ဢဝ်ၵႃႈတီႈၽၢႆႇတၢင်းၸၢၼ်း တေႃႇထိုင်ႁွတ်ႈၽၢႆႇတၢင်းႁွင်ႇၼၼ်ႉဢေႃႈ။-

5သတ်ႉတဝႃႇ တင်းသဵင်ႈတင်းလူင် တၵ်းလႆႈႁူႉလွင်ႈဢၼ်ၵဝ် ထႃႇဝရႃႉၽြႃး ဢဝ်လၢပ်ႇလႅဝ်းၵဝ်ဢွၵ်ႇသေ ၵႃႈၼႂ်းၵပ်းမၼ်း ၼၼ်ႉဢေႃႈ။ လၢပ်ႇလႅဝ်းၼၼ်ႉ ၵမ်းလိုၼ်းဢမ်ႇလႆႈၶိုၼ်းၶဝ်ႈ ၵႃႈၼႂ်းၵပ်းမၼ်း။-

6ပိူဝ်ႈဢၼ်ပဵၼ်ၼင်ႇၼႆလႄႈ လုၵ်ႈၵူၼ်းဢိူၺ်း၊ မီးတၢင်းဢၼ်ဢႅဝ်ႁၵ်းယူႇ သေလႄႈ ႁဵတ်းသဵင်ဢၼ်ၶၢင်းၶီၶၢင်းၽၢၼ်ယူႇတႃႉ။ မီးတၢင်းဢၼ်ႁူဝ်ၸႂ်တႅၵ်ႇလႅဝ်ယူႇ သေလႄႈ ႁဵတ်းသဵင်ဢၼ်ၶၢင်းၶီၶၢင်းၽၢၼ်ယူႇ သိုဝ်ႈၼႃႇတႂ်ႈတႃၶဝ်တႃႉ။-

7မိူဝ်ႈဢၼ်ၶဝ်ထၢမ်တီႈမႂ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၶၢင်းၶီၶၢင်းၽၢၼ်ယူႇ၊ ဝႃႈၼင်ႇၼႆၼၼ်ႉၸိုင်၊ မႂ်းၶိုၼ်းလၢတ်ႈလႄႈဝႃႈ၊ ၵွပ်ႈပိူဝ်ႈသတၢင်းသဵင်ၶၢဝ်ႇၼၼ်ႉဢေႃႈ။ ဢမူႉၸမ်မႃးယဝ်ႉ။ ႁူဝ်ၸႂ်ၵႃႈမီး တၵ်းၸိူမ်ႈယၢႆႈၵႂႃႇလႄႈ ႁႅင်းမိုဝ်းၵႃႈမီး တၵ်းဢူၼ်ႈၵႂႃႇ ယွမ်းၵႂႃႇဢေႃႈ။ ၸႂ်ၵႃႈမီးတၵ်းလူႉၵႂႃႇလႄႈ ႁူဝ်ၶဝ်ႇၵႃႈမီး တၵ်းၸိူမ်ႈပဵၼ်ၼမ်ႉၵႂႃႇဢေႃႈ။ တူၺ်းလူး။ ဢမူႉၸမ်မႃးယဝ်ႉ လႄႈ တၵ်းလႆႈပျေႉၸုမ်ႇဢေႃႈ ၸဝ်ႈထႃႇဝရႃႉၽြႃး မီးဢမိင်ႉဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

8လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

9လုၵ်ႈၵူၼ်းဢိူၺ်း၊ မႂ်းႁဵတ်းပရေႃးၽႅတ်ႈလႄႈဝႃႈ၊ ထႃႇဝရႃႉၽြႃး မီးဢမိင်ႉၸမ်ႉ၊ လၢပ်ႇၸဝ်ႈၼၼ်ႉ လၢပ်ႇၸဝ်ႈၼၼ်ႉ ပဵၼ်ဢၼ်ၽၢႆၼႃႇလူင်လၢင်ယဝ်ႉ။ ပဵၼ်ဢၼ်လပ်ႉပွတ်ႈသီထၼ်ႈပေႃးလိူမ်ႈ မၢပ်ႈမႅပ်ႈၼႃႇလူင်လၢင်ယဝ်ႉ။-

10ပဵၼ်ဢၼ်ၽၢႆၼႃႇ ႁႂ်ႈလႆႈယဵင်ႈၶႅၼ်း ၶႃႈၽၼ်းဢဝ်တၢႆလႄႈ ပဵၼ်ဢၼ်လပ်ႉပွတ်ႈသီ ထၼ်ႈပေႃးမၢပ်ႈမႅပ်ႈယူႇ မိူၼ်ၸိူဝ်ႉၼင်ႇၽႃႉမႅပ်ႈ ၼၼ်ႉယဝ်ႉ။ ႁဝ်းတၵ်းလႆႈႁဵတ်း တၢင်းဢၼ်သႂၢင်ႇသိူဝ်းႁိုဝ်။ ၵၼ်းႁွၵ်ႇရႃႇၸႃႉ လုၵ်ႈၸၢႆးၵဝ်ၼၼ်ႉ ၸၢင်ႈႁဵတ်းဢမ်ႇပေႃးၼင်ႇႁိုဝ် တီႈမႆႉၸိင် တင်းသဵင်ႈတင်းလူင်ဢေႃႈ။-

11ဢဝ်ဢၢပ်ႈဝႆႉ ႁႂ်ႈလႆႈလပ်ႉပွတ်ႈသီ ပုၼ်ႈဢၼ်တၵ်းယိပ်းတၵ်းၵမ်ယဝ်ႉ။ လၢပ်ႇလႅဝ်းၼၼ်ႉ ပဵၼ်ဢၼ်ၽၢႆၼႃႇလႄႈ လပ်ႉပွတ်ႈသီထၼ်ႈပေႃး လိူမ်ႈမၢပ်ႈမႅပ်ႈၼႃႇလူင်လၢင် ႁႂ်ႈလႆႈဢၢပ်ႈပၼ် ၵႃႈၼႂ်းမိုဝ်း ၵေႃႉဢၼ်ၶႃႈၽၼ်း ဢဝ်တၢႆၼၼ်ႉဢေႃႈ။-

12လုၵ်ႈၵူၼ်းဢိူၺ်း၊ ႁွင်ႉႁႆႈႁွင်ႉသႅၼ်ႇတႃႉ။ လွင်ႈမၼ်းၸမ်ႉ တၵ်းႁွတ်ႈထိုင်ၵႃႈၼိူဝ်ၵူၼ်းၵဝ်တင်းလၢႆလႄႈ ၵႃႈၼိူဝ်လုၵ်ႈၸၢႆး ၶုၼ် ဢီႉသရေႇလႃႉ တင်းသဵင်ႈတင်းလူင်ၵေႃႈ တၵ်းႁွတ်ႈထိုင်ဢေႃႈ။ ၶဝ်ဢိၵ်ႇလူၺ်ႈၵၼ်တင်းၵူၼ်းၵဝ် တင်းလၢႆၼၼ်ႉ တၵ်းလႆႈ ၶၢမ်ႇတၢင်းဢၼ်ဢဝ်ဢၢပ်ႈပၼ် တီႈလၢပ်ႇတီႈလႅဝ်းဢေႃႈ။ ပိူဝ်ႈၼႆလႄႈ တူပ်းယႅၼ်ႉၶႃမႂ်းတႃႉ။-

13ပဵၼ်လွင်ႈတၢင်းဢၼ် ၸႅတ်ႈထၢမ်ၸၢမ်းတူၺ်းဢေႃႈ။ ပေႃးၵၼ်းႁွၵ်ႇႁဵတ်းဢမ်ႇပေႃးၼင်ႇႁိုဝ်ယူႇၸိုင် တၵ်းပဵၼ်ၸိူဝ်ႉၼင်ႇႁိုဝ်။တၵ်းသုမ်းတၵ်းၸွမ်းဢေႃႈ၊ ဝႃႈၼင်ႇၼႆလႄႈ ၸဝ်ႈထႃႇဝရႃႉၽြႃး မီးဢမိင်ႉဢေႃႈ။-

14ပိူဝ်ႈဢၼ်ပဵၼ်ၼင်ႇၼႆလႄႈ၊ လုၵ်ႈၵူၼ်းဢိူၺ်း၊ ႁဵတ်းပရေႃးၽႅတ်ႈလႄႈ တူပ်းမိုဝ်းမႂ်းတႃႉ။ ႁႂ်ႈလၢပ်ႇလႅဝ်းၼၼ်ႉ ပဵၼ်သွင်မၢၵ်ႈ သၢမ်မၢၵ်ႈၵႂႃႇသေၵမ်းလူၺ်ႈ။ ပဵၼ်လၢပ်ႇလႅဝ်းၶဝ်ၸိူဝ်းဢၼ်ၶၢမ်ႇတၢႆ၊ လၢပ်ႇလႅဝ်းတၢင်းဢၼ်ဢဝ် ၵေႃႉဢၼ်ယႂ်ႇၼႃႇလူင်လၢင်ၼၼ်ႉ တၢႆလႄႈ ၶဝ်ႈႁွတ်ႈၶဝ်ႈထိုင် ၵႃႈၼႂ်းလုၵ်းတၢင်းၼႂ်းဢေႃႈ။-

15ၵဝ်ႁႂ်ႈၽေးလၢပ်ႇ ႁွတ်ႈထိုင်ၵႃႈတီႈႁူးၽၵ်းတူဝဵင်းၵႃႈမီး ႁႂ်ႈႁူဝ်ၸႂ်ၶဝ်ၸိူမ်ႈယၢႆႈၵႂႃႇလႄႈ ႁႂ်ႈလွင်ႈတၢင်းဢၼ်ၶဝ်ၶီႈလိုတ်း လႄႈလူမ်ႉၼၼ်ႉ ယႂ်ႇၽႄႈၼမ်ၵိုၼ်းမႃးယဝ်ႉ။ ဢလူဝ်း။ လၢပ်ႇလႅဝ်းမီးတၢင်းဢၼ် မၢပ်ႈမႅပ်ႈ ယူႇမိူၼ်ၸိူဝ်ႉၼင်ႇ ၽႃႉမႅပ်ႈၼၼ်ႉဢေႃႈ။ မီးတၢင်းဢၼ်လပ်ႉပွတ်ႈသီဝႆႉ ပုၼ်ႈဢၼ်တၵ်းၶႃႈၽၼ်းဢဝ်တၢႆဢေႃႈ။-

16မႂ်းၸူႉတုမ်ပဵၼ်ဢၼ်လဵဝ်ၵူၺ်းတႃႉ။ တႅပ်းၽၼ်းၵႃႈတီႈၽၢႆႇၶႂႃတႃႉ။ တႅပ်းၽၼ်းၵႃႈတီႈၽၢႆႇသၢႆႉဢိၵ်ႇတင်း ၵႃႈတီႈၽၢႆႇၵႃႈဢၼ်မႂ်းဝၢႆႇၼႃႈ ၵႂႃႇၸူးၼၼ်ႉတႃႉ။-

17ၵဝ်ၵေႃႈတၵ်းဢဝ်မိုဝ်းၼင်ႇၵၼ် တူပ်းၵၼ်လႄႈ ႁႂ်ႈဢၢႆႁႅင်းတေႃးသႃႉ တၢင်းၸႂ်မႆႈၵဝ်ထၢတ်ႇယဵၼ်ဢေႃႈ။ ၵဝ်ထႃႇဝရႃႉၽြႃး မီးဢမိင်ႉၸိူဝ်ႉၼင်ႇၼၼ်ယဝ်ႉ။

18လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊-

19လုၵ်ႈၵူၼ်းဢိူၺ်း၊ မႂ်းမၵ်းၶၢၼ်းဝႆႉသဵၼ်ႈတၢင်း တီႈဢၼ်လၢပ်ႇလႅဝ်းၶုၼ်ႁေႃၶမ်း ပႃႇပူႉလုၼ်ႇ တၵ်းမႃးၼၼ်ႉ သွင်သဵၼ်ႈတႃႉ။ သဵၼ်ႈတၢင်းသွင်သဵၼ်ႈၼၼ်ႉ တၵ်းလႆႈဢွၵ်ႇၵႃႈၼႂ်းမိူင်း မိူင်းၼိုင်ႈဢေႃႈ။ ႁဵတ်းမိုဝ်းဢၼ်ၸီႉၼႄယူႇၼၼ်ႉဝႆႉ ၵႃႈတီႈ ႁူဝ်တၢင်းသူပ်း တၢင်းဢၼ်ၵႂႃႇၸူး ၵႃႈတီႈဝဵင်းၼၼ်ႉတႃႉ။-

20မၵ်းၶၢၼ်းဝႆႉ သဵၼ်ႈတၢင်းတီႈဢၼ်လၢပ်ႇလႅဝ်း တၵ်းၵႂႃႇႁွတ်ႈၵႂႃႇထိုင် ၵႃႈတီႈဝဵင်း ရပ်ႉပႃႇ မိူင်း ဢမ်ႇမုၼ်ႇ ဢိၵ်ႇတင်း ၵႃႈတီႈဝဵင်း ယေႇရူႉသလႅမ်ႇ ဢၼ်မၼ်ႈၶိူင်ႇ ၵႃႈၼႂ်းမိူင်း ယူႉတႃႉ ၼၼ်ႉတႃႉ။-

21ၶုၼ်ႁေႃၶမ်း ပႃႇပူႉလုၼ်ႇ ၼၼ်ႉ ၸုၵ်းယူႇၵႃႈတီႈတၢင်းၽႄ တၢင်းႁွမ်း ၵႃႈတီႈႁူဝ်တၢင်းသွင်သဵၼ်ႈ ႁႂ်ႈလႆႈလူမၼ်းတူၺ်းမၼ်း လႄႈ ဢဝ်ပိုၼ်ၵၢင်ႇတင်းလၢႆ ၽၢဝ်ႇတူၵ်းပိုၼ်တူၵ်းယူႇဢေႃႈ။ မၼ်းတွင်ႈထၢမ်တီႈရုၵ်ႈထူႉ တေႇရပ်ႉ တင်းလၢႆလႄႈ လူတူၺ်းတပ်းပွတ်ႇ ႁူဝ်ၸႂ်ယူႇဢေႃႈ။-

22ၵႃႈတီႈၽၢႆႇၶႂႃမၼ်းၼၼ်ႉ မၼ်းလူမၼ်းတူၺ်းမၼ်းပုၼ်ႈ ဝဵင်း ယေႇရူႉသလႅမ်ႇ ႁႂ်ႈလႆႈဢဝ်တုမ်သၢၵ်ႇတွင်ႈတင်းလၢႆ ႁွႆႈဝႆႉ၊ ႁႂ်ႈလႆႈ ၽုၺ်ႇသူပ်းဢႃႈသူပ်း ႁဵတ်းသဵင်ဢၼ် တိုၵ်းသိုၵ်းႁွင်ႉသႅၼ်ႇ၊ ႁႂ်ႈလႆႈႁဵတ်းသဵင်ႁွင်ႉပၢဝ်ႇႁွင်ႉသေႃႇ၊ ႁႂ်ႈလႆႈဢဝ်တုမ်သၢၵ်ႇတွင်ႈႁွႆႈဝႆႉယူႇ ၽၢႆႇၼိုင်ႈတင်းၽၵ်းတူဝဵင်း၊ ႁႂ်ႈလႆႈၵေႃႇႁဵတ်းတဵင် ႁဵတ်းတႅၼ်ႈလိၼ်တေးလိၼ်၊ ႁႂ်ႈလႆႈႁဵတ်းတိူၵ်ႈတီႈတိုၵ်းသိုၵ်းဢေႃႈ။-

23ၵူၺ်းၵႃႈ ၶဝ်ၸိူဝ်းဢၼ်ၶၢမ်ႇၵိၼ်ႇသဵတ်ႈၸႃႇ တီႈၶဝ်ၼၼ်ႉ တၵ်းဢွၼ်ၵၼ်မၢတ်ႈတၢင်းဢၼ် လူမၼ်းတူၺ်းမၼ်းၼၼ်ႉ ပဵၼ် ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်လႄႈ တူဝ်မၼ်းၸမ်ႉ၊ တၵ်းၶုၵ်းၸႂ်လႆႈၶႆႈၸႂ်ထူပ်းဢပႅတ်ႈ ဢၼ်ၶဝ်ၽိတ်းပိူင်ႈၼၼ်ႉ ယူႇႁႂ်ႈလႆႈ တီႉဢဝ်ၶဝ်ယူႇဢေႃႈ။-

24ပိူဝ်ႈဢၼ် ပဵၼ်ၼင်ႇၼၼ်လႄႈ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵွပ်ႈပိူဝ်ႈဢၼ်သူ ႁႂ်ႈပိူၼ်ႈၶုၵ်းၸႂ်လႆႈၶႆႈၸႂ်ထူပ်းဢပႅတ်ႈ တူႉၸရိူၵ်ႈသူ ၼႂ်းလွင်ႈဢၼ် လွင်ႈတၢင်းဢၼ်သူပူၼ်ႉလိူဝ်ၸိူဝ်းၼၼ်ႉ မီးတၢင်းဢၼ်ၽုၺ်ႇဢွၵ်ႇၼႄပျႃးယူႇ တေႃႇထိုင်ႁွတ်ႈ ထၼ်ႈပေႃး ဢပႅတ်ႈၵႃႈဢၼ်သူႁဵတ်းၼၼ်ႉ လႆႈထၢင်ႇသႃး ဢိၵ်ႇတင်းၵွပ်ႈပိူဝ်ႈဢၼ်သူ လႆႈၶၢမ်ႇတၢင်းဢၼ် ၶုၵ်းၸႂ်လႆႈၶႆႈၸႂ်ထူပ်း ၼၼ်ႉလႄႈ သူတၵ်းလႆႈဢွၼ်ၵၼ်ၶၢမ်ႇ တၢင်းဢၼ်ဢဝ်မိုဝ်းတီႉဢဝ်ၵႂႃႇဢေႃႈ။-

25မႂ်းဢၼ်ၶၢမ်ႇတၢႆ ဢၼ်ႁၢႆႉယုတ်ႈၶုၼ် ဢီႉသရေႇလႃႉ ဢၼ်မိုဝ်ႉဝၼ်း ႁွတ်ႈထိုင်ယဝ်ႉၼႂ်းၶိင်ႇမိူဝ်ႈဢၼ် တူႉၸရိူၵ်ႈ သုတ်းၵွႆၼၼ်ႉၼႆႉဢိူၺ်း၊-

26ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ထွတ်ႇဢဝ်ၶဵၼ်းႁူဝ်ပႅတ်ႈလႄႈ ပူတ်းဢဝ်သရၽူႇရႃႇၸႃႉ ပႅတ်ႈတႃႉ။ ၵမ်းလိုၼ်းဢမ်ႇလႆႈမီး လႃးလႃး။ တၵ်းလႆႈယုၵ်ႉယွင်ႈ ၵေႃႉဢၼ်တႅမ်ႇ သုင်လႄႈ တၵ်းလႆႈၶျႃးၵေႃႉဢၼ်သုင် တႅမ်ႇဢေႃႈ။-

27ၵဝ်တၵ်းၶႂမ်ႈပိၼ်ႈပႅတ်ႈဢေႃႈ။ တၵ်းၶႂမ်ႈပိၼ်ႈပႅတ်ႈဢေႃႈ။ တၵ်းၶႂမ်ႈပိၼ်ႈပႅတ်ႈဢေႃႈ။ ၵမ်းလိုၼ်းတၵ်းဢမ်ႇလႆႈမီး လႃးလႃးတေႃႇထိုင်ႁွတ်ႈ ၵေႃႉဢၼ်ဢုပ်ႉပိူင်ႇၼၼ်ႉ ထၼ်ႈပေႃးႁွတ်ႈထိုင်လႄႈ ၵဝ်တၵ်းဢဝ်ဢၢပ်ႈပၼ် တီႈၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။

28လုၵ်ႈၵူၼ်းဢိူၺ်း၊ မႂ်းႁဵတ်းပရေႃးၽႅတ်ႈ သေလႄႈ လၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃး ဢဝ်လွင်ႈ ၵူၼ်းမဵဝ်း ဢမ်ႇမုၼ်ႇ တင်းလၢႆ ဢိၵ်ႇတင်း တၢင်းဢၼ်ၶဝ်သႄႉသွမ်းၼၼ်ႉလႄႈ မီးဢမိင်ႉၸမ်ႉ၊ လၢပ်ႇလႅဝ်း၊ လၢပ်ႇလႅဝ်းၼၼ်ႉ မီးတၢင်းဢၼ်ထွတ်ႇဝႆႉ ပုၼ်ႈတၢင်းဢၼ် တၵ်းၶႃႈၽၼ်းဢဝ်တၢႆၼၼ်ႉလႄႈ ပဵၼ်ဢၼ်လပ်ႉပွတ်ႈသီဝႆႉလိူမ်ႈလီၼႃႇလူင်လၢင် တေႃႇထိုင်ႁွတ်ႈ ဢရွင်ႇလုၵ်ႉႁိူဝ်ႈ မိူၼ်ၸိူဝ်ႉၼင်ႇၽႃႉမႅပ်ႈၼၼ်ႉ၊-

29ၼႂ်းမိူဝ်ႈဢၼ် ၶဝ်ႁၼ်လွင်ႈတၢင်းဢၼ်လၢႆလၢႆ ဢမ်ႇပွင်ႇလွင်ႈၵႃႈသင်ပုၼ်ႈမႂ်းလႄႈ ႁေႃးလၢတ်ႈၵႂၢမ်းမူႉသႃႇတီႈမႂ်း ႁႂ်ႈလႆႈႁႂ်ႈမႂ်းလူမ်ႉတူၵ်းသႂ်ႇ ၵႃႈၼိူဝ်ၶေႃးၶဝ်ၸိူဝ်းဢၼ်ႁၢႆႉဢၼ်ယုတ်ႈ ဢၼ်ၶၢမ်ႇတၢႆ ဢၼ်မိုဝ်ႉဝၼ်းၶဝ်ႁွတ်ႈထိုင်ယဝ်ႉ ၼႂ်းၶိင်ႇမိူဝ်ႈဢၼ် တူႉၸရိူၵ်ႈၶဝ် သုတ်းၵွႆၼၼ်ႉဢေႃႈ။-

30ႁႂ်ႈလၢပ်ႇလႅဝ်းၶိုၼ်းၸူး ၵႃႈတီႈၵပ်းမၼ်းသေတႃႉ။ ၵဝ်တၵ်းၸီႇယၢင်ႇမႂ်း ၵႃႈၼႂ်းတီႈဢၼ် ၵဝ်ၽၢၼ်ႇသၢင်းႁဵတ်းပဵၼ်မႂ်း၊ တီႈဢၼ်မႂ်းၵိူတ်ႇလဵင်ႉမႃးၼၼ်ႉဢေႃႈ။-

31ၵဝ်တၵ်းသွၼ်းလေႃႇ တၢင်းၸႂ်မႆႈၶႆႈၸႃႉၵဝ် ၵႃႈၼိူဝ်မႂ်းလႄႈ ဢဝ်ၽႆးတေႃးသႃႉၵဝ် ပဝ်ႇသႂ်ႇမႂ်းဢေႃႈ။ ၵဝ်တၵ်းဢဝ်မႂ်း ဢၢပ်ႈပၼ်ၵႃႈၼႂ်းမိုဝ်း ၶဝ်ၸိူဝ်းဢၼ် မီးၸႂ်သၽေႃးဢၼ်ႁၢဝ်ႈၵျၢမ်းၼႃႇလႄႈ ၸၢင်ႈယႃႉၽဵဝ်ႈပႅတ်ႈၼၼ်ႉဢေႃႈ။-

32မႂ်းတၵ်းလႆႈပဵၼ်ၽိုၼ်း ပုၼ်ႈဢၼ်တၵ်းသႂ်ႇၽႆး ၸိုၵ်းၽႆးဢေႃႈ။ လိူတ်ႈမႂ်းတၵ်းလႆႈမီး ၵႃႈၼႂ်းၵၢင်မိူင်းလႄႈ ၵမ်းလိုၼ်းၽူႈလႂ် ဢမ်ႇလႆႈၶုၵ်းၸႂ်လႆႈ ၶႆႈၸႂ်ထူပ်းမႂ်းလႃးလႃး။ ၵဝ်ထႃႇဝရႃႉၽြႃး မီးဢမိင်ႉဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

← Chapter 20 Jump to: Chapter 22 →