bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
2 Kings 15
2 Kings 15
Sukuma 2019
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 16 →
1
Mu ng'waka gwa makūmi abīlī na mpungatī aho Yeloboamu alī ntemi wa Isilaeli, ū Azalia ū ng'witūnja o ng'wa Amazia ūbiza ntemi wa Yuda.
2
Aho alandya kūtema walī na myaka ikūmi n'ītandatū; ūsuga ikanza lya myaka makūmi atanò n'ībīlī alī mu Yelusalemu. Ū nina walī muna Yelusalemu, ī lina witanagwa Yekolia.
3
Ū Azalia akīīta yawiza ū mu miso ga ng'wa SEEBA, kūlenganīla nū mumo walī wītīla ise Amazia.
4
Gwike a mapandī ga higūlya gatīnjiwe; a banhū baalī bataalī būja koi kūfunya shitambò na kūzuukīja būbbani.
5
Ū SEEBA ūngwisīja makoye ga būsaatu wa mbiji, ūkomanyiwa ūtūūlwa mu numba yakwe ya heeke; wikala ng'wenūmo kūshisha lūshikū lwa kūcha kwakwe. Ng'witūnja wakwe Yosamu hū ng'wene ūbiza ntaale wa mihayo ya ng'wkūlū, nī sī hū ūbiza nsugi wayo.
6
Mihayo yīngī ī ya mu shikū ja būtemi bo ng'wa Azalia yandīkilwe mu shitabo sha ng'hūlū ja batemi ba Yuda; ī yose īyo wīta.
7
Ū Azalia wifuula na bakūlūgenji bakwe, ūjīkwa bbihī nabo ū mu nzengo go ng'wa Daūdi. Ng'witūnja wakwe Yosamu ūbiza ntemi a ha ng'wanya gwakwe.
8
Mu ng'waka gwa makūmi adatū n'īnaane aho Azalia alī ntemi wa Yuda, Zakalia ng'witūnja o ng'wa Yeloboamu ūbiza ntemi wa Isilaeli mu Samalia; ūsuga ikanza lya myeji ītandatū.
9
Nang'hwe wīta yabūbi ū mu miso ga ng'wa SEEBA, gīt'ūmo ise walī wītīla. Atalekanile nū būhūbi bo ng'wa Yeloboamu ū ng'witūnja o ng'wa Nebati, ūbo walī wabenheleja a Baisilaeli kūhūba.
10
Shalumu ūng'wijomboka, ūng'wibanga ūmūlaga kū būtongi wa banhū, hūna wingīla wei a ha būtemi a ha ng'wanya gwakwe.
11
Mihayo yīngī ī ya mu shikū ja būtemi bo ng'wa Zakalia yandīkilwe mu shitabo sha ng'hūlū ja batemi ba Isilaeli.
12
Na lūūlū gūshikīīla ū mhayo go ng'wa SEEBA ūyo walī wawīlwa Yehu, “Ī numba yako īkwikala a h'isumbī lya būtemi wa Isilaeli kūshisha shibyalīlwe sha kanè.”
13
Mu ng'waka gwa makūmi adatū na kenda aho Uzia alī ntemi wa Yuda, Shalumu ng'witūnja o ng'wa Yabeshi ūbiza ntemi wa Isilaeli; ūsuga ikanza lya ng'weji gūmò alī mu Samalia.
14
Hūna Menahemu ng'witūnja o ng'wa Gadi ūfuma Tiliza, ūja ī Samalia kūndumīla ū Shalumu, ū ng'witūnja o ng'wa Yabeshi; ūmūlaga hūna ūbūsola wei ū būtemi a ha ng'wanya gwakwe.
15
Mihayo yīngī ī ya mu shikū ja būtemi bo ng'wa Shalumu, pyī nī ya wijomboki wakwe, yandīkilwe mu shitabo sha ng'hūlū ja batemi ba Isilaeli.
16
Ī likanza lyenīlo ū Menahemu wandya kwīkenaagūla ī mizengo, kwandīja Tiliza; hūna ūbasanga na a bikaji ba Tifusa na a ba mu bbihī bbihī nago ū nzengo gwenūyo, nguno bakabūlema ū būsugi wakwe. Ū nzengo gwa Tifusa ūgūkenaagūla kībi no, na a bakīma abo balī nda ūyūbatuumūla ī nda.
17
Mu ng'waka gwa makūmi adatū na kenda aho Azalia alī ntemi wa Yuda, Menahemu ng'witūnja o ng'wa Gadi ūbiza ntemi wa Isilaeli mu Samalia; ūsuga ikanza lya myaka ikūmi.
18
Wīta yabūbi ū mu miso ga ng'wa SEEBA. Ū mu shikū jose ja būsugi wakwe atagalūkile gīkī alekane nū būhūbi bo ng'wa Yeloboamu ng'witūnja o ng'wa Nebati, ūbo walī wabenheleja a Baisilaeli kūhūba.
19
Kwimanīla Puli ntemi wa Ashulu, wingīla ū mu sī yenīyo kwilwisha nayo; ū Menahemu ūng'winha tani makūmi adatū na mpungatī ja feza, gīkī aneke a ha būtemi, na hangī angunanhe ongeje kwikala ho a ha būtemi.
20
Ū Menahemu ūbatobisha bo nguzu a banhū ba mu sī yakwe ī feza jenījo. Būlī nsabi ūyo walīmo ū mu sī ūsooga shekeeli makūmi atanò ja feza, kūlwa kwinhwa ntemi wa Ashulu. Na lūūlū ū ntemi wa Ashulu wīnga, atikalile mo ū mu sī yenīyo hangī.
21
Mihayo yīngī ī ya mu shikū ja būtemi bo ng'wa Menahemu, nī yīyo wīta; yandīkilwe mu shitabo sha ng'hūlū ja batemi ba Isilaeli.
22
Ū Menahemu wifuula na bakūlūgenji bakwe, ng'witūnja wakwe Pekahia ūbiza ntemi a ha ng'wanya gwakwe.
23
Mu ng'waka gwa makūmi atanò aho Azalia alī ntemi wa Yuda, Pekahia ng'witūnja o ng'wa Menahemu ūbiza ntemi wa Isilaeli mu Samalia; ūsuga ikanza lya myaka ībīlī.
24
Ū Pekahia akīīta yabūbi ū mu miso ga ng'wa SEEBA. Atagalūkile gīkī alekane nū būhūbi bo ng'wa Yeloboamu ng'witūnja o ng'wa Nebati, ūbo walī wabenheleja a Baisilaeli kūhūba.
25
Ūmò wa batūmami ba mu būsugi bokwe lina lyakwe Peka, ng'witūnja o ng'wa Lemalia, ūng'wijomboka. Ūsola banhū makūmi atanò kūfuma Gileadi ūja nabo ī Samalia ūūkingīla ū munumba y'ikūlū ūnsanga ū Pekahia alī mu chumba sha kūpīlīla ūmūlagīla ng'wenūmo, hamò na Aligobi, na Alie. Na lūūlū ū Peka ūbiza wamūlaga ū Pekahia, ūbiza wei ū ntemi a ha ng'wanya gwakwe.
26
Mihayo yīngī ī ya mu shikū ja būtemi bo ng'wa Pekahia, nī yose īyo wīyīta; yandīkilwe mu shitabo sha ng'hūlū ja batemi ba Isilaeli.
27
Mu ng'waka gwa makūmi atanò na ībīlī aho Azalia alī ntemi wa Yuda, Peka ng'witūnja o ng'wa Lemalia ūbiza ntemi wa Isilaeli mu Samalia; ūsuga ikanza lya myaka makūmi abīlī.
28
Nang'hwe wīta yabūbi ū mu miso ga ng'wa SEEBA. Atagalūkile gīkī alekane nū būhūbi bo ng'wa Yeloboamu ng'witūnja o ng'wa Nebati, ūbo walī wabenheleja a Baisilaeli kūhūba.
29
Ū mu shikū jakwe ū ntemi Peka wa Isilaeli, wiza ntemi Tigilasi-pilesa wa Ashulu ūbadumīla ūdima mizengo ya, Ijoni, Abeli-beti-maaka, Yanoa, Kadeeshi, na Hazooli, nī Gileadi wīsola pyī nī Galilaya; nīyo pyī ī sī ya Nafutali, a banhū ba mu mapandī genayo ūbasaamīja Ashulu.
30
Ū mu shikū jenījo Hoshea ng'witūnja o ng'wa Ela ūng'wijomboka ū Peka ū ng'witūnja o ng'wa Lemalia. Ūntūla ūmūlaga, hūna ūbūsola wei ū būtemi; gwalī ng'waka gwa makūmi abīlī gwa būsugi wa ntemi Yotamu wa Yuda, ū ng'witūnja o ng'wa Uzia.
31
Mihayo yīngī ī ya mu shikū ja būtemi bo ng'wa Peka, nī yose īyo wīta; yandīkilwe mu shitabo sha ng'hūlū ja batemi ba Isilaeli.
32
Mu ng'waka gwa kabīlī aho Peka ng'witūnja o ng'wa Lemalia alī ntemi wa Isilaeli, Yotamu ū ng'witūnja o ng'wa Uzia ūbiza ntemi wa Yuda.
33
Aho alandya kūbiza ntemi walī na myaka makūmi abīlī n'ītanò; ūsuga ikanza lya myaka ikūmi n'ītandatū alī mu Yelusalemu. Ū nina witanagwa Yelusha, nshīke o ng'wa Sadoki.
34
Ū Yotamu akīīta yawiza ū mu miso ga ng'wa SEEBA, kūlenganīla nū mumo walī wītīla ise Uzia.
35
Gwike a mapandī ga higūlya gatīnjiwe; a banhū baalī bataalī būja koi kūfunya shitambò na kūzuukīja būbbani. Ū Yotamu akagūbeegeleja ū mita gwa kū lwandī lwa kwigūlya lwa hekalu ya ng'wa SEEBA.
36
Mihayo yīngī ī ya mu shikū ja būtemi bo ng'wa Yotamu, pyī īyo wīta; yandīkilwe mu shitabo sha ng'hūlū ja batemi ba Yuda.
37
(Ū mu shikū jenījo ū SEEBA wandya kūntūma ntemi Lezini wa Alamu na Peka ng'witūnja o ng'wa Lemalia kūja kwīdumīla ī Yuda.)
38
Ū Yotamu nang'hwe wifuula na bakūlūgenji bakwe, ūjīkwa hamò nabo mu nzengo go ng'wa Daūdi nkūlūgenji wakwe. Ng'witūnja wakwe Ahazi ūbiza ntemi a ha ng'wanya gwakwe.
← Chapter 14
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 16 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25