2 Chronicles 5

Sotho 1951 (BIBELE)

← Chapter 4 Jump to: Chapter 6 →

1Mediro ye ka moka ya Ngwako wa Morena ye Salomo a bego a e dira, ge e phethilwe, ke mo Salomo a tlišitšego dilo tše di kgethilwego ke Dafida tatagwe, le disilifera, le digauta, le dilo ka moka a di boloka dintlong tša matlotlo tša Ngwakong wa Modimo.

2Mohla woo Salomo a botha bagolo ba Isiraele, le babuši bohle ba meloko, le bakgoma ba dilete tša Baisiraele, ba tla Jerusalema gore ba rotoše polokelo ya kgwerano ya Morena, ba e rwale motseng wa Dafida wa Tsione.

3Banna ba Isiraele ba phuthegela go kgoši ka moka ga bona, ya ba monyanya ka kgwedi ya go šupa.

4Bagolo ba Isiraele ba tla bohle; gomme Balefi ba kuka polokelo,

5ba e rotoša le ntlo ya kgwerano, le dibjana tše dikgethwa ka moka tše di bego di le Ntlong ya kgwerano, tša rwalwa ke baperisita le Balefi.

6Kgoši Salomo le phuthego ya Baisiraele ka moka, ya ba ba bego ba kgobokane pele ga polokelo, ba hlaba dinku le dikgomo tše ntšintši, tše di sa balwego, tšeo go sa tsebjego palo ya tšona ka boati.

7Ya ba gona baperisita ba tlišago polokelo ya kgwerano ya Morena, ba e bea felo ga yona Ngwakong wa moseo sekgethwakgethweng ka tlase ga diphego tša Bakerubi.

8Bakerubi ba be ba phurolotše diphego tša bona ba okametše polokelo.

9Mešikaro yona e be e le e metelele, dintlha tša yona di bile di bonala ka mono pele ga sekgethwakgethwa; fela, e be e sa tšwelele ka ntle ga sona. Gomme polokelo e sa dutše moo le nankhono.

10Ka mo teng ga polokelo go be go se selo ge e se diphaphathi tše pedi tšela tše Moshe a di beilego mo go yona ba le kwa Horebe, mola Morena a dira kgwerano le Baisiraele ge ba etšwa Egipita.

11Ya re ge baperisita ba boa sekgethweng, gobane mohla woo baperisita ka moka ba ba bego ba le gona, ba be ba ikgethile, ba se ke ba ya ka dihlopha tša bona,

12ge go ema Balefi bohle ba baopedi, boAsafa le Hemane le Jeduthune, le barwa ba bona le bana ba bobona, ba apere tša leokodi, ba swere meropa le makope le diletšo, ba eme thoko ya bohlabela ya aletare, ba na le baperisita ba lekgolo le masome a mabedi ba go letša diphalafala,

13ge baletši ba dinaka le baopedi ba ela gotee, ba kwala bjalo ka ge eke ke lentšu la motho o tee, ba reta Morena ba mo leboga, ya re ge ba hlaboša mantšu gotee le dinaka le meropa le diletšo tše dingwe, ba re: Lebogang Morena, gobane ke yo botse, yo botho bja neng le neng! Ke ge Ngwako, Ngwako woo wa Morena o tlala leru.

14Baperisita ba šitwa go ema le go dira modiro wa bona ka baka la leru, gobane letago la Morena le be le tletše Ngwako wa Modimo.

← Chapter 4 Jump to: Chapter 6 →