2 Chronicles 7

Sotho 1951 (BIBELE)

← Chapter 6 Jump to: Chapter 8 →

1Ya re ge Salomo a sa tšo fetša go rapela, gwa theoga mollo o etšwa legodimong, wa fiša dihlabelo le didimo mme Ngwako wa tlala letago la Morena.

2Baperisita ba ba ba šitwa go tsena Ngwakong wa Morena ka baka la letago la Morena le le bego le tletše moo Ngwako wa Morena.

3Baisiraele ke moka ba bona mollo o fologa, le letago la Morena le le godimo ga Ngwako, ba khunama ba inametša difahlogo fase lebatong, ba lotšha ba leboga Morena gobane ke yo botse, yo botho bja neng le neng.

4Bjale kgoši le setšhaba ka moka ba tlišetša Morena didimo.

5Kgoši Salomo a tliša didimo tša dikgomo tše dikete tše masome a mabedi a metšo e mebedi; ya ba gona go kgakola Ngwako wa Modimo, ge kgoši le setšhaba ba dira ka mokgwa wo.

6Baperisita ba be ba eme ba dira modiro wa bona; Balefi bona ba be ba le diletšong tša dikoša tša Modimo tše di bego di dirilwe ke kgoši Dafida, ba re: Lebogang Morena yo botho bja neng le neng! Baperisita ba letša dinaka ba lebane nabo, Baisiraele ka moka ba eme fao.

7Gomme Salomo a kgakola lapa la gare le le bataganego le Ngwako wa Morena, ya ba la go tliša dihlabelo le makhura a dibego, ka ge aletare ya mphiri ye Salomo a bego a e dirile e sa lekane dihlabelo le dibego le makhura.

8Mehleng yeo Salomo o dir le monyanya wa matšatši a šupago, a na le Baisiraele ka moka, mašaba a magologolo a ba ba tšwago nageng e gomago ka Hamathi le ka noka ya Egipita.

9Tšatši la seswai ba le dirile la pitšo, gobane ba be ba feditše matšatši a šupago ba kgakola aletare, ba tsebo dira monyanya wa matšatši a šupago.

10Ka tšatši la masome a mabedi a metšo e meraro la kgwedi ya go šupa a laelana le batho, mme ba boela magaeng a bona ba thabile ba natefetšwe ke tše botse tše Morena a di diretšego Dafida le Salomo le setšhaba sa gagwe sa Isiraele.

11Ya re ge Salomo a phethile Ngwako wa Morena, le ngwako wa mošate, le tšohle tše a bego a rata go di dira Ngwakong wa Morena le ngwakong wa gagwe,

12Morena a tla a bonwa ke Salomo e le bošego, a mo rera a re: Thapelo ya gago ke e kwele, mme felo fa ke go kgethile gore e be Ngwako wa ka wa didimo.

13Bjalo ge nka tswalela legodimo, pula ya hlokwa, goba ge nka tliša tšie ya senya naga, goba ge nka roma dinkhu tša wela setšhaba sa ka,

14setšhaba sa ka se se bitšwago ka leina la ka, ge se ka ikokobetša sa rapela sa nyaka sefahlogo sa ka, sa lahla ditsela tše mpe tša sona, gona ke tlo ba kwa ke le legodimong, ka ba lebalela sebe, ka fodiša naga ya bona.

15Bjale mahlo a ka a tlo dula a lebeletše, mme tsebe tša ka di tlo theetša thapelo tša felo fa;

16gobane bjale ke ithatetše Ngwako wo ka o kgetha gore leina la ka le dule fa neng le neng; mahlo a ka le pelo ya ka di tlo ba fa ka mehla le mehla.

17Ge wena o ka phela o lebane le nna, wa etša Dafida tatago, wa dira tšhole tše ke go laelago tšona, wa hlokomela melao ya ka le mekgwa ya ka,

18gona ke tlo tiiša sedulo sa mmušo wa gago, bjalo ka ge ke kwane le Dafida tatago ka re: O ka se ke wa hlaelelwa ke monna wa go buša Isiraele.

19Fela, ge le ka hlanoga la tlogela melao ya ka le ditaelo tša ka tše ke di beilego pele ga lena, ge le ka ya la hlankela medimo e šele la e khunamela,

20gona ke tlo le tomola mo nageng ya ka ye ke le neilego yona; gomme Ngwako wo ke o kgethetšego leina la ka, ke tlo o lahla, ya tlo ba wa go kwerwa ka difela tša ditšhaba tšohle.

21Ke mo Ngwako wo, le ge o phala nywako yohle, e a tlogo feta ka fa a tlogo o tšhoga a re: Ke ka baka lang ge Morena a dirile naga ye le Ngwako wo ka mokgwa wo?

22Mme gwa tlo thwe: Ke ka gobane ba tlogetše Morena Modimo wa botatabo e a ba ntšhitšego nageng ya Baegipita, mme ba gomarela medimo e šele ba e khunamela ba e hlankela; bošula bjo Morena o bo tlišitše godimo ga bona ka baka leo.

← Chapter 6 Jump to: Chapter 8 →