2 Kings 8

Sukuma 2019

← Chapter 7 Jump to: Chapter 9 →

1Makanza malebe ū Elisha walī walūngalūnga nū nkīma ū muna Shunemu, ūyo walī wajūūchiwa ng'witūnja wakwe; ūng'wīla, “Saamaga nī kaya yako ūje ūkikale ipandī līngī, nguno ū SEEBA wahayile īkūgwa nzala ū mu sī yenīyī ikanza lya myaka mpungatī.”

2Ū nkīma ng'wenūyo wīta gīt'ūmo akawīlīlwa nū munhū o ng'wa Mulungu; ūsaama nī kaya yakwe būūkikala kū sī ya Bafilisiti kūshisha myaka mpungatī.

3Aho yabīta ī myaka mpungatī ūshoka ū kūfuma ū kū sī ya Bafilisiti, ūja ū kūlī ntemi kūjūlomba inhiwe ī numba yakwe na a malaale gakwe.

4Ū ng'wikanza lyenīlo ū ntemi ūsangwa alīhooya na Gehazi ū ntūmami o munhū o ng'wa Mulungu; ū ntemi ūbūūja, “Ūdūgije kūniwīla ī mihayo mitaale mitaale īyo wīyīta ū Elisha?”

5Wandya ū Gehazi kūng'wīla ū ntemi ī mihayo ya ng'wa Elisha kūjūūcha mfu, kwimanīla wiza ū nkīma ūyo Elisha walī wanjūūcha ng'witūnja wakwe; wizaga ū kūlī ntemi kūlomba ashokejiwe ī numba yakwe na a malaale gakwe. Hūna ū Gehazi ūhaya, “Baba ntemi, nīyo ū nkīma ng'wene ūūyū. Nū nyanda ūyo akajūūchiwa na Elisha hū ng'wenūyū ūyū.

6Ū ntemi ūmūja chiza ū nkīma ng'wenūyo ūmo īkajīla ī mihayo; nang'hwe ūnsomboolela.” Hūna ū ntemi ūnagīla ūmò wa batūmami bakwe angoloolele ī mihayo yakwe; ūng'wīla, “Nshokejage pyī ī shikolo shakwe, nī solobo īyo yigela kūfuma mu matwajo ga mu malaale gakwe, kwandīja aho wīngīla mu sī īyī kūshisha lelo.”

7Makanza malebe ū Elisha akaja Damasiko, ū Beni-hadadi ū ntemi wa Alamu ūsangwa nsaatu ī shikū jenījo. Ū ntemi aho wawīlwa gīkī, “Ū munhū o ng'wa Mulungu wizaga kūnū,”

8ūntūma Hazaeli ūng'wīla, “Solaga inong'ho ūje ūkibone nū munhū o ng'wa Mulungu; ūmūje ū SEEBA mu nzīla yakwe ūlū nakūpīla ū būsaatu wenūbū!”

9Ū Hazaeli ūja ū kūmona ū Elisha, ūjana n'inong'ho, miligo makūmi anè ya shikolo shose ī shawiza, īsho shikabeejiagwa mu Damasiko; yūbūūchiwa ngamīla. Aho washika wīmīīla ū kū būtongi wakwe; ūng'wīla, “Ū ng'witūnja wako ū ntemi wa Alamu wanitūmaga nize nakūbūje gīkī, ‘A hene nakūpīla ū būsaatu wenūbū?’”

10Ū Elisha ūng'wīla, “Jaga ūkang'wīle gīkī, ‘Ūkūpīla dūhū;’ alīyo hangī ū SEEBA wanoolekejaga gīkī akūcha!”

11Hūna ūnkalalīla no no no, kūshisha ū Hazaeli ūding'wa minala. Hūna ū munhū o ng'wa Mulungu ūlīla.

12Ū Hazaeli ūbūūja, “Ni kinehe hangī ū baba būgonzo wayūlīla?” Ūshosha, “Nguno nagamanile a makoye ayo ūkūbīītīla a Baisilaeli, ī mizengo yabo īyo īzengeelilwe ndugu ūkwīpemba moto, a basūmba ba mu sī yabo ūkūbabūlaga na līlūshū, a beleele babo ūkūyūbataalīka hasī baacha, na a bakīma abo balī nda ūkūyūbatuumūla ī nda.”

13Ū Hazaeli ūhaya, “Ū ntūmami wako ūyo alī sawa na mvwa dūhū, adūgije kinehe ū kwīta ī mihayo mitaale gītī yenīyo?” Ū Elisha ūhaya, “Ū SEEBA wanoolekejaga gīkī ū bebe ūkūbiza ntemi wa Alamu.”

14Hūna ū Hazaeli wīnga ū kūlī Elisha ūshoka kūlī ise būgonzo. Ū Beni-hadadi aho wamūja, “Ū Elisha wakūwīla kinehe?” Ū Hazaeli ūhaya, “Waniwīla gīkī ū kūpīla kwene ūkūpīla dūhū.”

15Alīyo a ha ntondo yaho ūsola būlengeedi ūbūlobya mu minzī, hūna ūnkundīkīja ū ntemi ū kū nomo nī nindo ūpelwa myūyī ūcha. Hanuma ū Hazaeli wingīla wei a ha būtemi wakwe.

16Ū mu ng'waka gwa katanò go ng'wa Yolamu ng'witūnja o ng'wa Ahabu aho alī ntemi wa Isilaeli, Yeholamu ng'witūnja o ng'wa Yehoshafati ūbiza ntemi wa Yuda; ū Yehoshafati ū ise walī ntemi wa Yuda ī shikū jenījo.

17Ū Yeholamu aho alandya kūbiza ntemi walī na myaka makūmi adatū n'ībīlī; ūtema ikanza lya myaka īnaane alī mu Yelusalemu.

18Washimīzaga mu kūlondeela nzīla ja batemi ba Isilaeli; walondeelaga nhūngwa ja numba ya ng'wa Ahabu, nguno akantoola nshīke o ng'wa Ahabu; wīta yabūbi ū mu miso ga ng'wa SEEBA.

19Alīyo ū SEEBA atīkenaagūlile ī Yuda kūlwa nguno ya ntūmami wakwe Daūdi, nguno walī wang'wisagīja ū Daūdi gīkī akūnekela tala kūlwa shibyalīlwe shakwe, yikale īkūbakaga shikū jose.

20Ū mu shikū jakwe ū Yeholamu ī Edomu yūlema ū kūbiza ha sīlīlī ya būsugi wa Yuda, nayo yūtūūla ntemi wayo.

21Hūna ūja Zaili na bashilikale bakwe, na magogoteni gakwe ga būlūgū; aho alī kwenūko a mabità ga Baedomu gūmpīndya hamò na a bashilikale bakwe; alīyo aho wila ū būjikū ūbūūka kūlwa nabo būlūgū. Gwike ūheewa, a banhū bakwe būpeela būshoka kaya.

22Kūshisha na lelo īyī ī Edomu yaalema ū kūbiza ha sīlīlī ya būsugi wa Yuda. Nī Libuna yūgoma a makanza genayo.

23Mihayo yīngī ī ya mu shikū ja būtemi bo ng'wa Yeholamu, nī yīyo wīta, ī yose yandīkilwe mu shitabo sha ng'hūlū ja batemi ba Yuda.

24Ū Yeholamu wifuula na bakūlūgenji bakwe, ūjīkwa hamò nabo mu nzengo go ng'wa Daūdi. Ng'witūnja wakwe Ahazia wingīla a ha ng'wanya gwakwe, ūbiza ntemi.

25Mu ng'waka gw'ikūmī n'ībīlī go ng'wa Yolamu ng'witūnja o ng'wa Ahabu alī ntemi wa Isilaeli, Ahazia ng'witūnja o ng'wa Yeholamu ntemi wa Yuda wandya kūtema.

26Ūtema alī mu Yelusalemu ikanza lya ng'waka gūmò. Ū nina witanagwa ī lina lyakwe Asalia, ng'wizūkūlū wa ntemi Omuli wa Isilaeli.

27Akayūshimīzīla mu nhūngwa ja kaya ya ng'wa Ahabu, wīta yabūbi ū mu miso ga ng'wa SEEBA, gīt'ūmo yalī yītīla dūhū ī numba ya ng'wa Ahabu, nguno walīho būdūgū nī numba ya ng'wa Ahabu, ūbo būkenhelejiwa būtooji.

28Ū Ahazia ūja Lamosi-gileadi hamò na Yolamu ng'witūnja o ng'wa Ahabu, kwilwisha būlūgū na Hazaeli ntemi wa Alamu. A Ba-Alamu būnabūla ū Yolamu;

29na lūūlū ū ntemi Yolamu ūshoka Yezileeli kwifuula gīkī apīle a magulagīje ayo Ba-Alamu bakaminya aho alī Lamosi kū būlūgū wa kwilwisha na Hazaeli ntemi wa Alamu. Na lūūlū ū Ahazia, ū ng'witūnja o ng'wa Yeholamu ntemi wa Yuda, ūkūūbīja nang'hwe ī Yezileeli kūjūnola ū Yolamu ng'witūnja o ng'wa Ahabu, nguno akalabūlwa mu būlūgū.

← Chapter 7 Jump to: Chapter 9 →