2 Kings 24

Sukuma 2019

← Chapter 23 Jump to: Chapter 25 →

1Ū Yehoyakimu aho alī ntemi, Nebukadineza ntemi wa Babuloni wiza kūduma, ūng'wīta ū Yehoyakimu kūbiza ntemi wa ha sīlīlī yakwe. Ū Yehoyakimu ūbiza ha sīlīlī ya ng'wa Nebukadineza ikanza lya myaka idatū, alīyo kwimanīla wagalūcha a maganiko ūlema ū kūsugwa gīko.

2Hūna ū SEEBA ūtūma mabità ga sī ja banhū ba Babuloni, Alamu, na Moabu kwiza kwīkenaagūla ī sī ya Yuda, kūlenganīla nū mhayo go ng'wa SEEBA ūyo gwalī gwahayiwa na batūmami bakwe a bahangi.

3Ī mihayo yenīyī yūbilongela a banhū ba Yuda kūlenganīla na mhayo go ng'wa SEEBA, gīkī abīnje gete ū kū būtongi wakwe, kūlwa nguno ya būbi bo ng'wa Manase; kūlenganīla nū būkenaagūji ū bose ūbo olī owīta.

4Ū SEEBA atanekegije ī mihayo yenīyo, nī ya mininga ga banhū batī na būbi ayo walī wagiita; nguno ī Yelusalemu walī wīyookaja mininga ga banhū abo baalī batī na būbi.

5Mihayo yīngī ī ya mu shikū ja būtemi bo ng'wa Yehoyakimu, nī yīyo wīta pyī yandīkilwe mu shitabo sha ng'hūlū ja batemi ba Yuda. Ū Yehoyakimu wifuula hamò na bakūlūgenji bakwe;

6Yehoyachini ng'witūnja wakwe ūtema a ha ng'wanya gwakwe.

7Ū mu shikū jenījo ū ntemi wa Misili atīngile ū mu sī yakwe kūja, nguno ū ntemi wa Babuloni walī wajidima pyī ī sī ījo jalī ha sīlīlī ya Misili ī kwandya, kūfuma mu mongo gwa Misili kūshisha kū mongo gwa Flati.

8Ū Yehoyachini aho alībiza ntemi walī na myak'ikūmi n'īnaane, ūsuga ikanza lya myeji idatū alī mu Yelusalemu. Ū nina ī lina lyakwe witanagwa Nehushita, nshīke o ng'wa Elinasani, muna Yelusalemu.

9Nang'hwe ū Yehoyachini akīīta yabūbi ū mu miso ga ng'wa SEEBA, gīt'ūmo baalī bīītīla dūhū a bataale bakwe.

10Ū mu shikū jenījo a bashilikale ba ng'wa Nebukadineza biza kūgūdumīla ū nzengo gwa Yelusalemu, būgūpīndīlīja na mabità.

11Ū Nebukadineza ng'wenekīlī wiza ū kū bashilikale bakwe aho bagūpīndīlīgije ū nzengo gwenūyo.

12Ū ntemi wa Yuda ū Yehoyachini, nū nina, na a batūmami bakwe, na a basugi ba sī a ba ha sīlīlī yakwe pye a bose bitūūla mu makono ga ntemi wa Babuloni. Na lūūlū ū ntemi wa Babuloni aho alī mu ng'waka gwakwe gwa kanaane asugile, ūndima ū Yehoyachini ūntwala mu būtungwa.

13Ū Nebukadineza ūjīnja ng'hana pyī ī sabo ījo jalī ū mu hekalu ya ng'wa SEEBA, nī jijo jalī ū mu numba y'ikūlū; nī shikolo sha zahabu ī shose īsho Solomoni ntemi wa Isilaeli walī washibeeja kūlwa nguno ya hekalu ya ng'wa SEEBA; gūshikīīla ūyo walī wagūhaya ū SEEBA.

14A bikaji ba Yelusalemu a bose ūbasaamya būja mu būtungwa, pye a basugi na a bashilikale a bose, na bakoolī ba kūbeeja shikolo, gītī baselemala na bazengi ūbajana; ī lisaabu ī lyose baalī banhū shihūmbī ikūmi. Ū mu sī yenīyo būlekeelwa dūhū a bakuneese ba koocha na ngobo.

15Na lūūlū ū Nebukadineza ūbiza wansaamya ū Yehoyachini, ūntwala Babuloni kūjūbiza ntungwa, nū nina wa ntemi ūnsaamya ī Yelusalemu, pye na a bake bakwe, na a basugi ba sī a ba ha sīlīlī yakwe, na a batongeeji ba mu sī yakwe.

16Ū ntemi wa Babuloni ūbasaamīja Babuloni pye a bashilikale, ibità igima lya banhū shihūmbī mpungatī; bose baalī na nguzu ja kūdūla kūlwa mu būlūgū; na bakoolī shihūmbī shimò, banhū abo baalī badūgije kūbeeja shikolo.

17A ha būsugi wa sī ūntūūla Matania, ise ndo o ng'wa Yehoyakini, nī lina lyakwe ūngalūcha ūng'witana Zedekia.

18Ū Zedekia aho alībiza ntemi walī na myaka makūmi abīlī na gūmò, ūsuga ikanza lya myak'ikūmi na gūmò alī mu Yelusalemu Ū nina ī lina lyakwe witanagwa Hamutaali, nshīke o ng'wa Yelemia, muna Libuna.

19Nang'hwe ū Zedekia wīta yabūbi ū mu miso ga ng'wa SEEBA, gīt'ūmo walī wītīla dūhū ū Yehoyakimu.

20Ī yenīyo īkaja gīko ū mu Yelusalemu nī Yuda kūlwa nguno ya būpalenu bo ng'wa SEEBA. A ha ng'halīlo yaho ūbaponya bīnga gete ū kū būtongi wakwe. Nīyo ū mu shikū jenījo ū Zedekia ūlema ū kūbiza ha sīlīlī ya ntemi wa Babuloni.

← Chapter 23 Jump to: Chapter 25 →