2 Chronicles 21

Sotho 1951 (BIBELE)

← Chapter 20 Jump to: Chapter 22 →

1Josafate o ithobaletše le botatagwe; o bolokilwe le botatagwe motseng wa Dafida; legatong la gagwe gwa buša Jorama morwa wa gagwe.

2Jorama o be a na le bana babo, bana ba Josafate, boAsaria, le Jehiele, le Sekaria, le Asariahu, le Mikaele, le Sefatya; ka moka ba e be e le barwa ba Josafate kgoši ya Juda.

3Tatabo o be a ba neile thoto e ntši, le disilifera, le digauta, le tše bohlokwa, le metse ya dibo mo nageng ya Juda; ge e le mmušo wona a o nea Jorama, wa ntlha e be e le yena.

4Ya re ge Jorama a šetše a tšere bogoši bja tatagwe, a tiile maatla, a bolaya bana babo ka moka ka lerumo, le bakgoma ba bangwe ba Isiraele.

5Jorama mola a tšea bogoši o be a na le nywaga e masome a mararo a metšo e mebedi, a fetša nywaga e seswai e le kgoši motseng wa Jerusalema.

6Yena o tšere ka tsela ya dikgoši tša Isiraele a etša ba leloko la Ahaba, gobane morwedi wa Ahaba e be e le mosadi wa gagwe; a dira tše di bego di befela Morena.

7Le ge go le bjalo Morena o be a sa rate go fediša leloko la Dafida, ka baka la kgwerano ye a e dirilego le Dafida a re: Ke tlo bea lebone la gago le la bana ba gago pele gaka ka mehla.

8Mehleng ya gagwe mmušo wa Juda o hlanogetšwe ke Baedomo, ba ipeela kgoši ya bona.

9Jorama a ba tšwela dira a na le bakgoma ba gagwe, le dikoloi tša gagwe ka moka; a tšwa e sa le bošego a fenya Baedomo ba ba bego ba mo tietše gare a na le balaodi ba dikoloi.

10Le ge go le bjalo Baedomo ba fela ba hlanogetše mmušo wa Juda le lehono. Mehleng yeo le motse wa Libina o hlanogetše mmušo wa Juda; di mo tletše ka gobane a tlogetše Morena Modimo wa botatagwe.

11O bile o tsošitše meboto yela dithabeng tša Juda, a otswiša ba Jerusalema, a aroša Juda.

12Jorama o kile a tlelwa ke lengwalo le etšwa go moporofeta Elia le re: Ka gobane o lahlile tsela ya Josafate tatago, le tsela ya Asa kgoši ya Juda,

13wa tšea ka tsela ya dikgoši tša Isiraele, wa diriša Juda le ba Jerusalema bootswa, wa etša ba leloko la Ahaba ba ba dirišago Isiraele bootswa, le gona wa bolaya bana beno, ba ba bego ba go phala,

14O tsebe gore Morena o tlo otla setšhaba sa gago ka kotlo e kgolo gotee le bana ba gago le basadi ba gago, le maruo a gago ka moka.

15Ge e le wena mong o tlo tsenwa ke bolwetši bjo bošoro bja mo maleng; mala a gago a tlo ba a tšwela ntle ka bjona bolwetši bjoo bja mehla le mehla.

16Gomme Morena a tsoša dipelo tša Bafilisita, le tša Baarabia ba ba bapetšego le Bakushe, ba lwa le Jorama.

17Ba rotogela nageng ya Juda ba e hlagela, ba thopa dithoto ka moka tše di bego di le ngwakong wa Kgoši, ba thopa le bana ba gagwe, a se ke a šalelwa ke morwa ge e se Joahase e monyane wa bona barwa ba gagwe.

18Ge go diregile tšona tše ka moka, ya ba gona Morena a mo otlago ka bolwetši bja mala a gagwe, ka bolwetši bjo bo sa folego.

19A fela a koka go ya le nywaga; ge go fetile nywaga e mebedi, mala a gagwe a tšwela ntle ka bolwetši bjoo, a ba a hwa ka mahloko a magolo.

20Yena setšhaba sa gagwe ga sa ka sa mo thuntšhetša diorelo bjalo ka ge ba di thuntšheditše botatagwe.

21Mola a tšea bogoši o be a na le nywaga e masome a mararo a metšo e mebedi; a fetša nywaga e seswai a le kgoši motseng wa Jerusalema. O sepetše a sa ratwe ke motho. Ba mmolokile motseng wa Dafida, e sego mabitleng a dikgoši.

← Chapter 20 Jump to: Chapter 22 →