2 Chronicles 31

Sotho 1951 (BIBELE)

← Chapter 30 Jump to: Chapter 32 →

1Ya re ge ba feditše tšeo ka moka, Baisiraele bohle ba ba bego ba le moo ba tšwela metseng ya Juda ba pšhatlaganya dikokwane tša maswika le dikokwane tša Ashera, ba phušola meboto le dialetare mo nageng ya Juda ka moka le nageng ya Benyamini, ba fediša dilo tšeo; ya ba gona Baisiraele ba boelago metseng ya gabo magaeng a bona.

2Gomme Hiskia a beakanya dihlopha tša baperisita le tša Balefi ka mo di bego di le gona, e mongwe le e mongwe a tseba modiro wa gagwe; baperisita le Balefi ya ba ba go tliša dihlabelo le dileboga, le ba go reta Morena le go mo opelela dikgorong tša meago ya Morena.

3Yena kgoši mo go leruo la gagwe a ntšha dibego tša go dira dihlabelo tša bosasa le tša mantšiboa, le dihlabelo tša Sabatha, le tša kgwedi e mpsha, le tša menyanya ka mo go ngwadilwego molaong wa Morena.

4A boelela le batho ba ba agilego Jerusalema a re: Ntšhang kabelo ya baperisita le ya Balefi, gore bona ba kgone go tiiša tša molao wa Morena.

5Ge go kwala lentšu leo, Baisiraele ba tliša dithakangwaga tše ntši tša mabele le tša morara le tša makhura, le dinose, le tša dienywa ka moka tša mašemo; ba tliša sa lesome ka tlalo.

6Gomme Baisiraele le Bajuda ba ba bego ba agile metseng ya Juda, le bona ba tliša sa lesome sa dikgomo le sa dinku, le sa lesome sa dineo tše kgethwa tše ba di kgethetšego Morena Modimo wa bona, ba di ntšha ya ba mekgobokgobo.

7Ba thomile ka kgwedi ya boraro go di kgobela, ba fetša ka kgwedi ya go šupa.

8Hiskia le bakgoma ge ba tla ba bona mekgobo yeo, ba leboga Morena le setšhaba sa gagwe.

9Hiskia a botšiša baperisita le Balefi ka baka la mekgobo yeo.

10Asaria moperisita e mogolo wa leloko la Tsadoko a fetola a re: E sa le ge ba thoma go ntšhetša Ngwako wa Morena kabelo ye, re a ja, re a khora mme go šala tše ntši, ka gobane Morena o šegofaditše setšhaba sa gagwe, gwa ata tše di šalago tše.

11Ke mo Hiskia a laetšego gore go lokišwe nywakwana mo Ngwakong wa Morena; mme ba e lokiša.

12Mo go yona ba iša dikabelo tšeo, ba dira ka go botega; ba iša le tša lesome, le dineo tše kgethwa. Molaki wa tšona ya ba Konanya Molefi, a hlatlangwa ke Simei monnagwe.

13Balebeledi ba ba bego ba bušwa ke Konanya le Simei monnagwe ka taelo ya kgoši Hiskia le ya Asaria molaki wa Ngwako wa Modimo, e be e le Jehiele, le Asasia, le Nahathe, le Asahele, le Jerimothe, le Josabadi, le Eliele, le Jisimakia, le Mahathe, la Benaya.

14Kore morwa wa Jimina Molefi e be e le moleti wa kgoro ya thoko ya bohlabela, e le molebeledi wa dineo tša go ithapa tša Modimo, le wa go ntšha dikabelo tša seekaro sa Morena, tšona tše kgethwakgethwa.

15A tlatšwa ke Edeni, le Minyamini, le Jesua, le Semaya, le Amaria, le Sekanya, ba e bego e le ba metse ya baperisita, ba botilwe ge ba abela bana ba bobona dikabelo, ba bagolo le ba banyane.

16Ba abetše bohle ba ba bego ba ngwadilwe, ba thoma ka masoganyana a nywaga e meraro, ba iša go ba ba fetago bao, ka moka ba ba tsenago Ngwakong wa Morena ba dira mediro ya ka mehla ka matšatši a a ba lebanego, ba hlankela Morena ka go ya ka dihlopha tša bona.

17Lengwalo la maina a baperisita, lona le be le eya ka meloko ya bona. Balefi le bona ba be ba ngwalwa ge ba na le nywaga e masome a mabedi le e fetago yeo, gwa iwa ka mediro e ba lebanego le ka dihlopha tša bona.

18Ba be ba ngwadilwe le bana ba bona, le basadi ba bona, le barwa ba bona, le barwedi ba bona, leloko ka moka; gobane ba be ba botilwe gore ba tlo babalela tše kgethwa.

19Le baperisita barwa ba Arone ba dinageng tša metsana ya dilete tša bona, ka moka ba be ba beetšwe balaki bao maina a bona a boletšwego, gore banna ka moka ba baperisita ba newe dikabelo gotee le Balefi bala ba ba ngwadilwego.

20Ke tšona tše Hiskia a di dirilego mo nageng ya Juda ka moka, a dira tše di bolo le tše di lokilego, a botegela Morena Modimo wa gagwe.

21Mediro ka moka ye a e dirilego, ge a beakanya mediro ya Ngwakong wa Modimo, le mediro ya melao le ya ditaelo, o be a e thoma a nyakile Modimo ka pelo ya gagwe ka moka, mme a letlega.

← Chapter 30 Jump to: Chapter 32 →