2 Kings 25

Sukuma 2019

← Chapter 24 Jump to:

1Hūna aho lwashika lūshikū lw'ikūmi ū mu ng'weji gw'ikūmi, ū Zedekia alī mu ng'waka gwakwe gwa kenda alī ntemi, ū Nebukadineza ntemi wa Babuloni wiza nalyo pyī ī libità lyakwe ī lyose kūgūdumīla ū nzengo gwa Yelusalemu. Ūzenga ng'hambī ī hanze yago ūgūpīndīlīja mabità ga bashilikale.

2Gūpīndīlījiwa mabità gīko kūshisha ng'waka gw'ikūmi na gūmò go ng'wa Zedekia alī ntemi.

3Aho gwashika ng'weji gwa kanè ī nzala yūdidoha no ū mu nzengo, a banhū būmala gete ī shilīwa sha kūlya. Lūshikū lwa kenda ū mu ngweji gwenūyo,

4Ī ndugu ya nzengo yūkambūlwa ipandī ilebe mu makanza ga būjikū, pyī ī libità lya bashilikale lyūtoloka kūbītīla ha mita gwalīho bbihī na ngūnda gwa ntemi; būbīta ha gatī gatī ya ndugu būbīlī wajo, nūūlū īkī a bashilikale ba Bakalidayo baalī bagūpīndīlīgije ū nzengo; a batoloki būpeela balolile kwitogolo lya Alaba.

5Alīyo a bashilikale ba Bakalidayo būbakūūbīja, ū ntemi būmpandīkīla mu mbūga ya Yeliko, a bashilikale bakwe bamalaga kūneka būsambaala.

6Na lūūlū ū wei ūding'wa, ūtwalwa Libula ūko walī ū ntemi wa Babuloni; ī likanza lyenīlo ū Zedekia ūhamīlwa kūpandīka nsango.

7A bitūnja bakwe būbabūlaga mu būtongi wakwe alolile; hanuma ya henaho ū wei būgakobola a miso gakwe, hūna būntunga nhendele ja shaba būntwala Babuloni atungilwe gīko.

8Mu ng'waka gw'ikūmi na kenda gwa būsugi bo ng'wa Nebukadineza ntemi wa Babuloni, Nebuzaladani ūyo walī ntaale wa balang'hani ba ntemi, na ntūmami wa ha sīlīlī ya ntemi wa Babuloni, akingīla ī Yelusalemu mu lūshikū lwa mpungatī ng'weji gwa katanò.

9Ūshika wīpemba moto ī hekalu ya ng'wa SEEBA, nī likūlū, nī numba ja Yelusalemu pyī ī jose; pyī ī numba ī nhengeke ūjipemba moto.

10Na hangī a bashilikale ba Bakalidayo abo walī nabo ū ntaale wa balang'hani ba ntemi būjiikīja hasī, pyī ī ndugu ja ngītīli īyo yalī īgūpīndije ū nzengo gwa Yelusalemu.

11Ū Nebuzaladani ū ntaale wa balang'hani ba ntemi, ūbasola a banhū abo baalī basaaga ū mu nzengo, na a bangī abo baalī basaagīīla ū mu sī, ūūkababītīla na a babo baalī baaja boi benekīlī ū kūlī ntemi wa Babuloni, kūbasaamya ūbatwala mu būding'wa.

12Alīyo ū ntaale wa bashilikale akabaleka bamò ba bakuunese ba bakuunese, babize batūmami ba mu migūnda ya mizabibu, nū mu a malaale a gangī.

13A Bakalidayo būshibelagūla ī shikolo sha shaba īsho shalī ū mu hekalu ya ng'wa SEEBA; gītī, ng'hīngī ja shaba, makīndīkīlo, shiseme sha kūtūūlīla minzī; ī shaba pyī ī yose būbūūcha būjana Babuloni.

14Bakajaana na shikolo gītī, mafulīla, makolelo, majimījo ga tala, nzweso, nī shiseme sha shaba pyī īsho shatūmamīlagwa mu myatīla ya kalamīje ka mu hekalu.

15Ū ntaale wa balang'hani ba ntemi akajisola nī nzweso ja kūzuukīlīgīja būbbani, na a mabbakuli ga kūseeseebelela; pyī ī shiseme īsho shalī sha zahabu na sha feza ūshijana.

16Ī shaba yalī ningī no īyo bakīnja a ha ng'hīngī īj'ibīlī, na a ha shiseme sha kūtūūlīla minzī, na a ha makīndīkīlo; yalī shilambu ū kūbūmana ū būdito wayo. Ī shikolo shenīsho Solomoni walī washibeeja kūlwa nguno ya hekalu ya ng'wa SEEBA.

17Būlī ng'hīngī yalī na būlīhu bo fuuti makūmi abīlī na mpungatī, na yalī n'ikundīkījo lya shaba a higūlya, lya būlīhu bo fuuti inè na nusu; hūna lyūtūūlīlwa kalweyo ka būlenji, na makomamanga ga shaba gūpīndīlījiwa. Ī ng'hīngī jose būbīlī wajo jalī na būlenji bo mbika īmò.

18Ū ntaale wa mabità ga ntemi ūnsola nū Selaya ū ngabīji ntaale, nū Sefania ūyo walī wa ha sīlīlī yakwe, hamò na a balang'hani būdatū wabo.

19Ū mu banhū abo akabasola abo baalī bashiiga ū mu nzengo, walīmo ū ntaale wa kahelele ka banhū ba būlūgū, na banhū batanò, abo baalī bagunanhi ba ntemi mu mihayo ya būsugi. Nū ng'wandīki ūyo walī ntaale wa kahelele ka milīmo ū mu sī; ūsolwa na banhū bakwe makūmi atandatū abo baalī basaagīīla ū mu nzengo.

20Ū Nebuzaladani ū ntaale wa balang'hani ba ntemi ūbasola pye a benabo, ūja nabo Libula kūlī ntemi wa Babuloni.

21Aho wabashisha ī Libula būhamīlwa nsango gwa kūbūlagwa; būbūlagīlwa kwenūko mu sī ya Hamasi. Na lūūlū a banhū ba Yuda bīnjiwa, būbiza basaamiwa ū mu sī yabo.

22Ū ntemi wa Babuloni ū Nebukadineza ūnsola Gedalia ng'witūnja o ng'wa Ahikamu, ng'witūnja o ng'wa Shafani, ūntūūla kūbiza nsugi wabo a banhū abo bakalekeelwa ū mu sī ya Yuda.

23A bataale ba bashilikale na a banhū babo aho bigwa gīkī ū ntemi wa Babuloni wantūūlile Gedalia a ha būsugi, biza hamò na banhū babo ī Misipa ūko walī ū Gedalia, baalī ba Ishimaeli ng'witūnja o ng'wa Nesania, Yohanani ng'witūnja o ng'wa Kalea, Selaya ng'witūnja o ng'wa Tanhumeti, munhū wa Netofa, Jaazania muna Maaka.

24Ū Gedalia ūbilahīlīla balī hamò na a banhū babo, ūbatimbya ng'holò alībawīla, “Mutabogohage a bataale ba selekali ya Bakalidayo; igashagi dūhū ū mu sī yenīyī mulembeele muntūmamīle ū ntemi wa Babuloni, ī mihayo īkūmugololokela.”

25Ū Ishimaeli ū ng'witūnja o ng'wa Nesania, ng'witūnja o ng'wa Elishama, walī munhū wa būbyīle wa ng'wikūlū. Na lūūlū kwimanīla ū mu ng'weji gwa mpungatī wiza na banhū bangī ikūmi, būmūlaga ū Gedalia, na a banhū ba Yuda, na a Bakalidayo abo baalī hamò nang'hwe ī Misipa.

26Ū mhayo gwenūyo aho gwaja gīko, pye a banhū bataale na bado, hamò na a bashilikale abo baalīho, būpeelela Misili kūlwa nguno ya kūbogoha Bakalidayo.

27Ū ntemi wa Yuda ū Yehoyachini aho washisha myaka makūmi adatū na mpungatī alī mu būtungwa, Evi-melodaki ūbiza ntemi wa Babuloni. Mu lūshikū lwa makūmi abīlī na mpungatī ng'weji gw'ikūmi n'ībīlī, ū ntemi ng'wenūyo ūntaligūlīla ū Yehoyachini, ūng'wīnja ū mu jeela.

28Ūyūlūngalūnga nang'hwe nhambū jawiza; ūngūngūhya, nī lisumbī lya kwigaasīja ūng'winha ly'ikūjo kūtinda a batemi a bangī abo baalī baatungwa Babuloni hamò nang'hwe.

29Kūfuma ikanza lyenīlo ū Yehoyachini ūlekana nasho ī shizwalo sha nyatungwa; nīyo ī shilīwa ūyūlīīla ha meza ya ntemi būlī lūshikū pyī ī shikū ja būpanga bokwe ūbo būkasaaga.

30Na hangī ū ntemi ūlagīja gīkī ū Yehoyachini ayūpandīka shiigunaanīlo būlī lūshikū, ū mu shikū jose ja būlamu wakwe.

← Chapter 24 Jump to: