2 Chronicles 30

Sotho 1951 (BIBELE)

← Chapter 29 Jump to: Chapter 31 →

1Gomme Hiskia a iša lentšu go Isiraele le go Juda; le Baefuraimi le Bamanase a ba ngwalela mangwalo, a re ba tle Ngwakong wa Morena ba direle Morena Modimo wa Isiraele Paseka.

2Kgoši ya eletšana le bakgoma ka moka, le phuthego ya Jerusalema, ba re go direlwe Morena Paseka ka kgwedi ya bobedi,

3gobane ba šitilwe go dira Paseka ka mohla wola, ka ge baperisita ba sešo ba ikgetha ka mo go bego go swanetše, le setšhaba se sa ka sa phuthegela Jerusalema.

4Gomme taba ye ya kgahla kgoši le setšhaba ka moka.

5Ba tiiša ba re: Baisiraele ka moka ba tsebišwe go goma ka Bereseba le ka Dani, gore ba tle ba direle Morena Modimo wa Isiraele Paseka motseng wa Jerusalema, gobane e be e šetše e le kgale ba sa hlwe ba e dira ka mo go ngwadilwego ka gona.

6Gomme batseta ba sepela le naga ya Isiraele le ya Juda ka moka, ba swere mangwalo a kgoši le a bakgoma ba gagwe, ba fihliša malaeledi a kgoši, ba re: Lena Baisiraele! Boelang go Morena Modimo wa Aborahama le Isaka le Isiraele, gore le yena a boele go rena mašalela a phonyokgilego diatleng tša kgoši ya Asuri.

7Le se ke la etša botata weno le bana ba bolena, ba ba bego ba hlanogetše Morena Modimo wa botatabo, a ba a ba gafa ba senyega ka mokgwa le o bonago.

8Bjale le se ke la šatalatša melala ya lena bjalo ka botata weno. Išang diatla go Morena, le tle sekgethweng sa gagwe se a se kgethilego ka go sa felego, le hlankele Morena Modimo wa lena gore bogale bja gagwe bjo bo tukago, bo re gomele.

9Gobane ge le ka boela go Morena, lena le ba bolena le bana ba lena le tlo gaugelwa ke bao ba ba thopilego, ba boela nageng ye, gobane Morena Modimo wa lena ke yo kgaugelo, o kwela batho bohloko. Ge le ka boela go yena, a ka se ke a le gerula.

10Gomme batseta ba ya le metse nageng ya Efuraimi le ya Manase, ba fihla go ya Sebulone; gomme ba segwa, ba kwerwa ke batho ba naga tšeo.

11Fela, ba bangwe ba ga Asere le ba ga Manase le ba ga Sebulone ba ikokobetša ba tla Jerusalema.

12Le gona seatla sa Morena se be se na le ba Juda, a ba nea pelo e tee, gore ba dire ka taelo ya kgoši le ya bakgoma ka lentšu la Morena.

13Motseng wa Jerusalema gwa phuthega setšhaba se segolo; ba dira monyanya wa dinkgwa tše di sa omelwago ka kgwedi ya bobedi; ya ba phuthego e kgolo ka kudu.

14Gomme ba nanoga ba tloša dialetare tše di bego di le Jerusalema, le tšohle tša go thuntšhetša diorelo ba di tloša, ba di lahlela molapong wa Kidirone,

15ya ba gona ba hlabago Paseka ka letšatši la lesome la metšo e mene la kgwedi ya bobedi. Ge e le baperisita le Balefi ba be ba llwe ke dihlong; bjale ba tla ba ikgethile, ba tliša dihlabelo Ngwakong wa Morena.

16Ba ema boemong bja bona, ka mo go ba swanetšego ka molao wa Moshe monna wa Modimo. Baperisita ba foka ka madi, ba a tšea diatleng tša Balefi.

17Gobane mo phuthegong go be go sa na le ba bantši ba ba sešogo ba ikgetha; bjale Balefi ge ba hlaba dikwanyana tša Paseka, ba di hlabela bohle ba ba sešogo ba ithakgafatša;

18ba bantši ba bona e be e le ba ga Efuraimi, le ba ga Manase, le ba ga Isashara, le ba ga Sebulone. Bona bao ba lle Paseka ba sa latele molao o ngwadilwego. Fela, Hiskia o ba rapeletše a re: A Morena yo botho a ba lebalele;

19a lebalele bohle ba ba itokišitšego ba nyaka Modimo, Morena, Modimo wa botatabo ka pelo, le ge ba sa ka ba thakgafatšwa ka molao wa sekgethwa.

20Gomme Morena a kwa se Hiskia a se kgopetšego, a lesa sethšaba sa fola.

21Baisiraele ba ba bego ba tlile Jerusalema, ba bina monyanya wa dinkgwa tše di sa omelwago, ba o bina matšatši a šupago, ba o bina ba thabile gagolo. Balefi le baperisita ba reta Morena ka mehla ba swere diletšo tša Morena, ba di letša ka maatla.

22Gomme Hiskia a bolela le Balefi ka botho ka ge ba swere modiro wa Morena ka pelo e tšhweu; mme ba ja tša dihlabelo tša monyanya ka matšatši a šupago ao, ba hlaba tša dileboga ba reta Morena Modimo wa botatabo.

23Gomme phuthego ka moka ya na ya kwana ya re: A go dirwe monyanya wa matšatši a šupago gape; ba fetša matšatši a mangwe a šupago; ya ba a lethabo.

24Gobane Hiskia kgoši ya Juda o be a ntšheditše phuthego dipowana tše sekete, le dinku tše dikete tše di šupago. Bakgoma le bona ba ntšhetša phuthego dipowana tše sekete, le dinku tše dikete tše lesome; gomme baperisita ba ba bego ba ikgethile e be e le ba bantši.

25Phuthego ka moka ya Juda ya na ya thaba, le bona baperisita le Balefi, le lešaba ka moka la ba ba tlilego ba etšwa go Isiraele, le ba mathoko ba ba bego ba tlile ba etšwa nageng ya Isiraele, le ba ba bego ba agile nageng ya Juda.

26Motseng wa Jerusalema gwa ba le lethabo le legolo, gobane go tloga mehleng ya Salomo morwa wa Dafida kgoši ya Isiraele go be go sa ka gwa dirwa tše bjalo motseng wa Jerusalema.

27Gomme baperisita le Balefi ba ema ba šegofatša setšhaba; gomme mantšu a bona a kwala, mme thapelo ya bona ya fihla bodulong bjo bokgethwa bja Morena kua legodimong.

← Chapter 29 Jump to: Chapter 31 →