2 Kings 20

Sukuma 2019

← Chapter 19 Jump to: Chapter 21 →

1Ū mu shikū jenījo ū Hezekia akasaata, ūsaaja ikanza iguhī ache. Ū ng'hangi Isaya, ng'witūnja o ng'wa Amozi, ūja koi; aho washika ūng'wīla, “Ū SEEBA alīhaya gīkī, ‘Īgolanyage chiza ī mihayo ya ha ng'wako, nguno ūkūcha; ūtūpīlaga.’”

2Ū Hezekia ūgalūkīla kū ndugu ūnomba ū SEEBA alīhaya,

3“Ee SEEBA, izūkagwa ūmo nalūshimīzīlaga kū būtongi wako, mu būshikanu na ng'holò ya kwifunya kwa ng'hana; nū mu miso gako nalīītaga yawiza.” Ū Hezekia ūlīla mu kūsaatwa kūtaale no.

4Hūna ū Isaya aho ataalī nū kūfuma ū mu chumba sha ha gatī, ū mhayo go ng'wa SEEBA gūng'wizīīla; gūng'wīla,

5“Shokaga ū kūlī Hezekia ū ntongeeji wa banhū bane ūkang'wīle gīkī, ‘Ū SEEBA, ū Mulungu wa nkūlūgenji wako Daūdi alīhaya: Naakwigwaga ū kūlomba kwako, nī ī shisoji shako nashibonaga; nakūkūpīja. Mu lūshikū lwa kadatū, kwandīja lelo īyī, ūkūlinha kūja mu hekalu ya ng'wa SEEBA wako.’

6Nakūkongeja myaka ikūmi n'ītano a ha būlamu wako. Nīyo nakūkūpīja ū bebe nū nzengo gwenūyū kūfuma ū mu nkono gwa ntemi wa Ashulu. Nakūgūlwīlīīla ū nzengo gwenūyū kūlwa nguno yane, na kūlwa nguno ya ntūmami wane Daūdi.”

7Hūna ū Isaya ūbawīla, “Shiginagi tiini, mubandīkīje a h'ibaale lyakwe akūpīla.” Aho bīīta ūpīla.

8Ū Hezekia akamūja ū Isaya, “Shikūbiza ho shimanīkījo kī sha koolecha gīkī ū SEEBA akūnipīja, nī gīkī ū mu lūshikū lwa kadatū, kūbala kwandīja lelo, nakūlinha kūja mu hekalu ya ng'wa SEEBA?”

9Ū Isaya ūng'wīla, “Ī mbeho ya numba, h'īkūbiza shimanīkījo sha gīkī ū SEEBA akwīta īyo wisagījaga; ūlītogwa īlīīhe kūja kū būtongi magūlū ikūmi, nūūlū īshoke kū numa magūlū ikūmi?”

10Ū Hezekia ūhaya, “Ī mbeho ū kūlīīha kūja kū būtongi magūlū ikūmi gūlī mhayo nogu, hambū hambū īshoke numa magūlū ikūmi.”

11Hūna ū ng'hangi Isaya ūnomba ū SEEBA, ng'hana ū SEEBA wīyīta ī mbeho kūshoka kū numa magūl'ikūmi a ha malinhīlo ga ha numba ya ng'wa Ahabu ayo yalī yamala kūgakīlanhya kwika sīlīlī.

12Ū mu shikū jenījo ntemi wa Babuloni, Melodaki-baladani ng'witūnja o ng'wa Baladani ūtūma ū kūlī Hezekia nyalūba n'inong'ho, nguno akigwa gīkī ū Hezekia walī wasaatile.

13Ū Hezekia ūbanukūla abo baalī baatūng'wa, nī shikolo īsho walī nasho mu mabīkīlo ga mu numba jakwe ūboolekeja pyī ī shose. Shikolo gītī, feza, zahabu, shisanjo sha mu shilīwa, na maguta ga ng'waso gwawiza, ūbingīnja nū mu chumba sha kūbīka shilanga; ūboolekeja pyī gete īsho walī nasho ū mu wibīkīja wakwe. Ū Hezekia atasaagije shikolo shose shose īsho ataboolekegije, hose pyī ū ng'wikūlū lyakwe, nū mu būtemi wakwe ū bose.

14Hanuma ya yenīyo ū ng'hangi Isaya ūja ū kūlī ntemi Hezekia ūūkamūja, “A banhū benaba balūhayaga kinehe? Na baalī bafumaga halī?” Ū Hezekia ūhaya, “Bafumaga kū sī ya kūle; sī ya Babuloni.”

15Ū ng'hangi ūbūūja, “Babonaga shikolo kī ū ng'wikūlū lyako?” Ū Hezekia ūhaya, “Bashibonaga pyī ī shikolo sha ng'wikūlū lyane, shitīho shose shose ū mu shikolo sha mu mabīkīlo gane īsho nataboolekegije.”

16Hūna ū Isaya ūng'wīla ū Hezekia, “Alilūūlū degelekaga gūūyū mhayo go ng'wa SEEBA:

17Līkūshika ikanza ī shikolo sha ng'wikūlū lyako shikūsolwa shitwalwe Babuloni, pyī nī shisho shakumingwa kwandīja mu shikū ja bataale bako kūshisha makanza aya. Shitūlekeelwa nūūlū shikolo shimò; h'ūmo alīhayīla ū SEEBA.

18Na banhū bamò na bamò ba mu shibyalīlwe shako, abo balī mīlī na mininga gako gete, abo ūkūbyalīlwa; nabo bakūtwalwa bakabize basoloolwa ba ng'wikūlū lya ntemi wa Babuloni.”

19Ū Hezekia ūhaya, “Ū mhayo go ng'wa SEEBA ūyo wagūhaya gwene gwawiza.” Akahaya gīko kūlwa nguno wiganikaga, “Tūhaya īkūbiza īlīho ī mhola a hene ū mu shikū jane?”

20Mihayo yīngī ī ya mu shikū ja būtemi bo ng'wa Hezekia, pyī ī ya būtindi wakwe nū mumo akabeegeja ilambo, ūsīmba na ngoka gwa kwenha minzī mu nzengo; ī yose yandīkilwe mu shitabo sha ng'hūlū ja batemi ba Yuda.

21Ū Hezekia wifuula hamò na bataale bakwe, ng'witūnja wakwe Manase ūbiza ntemi a ha ng'wanya gwakwe.

← Chapter 19 Jump to: Chapter 21 →