2 Kings 22

Sukuma 2019

← Chapter 21 Jump to: Chapter 23 →

1Ū Yosia walī na myaka īnaane aho alandya kūbiza ntemi, ūsuga ikanza lya myaka makūmi adatū na gūmò alī mu Yelusalemu. Ū nina witanagwa ī lina lyakwe Yedida, nshīke o ng'wa Adaya muna Bozikati.

2Ū Yosia akīīta yawiza ū mu miso ga ng'wa SEEBA, kūlwa kūshimīzīla mu nzīla jose ja nkūlūgenji wakwe Daūdi; atagalūkile kūja kū būlyo nūūlū kū lūmoso.

3Hūna aho alī mu ng'waka gwakwe gw'ikūmi n'īnaane alī ntemi, ūntūma Shafani ūyo walī ng'wandīki, ng'witūnja o ng'wa Azalia, ng'witūnja o ng'wa Meshulamu; ūntūma ū kū hekalu ya ng'wa SEEBA. Ūng'wīla gīkī,

4“Jaga ū kūlī ngabīji ntaale ū Hilikia ūkang'wīle ajihele chiza ī hela ījo jasoogilwe jenhwa mu hekalu ya ng'wa SEEBA, ījo bajikumingile a balang'hani kūfuma ū kū banhū.

5Ī hela jenījo binhwe a banhū abo basolwa kūlwa kūgwīmīīla ū nīmo gwa kwībeegeleja ī hekalu; a banhū benabo hū bakūyūbalīpa a batūmami abo bakwībeegelejaga ī hekalu ya ng'wa SEEBA,

6a baselemala na a bazengi, hamò na a bagunanhi babo; bapandīke ja kūyūgūla mbawa na mawe ayo gabeejiwe ng'hana ng'hana kūlwa nguno ya kwībeegeleja ī hekalu.

7Alīyo abo bakwinhagwa ī hela jenījo batī na nguno ya kwikala bakūbūjiagwa ūmo bakūjitūmamīlaga, nguno bakūjitūmamīlaga na būtūngīlīja būtaale.”

8Ū Hilikia ū ngabīji ntaale ūng'wīla ū Shafani ū ng'wandīki, “Shiishi ī shitabo sha shilagīlo nashipandīkīla mu hekalu ya ng'wa SEEBA;” ū Hilikia ūng'winha ū Shafani, ūshisoma.

9Hūna ū Shafani ū ng'wandīki ūja ū kūlī ntemi kūtwala ī mhola; ūūkang'wīla, “A batūmami bako bajitūmamīlaga ī hela ījo jalī mu hekalu ya ng'wa SEEBA, bajitūūlaga mu makono ga batūmami na a bīmīīji ba nīmo abo baalī ū kū hekalu.”

10Hanuma ū Shafani ū ng'wandīki ūng'wīla ū ntemi, “Ū ngabīji Hilikia waninha shitabo shiishi.” Hūna ū Shafani ūshisoma ū kū būtongi wa ntemi.

11Ū ntemi aho wīyiigwa ī mihayo ya mu shitabo sha shilagīlo, ūtandūla ī shizwalo shakwe.

12Ūnagīja ū ngabīji Hilikia na Ahikamu ng'witūnja o ng'wa Shafani, na Akibooli ng'witūnja o ng'wa Mikaya, na Shafani ū ng'wandīki, hamò na Asaaya, ūyo walī ntūmami wa ha ng'wa ntemi.

13Ūbawīla, “Jagi mukabūje ū kūlī SEEBA; munibūgīje ū nene na a banhū, nī Yuda ī yose, kūlwa nguno ya mihayo īyo yandīkilwe ū mu shitabo īsho shabonagwa shenīshi. Īlī hape gīkī ū būpelanu bo ng'wa SEEBA ūbo atūpelanīlile būlī būtaale no; nguno a babyaji bise batīdīlīlile, na batīītile gīt'ūmo īlī ī mihayo īyo yandīkilwe ū mu shitabo shenīshi kūlwa nguno yise.”

14Na lūūlū ū ngabīji Hilikia nū Ahikamu, hamò nū Akibooli, nū Shafani nū Asaaya, būja ū kūlī Huluda; walī ng'hangi nkīma, nke o ng'wa Shalumu, ng'witūnja o ng'wa Tikiva, ng'witūnja o ng'wa Hahasi, nang'hani wa chumba sha kūbīkīla shizwalo. Ū ng'hangi nkīma ng'wenūyo wikalaga mumo Yeluasalemu, mu lūgalī lwa kabīlī lwaho.

15Ūbawīla, “Ū SEEBA ū Mulungu wa Isilaeli alīhaya gīkī, Ū munhū ūyo wamutūmaga kūlī nene ng'wīlagi:

16‘Ū SEEBA alīhaya gīkī: Nakwenha būkenaagūji būtaale, nalīkenaagūle ī lipandī lyenīlī na a banhū benaba, kūlenganīla nī mihayo ya mu shitabo īsho washisomaga ū ntemi wa Yuda.

17Nguno baanilekile ū nene, bandya kūzuukīja būbbani kū bamulungu bangī; baanisaayīkije no kūlwa milīmo yabo yose īyo bakūbeejaga na makono gabo. Na lūūlū ū būpelanu wane wabakile, būtīko kūjimiwa na hado yaya; shiigelile nalīkenaagūle ī lipandī lyenīlī!’

18Alīyo ū ntemi wa Yuda ūyo wamutūmaga kwiza kūbūūja kūlī SEEBA, ng'wīlagi gīkī, ‘Ū mu mihayo īyo wīyigwaga, ū SEEBA Mulungu wa Isilaeli alīkūwīla ū bebe gīkī:

19Īkī ī ng'holò yako yoolechaga hape gīkī wagalūkaga na kwidoohya ū kū būtongi bo ng'wa SEEBA aho wīyiigwa ī mihayo īyo nīhaya kūlwa nguno y'ipandī lyenīlī na a banhū baamo, ī gīkī bakūzung'wa, nī lipandī lyabo lībize buyīkī; na lūūlū ū bebe īkī watandūlaga na shizwalo shako ūlīla na kū būtongi bone, nakwigwaga, alīhaya ū SEEBA.

20Ū bebe nakūkwīnja nakūtwale kū bakūlūgenji bako; ūkūjīkwa mu mhola, a miso gako gatūbūbona ū būkenaagūji ūbo nalīhaya kūwenha a h'ipandī lyenīlī.’” Hanuma ya yenīyo būshoka ū kūlī ntemi, būntwalīla ī lishosho lya kūfuma ū kūlī ng'hangi nkīma ng'wenūyo.

← Chapter 21 Jump to: Chapter 23 →