2 Kings 10

Sukuma 2019

← Chapter 9 Jump to: Chapter 11 →

1Ū mu Samalila baalī bataalī mo bagosha makūmi mpungatī ba būbyīle bo ng'wa Ahabu. Na lūūlū ū Yehū ūbandīkīla nyalūba a basugi ba Yezileeli gīkī bajitwale ī Samalia ū kū banamhala na a baleji ba bitūnja ba numba ya ng'wa Ahabu. Ūhaya,

2“Alilūūlū yīyo nyalūba namutūmīla, ūlū ng'ūmala dūhū ū kwīsoma, īkī a baana ba ng'wa sīng'we būgonzo mulī nabo kwenūko, na a magogoteni mulī nago nī falasa, nū nzengo gwing'we gūzengeelilwe ndugu, hama nī shilanga mulī nasho koi,

3nsolagi ūmò wa bitūnja ba ng'wa sīng'we būgonzo ūyo mulantogwe kūtinda pye a biye, ūyo mulībona gīkī ngosha apandile hasī; ū ng'wenūyo hū ntūūlagi a h'isumbī lya būtemi lya ng'wa ise.”

4Alīyo a banhū benabo bakogoha no; būhaya, “A batemi a babīlī balemeelwa kūng'wīmīīla, al'a bise tūkūdūgīja he?”

5Na lūūlū ū ntaale wa h'ikūlū nū nsugi wa mu nzengo, na a banamhala, na a baleji ba bitūnja ba ntemi būnshokeja nyalūba ū Yehu balīhaya, “A bise tūlī batūmami bako, tūkwīta būlī mhayo ūyo ūtūlagīja. Tūtīko kūsola ntemi ūngī; bebe ng'wenekīlī ītaga īyo ūlībona īlībeelela.”

6Hūna ū Yehu ūbandīkīla nyalūba yīngī alībawīla, “Ūlū mulī kū lwandī lwane, na mulīzunya ū kwīta gīt'ūmo nalīmulagīīlīla, na lūūlū batīnagi ī mitwe a bitūnja ba ng'wa sīng'we būgonzo, ng'wize Yezileeli ūko nalī kūnū; a makanza gīt'aya ī ntondo mubize ng'washikaga aha.” Baalīho basūmba makūmi mpungatī, ba mu numba ya ntemi, baalang'hanagwa na banhū bataale ba mu nzengo gwenūyo.

7Aho yashika ī nyalūba yenīyo būbadima a badinha benabo būbabūlaga bose makūmi mpungatī, ī mitwe yabo bītūūla mu shigabbu, būntwalīla ū Yehu ī Yezileeli.

8Ū ntaale wa batwaji ūūkang'wīla ū Yehu, “Bīyenha ī mitwe ya bitūnja ba ntemi!” Ū Yehu ūbawīla, “Ītūūgagi matūūgo abīlī hanze bbihī na mita kūshisha ntodo dilū.”

9A ha ntondo dilū ū Yehu ūja ho ī hanze, ūūkīmīīla ū kū būtongi wabo pye a banhū ūbawīla, “A bing'we mutī na būbi. Nene h'ūyo naang'wijombokile ū baba būgonzo nūmūlaga; alīyo ūyo wababūlagile a bose aba nani?

10Na lūūlū deebagi gete gīkī gūtīho mhayo ūyo gwahayiwa na SEEBA kūlwa numba ya ng'wa Ahabu ūyo gūkūleba ho nūūlū hado. Ū SEEBA alīīta gīt'ūmo walī wahayīla mu nzīla ya ntūmami wakwe Eliya.”

11Na ng'hana ū Yehu ūbabūlaga pye a ba lūdūgū lwa ng'wa Ahabu abo baalī basaagīīla mu Yezileeli; na a babo baalī bataale mu būsugi wakwe pye a bose, na a bimane ba kaya yakwe, na a bagabīji bakwe, atanekeelelile mpanga nūūlū ūmò.

12Hanuma ya yenīyo ū Yehu wīnga a henaho ūbūūka ajile Samalia, aho washika Beti-ekedi ya badīīmi,

13ūmanhya na badūgūye ba ng'wa Ahazia ntemi wa Yuda; ūbabūūja, “Mulī ba nani a bing'we?” Būng'wīla, “Tūlī badūgūye ba ng'wa Ahazia, tūjile kūgīsha kaya ya ntemi, nū nina wa ntemi.”

14Haho na haho ū Yehu ūlagīja, “Badimagi balī bapanga gīko;” būbadima ng'hana balī bapanga gīko, būkababūlagīla ha lwinzī lwa Beti-ekedi. Baalī banhū makūmi anè na babīlī, atalekeelile mpanga nūūlū ūmò wabo.

15Aho wīnga a henaho ūmanhya na Yehonadabu ng'witūnja o ng'wa Lekabu, walī mu nzīla wizaga kwibona nang'hwe; ū Yehu aho wangīsha ūmūja, “Ūlī būsangī būmò nū nene gīt'ūmo nene nalī hamò nang'ho?” Ū Yehonadabu ūhaya, “Nalīhamò nang'ho.” Ū Yehu ūng'wīla, “Ūlū chene, enhaga aha ū nkono gwako;” ū Yehu ūndima ū nkono gwakwe ūng'wingīja ū ng'wigogoteni lyakwe.

16Ū Yehu ūng'wīla, “Tūjage hamò ūkabūbone ū wilu ūbo nalī nabo kūlwa nguno ya ng'wa SEEBA.” Wigasha hamò nang'hwe ū ng'wigogoteni būja dege.

17Aho washika ī Samali ūbabūlaga pye a banhū ba numba ya ng'wa Ahabu abo baalī basaagīīla; ūbayagaja kūlenganīla nū mhayo go ng'wa SEEBA ūyo gwalī gwahayiwa na Eliya.

18Hūna ū Yehu ūbabilinga pye a banhū ūbawīla, “Ū Ahabu wantūmamīla hado no ū Baalī, ū Yehu ng'wene akūntūmamīla hataale.

19Alilūūlū, ī haha balaalīkagi pye a bahangi ba ng'wa Baalī, na a babo bakanamyaga bose pye; na a bagabīji bakwe a bose. Debelagi gete atizūkīja kūbiza ho nūūlū ūmò wabo, nguno nalī na nīmo gwa kūmfunīja ū Baalī shitambò shitaale. Ūyo alakīje ū kwiza numho jashilaga ī shikū jakwe.” Gwike ū Yehu wabalembaga, nguno walī na ng'hūmbū ja kūbayagaja a balamya ba ng'wa Baalī.

20Hanuma ya henaho ūbawīla, “Solagi lūshikū lwa shigukulu sha ng'wa Baalī.” Būlūsola, hama būlūkumūcha ū kū banhū.

21Hūna ū Yehu ūtūma mhola hose pye ū mu sī ya Isilaeli, pye a batūmami ba ng'wa Baalī biza; nūūlū ūmò atakīgije ū kwiza. Bookala pa ū mu hekalu ya ng'wa Baalī, kūshisha bishita mo.

22Ū Yehu ūng'wīla ū nang'hani wa chumba sha myenda ya batūmami ba mu hekalu ya ng'wa Baalī, “Benhelage shizwalo sha milīmo a batūmami ba ng'wa Baalī benaba bazwale.” Ūbenhela ī shizwalo.

23Hūna ū Yehu nū Yehonadabu ng'witūnja o ng'wa Lekabu bingīla ū mu hekalu ya ng'wa Baalī. Ū Yehu ūbawīla a batūmami ba ng'wa Baalī, “Lola lolagi chiza moi batizūbiza balīmo na batūmami ba ng'wa SEEBA; babize mo batūmami ba ng'wa Baalī dūhū.”

24Na lūūlū bingīla kūfunya shitambò na shitambò sha kūpemvwa. Alīyo ū Yehu walī wamala kūtūūla banhū makūmi anaane ī hanze ya hekalu yenīyo, ūbakomeleja alībawīla, “Ūlū ūmò wing'we aladondoshe hūna ūpūlūgūka nūūlū ūmò wa banhū abo nalībatūūla mu makono ging'we, ū wa kūdondosha ng'wenūyo ū būpanga wakwe būkūbiza ha ng'wanya gwakwe ūyo alaapūlūgūke.”

25Ū Yehu aho wamala ū kūfunya ī shitambò sha kūpemvwa, ūbalagīla a balang'hani na a bataale babo, “Ingīlagi mo lūūlū mukababūlage, mutizūleka akapūlūgūka nūūlū ūmò wabo.” Bingīla moi būbabūlaga bo kūtūmamīla shū. A balang'hani na a bataale babo bīponanja hanze ī mibimba yenīyo, hūna bingīla nū kū chumba sha mu gatī ya hekalu ya ng'wa Baalī.

26Ū mu hekalu ya ng'wa Baalī lyalīmo iwe lyeela, būlīfunya būlīpembeela moto.

27Ī liwe lyenīlo būlībelagūla gete, nī heekalu ya ng'wa Baalī bīkambagūla, yūgaya ū nīmo ūlū ītī kūtūmamīlwa gītī cholooni dūhū kūshisha na lelo īyī.

28Na lūūlū ū Yehu ūbiza wagwīnja ū mhayo gwa kūnamya Baalī ū mu Isilaeli.

29Gwike atīngile ū mu būkenaagūji bo ng'wa Yeloboamu ū ng'witūnja o ng'wa Nebati, ūbo walī wabenheleja a Baisilaeli kūhūba, ū būhūbi wa kūja na Dani kūlamya shiikolile sha ndama.

30Ū SEEBA ūng'wīla ū Yehu, “Īkī wītile ītūngīlīgije ū mu miso gane, wīyītīla ī numba ya ng'wa Ahabu gīt'ūmo naalī nahayīlile, ī numba yako īkwikala a h'isumbī lya būtemi wa Isilaeli kūshisha shibyalīlwe sha kanè.”

31Gwike ū Yehu atilang'hanile, atashimīzile na ng'holò yakwe yose ū mu shilagīlo sha ng'wa SEEBA, ū Mulungu wa Isilaeli; atīngile ū mu būhūbi bo ng'wa Yeloboamu ū ng'witūnja o ng'wa Nebati, ūbo walī wabenheleja Baisilaeli kūhūba.

32Hūna lūūlū ū mu shikū jenījo, ū SEEBA wandya kwīmegula ī sī ya Isilaeli īdoohe. Hazaeli ūbapyena a Baisilaeli pye a hose ū mu sī yabo

33Ī ya kū kīya na mongo gwa Yolodani, pyī ī sī ya Gileadi (a mapandī ayo gaalī ga ng'anda ja Gaadi, Lubeni na Manase); kwandīja Aloeli bbihī na mongo gwa Alinoni kūbītīla ū mu Gileadi kūja Bashani.

34Mihayo yīngī ī ya mu shikū ja būtemi bo ng'wa Yehu, īyo wīta nī ya būtindi wakwe, ī yose yandīkilwe mu shitabo sha ng'hūlū ja batemi ba Isilaeli.

35Ū Yehu wifuula na bakūlūgenji bakwe, ūjīkīlwa Samalia. Ng'witūnja wakwe Yehoahazi wingīla a ha ng'wanya gwakwe, ūbiza ntemi.

36Ī likanza ī lyose īlo walī nsugi wa Isilaeli mu Samalia lyalī myaka makūmi abīlī n'īnaane.

← Chapter 9 Jump to: Chapter 11 →