2 Chronicles 11

Sotho 1951 (BIBELE)

← Chapter 10 Jump to: Chapter 12 →

1Rehabeama ge a boetše Jerusalema a rapa ba leloko la Juda le la Benyamini, ya ba bahlabani ba dikete tše lekgolo la masome a seswai, ba masogana, ba go lwa le Baisiraele gore mmušo o boele go Rehabeama.

2Fela, Lentšu la Morena la tlela Semaya monna wa Modimo, la re:

3Botša Rehabeama morwa wa Salomo kgoši ya Juda, o botše Baisiraele ka moka ba ba lego nageng ya Juda le ya Benyamini, o re:

4Morena o re: Lesang go tšwa dira le go hlabana le bana ba bolena; ka moka ga lena boelang magaeng, gobane taba ye e tšwa go nna. Ka kgonthe ba theetša se Morena a se bolelago, ba lesa go tšwela Jerobeama dira.

5Bjale Rehabeama ge a dutše Jerusalema a aga metse ya dibo nageng ya Juda;

6a aga merako ya Betlehema, le Etama, le Thekoa,

7le Bethe-Tsuri, le Soko le Adulama,

8le Gathe, le Maresa, le Sifi,

9le Adoraima, le Lakisi, le Aseka,

10le Tsarea, le Ayalone, le Heburone; metse ye ya naga ya Juda le ya Benyamini a e dira ya dibo.

11Dibo tšeo a di tiiša, a bea balaodi go tšona le nywako ya dišego, le dijo, le makhura, le beine.

12Metseng yeo ka moka a bea dikotse le marumo, a e tiiša ka maatla ka kudu. Juda le Benyamini ya ba mmušo wa gagwe.

13Baperisita le Balefi ba naga ka moka ya Isiraele ba be ba ema le Rehabeama, ba tšwa dileteng tša bona ka moka.

14Balefi ba tlogela dinaga tša bona le magae a bona, ba khudugela Juda le Jerusalema, ka gobane Jerobeama le barwa ba gagwe ba ba amogile modiro wa go ba baperisita ba Morena.

15Jerobeama o be a ipeetše baperisita ba meboto, le ba diphoko, le ba mamane ala a a itiretšego ona.

16Bakhudugi bala ba latetšwe ke ba ba bego ba gafetše dipelo tša bona go nyaka Morena Modimo wa Isiraele, ba tla ba etšwa melokong yohle ya Isiraele, ba tla Jerusalema ba tliša didimo tša Morena Modimo wa botatabo.

17Ba tiiša mmušo wa Juda; gomme Rehabeama morwa wa Salomo ba mo fa maatla gwa ba gwa fela nywaga e meraro; gobane ka nywaga e meraro yeo ba be ba swere ka tsela ya Dafida le ya Salomo.

18Rehabeama o be a tšere Mahalathe morwedi wa Jerimothe morwa wa Dafida; a tšea le Abihaile morwedi wa Eliaba morwa wa Isai.

19Yena e o mmelegetše barwa, e lego Jehusi, le Semaria, le Sahama.

20Ka morago a tšea le Maaka morwedi wa Abesalomo; yena e a mmelegela Abia, le Atai, le Sisa, le Selomitha.

21Maaka morwedi wa Abesalomo ke yena yo Rehabeama a bego a mo rata mo go basadi ba gagwe ka moka le ba direthe; gobane o be a tšere basadi ba lesome; ba direthe e be e le ba masome a selelago; a tswala barwa ba masome a mabedi a metšo e seswai, le barwedi ba masome a selelago.

22Abia morwa wa Maaka, Rehabeama o mmeile mokgoma le mmuši wa bana babo, gobane o be a rata go mo dira kgoši.

23O dirile ka bohlale, a gašanya bana ba gagwe ka moka le dinaga tšohle tša Juda le tša Benyamini, a ba iša metseng ya dibo, a ba nea thoto e ntši, a ba tšeiša basadi ba bantši.

← Chapter 10 Jump to: Chapter 12 →