2 Chronicles 4

Sotho 1951 (BIBELE)

← Chapter 3 Jump to: Chapter 5 →

1A dira le aletare ka mphiri. Botelele bja yona le bophara bja yona e be e le meelo e masome a mabedi, boemo e be e le meelo e lesome.

2A dira le mogopo o mogolo o tšholotšwego, wo e bego e re ge o elwa go tloga morumong go ya morumong wa ka thoko yela, ya ba meelo e lesome; leemo e be e le meelo e mehlano; lenti la go dikologa le morumo le be le tšea meelo e masome a mararo.

3Ka tlase ga morumo o be o dikologwa ke diswantšho tša maraka; maraka a lesome a tšea sebaka sa moelo o tee, a dikologa le mogopo thoko tšohle e le melokoloko e mebedi ya maraka.

4Mogopo wo o be o beilwe godimo ga dikgomo tše lesome la metšo e mebedi; tše tharo di lebile leboa; tše tharo di lebile bodikela; tše tharo di lebile borwa; tše tharo di lebile bohlabela; mogopo o be o rwelwe ke tšona di išitše marago ka teng.

5Ge e le bokoto bja tshipi ya mogopo woo bo be bo lekana le bophara bja seatla; gomme morumo wa wona o be o swana le wa lefišwana le letšoba ge le palegile. Mogopo wo o be o tlala ge o tšhetšwe meeta e dikete tše tharo.

6A dira le dihlapelo tšela tše lesome; tše tlhano tša bewa ka thoko ya le letona; tše tlhano tša bewa ka thoko ya la ntsogošo; e be e le tša go hlapela mo go tšona, le tša go hlatswa dilo tša dihlabelo. Mogopo o mogolo e be e le wa go hlapela baperisita.

7A dira le dihlomapone ka gauta, tše lesome, ka go ya ka diswantšho tša tšona; a di bea mo Ntlongkwethwa; tše tlhano tša bewa ka go le letona; tše tlhano tša bewa ka go la ntsogošo.

8A dira le dithalana tše lesome, a di bea Ntlongkgethwa; tše tlhano tša bewa ka go le letona; tše tlhano tša bewa ka go la ntsogošo; a dira le meruswi e lekgolo ka gauta.

9A dira lapa la baperisita, le lapa le legolo, le difero tša malapa; mamati a difero a a manega ka mphiri.

10Mogopo o mogolo o o beile ka thoko ya borwa, mo lehlakore la thoko ya bohlabela le gomago ka thoko ya borwa.

11Hurama o dirile le mabeana le meruswi ya go fokela, a ba a phetha mediro ye a e diretšego kgoši Salomo Ngwakong wa Modimo.

12Le dikokwane tše pedi tšela, le dikgokolwana tša tšona, le dihlogo tše pedi tša go bewa godimo ga tšona, le malokwa ala a go apeša dihlogo,

13le dikgokolwana tše di etšago marapa tše makgolo a mane tše di bego di kgoketšwe malokweng ya ba melokoloko e mebedi ya marapa mo malokweng a go apeša dihlogo tša dikokwane kwa dintlheng tša tšona.

14A dira le dikoloinyana tšela tša go bea megopo yela ya go hlapa.

15A dira mogopo o mogolo, le dikgomo tše lesome la metšo e mebedi tša go o rwala,

16le dipitša, le mabeana, le dihlaba, le dilwana tša modiro woo ka moka. Ke tšona tše Hurama-Abi a di diretšego kgoši Salomo, gore e be tša ngwako wa Morena. O di dirile ka mphiri o ritetšwego.

17Kua molaleng wa noka ya Jorodane, mo mmu e lego o montši, gare ga Sukothe le Tsereda, ke gona mo kgoši e laetšego gore di tšhollwe gona.

18Gomme dilo tšeo ka moka kgoši Salomo o di dirile e le tše ntšintši, gobane mphiri e be e le o montši o sa elwe boima.

19Salomo a dira dilo ka moka tša Ngwako wa Modimo, e lego aletare ya gauta, le dithalana tšela tša go bea dinkgwaponwa,

20le dihlomapone, le dipone tša tšona tša gautatshekegi, tša go gotetšwa pele ga sekgethwakgethwa ka mokgwa wa tšona,

21le matšoba a mo diponeng, le matlaonyana a gauta; e be e le tša gautatshekegi.

22A dira le mefaka; le meruswi ya go fokela, le mabeana a go thuntšha diorelo, le megopšana; ka moka e be e le tša gauta e botse; le mojako wa Ngwako, le mamati a wona a sekgethwakgethweng, le mamati a Ntlokgethwa e be e le a gauta.

← Chapter 3 Jump to: Chapter 5 →