2 Chronicles 15

Sotho 1951 (BIBELE)

← Chapter 14 Jump to: Chapter 16 →

1Moya wa Morena wa na wa tlela Asaria morwa wa Odede.

2A tšwa a gahlanetša Asa a mo rera a re: Ntheetše wene Asa, le lena bohle ba Juda le ba Benyamini. Morena o ema le lena, le lena le ema le yena. Ge le mo tsoma, le tlo mmona. Ge le ka mo tlogela, le yena o tlo le tlogela.

3Baisiraele ba feditše matšatši a mantši ba se na Modimo e wa ruri, ba se na moperisita e a ba rutago, ba se na molao.

4Mohla ba tlalešwe, ge ba boela go Morena Modimo wa Isiraele, mme ba mo nyaka, yena ga a ka a gana go hwetšwa ke bona.

5Mehleng yeo, e a tšwago le e a boago o hweditše go se šebešebe, go na le meferefere e mentši ya beng ba lefase le;

6ditšhaba di be di šušulana, motse o šušula o mongwe, gobane Modimo o be a ba raranya ka ditlaletšo tše ntši.

7Tiang maatla gee, le se rephiše matsogo; gobane le tlo bona moputso ka mediro ya lena.

8Asa a re go kwa kgoelelo ya moporofeta Odede, a tiiša maatla a fediša makgapha mo nageng ya Juda ka moka le ya Benyamini, le metseng ka moka ye a e thopilego dithabeng tša Efuraimi; a mpšhafatša Aletare ya Morena e bego e le pele ga mathudi.

9A botha ba Juda le ba Benyamini ka moka, le ba mathoko ba ba bego ba etšwa Efuraimi le Manase le Simeone; gobane Baisiraele ba bantši ba be ba kopana le Juda, ge ba bona Morena Modimo a na le Juda.

10Ba phuthegela Jerusalema ka kgwedi ya boraro ya ngwaga wa lesome le metšo e mehlano wa pušo ya Asa.

11Mohla woo ba tlišetša Morena dibego tša dithebola tše ba bego ba boile natšo; dipholo e be e le tše makgolo a šupago, dinku e be e le tše dikete tše di šupago.

12Ba dira kgwerano ya go re ba tlo nyaka Morena Modimo wa botatabo ka pelo ka moka le ka moya ka moka.

13Ba re, mang le mang e a sa tsomego Morena Modimo wa Isiraele, a bolawe, e ka ba e monyenyane goba e mogolo, e ka ba monna goba mosadi.

14Ba enele Morena ka lentšu le legolo, ka megobo le ka dinaka le ka diphalafala.

15Bajuda ka moka ba thabela keno yeo, gobane ba be ba enne ka pelo ka moka, ba mo nyaka ka go rata ga bona ka moka, ba ba ba mo hwetša; mme Morena a ba khutšiša ka thoko tše go fela.

16Asa a ba a amoga Maaka mmagwe bohumagadi, ka ge a dirile seswantšho sa Ashera sa makgapha. Asa a remakanya seswantšho seo, a se pšhatlaganya, a se fiša nokeng ya Kidirone.

17Meboto yona ga ya ka ya fedišwa mo go Isiraele; fela, pelo ya Asa yona e be e se na bosodi mehla yohle a sa phela.

18Ka moka tše tatagwe a bego a di kgethile, le tše di kgethilwego ke yena, o di tlišitše Ngwakong wa Modimo, disilifera le digauta le dibjana.

19Gwa ba gwa tla ngwaga wa masome a mararo a metšo e mehlano wa pušo ya gagwe go se na ntwa ye e lwewago.

← Chapter 14 Jump to: Chapter 16 →