2 Kings 14

Sukuma 2019

← Chapter 13 Jump to: Chapter 15 →

1Mu ng'waka gwa kabīlī go ng'wa Yehoashi ng'witūnja o ng'wa Yehoahazi ntemi wa Isilaeli, Amazia ng'witūnja o ng'wa Yoashi ūbiza ntemi wa Yuda.

2Aho alandya kūbiza ntemi walī na myaka makūmi abīlī n'ītanò; ūsuga alī mu Yelusalemu ikanza lya myaka makūmi abīlī na kenda. Ū nina witanagwa Yehoadini, muna Yelusalemu.

3Ū Amazia akīīta yawiza ū mu miso ga ng'wa SEEBA; gwike atashikile ūmo walī ū nkūlūgenji wakwe ū Daūdi. Ū mu mihayo yose walondeelaga kashimīzīle ka ng'wa ise Yoashi.

4Na a mapandī ga higūlya gatīnjiwe; a banhū baalī bataalī būja koi kūfunya shitambò na kūzuukīja būbbani.

5Ū Amazia aho wabona gīkī wabūdima chiza ū būsugi, ūbabūlaga a batūmami ba mu būsugi bokwe abo baalī bamūlaga ū ntemi ū ise.

6Alīyo a bitūnja ba babūlagi benabo atababūlagile, nguno h'ūmo handīkīlilwe ū mu shitabo sha shilagīlo sha ng'wa Musa; ūmo SEEBA alagīlile, “A babyaji yaya ū kūbūlagwa kūlwa nguno ya būhūbi wa baana babo, na a baana batizūbūlagwa kūlwa nguno ya būhūbi wa babyaji babo; būlī munhū akūcha kūlwa būhūbi wakwe wei ng'wenekīlī.”

7Ū Amazia hū ng'wene ūyo akabapyena bana Edomu mu sī ya ntubīlo; īyo yalī sī ya munhu, ūbabūlaga banhū shihūmbī ikūmi ū mubo. Nū nzengo gwa Sela ūgūdima, ūgūgalūcha ī lina gūbiza Yokiseli, lina īlo na lelo lītaalī līkūtūmamaga.

8Hanuma ya henaho ū Amazia ūtwala nhūng'wa kūlī ntemi wa Isilaeli ū Yehoashi ng'witūnja o ng'wa Yehoahazi, ng'witūnja o ng'wa Yehu; ūng'wīla, “Nzūgū tūpamanye būshū kū būshū ū bebe nū nene.”

9Alīyo ū Yehoashi ūnshokeja ū Amazia ū ntemi wa Yuda ūng'wīla, “Kagwaata kalebe kakigīmba gīmba ng'wipoolu lya Lebanoni, kūtwala mhola kū ntī gwa manga ū mu Lebanoni ng'wenūmo; kūlagīja kalīhaya, ‘Nfunyage ū nshīke wako atoolwe na ng'witūnja wane!’ Alīyo kwimanīla shiinū ya muumo Lebanoni ng'wenūmo yūbītīla ī mhandī jenījo, yūkapandagīla a kagwaata kenako!

10Gashi īkī wabapyenile bana Edomu hū wītile lūgiili giili. Bebe ni wayegela būtindi wako dūhū, wikale kū ng'wako kwenūko! Ī gete waseeseelilwe kī, nose ūlīhaya kwiyenheleja makoye ga kūkūgwisha ū bebe nī Yuda?”

11Alīyo ū Amazia atigwiile, nose ū Yehoashi ū ntemi wa Isilaeli ūbūūka kūjūndumīla; na ng'hana ū wei nū Amazia ū ntemi wa Yuda būpamanya būshū kū būshū balī Beti-shemeshi mu sī ya Yuda.

12Ī Yuda yūpyenwa kībi no na a Baisilaeli, būlī munhū ūpeela ashokile kū ng'wakwe.

13Aho balī ū mu būlūgū wa Beti-shemeshi wenūbo, ū Yehoashi ū ntemi wa Isilaeli ūndima ū Amazia ū ntemi wa Yuda, ū ng'witūnja o ng'wa Yoashi, ng'witūnja o ng'wa Ahazia. Hanuma ū Yehoashi ūja ī Yelusalemu ūūkīgwisha ī ndugu ya Yelusalemu kwandīja kū mita gwa Efulaimu kūja kū mita gwa kuluba, ibbala lya būlīhu wa fuuti magana atandatū.

14Ī zahabu nī feza ūjisola, pyī nī shikolo ī shingī īsho akapandīka kūfuma mu hekalu ya ng'wa SEEBA, nū kūfuma ū mu mabīkīlo ga sabo ga mu numba y'ikūlū. Ūdima na banhū ūbajana aho alīshoka Samalia.

15Mihayo yīngī ī ya mu shikū ja būtemi bo ng'wa Yehoashi, īyo wīta nī ya būtindi wakwe, pyī nī ya būlūgū wakwe ūbo akalwa na Amazia ntemi wa Yuda, ī yose yandīkilwe mu shitabo sha ng'hūlū ja batemi ba Isilaeli.

16Ū Yehoashi wifuula na bakūlūgenji bakwe, ūjīkwa mu nzengo gwa Samalia, hamò na batemi ba Isilaeli. Ng'witūnja wakwe Yeloboamu wingīla a ha ng'wanya gwakwe, ūbiza ntemi.

17Gwike ū Amazia, ū ng'witūnja o ng'wa Yoashi, ū ntemi wa Yuda, akikala alīho mpanga kūshisha ikanza lya myaka ikūmi n'ītanò, a ha numa ya kūcha kwa ng'wa Yehoashi ū ng'witūnja o ng'wa Yehoahazi ū ntemi wa Isilaeli.

18Mihayo yīngī ī ya mu shikū ja būtemi bo ng'wa Amazia yandīkilwe mu shitabo sha ng'hūlū ja batemi ba Yuda.

19A bana Yelusalemu būnīīla gwīnda ya kūhaya kūmūlaga, aho wadeeba ūtoloka ūpeelela Lakishi, alīyo būtūma banhū būnkūūbīja ī Lakishi būūkamūlaga.

20Hūna wenhwa ha falasa wiza ūjīkwa mu Yelusalemu hamò na bakūlūgenji bakwe mu nzengo go ng'wa Daūdi.

21Hanuma a banhū ba Yuda a bose būnsola ng'witūnja wakwe Azalia, būntemya a ha ng'wanya gwa ng'wa ise ū Amazia; walī na myaka ikūmi n'ītandatū.

22Aho wifuula ū Amazia hamò na bakūlūgenji bakwe, ū Azalia ūgūshosha ū nzengo gwa Elasi mu būsugi wa Yuda, nīyo ūgūzenga būpya.

23Mu ng'waka gw'ikūmi n'īnè go ng'wa Amazia ng'witūnja o ng'wa Yoashi ntemi wa Yuda, Yeloboamu ng'witūnja o ng'wa Yehoashi ūbiza ntemi wa Isilaeli mu Samalia; ūsuga ikanza lya myaka makūmi anè na gūmò.

24Nang'hwe wīta yabūbi ū mu miso ga ng'wa SEEBA, atalekanile nū būhūbi bo ng'wa Yeloboamu ū ng'witūnja o ng'wa Nebati, ūbo walī wabenheleja a Baisilaeli kūhūba.

25Hū ng'wene ūyo akalūshosha ū lūbīmbī lwa sī ya Isilaeli kūfuma Lebo lūūkashika kū nyanza ya Alaba, kūlenganīla na mhayo go ng'wa SEEBA, ū Mulungu wa Isilaeli; ūmo walī wayombela mu nzīla ya ntūmami wakwe Yona ng'witūnja o ng'wa Amitai, ūyo walī ng'hangi wa Gaasi-hefa.

26Ū SEEBA akabūbona ū būbi wa būluhi ūmo būlī munhū waluhīlaga ū mu Baisilaeli, abize nsese nūūlū alī mu wiyaabī; walī atīho ose ose ū wa kūbagunanha.

27Na lūūlū īkī ū SEEBA walī atahayile gīkī akūlīpyagūla līshile ho gete ī lina lya Baisilaeli ū mu sī, akabapīja mu nzīla ya nkono go ng'wa Yeloboamu ng'witūnja o ng'wa Yehoashi.

28Mihayo yīngī ī ya mu shikū ja būtemi bo ng'wa Yeloboamu yandīkilwe mu shitabo sha ng'hūlū ja batemi ba Isilaeli; pyī īyo wīta nī ya būtindi wa mabità gakwe mu būlūgū, nū mumo akīshokeja mu sī ya Isilseli mizengo ya Damasiko na Hamasi īyo yalī ya Yuda.

29Nang'hwe ū Yeloboamu wifuula na bakūlūgenji bakwe, a batemi ba Isilaeli; ng'witūnja wakwe Zakalia ūbiza ntemi a ha ng'wanya gwakwe.

← Chapter 13 Jump to: Chapter 15 →