2 Chronicles 9

Sotho 1951 (BIBELE)

← Chapter 8 Jump to: Chapter 10 →

1Mohumagadi wa Seba o be a kwele tumo ya Salomo, a tla Jerusalema gore a leke Salomo ka diema, a tla a na le leswethe le legolo ka kudu, le dikamela tše di bego di rwele dinoko le digauta tše ntši, le magakabje a bohlokwa. A tla go Salomo a bolela nae taba tšohle tše di bego di le pelong ya gagwe.

2Salomo a mo hlathollela ditaba tša gagwe ka moka, gwa se ke gwa ba le taba e utagetšego Salomo, ye a sa kago a mo hlathollela yona.

3Ya re ge mohumagadi wa Seba a bona bohlale bja Salomo, le ngwako wo a o agilego,

4le dijo tša meruswing ya gagwe, le madulo a matona a gagwe, le mekgwa ya bahlanka ba gagwe le diaparo tša bona, le batšheledi ba gagwe le diaparo tša bona, le manamelo a gagwe a go rotogela Ngwakong wa Morena, a felelwa ke mogopolo,

5a bolela le kgoši a re: Ditaba tša gago, le tša bohlale bja gago, tše ke di kwelego ke le kua gagešo, ke therešo.

6Ke be ke sa kgolwe tše ba mpoditšego tšona, ka ba ka tla ka di bona ka mahlo a ka. Bjale šedi, tše ba mpoditšego tšona e fo ba seripa fela sa bohlale bja gago bjo bokaakaa. Tša gago di fetiša tumo ye ke e kwelego.

7Batho ba gago ke ba lehlogonolo; ba lehlogonolo ke bahlanka ba gago ba ba go hlankelago ka mehla mme ba kwa bohlale bja gago.

8A go retwe Morena Modimo wa gago yo o mo kgahlilego a go dudiša sedulong sa gagwe, wa ba kgoši ya Morena Modimo wa gago; gobane Morena Modimo wa gago o ratile Isiraele, o thekgile Isiraele ka go sa felego. Ke ka baka leo a go beilego wa ba kgoši ya bona gore o buše o dire ka toko.

9Mohumagadi a nea kgoši talente tše lekgolo le masome a mabedi tša gauta, le dinoko tše ntšintši, le magakabje a bohlokwa. Ga gwa ka gwa buša gwa ba le dinoko tše kaakaa, tše di kago lekana le tšeo mohumagadi wa Seba a di neilego kgoši Salomo.

10Le bahlanka ba Hirama, le bahlanka ba Salomo, ba tlišitše digauta di etšwa Ofira, ba tliša le dihlare tša morekure, le magakabje a bohlokwa.

11Kgoši Salomo o dirile manamelo a go ya Ngwakong wa Morena ka wona morekure, le manamelo a go ya ngwakong wa kgoši, le diletšo le makope a baopedi. Mo nageng ya Juda go be go sešo gwa bonwa tše di etšago tšeo.

12Kgoši Salomo a nea mohumagadi wa Seba tšohle tše a di kganyogago le tše a di kgopelago, ya ba go oketša neo ye a lebogilego dibego tšela tša mohumagadi ka yona. Gomme mohumagadi a boela ga gabo le bahlanka ba gagwe.

13Boima bja digauta tše di bego di tlišwa go Salomo ka ngwaga o tee, e be e le talente tše makgolo a selelago le masome a selelago a metšo e selelago,

14go sa balwe tše di bego di etšwa go bašabi le go babapatši, le go dikgoši ka moka tša Arabia, le go bakgoma ba ba bego ba tlišetša Salomo digauta le disilifera.

15Kgoši Salomo o dirile dikotse tše makgolo a mabedi ka gauta e batotšwego; e tee a e ntšhetša gauta ya Sekele tše makgolo a selelago.

16A dira le dikotsana tše makgolo a mararo ka gauta e batotšwego; e tee a e ntšhetša Sekele tše makgolo a mararo tša gauta. Tšona tše a di bea ngwakong wa Sekgwa sa Libanoni.

17Kgoši a dira sedulo sa bogoši se segolo ka naka tša tlou, a se manega ka gautatshekegi.

18Sedulong se go be go iwa ka manamelo a direpodi tše di selelago; le bogato bja maoto bja gauta bjo bo bego bo swaragane le sedulo. Se be se na le mesamelo e mebedi ya mabogo ka dithokong tša madulo, gona moo go be go eme ditau tše pedi di batagane le mesamelo ya mabogo.

19Mo direpoding tše di selelago tša manamelo, ka thoko ye le ye, go be go eme ditau tše lesome la metšo e mebedi. Ga go na mmušo o mongwe o kilego wa direlwa tše bjalo.

20Dinwelo ka moka tša kgoši Salomo e be e le tša gauta; le dibjana ka moka tša ngwako wa Sekgwa sa Libanoni e be e le tša gauta e botse; go tšona go be go se silifera, gobane mehleng ya Salomo silifera e be e sa šetšwe selo.

21Gobane dikepe tša kgoši Salomo di be di ya Tarasisi le bahlanka ba Hirama, gomme maselawatle ao a Tarasisi a be a boa gatee ka nywaga e meraro, a tliša digauta, le disilifera, le naka tša tlou, le ditšhweni, le dikgabo.

22Ka mokgwa wo kgoši Salomo a ba e mogolo a fetiša dikgoši tša lefase ka moka ka mahumo le ka bohlale.

23Dikgoši ka moka tša lefase di be di kganyoga go bona Salomo, le go kwa bohlale bja gagwe bjo Modimo a bego a bo beile pelong ya gagwe.

24Bohle ba tla le dibego tša dilwana tša silifera le tša gauta, le diaparo, le marumo, le dinoko, le dipitsi, le dimeila; ba di tliša ka ngwaga o mongwe le o mongwe.

25Salomo o be a na le dipitsi tše ntši tša dikoloi, tše e bego e re ge di balwa ka dipedi ya ba dikete tše nne, le makoloi, le dipitsi tša go namelwa tše dikete tše lesome la metšo e mebedi; a di bea metseng ya dikoloi, le motseng wa Jerusalema.

26Dikgoši ka moka go tloga nokeng ya Forate go goma ka mellwane ya Egipita, di be di loba yena.

27Kgoši ya atiša silifera motseng wa Jerusalema ya ba ye kaka maswika, dikota tša morokwana tše kaka tša mego e lego magoleng ka bontši.

28Ba be ba tlišetša Salomo dipitsi di etšwa Egipita le dinageng ka moka.

29Ge e le ditaba tše dingwe tša Salomo, tša ge a thoma a ba a goma, naa ga di a ngwalwa ditabeng tša Nathane moporofeta, le mo dikgwelelong tša Ahia wa Silo, le mo diponong tša Ido mmoni wa tša Jerobeama morwa wa Nebata?

30Salomo o feditše nywaga e masome a mane a buša Isiraele ka moka a le motseng wa Jerusalema.

31O ithobaletše le botatagwe, ba mmoloka motseng wa Dafida tatagwe; legatong la gagwe gwa buša Rehabeama morwa wa gagwe.

← Chapter 8 Jump to: Chapter 10 →