Ezekiel 40 — Shan

1ၼႂ်းပီႊဢၼ် ႁဝ်းလႆႈၶၢမ်ႇတၢင်းဢၼ် သိမ်းဢဝ်ၵႂႃႇလႄႈ ထူၼ်ႈထိုင် သၢဝ်းႁႃႈပီႊ လိူၼ်ပထမႃႉ သိပ်းဝၼ်းၼၼ်ႉ ၼႂ်းမိုဝ်ႉဝၼ်း ဢၼ်ယႃႉၽဵဝ်ႈဝဵင်းၸဝ်ႈပႅတ်ႈလႄႈ ၸေးသိပ်းသီႇပီႊၼၼ်ႉ၊ ၼႂ်းဝၼ်းၼၼ်ႉၵမ်းလဵဝ် မိုဝ်းထႃႇဝရႃႉၽြႃး မီးၵႃႈၼိူဝ်ၵဝ်လႄႈ မၼ်းၸဝ်ႈဢဝ်ၵဝ်ၵႂႃႇ ၵႃႈတီႈဝဵင်းၼၼ်ႉဢေႃႈ။-

2မၼ်းၸဝ်ႈ ဢဝ်ၵဝ်ၵႂႃႇၵႃႈတီႈမိူင်း ဢီႉသရေႇလႃႉ ၼႂ်းပျႃႇတိၵ်ႈရူႇပႃႇရူင်ႇ ၽြႃးပဵၼ်ၸဝ်ႈ ၸိူဝ်းၼၼ်ႉလႄႈ ဢဝ်ၵဝ်တၢင်ႇဝႆႉၵႃႈၼိူဝ်လွႆ ဢၼ်သုင်ၼႃႇ ဢၼ်ၵႃႈတီႈ ၽၢႆႇတၢင်းၸၢၼ်းမၼ်းၼၼ်ႉ မီးပုင်ႇႁၢင်ႈဝဵင်းဢေႃႈ။-

3မိူဝ်ႈဢၼ် မၼ်းၸဝ်ႈဢဝ်ၵဝ်ၵႂႃႇ ၵႃႈတီႈၼၼ်ႈ ၼၼ်ႉၸိုင်၊ မီးၵူၼ်းဢၼ်ႁၢင်ႈၽၢင်မၼ်း ပဵၼ်ၸိူဝ်ႉၼင်ႇတွင်းလိူင်ဝႆႉလႄႈ ယိပ်းၵမ်ဢဝ်လႅမ်ႈမႆႉဢေႃႈ ဢိၵ်ႇတင်း ၸိူၵ်ႈၵုၺ် ပုၼ်ႈဢၼ်တၵ်းတႅၵ်ႈၼၼ်ႉယူႇ သေလႄႈ ၸုၵ်းယူႇၵႃႈတီႈႁူး ၽၵ်းတူဝဵင်းၼၼ်ႉၵေႃႉၼိုင်ႈဢေႃႈ။-

4ၵေႃႉၼၼ်ႉ လၢတ်ႈတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ ဢဝ်မၢၵ်ႇတႃမႂ်းလူတူၺ်းလႄႈ ဢဝ်ႁူမႂ်းထွမ်ႇငိၼ်းတႃႉ။ ဢဝ်ၵႃႈဢၼ်ၵဝ်တၵ်းၼႄပျႃး တီႈမႂ်းၼၼ်ႉသႂၢင်းသႂ်ႇဝႆႉ ၵႃႈၼႂ်းၸႂ်မႂ်းတႃႉ။ လွင်ႈၼင်ႇႁိုဝ်ၵဝ်တၵ်းလႆႈၼႄပျႃး လွင်ႈတၢင်းၸိူဝ်းၼႆႉတီႈမႂ်းၸိုင် မႂ်းလႆႈၶၢမ်ႇတၢင်းဢၼ် ဢဝ်မႃးၵႃႈတီႈၼႆႈယဝ်ႉ။ မႂ်းတၵ်းလႆႈဢဝ်ၵႃႈဢၼ်မႂ်းႁၼ်ၼၼ်ႉ ၼႄပျႃးတီႈ မဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆဢေႃႈ။

5ၵႃႈတီႈၼွၵ်ႈ လဵပ်ႈႁွပ်ႈႁိူၼ်းၸဝ်ႈၼၼ်ႉ မီးတမ်ႇတိူင်းဢေႃႈ။ ၵေႃႉၼၼ်ႉ ယိပ်းၵမ်ဢဝ်လႅမ်ႈမႆႉဢေႃႈ ဢၼ်တၢင်းယၢဝ်းမၼ်းမီးႁူၵ်းသွၵ်ႇ ဢၼ်ယေႈသွၵ်ႇယေႈသွၵ်ႇၼၼ်ႉ မီးသွၵ်ႇပၢႆၶိုပ်ႈၼၼ်ႉယူႇ သေလႄႈ ဢဝ်တႅၵ်ႈတူၺ်းတမ်ႇတိူင်း ၼၼ်ႉလႄႈ ဢၼ်ၼႃမၼ်း မီးလႅမ်ႈမႆႉဢေႃႈၼၼ်ႉ တႅၵ်ႈၼိုင်ႈ၊ ဢၼ်သုင်မၼ်းၵေႃႈ မီးလႅမ်ႈမႆႉဢေႃႈၼၼ်ႉ တႅၵ်ႈၼိုင်ႈ ဢေႃႈ။-

6လိုၼ်းၼၼ်ႉ မၼ်းၵႂႃႇၸူးၵႃႈတီႈၽၵ်းတူ ၽၢႆႇၼႃႈတၢင်းဢွၵ်ႇလႄႈ ၶိုၼ်ႈၶၼ်ႈလႆမၼ်း သေယဝ်ႉ၊ တႅၵ်ႈတူၺ်းၶိုဝ်ႇၽၵ်းတူ ဢိၵ်ႇတင်း ၶူင်ႇၽၵ်းတူလႄႈ ၼႃႈၼွႆႉမၼ်းမီးလႅမ်ႈမႆႉဢေႃႈၼၼ်ႉ တႅၵ်ႈၼိုင်ႈ ၼင်ႇၵၼ်ဢေႃႈ။-

7လုၵ်းဢွၼ်ႇ တင်းလၢႆ ယေႈလုၵ်းၼႃႈယၢဝ်းမၼ်းမီး လႅမ်ႈမႆႉဢေႃႈၼၼ်ႉတႅၵ်ႈၼိုင်ႈလႄႈ လုၵ်းၼိုင်ႈလႄႈလုၵ်းၼိုင်ႈ ယၢၼ်ၵၼ် ႁႃႈသွၵ်ႇ ၼင်ႇၵၼ်လႄႈ ၼႃႈၼွႆႉၶူင်ႇၽၵ်းတူ ၵႃႈတီႈႁိမ်းမုၵ်ႈမၼ်းၽၢႆႇတၢင်းၼႂ်းၼၼ်ႉၵေႃႈ မီးလႅမ်ႈမႆႉဢေႃႈၼၼ်ႉ တႅၵ်ႈၼိုင်ႈဢေႃႈ။-

8မၼ်းတႅၵ်ႈတူၺ်း မုၵ်ႈၽၵ်းတူၽၢႆႇတၢင်းၼႂ်း မီးလႅမ်ႈမႆႉဢေႃႈၼၼ်ႉ တႅၵ်ႈၼိုင်ႈဢေႃႈ။-

9မုၵ်ႈၽၵ်းတူၵေႃႈ မၼ်းတႅၵ်ႈတူၺ်းလႄႈ မီးပႅတ်ႇသွၵ်ႇဢေႃႈ။ သဝ်မၼ်းမီး သွင်သွၵ်ႇၼင်ႇၵၼ်ဢေႃႈ။ မုၵ်ႈၽၵ်းတူၼၼ်ႉ မီးၵႃႈတီႈၽၢႆႇတၢင်းၼႂ်းဢေႃႈ။-

10လုၵ်းၽၵ်းတူၽၢႆႇၼႃႈတၢင်းဢွၵ်ႇ ၸိူဝ်းၼၼ်ႉ ၽၢၵ်ႇၶၢင်ႈၼိုင်ႈ မီးလုၵ်းသၢမ်လုၵ်း၊ ၽၢၵ်ႇၶၢင်ႈၼိုင်ႈ မီးလုၵ်းသၢမ်လုၵ်းၼင်ႇၵၼ်လႄႈ တင်းသၢမ်လုၵ်းတၢၼ်ႇပဵင်းၵၼ်ဢေႃႈ။ သဝ်ၵႃႈတီႈသွင်ၽၢၵ်ႇၶၢင်ႈမၼ်း ၸိူဝ်းၼၼ်ႉၵေႃႈ တၢၼ်ႇပဵင်းၵၼ်ဢေႃႈ။-

11မၼ်းတႅၵ်ႈတူၺ်း ၼႃႈပွတ်းႁူးၽၵ်းတူလႄႈ မီးသိပ်းသွၵ်ႇဢေႃႈ။ ဢၼ်သုင်မၼ်းၸမ်ႉ၊ မီးသိပ်းပၢႆသၢမ်သွၵ်ႇဢေႃႈ။-

12မီးၸၢၼ်းၵႃႈတီႈၽၢႆႇၼႃႈလုၵ်းဢွၼ်ႇ ၸိူဝ်းၼၼ်ႉ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉသွၵ်ႇၼိုင်ႈ၊ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉသွၵ်ႇၼိုင်ႈ ၼင်ႇၵၼ်လႄႈ လုၵ်းဢွၼ်ႇ ၸိူဝ်းၼၼ်ႉ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ ႁူၵ်းသွၵ်ႇ၊ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ ႁူၵ်းသွၵ်ႇ ၼင်ႇၵၼ်ဢေႃႈ။-

13လိုၼ်းၼၼ်ႉ မၼ်းတႅၵ်ႈတူၺ်းဢဝ် ၵႃႈတီႈၸၢႆးၶႃး ဢၼ်မုင်းလုၵ်းဢွၼ်ႇဢၼ်ၼိုင်ႈတေႃႇထိုင်ႁွတ်ႈ ၸၢႆးၶႃးဢၼ်မုင်း လုၵ်းဢွၼ်ႇဢၼ်ၼိုင်ႈလႄႈ ဢၼ်ၵႂၢင်ႈမၼ်းမီး သၢဝ်းႁႃႈသွၵ်ႇဢေႃႈ။ ၽၵ်းတူမၼ်းၸိူဝ်းၼၼ်ႉ ဝၢႆႇၼႃႈတေႃႇၵၼ်ယူႇဢေႃႈ။-

14မၼ်းႁဵတ်းသဝ် ဢၼ်မီးႁူၵ်းသိပ်းသွၵ်ႇလႄႈ တမ်ႇတိူင်းၶိုတ်းထိုင် တီႈသဝ်ၽၵ်းတူ ဢၼ်မီးၵႃႈတီႈႁိမ်းႁွမ်းလဵပ်ႈႁွပ်ႈ ၼၼ်ႉဢေႃႈ။-

15ဢဝ်ၵႃႈတီႈႁူးၽၵ်းတူ ၽၢႆႇတၢင်းၼွၵ်ႈ တေႃႇထိုင်ႁွတ်ႈႁူးမုၵ်ႈၽၵ်းတူ ၽၢႆႇတၢင်းၼႂ်းၼၼ်ႉ မီးႁႃႈသိပ်းသွၵ်ႇဢေႃႈ။-

16ႁူးလၢင်းတဵၼ် ဢၼ်ၵႅပ်ႈဢၼ်ဢွၼ်ႇမီးဝႆႉၵႃႈတီႈလုၵ်း ၸိူဝ်းၼၼ်ႉ ဢိၵ်ႇတင်း သဝ်ဢၼ်မီးၵႃႈတီႈ ၽၢႆႇတၢင်းၼႂ်းၽၵ်းတူ ၵႃႈတီႈၸွမ်းလဵပ်ႈႁွပ်ႈၸိူဝ်းၼၼ်ႉ တင်းမုၵ်ႈၽၵ်းတူတင်းလၢႆလႄႈ ႁူးလၢင်းတဵၼ် ၸိူဝ်းၼၼ်ႉ မီးဝႆႉယူႇ ၵႃႈတီႈၸွမ်းႁိမ်းႁွမ်းလဵပ်ႈႁွပ်ႈ ၽၢႆႇတၢင်းၼႂ်းၼၼ်ႉလႄႈ ပုင်ႇႁၢင်ႈတူၼ်ႈထၢၼ် တင်းလၢႆၵေႃႈ မီးဝႆႉယူႇ ၵႃႈတီႈသဝ်ၸိူဝ်းၼၼ်ႉဢေႃႈ။

17လိုၼ်းၼၼ်ႉ မၼ်းဢဝ်ၵဝ်သႂၢင်းၶဝ်ႈ ၵႃႈၼႂ်းတမ်ႇတိူင်းဢၼ်ၵႃႈၼွၵ်ႈလႄႈ ၵဝ်ႁၼ်လုၵ်း တင်းလၢႆ ဢိၵ်ႇတင်း မၢၵ်ႇႁိၼ်သိူဝ်ႇ ဢၼ်ႁဵတ်းဝႆႉသိူဝ်ႇဝႆႉပုၼ်ႈ တမ်ႇတိူင်းၼၼ်ႉဢေႃႈ။ ၵႃႈၼိူဝ်မၢၵ်ႇႁိၼ်သိူဝ်ႇဝႆႉၼၼ်ႉ မီးလုၵ်းသၢမ်သိပ်းဢေႃႈ။-

18မၢၵ်ႇႁိၼ်သိူဝ်ႇၼၼ်ႉ မီးဝႆႉယူႇၵႃႈတီႈႁိမ်းၽၵ်းတူ ၸိူဝ်းၼၼ်ႉ ၸွမ်းၵႃႈၼင်ႇဢၼ် ၽၵ်းတူၸႅၼ်ႇတၢမ်းၵၼ် ၼၼ်ႉလႄႈ ပဵၼ်မၢၵ်ႇႁိၼ်သိူဝ်ႇၵႃႈတႂ်ႈဢေႃႈ။-

19လိုၼ်းၼၼ်ႉ မၼ်းတႅၵ်ႈတူၺ်းဢဝ် ၵႃႈတီႈႁူဝ်ၽၵ်းတူ ဢၼ်ၵႃႈတႂ်ႈ တေႃႇထိုင်ႁွတ်ႈ ႁူဝ်ၽၢႆႇၼွၵ်ႈတမ်ႇတိူင်း ဢၼ်ၵႃႈၼႂ်းလႄႈ ၵႃႈတီႈၼႃႈတၢင်းဢွၵ်ႇ ဢိၵ်ႇတင်း ၼႃႈတၢင်းႁွင်ႇၼၼ်ႉ မီးပၢၵ်ႇသွၵ်ႇၼင်ႇၵၼ်ဢေႃႈ။

20လႆႈသမ်ႉ မၼ်းတႅၵ်ႈတူၺ်း ဢၼ်သုင် ဢိၵ်ႇတင်း ၼႃႈပွတ်းၽၵ်းတူတမ်ႇတိူင်း ဢၼ်ၵႃႈၼွၵ်ႈ ဢၼ်ဝၢႆႇၼႃႈၵႂႃႇတၢင်းႁွင်ႇ ၼၼ်ႉဢေႃႈ။-

21လုၵ်းဢွၼ်ႇ မီးၵႃႈတီႈၽၢၵ်ႇၶၢင်ႈၼိုင်ႈ မၼ်းသၢမ်လုၵ်း ၵႃႈတီႈၽၢၵ်ႇၶၢင်ႈၼိုင်ႈမၼ်းသၢမ်လုၵ်ႈ ၼင်ႇၵၼ်ဢေႃႈ။ သဝ်မၼ်းဢိၵ်ႇတင်း မုၵ်ႈမၼ်းၸိူဝ်းၼၼ်ႉ မိူၼ်ၸိူဝ်ႉၼင်ႇ ၽၵ်းတူဢွၼ်တၢင်း ၼၼ်ႉလႄႈ ၼႃႈယၢဝ်းမၼ်းမီးႁႃႈသိပ်းသွၵ်ႇ၊ ၼႃႈပွတ်းမၼ်းမီး သၢဝ်းႁႃႈ သွၵ်ႇဢေႃႈ။-

22ႁူးလၢင်းတဵၼ်မၼ်း၊ မုၵ်ႈမၼ်း၊ တူၼ်ႈထၢၼ်မၼ်း ၸိူဝ်းၼၼ်ႉ မိူၼ်ၸိူဝ်ႉၼင်ႇၽၵ်းတူ ၼႃႈတၢင်းဢွၵ်ႇၼၼ်ႉဢေႃႈ။ ၶဝ်လႆႈ ၶိုၼ်ႈၶၼ်ႈလႆ ၸဵတ်းသိၵ်ႈၸူး ၵႃႈတီႈၽၵ်းတူလႄႈ မုၵ်ႈမၼ်းၸိူဝ်းၼၼ်ႉ မီးဝႆႉယူႇသိုဝ်ႈၼႃႈၶဝ်ဢေႃႈ။-

23မီးၽၵ်းတူ တမ်ႇတိူင်းဢၼ်ၵႃႈၼႂ်းဢၼ်သိုဝ်ႈၵၼ်တင်း ၽၵ်းတူဢၼ်ၵႃႈၼွၵ်ႈၼၼ်ႉ ဝႆႉၵႃႈတီႈၽၢႆႇတၢင်းႁွင်ႇ ဢိၵ်ႇတင်း ၽၢႆႇတၢင်းဢွၵ်ႇဢေႃႈ။ မၼ်းတႅၵ်ႈတူၺ်းဢဝ်ၵႃႈတီႈ ႁူးၽၵ်းတူဢၼ်ၼိုင်ႈ တေႃႇထိုင်ႁွတ်ႈၽၵ်းတူဢၼ်ၼိုင်ႈလႄႈ မီးပၢၵ်ႇသွၵ်ႇဢေႃႈ။

24လိုၼ်းၼၼ်ႉ မၼ်းႁွင်ႉၵဝ်ၵႂႃႇ ၵႃႈတီႈၼႃႈတၢင်းၸၢၼ်းလႄႈ ၵဝ်ႁၼ်ၽၵ်းတူၵႃႈတီႈၼႃႈတၢင်းၸၢၼ်း ၼၼ်ႉဢေႃႈ။ မၼ်းတႅၵ်ႈတူၺ်းသဝ်မၼ်း ဢိၵ်ႇတင်း မုၵ်ႈမၼ်းၸိူဝ်းၼၼ်ႉလႄႈ ၸွမ်းပမႃႇၼႃႉဢၼ်ဢွၼ်တၢင်း ၸိူဝ်းၼၼ်ႉဢေႃႈ။-

25မီးႁူးလၢင်းတဵၼ်ၵႃႈၼႂ်းမၼ်း ဢိၵ်ႇတင်းၵႃႈၼႂ်းမုၵ်ႈမၼ်း ၸိူဝ်းၼၼ်ႉ မိူၼ်ၸိူဝ်ႉၼင်ႇ ႁူးလၢင်းတဵၼ်ဢၼ်ဢွၼ်တၢင်း ၸိူဝ်းၼၼ်ႉလႄႈ ၼႃႈယၢဝ်းမၼ်းမီးႁႃႈသိပ်းသွၵ်ႇ၊ ၼႃႈပွတ်းမၼ်းမီးသၢဝ်းႁႃႈသွၵ်ႇဢေႃႈ။-

26ၶဝ်လႆႈၶိုၼ်ႈၶၼ်ႈလႆၸဵတ်းသိၵ်ႈ ၸူးၵႃႈတီႈၽၵ်းတူလႄႈ မုၵ်ႈမၼ်းၸိူဝ်းၼၼ်ႉမီးဝႆႉယူႇ သိုဝ်ႈၼႃႈၶဝ်ဢေႃႈ။ ၵႃႈတီႈ သွင်ၽၢၵ်ႇသဝ်ၸိူဝ်းၼၼ်ႉ မီးပုင်ႇႁၢင်ႈ တူၼ်ႈထၢၼ်ယေႈၽၢၵ်ႇ ယေႈတူၼ်ႈၼင်ႇၵၼ်ဢေႃႈ။-

27ၵႃႈတီႈၼႃႈတၢင်းၸၢၼ်းၼၼ်ႉ မီးႁူးၽၵ်းတူတမ်ႇတိူင်းဢၼ်ၵႃႈၼႂ်းဢေႃႈ။ မၼ်းတႅၵ်ႈတူၺ်း ဢဝ်ၵႃႈတီႈႁူးၽၵ်းတူႁူးၼိုင်ႈ တေႃႇထိုင်ႁွတ်ႈႁူးၼိုင်ႈ ၵႃႈတီႈၼႃႈတၢင်းၸၢၼ်းၼၼ်ႉလႄႈ မီးပၢၵ်ႇသွၵ်ႇဢေႃႈ။

28လႆႈသမ်ႉ မၼ်းၸဝ်ႈဢဝ်ၵဝ်သႂၢင်းၶဝ်ႈ ၵႃႈၼႂ်းတမ်ႇတိူင်းဢၼ်ၵႃႈၼႂ်းတီႈႁိမ်းၽၵ်းတူ ၼႃႈတၢင်းၸၢၼ်း ၼၼ်ႉလႄႈ တႅၵ်ႈတူၺ်း ၽၵ်းတူၼႃႈတၢင်းၸၢၼ်းၼၼ်ႉ ၸွမ်းပမႃႇၼႃႉ ဢၼ်ဢွၼ်တၢင်းၸိူဝ်းၼၼ်ႉဢေႃႈ။-

29လုၵ်းဢွၼ်ႇမၼ်း၊ သဝ်မၼ်း၊ မုၵ်ႈမၼ်းၸိူဝ်းၼၼ်ႉ ဢွၼ်ၵၼ်မီးမႅၼ်ႈၵၼ်တင်းပမႃႇၼႃႉ ဢၼ်ဢွၼ်တၢင်း ၸိူဝ်းၼၼ်ႉဢေႃႈ။ မီးႁူးလၢင်းတဵၼ်ၵႃႈၼႂ်းမၼ်း ဢိၵ်ႇတင်း ၵႃႈၼႂ်းမုၵ်ႈၸိူဝ်းၼၼ်ႉ ၸွမ်းႁိမ်းလဵပ်ႈႁွပ်ႈမၼ်းလႄႈ ၼႃႈယၢဝ်းမၼ်းမီးႁႃႈသိပ်းသွၵ်ႇ၊ ၼႃႈပွတ်းမၼ်း မီးသၢဝ်းႁႃႈသွၵ်ႇဢေႃႈ။-

30မီးမုၵ်ႈၵႃႈတီႈၸွမ်းႁိမ်းလဵပ်ႈႁွပ်ႈမၼ်း ၸိူဝ်းၼၼ်ႉလႄႈ ၼႃႈယၢဝ်းမၼ်းမီးသၢဝ်းႁႃႈသွၵ်ႇ၊ ၼႃႈပွတ်းမၼ်း မီးႁႃႈသွၵ်ႇဢေႃႈ။-

31မုၵ်ႈၸိူဝ်းၼၼ်ႉဝၢႆႇၼႃႈတေႃႇ တမ်ႇတိူင်းဢၼ်ၵႃႈၼွၵ်ႈယူႇလႄႈ မီးပုင်ႇႁၢင်ႈ တူၼ်ႈထၢၼ်ၵႃႈၼိူဝ်သဝ် ၸိူဝ်းၼၼ်ႉယူႇဢေႃႈ။ လႆႈၶိုၼ်ႈၶၼ်ႈလႆပႅတ်ႇသိၵ်ႈၸူးဢေႃႈ။

32လႆႈသမ်ႉ မၼ်းဢဝ်ၵဝ်သႂၢင်းၶဝ်ႈၵႃႈၼႂ်းတမ်ႇတိူင်း ဢၼ်ၵႃႈၼႂ်းၽၢႆႇၼႃႈတၢင်းဢွၵ်ႇလႄႈ တႅၵ်ႈတူၺ်းၽၵ်းတူၼၼ်ႉ ၸွမ်းပမႃႇၼႃႉ ဢၼ်ဢွၼ်တၢင်း ၸိူဝ်းၼၼ်ႉဢေႃႈ။-

33လုၵ်းဢွၼ်ႇမၼ်း၊ သဝ်မၼ်း၊ မုၵ်ႈမၼ်းၸိူဝ်းၼၼ်ႉ မီးမႅၼ်ႈၵၼ်တင်းပမႃႇၼႃႉ ဢၼ်ဢွၼ်တၢင်း ၸိူဝ်းၼၼ်ႉဢေႃႈ။ မီးႁူး လၢင်းတဵၼ် ၵႃႈၼႂ်းမၼ်း ဢိၵ်ႇတင်း ၵႃႈၼႂ်းမုၵ်ႈမၼ်း ၸိူဝ်းၼၼ်ႉ ၸွမ်းႁိမ်းလဵပ်ႈႁွပ်ႈမၼ်းလႄႈ ၼႃႇယၢဝ်းမၼ်း မီးႁႃႈသိပ်းသွၵ်ႇ၊ ၼႃႈပွတ်းမၼ်း မီးသၢဝ်းႁႃႈသွၵ်ႇဢေႃႈ။-

34မုၵ်ႈၸိူဝ်းၼၼ်ႉ ဝၢႆႇၼႃႈတေႃႇ တမ်ႇတိူင်းဢၼ်ၵႃႈၼွၵ်ႈယူႇလႄႈ မီးပုင်ႇႁၢင်ႈတူၼ်ႈထၢၼ် ၵႃႈၼိူဝ်သဝ်ၸိူဝ်းၼၼ်ႉ ယေႈၽၢၵ်ႇ ယေႈတူၼ်ႈ ၼင်ႇၵၼ်ဢေႃႈ။ လႆႈၶိုၼ်ႈၶၼ်ႈလႆ ပႅတ်ႇသိၵ်ႈ ၸူးဢေႃႈ။

35လႆႈသမ်ႉ မၼ်းႁွင်ႉၵဝ်ၵႂႃႇၵႃႈတီႈ ၽၵ်းတူၼႃႈတၢင်းႁွင်ႇလႄႈ တႅၵ်ႈတူၺ်းမၼ်းၸွမ်းပမႃႇၼႃႉ ဢၼ်ဢွၼ်တၢင်း ၸိူဝ်းၼၼ်ႉဢေႃႈ။-

36မၼ်းမီးတၢင်းဢၼ်ပျေႉၸုမ်ႇဝႆႉ တင်းလုၵ်းဢွၼ်ႇလႂ်၊ သဝ်လႂ်၊ မုၵ်ႈလႂ်၊ ႁူးလၢင်းတဵၼ်ဢၼ်ၸွမ်းႁိမ်းလဵပ်ႈႁွပ်ႈမၼ်းလႂ်လႄႈ ၼႃႈယၢဝ်းမၼ်းမီးႁႃႈသိပ်းသွၵ်ႇ၊ ၼႃႈပွတ်းမၼ်း မီးသၢဝ်းႁႃႈသွၵ်ႇဢေႃႈ။-

37သဝ်မၼ်းၸိူဝ်းၼၼ်ႉ ဝၢႆႇၼႃႈတေႃႇတမ်ႇတိူင်း ဢၼ်ၵႃႈၼွၵ်ႈလႄႈ မီးပုင်ႇႁၢင်ႈတူၼ်ႈထၢၼ် ၵႃႈၼိူဝ်သဝ် ၸိူဝ်းၼၼ်ႉ ယေႈၽၢၵ်ႇ ယေႈတူၼ်ႈၼင်ႇၵၼ်ဢေႃႈ။ လႆႈၶိုၼ်ႈၶၼ်ႈလႆ ပႅတ်ႇသိၵ်ႈ ၸူးဢေႃႈ။

38လုၵ်းဢွၼ်ႇ ဢိၵ်ႇတင်း ၽၵ်းတူမၼ်းၸိူဝ်းၼၼ်ႉ မီးဝႆႉယူႇၵႃႈတီႈႁိမ်း သဝ်ၽၵ်းတူ တင်းလၢႆ ၼၼ်ႉလႄႈ ၶဝ်လႆႈဢဝ် တူဝ်ယိတ်ႈ ဢၼ်တုတ်ႇၽႆးၼၼ်ႉ သုၵ်ႈၼမ်ႉသၢႆႇၼမ်ႉ ၵႃႈတီႈၼၼ်ႈဢေႃႈ။-

39ၵႃႈၼႂ်းမုၵ်ႈၽၵ်းတူမီးၶူင်ႇတီႈၵိၼ် ၵႃႈတီႈၽၢၵ်ႇၶၢင်ႈၼိုင်ႈ သွင်ဢၼ်၊ ၵႃႈတီႈၽၢၵ်ႇၶၢင်ႈၼိုင်ႈ သွင်ဢၼ်ၼင်ႇၵၼ် ပုၼ်ႈဢၼ် တၵ်းဢဝ်တူဝ်ယိတ်ႈ ဢၼ်တုတ်ႇၽႆး၊ တူဝ်ယိတ်ႈဢၼ်ၽေႇဢပႅတ်ႈ၊ တူဝ်ယိတ်ႈ ဢၼ်ၽေႇတူႉၸရိူၵ်ႈ ၸိူဝ်းၼၼ်ႉ တၢႆဢေႃႈ။-

40ၵႃႈတီႈၽၢၵ်ႇၶၢင်ႈၼိုင်ႈ ၽၢႆႇတၢင်းၼွၵ်ႈ တီႈဢၼ်ၶိုၼ်ႈၸူး ႁူးၽၵ်းတူ ၼႃႈတၢင်းႁွင်ႇၼၼ်ႉၵေႃႈ မီးၶူင်ႇတီႈၵိၼ်သွင်ဢၼ်လႄႈၵႃႈတီႈၽၢၵ်ႇၶၢင်ႈၼိုင်ႈ ဢၼ်မီးၵႃႈတီႈမုၵ်ႈၽၵ်းတူၼၼ်ႉၵေႃႈ မီးၶူင်ႇတီႈၵိၼ်သွင်ဢၼ်ဢေႃႈ။-

41ၼင်ႇၼၼ်လႄႈ ၵႃႈတီႈၽၢၵ်ႇၶၢင်ႈၼိုင်ႈၽၵ်းတူၼၼ်ႉ မီးၶူင်ႇတီႈၵိၼ်သီႇဢၼ် ၵႃႈတီႈၽၢၵ်ႇၶၢင်ႈၼိုင်ႈသီႇဢၼ်လႄႈ သီႇဢၼ်၊ပွင်းၵၼ်မီးပႅတ်ႇဢၼ် ပုၼ်ႈဢၼ်တၵ်းဢဝ်တူဝ်ယိတ်ႈတၢႆဢေႃႈ။-

42ၶူင်ႇတီႈၵိၼ်ပုၼ်ႈယိတ်ႈဢၼ် တုတ်ႇၽႆးသီႇဢၼ်ၼၼ်ႉ ယဝ်ႉတူဝ်ႈတင်းမၢၵ်ႇႁိၼ်ဢၼ်ထၢၵ်ႇႁဵတ်းသပ်းႁဵတ်း ၼႃႈယၢဝ်းမၼ်း မီးသွၵ်ႇၶိုပ်ႈ၊ ၼႃႈပွတ်းမၼ်း သွၵ်ႇၶိုပ်ႈ၊ ဢၼ်သုင်မၼ်းသွၵ်ႇၼိုင်ႈဢေႃႈ။ ၶဝ်ဢဝ်ၶိူင်ႈယိပ်းၶိူင်ႈၵႅမ်းဢၼ် ဢဝ်တူဝ်ယိတ်ႈ ဢၼ်တုတ်ႇၽႆးတၢႆၸိူဝ်းၼၼ်ႉ တၢင်ႇသႂ်ႇဝႆႉၵႃႈၼိူဝ်ၼၼ်ႉဢေႃႈ။-

43ၵမ်းပၢတ်ႈဢၼ်တၢင်းၵႂၢင်ႈမၼ်း မီးၽႃႇမိုဝ်းၼိုင်ႈ ၸိူဝ်းၼၼ်ႉ လႆႈမီးတၢင်းဢၼ်ဢဝ်သႂ်ႇ ၸပ်းဝႆႉၵႃႈတီႈၽၢႆႇၼႂ်း ၸွမ်းႁိမ်းလဵပ်ႈႁွပ်ႈမၼ်း လႄႈ ၼိူဝ်ႉယိတ်ႈဢၼ် တၵ်းပုၵ်ႈၸေႃႇၼၼ်ႉ တၢင်ႇသႂ်ႇဝႆႉမီးယူႇ ၵႃႈၼိူဝ်ၶူင်ႇတီႈၵိၼ် ၸိူဝ်းၼၼ်ႉဢေႃႈ။

44ၼွၵ်ႈၽၵ်းတူ ဢၼ်ၵႃႈၼႂ်း၊ ၵႃႈတီႈတမ်ႇတိူင်းဢၼ်ၵႃႈၼႂ်းၼၼ်ႉ မီးလုၵ်းဢွၼ်ႇ တင်းလၢႆ ပုၼ်ႈဢၼ် ၵူၼ်းဢၼ်ႁဵတ်းၵႂၢမ်း တၵ်းယူႇၼၼ်ႉဢေႃႈ။ လုၵ်းၼိုင်ႈၸမ်ႉ၊ မီးၵႃႈတီႈႁိမ်းၽၵ်းတူ ၼႃႈတၢင်းႁွင်ႇလႄႈ ဝၢႆႇၼႃႈတေႃႇ ၽၢႆႇတၢင်းၸၢၼ်းယူႇဢေႃႈ။ လုၵ်းၼိုင်ႈၸမ်ႉ၊ မီးၵႃႈတီႈႁိမ်း ၽၵ်းတူၼႃႈတၢင်းၸၢၼ်းလႄႈ ဝၢႆႇၼႃႈတေႃႇ ၽၢႆႇတၢင်းႁွင်ႇယူႇဢေႃႈ။-

45မၼ်းၼၼ်ႉ လၢတ်ႈတီႈၵဝ်လႄႈဝႃႈ၊ လုၵ်းဢၼ်ဝၢႆႇၼႃႈတေႃႇ ၽၢႆႇတၢင်းၸၢၼ်းယူႇၼႆႉၸမ်ႉ၊ ပဵၼ်ပုၼ်ႈဢၼ်ယိတ်ႈပရေႃးႁဵၵ်ႈ ဢၼ်ပွင်ႁဵတ်းဢမူႉႁိူၼ်းၸဝ်ႈ ၸိူဝ်းၼၼ်ႉ တၵ်းယူႇဢေႃႈ။-

46လုၵ်းဢၼ်ဝၢႆႇၼႃႈတေႃႇ ၽၢႆႇတၢင်းႁွင်ႇယူႇၼႆႉၸမ်ႉ၊ ပဵၼ်ပုၼ်ႈဢၼ် ယိတ်ႈပရေႃးႁဵၵ်ႈ ဢၼ်ပွင်ႁဵတ်းဢမူႉ ယိတ်ႈပလၢင်ႇ ၸိူဝ်းၼၼ်ႉ တၵ်းယူႇဢေႃႈ။ ၶဝ်ၼၼ်ႉၸမ်ႉ၊ ပဵၼ်လုၵ်ႈလၢၼ် ၸႃႇတုၵ်ႉ ဢၼ်လိူၵ်ႈၵဵပ်းဢဝ် ၵႃႈၼႂ်းၵူၼ်းမဵဝ်း လေႇဝီႉ ႁႂ်ႈလႆႈ သုတ်ႉၸပ်းသုတ်ႉၸူး ၵႃႈတီႈ ထႃႇဝရႃႉၽြႃးလႄႈ ပွင်ႁဵတ်းဢမူႉၸဝ်ႈ ၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

47မိူဝ်ႈၼၼ်ႉ မၼ်းၼၼ်ႉ တႅၵ်ႈတူၺ်းတမ်ႇတိူင်းလႄႈ ၼႃႈယၢဝ်းမီးပၢၵ်ႇသွၵ်ႇ၊ ၼႃႈပွတ်းမၼ်းပၢၵ်ႇသွၵ်ႇလႄႈ ပဵၼ်သီႇၸဵင်ႇၶိုင်ႈဝႆႉဢေႃႈ။ ယိတ်ႈပလၢင်ႇ မီးဝႆႉယူႇ ၵႃႈတီႈၽၢႆႇၼႃႈႁိူၼ်းၸဝ်ႈဢေႃႈ။-

48မၼ်းၼၼ်ႉ ႁွင်ႉၵဝ်ၵႂႃႇၵႃႈတီႈ ၼႃႈႁိူၼ်းၸဝ်ႈလႄႈ တႅၵ်ႈတူၺ်းသဝ်ၼႃႈႁိူၼ်းၸဝ်ႈၼၼ်ႉ ၵူႈလႅမ်ႈလႄႈ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ မီးႁႃႈသွၵ်ႇ၊ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ မီးႁႃႈသွၵ်ႇ ၼင်ႇၵၼ်လႄႈ ၼႃႈပွတ်းမႂ်ၽၵ်းတူ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ မီးသၢမ်သွၵ်ႇ၊ ၵႃႈတီႈၽၢၵ်ႇၶၢင်ႈၼိုင်ႈၼၼ်ႉ မီးသၢမ်သွၵ်ႇၼင်ႇၵၼ် ဢေႃႈ။-

49ဢၼ်ယၢဝ်းၼႃႈႁိူၼ်းၸဝ်ႈ ၼၼ်ႉၸမ်ႉ၊ မီးသၢဝ်းသွၵ်ႇ၊ ၼႃႈပွတ်းမၼ်းၸမ်ႉ၊ မီးသိပ်းပၢႆဢဵတ်းသွၵ်ႇဢေႃႈ။ လႆႈၶိုၼ်ႈၶၼ်ႈလႆ သိပ်းသိၵ်ႈ ၸူးဢေႃႈ။ ၵႃႈတီႈႁိမ်းၼႃႈႁိူၼ်းၸဝ်ႈၼၼ်ႉ၊ မီးသဝ်ၽၢၵ်ႇၶၢင်ႈၼိုင်ႈ လႅမ်ႈၼိုင်ႈ၊ ၽၢၵ်ႇၶၢင်ႈၼိုင်ႈ လႅမ်ႈၼိုင်ႈ ယူႇဢေႃႈ။