2 Kings 13

Sukuma 2019

← Chapter 12 Jump to: Chapter 14 →

1Mu ng'waka gwa makūmi abīlī n'idatū go būtemi bo ng'wa Yoashi ng'witūnja o ng'wa Ahazia ntemi wa Yuda, Yehoahazi ng'witūnja o ng'wa Yehu ūbiza ntemi wa Isilaeli mu Samalia, ūsuga ikanza lya myaka ikūmi na mpungatī.

2Nang'hwe akīīta yabūbi ū mu miso ga ng'wa SEEBA, nguno akalondeela būbi bo ng'wa Yeloboamu ng'witūnja o ng'wa Nebati; būbi ūbo walī wabenhelaja Baisilaeli kūshimīzīla mubo; nū Yehoahazi atagalūkile kūlekana nabo.

3Na lūūlū ū būpelanu bo ng'wa SEEBA būbapembekela ikanza ilīhu a Baisilaeli; ūbatūūla ha sīlīlī ya būsugi bo ng'wa Hazaeli ntemi wa Alamu, nū ng'witūnja wakwe ū Beni-hadadi, nang'hwe ūbasuga ū mu shikū jakwe.

4Alīyo ū Yehoahazi aho wanomba ū SEEBA kūnchīla shigongo, ū SEEBA nang'hwe ūng'wigwa, nguno akabona ūmo ntemi wa Alamu wabaluhījaga a Baisilaeli.

5Na lūūlū ū SEEBA ūbinha ngunanhi a Baisilaeli, bīnga ū mu būsugwa wa Baalamu. A Baisilaeli bandya kwikala mu kaya jabo hangī gīt'ūmo bikalīlaga kwandya.

6Gwike batagalūkile na kūlekana nabo ū būhūbi wabo, ūbo baalī benhelejiwa na numba ya ng'wa Yeloboamu, ūbo walī wabenheleja Baisilaeli kūwīta. Bakikala bakūwītaga dūhū; nī ng'hīngī ya ng'wa Ashela yalī ītaalī yīmīīlile ū mu Samalia.

7Ū mu shikū jenījo ī libità lya bashilikale ba ng'wa Yehoahazi līkageehiwa no; ūlekeelelwa falasa makūmi atanò na magogoteni ikūmi dūhū, a bashilikale ba kūshimīza bo magūlū a bene shihūmbī ikūmi. A bose pye būkenaagūlwa na ntemi wa Alamu, ūbīīta kūbiza gītī lūbuubu ng'wikanza lya matūla būsīga.

8Mihayo yīngī ī ya mu shikū ja būtemi bo ng'wa Yehoahazi, īyo wīta nī ya būtindi wakwe, ī yose yandīkilwe mu shitabo sha ng'hūlū ja batemi ba Isilaeli.

9Ū Yehoahazi wifuula na bakūlūgenji bakwe, ūjīkwa mu nzengo gwa Samalia. Ng'witūnja wakwe Yehoashi wingīla a ha ng'wanya gwakwe, ūbiza ntemi.

10Mu ng'waka gwa makūmi adatū na mpungatī go būtemi bo ng'wa Yoashi ng'witūnja o ng'wa Ahazia ntemi wa Yuda, Yehoashi ng'witūnja o ng'wa Yehoahazi ūbiza ntemi wa Isilaeli mu Samalia, ūsuga ikanza lya myaka ikūmi n'ītandatū.

11Nang'hwe wīta yabūbi ū mu miso ga ng'wa SEEBA, nguno atalekanile nū būhūbi bo ng'wa Yeloboamu ū ng'witūnja o ng'wa Nebati; būbi ūbo walī wabenhelaja a Baisilaeli kūwīta; nū wei ongeja ū kūwīta.

12Mihayo yīngī ī ya mu shikū ja būtemi bo ng'wa Yehoashi, īyo wīta nī ya būtindi wakwe, pyī nī ya būlūgū wakwe ūbo akalwa na Amazia ntemi wa Yuda, ī yose yandīkilwe mu shitabo sha ng'hūlū ja batemi ba Isilaeli.

13Nang'hwe ū Yehoashi wifuula na bakūlūgenji bakwe, ng'witūnja wakwe Yeloboamu wingīla a ha ng'wanya gwakwe, ūbiza ntemi. Ū Yehoashi ūjīkwa mu nzengo gwa Samalia hamò na batemi ba Isilaeli.

14Ū mu shikū jenījo ū Elisha ūsaata būsaatu ūbo nose būkamūlaga. Ū ntemi wa Isilaeli ū Yehoashi ūja kūngīsha; aho washika hoi ūlīla alīhaya, “Baba! Baba! Magogoteni ga Isilaeli, na badamhīji ba falasa ba Isilaeli!”

15Ū Elisha ūng'wīla, “Solaga būta na masonga wenhe aha.” Wīta ng'hana.

16Hūna ū Elisha ūng'wīla ū ntemi wa Isilaeli, “Būdimage mu nkono gwako ū būta.” Aho wīta gīko, ū Elisha ūgūtūūla ū nkono gwakwe a ha makono ga ntemi.

17Hūna ūng'wīla, “Līlugūlage ī lidilisha īlo līlī kīya lyenīlo.” Ūlīlugūla; hūna ū Elisha ūng'wīla, “Lasaga;” ūlasa. Hūna ū Elisha ūhaya, “Isonga lya būtindi bo ng'wa SEEBA, isonga lya būtindi bo ng'wa SEEBA kū Ba-Alamu. Nguno a Ba-Alamu ūkūjūlwīla nabo Afeki kūshisha ūbakenaagūle gete.”

18Hūna ūng'wīla hangī, “Gasolage a masonga.” Ū ntemi wīta ng'hana. Ū Elisha ūng'wīla, “Gakiinūjage hasī a masonga genayo.” Ūgakiinūja hasī ng'hangala idatū ooya.

19Ū munhū o ng'wa Mulungu ūmpelanīla no; ūng'wīla, “Walemūgakiinūja a hasī ng'hangala itanò nūūlū itandatū, nguno ū mu gīko ni wabaheeba kībi a Ba-Alamu, nīyo ni wabakenaagūla gete. Alīyo ī haha ūkūbapyena ng'hangala idatū dūhū.”

20Hanuma ya henaho ū Elisha ūcha, ūjīkwa. Ū mu shikū jenījo, Bamoabu baalī bamanīīla kwīdumīla ī sī mu shikū ja matūja malaale.

21Lwise lūmò a Baisilaeli banjīkaga munhū, kwitulwa babona ibità lya banishi baliza kūbadumīla. Ū mimba gwa munhū ng'wenūyo būgūponya mu shigila īsho walī wajīkīlwa moi Elisha. Ū mimba gwakwe aho gwikuumya na a maguha ga ng'wa Elisha ūpīmbūka, ūjūdūka wīmīīla na magūlū gakwe.

22Ū ntemi wa Alamu ū Hazaeli walī wabaluhya no a Baisilaeli ū mu shikū pyī ī ja būsugi bo ng'wa Yehoahazi.

23Alīyo nose ū SEEBA akabachīla shigongo, ūbasaatwa kūlwa ilagane lyakwe na Abulahamu, Isaka, na Yakobo. Nguno kūshisha ikanza lyenīlo ū SEEBA walī atatogilwe ū kūbakenaagūla, nūūlū kūbabbalasanya bīnge ū kū būtongi wakwe.

24Na lūūlū ū ntemi wa Alamu ū Hazaeli aho waacha, ng'witūnja wakwe Beni-hadadi wingīla a ha ng'wanya gwakwe ūbiza ntemi.

25Ū Yehoashi ng'witūnja o ng'wa Yehoahazi ūntaaja ū Beni-hadadi ū ng'witūnja o ng'wa Hazaeli ī mizengo īyo ise Hazaeli walī wīdima mu būlūgū kūfuma kūlī ise Yehoahazi. Ū Yehoashi ūshisha kadatū akūmpyenaga ū Beni-hadadi, wīshosha ī mizengo ya Isilaeli.

← Chapter 12 Jump to: Chapter 14 →