Leviticus 1

Sukuma 2019

Jump to: Chapter 2 →

1Ū SEEBA ūnyombya ū Musa kūfuma ū ng'wiheema lya kwibilingīla, ūng'wīla,

2shitambò kūlwa ng'wa SEEBA, ni enhage ntugo kūfuma ng'widaale lya ng'ombe, nūūlū lya ng'holo na mbūli.

3Ī shakwinha shakwe ūlū alīfunya ng'ombe kūbiza shitambò sha kūpemva, akūfunya nzagamba ītī na būka. Akūyenha ha nyango gw'iheema lya kwibilingīla, yanukūlwe kū būtongi bo ng'wa SEEBA.

4Hanuma akūtūūla nkono gwakwe a ha ntwe gwa ntugo gwa shitambò sha kūpemva shenīsho, hū shikwanukūlwa ha ng'wanya gwakwe, kūlwa nguno ya kūmeegeja isangī.

5Hanuma ya henaho, ī ng'ombe yenīyo akwīsīnza kū būtongi bo ng'wa SEEBA; a bitūnja ba ng'wa Alooni, a bagabīji, bakūgenha a mininga gayo bagaseeseebele kū mhande jose ja ng'walīlo ūyo gūlī a ha nyango gwa h'iheema lya kwibilingīla.

6Hūna ī ng'ombe ya shitambò sha kūpemva yenīyo akwībaaga, hanuma ībutagūle mapingili mapingili.

7A bitūnja ba ngabīji Alooni bakūtūūla moto a ha ng'walīlo, būgūkūbīkīīla ng'hwi.

8Hanuma a bitūnja ba ng'wa Alooni a bagabīji, bakūgatūūla a mapingili ga nyama yenīyo higūlya ya ng'hwi jilībaka moto a ha ng'walīlo; nū ntwe bakūgūtūūla ho, pye na a masazu.

9Alīyo ī sha mu nda nī chūūga akūshooja tame mu minzī; hama ū ngabīji akwīpemba pyī ī nyama ya ng'ombe yenīyo ha ng'walīlo. Shilī shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.

10Ī shitambò ūlū shifumile ng'widaale lya ng'holo nūūlū mbūli, akūfunya ng'osha ītī na būka.

11Akūyenha kū būtongi bo ng'wa SEEBA, kū lwande lwa sukuma ya ng'walīlo wīsīnzīle kwenūko; hūna a bitūnja ba ng'wa Alooni a bagabīji bakūgaseeseebela a mininga gayo ha ng'walīlo, kū mhande jago jose.

12Hanuma akwībbutagūla mapingili mapingili, hūna ū ngabīji ūgatūūla higūlya ya ng'hwi jilībaka moto a ha ng'walīlo; nū ntwe akūgūtūūla ho, pye na a masazu.

13Ū ng'wenekīlī shitambò akūshooja mu minzī ī sha mu nda nī chūūga, hūna ū ngabīji akūshenha pyī ī shose ha ng'walīlo ashipembe. Ī shenīsho shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.

14Ī shitambò sha kūpemva ī sha kūmfunīja SEEBA, ūlū noni akūfunya ng'hūūlū, nūūlū ng'hune ya mhunda.

15Ū ngabīji akūyenha ha ng'walīlo, ūyīmyoola ī nhingo, ūgwīnja ū ntwe gwayo, ūgoocha ha ng'walīlo; a mininga gayo gūūsūlūlūkījiwa ha ng'walīlo mu kabazu.

16Ī lisogejo akūlyīnja na a yayo galīmo ū mu gatī yalyo, ūlīponya ha kīya ya ng'walīlo aho gakaponejiagwa mabu.

17Ī noni yenīyo akwīdimīla kū manana wītandūla, gwike yaya ū kwīlekanya gete; hūna ū ngabīji akwīpemba ha ng'walīlo, a higūlya ya ng'hwi ījo jilī mu moto. Ī shenīsho shitambò sha kūpemva, shitambò sha kūfunyiwa mu nzīla ya moto; sha ng'waso gwa kūnyeja SEEBA.

Jump to: Chapter 2 →