2 Kings 16

Sukuma 2019

← Chapter 15 Jump to: Chapter 17 →

1Mu ng'waka gw'ikūmi na mpungatī aho Peka ng'witūnja o ng'wa Lemalia alī ntemi wa Isilaeli, Ahazi ng'witūnja o ng'wa Yotamu ūbiza ntemi wa Yuda.

2Ū Ahazi walī na myaka makūmi abīlī aho alandya kūbiza ntemi; ūtema ikanza lya myaka ikūmi n'ītandatū alī mu Yelusalemu. Ū wei atītile yawiza ū mu miso ga ng'wa SEEBA Mulungu wakwe, gīt'ūmo walī wītīla nkūlūgenji wakwe Daūdi.

3Washimīzīlaga mu nzīla ja batemi ba Isilaeli; nose ūūkabīta na kūpemba ng'witūnja wakwe mu moto, kūlwa kūlondeela nhūngwa ja mahanga ayo SEEBA walī wagapeeja gīkī gabīngīle a Baisilaeli.

4Wafunyaga shitambò na kūzuukīja būbbani kū mapandī ga higūlya, kū ngūlū, na mu mbeho ja mitī ya madūūtū manīlīzu.

5Hūna Lezini ntemi wa Alamu na Peka ntemi wa Isilaeli, būnsanga ū Ahazi kwiza kwīdumīla ī Yelusalemu, būmpīndīlīja na mabità gabo; gwike būlemeelwa ū kūng'heeba.

6Ū mu shikū jenījo ū Lezini ū ntemi wa Alamu ūgūshosha mu būsugi wa Alamu ū nzengo gwa Elasi, ūbapeeja a banhū ba Yuda abo bikalaga moi. Baedomu būsaamīla ī Elasi, na kūshisha lelo īyī balī bikaji ba ng'wenūmo.

7Ū Ahazi ūtūma banhū kūlī Tigilasi-pilesa, kūjūng'wīla, “Ū nene nalī ntūmami wako, na nalī ng'witūnja wako. Nangūhīlage wize ūnigune ū mu makono ga ntemi wa Alamu nū wa Isilaaeli, nguno banūbūkīlile.”

8Ū Ahazi ūjisola ī feza nī zahabu ījo jikilonga ū mu hekalu ya ng'wa SEEBA, nū mu mabīkīlo ga sabo ga ng'wikūlū, ī shose shenīsho ūntwalīla inong'ho ū ntemi wa Ashulu.

9Ū ntemi wa Ashulu ūzunya ū kūngunanha ū Ahazi; ūtwala mabità gakwe Damasiko kūgūdumīla ū nzengo gwenūyo, kūshisha ūgūdima. A bikaji ba ng'wene ūbasaamīja Kili, ū Lezini ūmūlaga.

10Hanuma ya makanza ū Ahazi ūja ī Damasiko kwibona nū Tigilasi-pilesa ū ntemi wa Ashulu; aho alī Damasiko ūbona koi ng'walīlo; ūntwalīla ū ngabīji Ulia shiikolanīgījo shago ū ng'walīlo gwenūyo, kūng'olekeja ūmo gūlī.

11Na lūūlū ū ngabīji Ulia ūbeeja ng'walīlo gwa kūbiza gīt'ūmo shalī ī shiikolanīgījo īsho ntemi Ahazi akantūmīla kūfuma Damasiko; ūgūmala aho ataalī kūshoka ū ntemi.

12Ū ntemi aho washoka kūfuma ī Damasiko ūshikīla kūgūlola ū ng'walīlo gwenūyo, wegeela ūfunya shakwinha a higūlya yago.

13Ūfunya hoi ī shitambò shakwe sha kūpemvwa, nī sha būsu, wita hoi na shakwinha sha kūng'wiwa; na a mininga ga shakwinha shakwe sha būsangī ūgaseeseebela a ha ng'walīlo gwenūyo.

14Ū ng'walīlo gwa shaba ūyo gwalī gwīmīīlile kū būtongi bo ng'wa SEEBA ūgwīnja ū kū būtongi wa hekalu, ūgūsaamya aho gwalī, a ha gatī gatī ya hekalu nū ng'walīlo gwakwe; ūgūtūūla kū sukuma ya ng'walīlo gwakwe ū mpya.

15Hanuma ya henaho ū ntemi Ahazi ūnagīj'ū ngabīji Ulia ūhaya, “Ī shitambò sha kūpemvwa ī sha dilū, nī shakwinha sha būsu ī sha mhīndī, bizagūshifunya a ha ng'walīlo ū mpya; pyī nī shitambò sha kūpemvwa ī sha ntemi, nī shakwinha shakwe ī sha būsu, nī shitambò sha kūpemvwa ī sha banhū bose ū mu sī īyī, nī shakwinha shabo sha būsu, nī shakwinha shabo ī sha kūng'wiwa. A mininga ga shitambò sha kūpemvwa na a ga shitambò; a gose ūkūyūgaseeseebela a ha ng'walīlo gwenūyo. Ū ng'walīlo gwa shaba nakūyūgūtūmamīla nene kūlwa kūbūūja mbika ja kajīle.”

16Ū ngabīji Ulia wīta gīt'ūmo akalagīīlīlwa na ntemi Ahazi.

17Ū ntemi Ahazi ūshīnja ī shipande sha chūma īsho shalī shibbadanīkīgije kūlwa kūdimīīla madandali, nī shiseme īsho shalī a ha makīndīkīlo. Nī nyanza wīyīnja a ha migongo ya nzagamba ja shaba, aho yalī ītūūlile; wītūūla h'ikīndīkīlo ly'iwe.

18Shalīho na chumba sha kwifuulīla shalī shizengilwe haho nī hekalu hūna shūbimvwa chiza chiza, nasho ūshīnja; walīho na būbītīlo wa ntemi ajile na kūfuma mu hekalu, nū wene ūwīnja ī hanze ya hekalu ya ng'wa SEEBA; ī yose yenīyī akīyīta kūlwa nguno ya ntemi wa Ashulu.

19Mihayo yīngī ī ya mu shikū ja būtemi bo ng'wa Ahazi yandīkilwe mu shitabo sha ng'hūlū ja batemi ba Yuda; ī yose īyo wīyīta.

20Ū Ahazi wifuula na bakūlūgenji bakwe, ūjīkwa hamò nabo mu nzengo go ng'wa Daūdi. Ng'witūnja wakwe Hezekia ūbiza ntemi a ha ng'wanya gwakwe.

← Chapter 15 Jump to: Chapter 17 →