Leviticus 15

Sukuma 2019

← Chapter 14 Jump to: Chapter 16 →

1Ū SEEBA ūbawīla a ba Musa nū Alooni,

2Lūngalūngagi nabo a Baisilaeli mubawīle gīkī, “Ūlū munhū ngosha ūsaata būsaatu bo kūfuma minzī minzī mu mīlī gwakwe, īsho shilīmfuma shenīsho shilī shisoso.

3Nū wei shikūng'wenheleja kūbiza nsoso, shibize shikūselaga būl'ikanza, nūūlū ū mīlī gwakwe gwachibije; alī nsoso ū ng'wenūyo.

4Ū munhū ūyo būsoso būkūmfumaga mu mīlī ūlū ūlaala ha būlīīlī, ūbūlobya nī shisho shikūmfumaga, būkūsosohala; nūūlū wigaasha ha shikolo shose shose, shikūsosohala.

5Ose ose ūyo ūbūkuumya ū būlīīlī wa munhū ng'wenūyo, akūbiza nsoso; akūfula ī shizwalo shakwe, ooga na kooga mu minzī, hūna wikala alī nsoso gīko kūshisha līīmi kūlibīla.

6Ose ose ū wa kwigaasīja shikolo īsho shaalī shigaasījiagwa na munhū akūfumagwa būsoso, akūfula ī shizwalo shakwe, ooga na kooga mu minzī; hūna wikala alī nsoso gīko kūshisha līīmi kūlibīla.

7Nūūlū ose ose ūyo ūnkuumya munhū ūyo akūfumagwa būsoso, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

8“Ū munhū ūyo akūfumagwa būsoso ūlū ūng'wigaasīja munhū, ūyo wigaasījiagwa ng'wenūyo akūfula ī shizwalo shakwe, ooga na kooga mu minzī; hūna wikala alī nsoso gīko kūshisha līīmi kūlibīla.

9Ū munhū ng'wenūyo ūlū wigaasīja shose shose alī mu lūgendo, īsho alashigaasīje shikūsosohala.

10Na būlī ose ose ūyo ūshikuumya ī shikolo īsho shaalī shigaasījiagwa na munhū wa kūfung'wa būsoso, nang'hwe akūbiza nsoso kūshisha līīmi kūlibīla; ū wa kūshibūūcha ī shikolo shenīsho akwigeleelwa kūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

11Ū munhū ūyo akūfumagwa būsoso ūlū ūnkuumya munhū ose ose alīyo atakalabile a makono gaakwe, ūyo wakuumiagwa ng'wenūyo akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

12Ū munhū ng'wenūyo ūlū ūkuumya nungū, īkūbelagūlwa; ūlū shiseme sha līntī shikoojiwa mu minzī.

13“Ū munhū wa kūfung'wa būsoso ūlū ūpīla, akūdīīla shikū mpungatī alī ng'wikanza lya kwejiwa; ūfula ī shizwalo shakwe, ooga nū mīlī gwakwe mu minzī ga kūsela, hūna wela.

14Ū mu lūshikū lwa kanaane akūsola mhunda ibīlī nūūlū ng'hune ibīlī ja ng'hūūlū wiza najo kū būtongi wang'wa SEEBA, ū kū nyango gwiheema lya kwibilingīla, ūng'winha ngabīji.

15Ū ngabīji akūjisīnza, īmò kūlwa shitambò sha shibi, ī yīngī yūbiza shitambò sha kūpemva. Ū mu nzīla yenīyo ū ngabīji akūmeegeja isangī kūlī SEEBA, kūlwa nguno ya būsaatu wakwe ū wa kūfung'wa būsoso.

16“Ū ngosha ūlū wiloteela, akooga mu minzī pyī ū mīlī; hūna wikala alī nsoso gīko kūshisha līīmi kūlibīla.

17Ng'wenda gose gose ūlū ūgwilooteelela shiigelile gūfulwe, ūlū ndīlī yoojiwe; shikwikala shilī shisoso gīko kūshisha līīmi kūlibīla.

18Ū ngosha ūlū ūlaala na nkīma, a bose būbīlī wabo īkūbigeleelwa kooga mu minzī, hūna bakwikala basoso gīko kūshisha līīmi kūlibīla.

19“Ūlū nkīma wingīla ng'wikanza lyakwe lya ng'weji, akūbiza nsoso ikanza lya shikū mpungatī kūlwa mininga gaakwe. Ose ose ūyo ūnkuumya akūsosohala kūshisha līīmi līlibīle.

20Ū ng'wikanza lya būsoso bokwe, shose shose īsho ūshilaalīla shikūsosohala, na būlī shene īsho ūshigaasīja shikūsosohala.

21Ose ose ūyo ūkuumya būlīīlī wakwe ū nkīma ng'wenūyo, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

22Nūūlū munhū ose ose ūkuumya shikolo īsho shigaasījiagwa nū nkīma ng'wenūyo, ū munhū ng'wenūyo akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

23Nūūlū ūbiza walī wigaashaga ha būlīīlī, hūna munhū ūbūkuumya, ū munhū ng'wenūyo akūbiza nsoso kūshisha līīmi līlibīle.

24Nūūlū ngosha ūlaala nū nkīma ng'wenūyo hūna gūnkuumya a mininga ga ng'wikanza lyakwe, ū ngosha ng'wenūyo akūbiza nsoso kūshisha shikū mpungatī; na būlī būlīīlī ūbo ūbūlaalīla būkūsosohala.

25“Ū nkīma ūlū ūbiza mu makoye ga kūfuma mininga ikanza lya shikū ningī īlo lītī mu shikū ja ng'weji gwakwe, nūūlū a mininga ga ng'wikanza lyakwe gūūfuma kūshisha kūlībīta ī likanza lyenīlo, akūbiza nsoso pyī ī likanza īlo akūfumagwa mininga; akwīta gīt'ūmo akīītīlaga mu shikū jakwe ja ng'weji.

26Būlīīlī bose bose ūbo ūbūlaalīla aho ataalī akūfumagwa mininga būkūbiza būsoso, gīt'ūmo būkabizīlaga ū mu shikū jakwe ja ng'weji; na būlī shikolo īsho ūshigaasīja shikūbiza shisoso, gīt'ūmo shikabizīlaga mu shikū jakwe ja ng'weji.

27Ose ose ūyo ūshikuumya akūbiza nsoso, akūfula ī shizwalo shakwe, ooga na kooga mu minzī; hama wikala alī nsoso gīko kūshisha līīmi kūlibīla.

28“Ūlū ūpīla wīnga ū mu makoye gaakwe genayo, akūlinda jibīte shikū mpungatī hūna wandya kūbalwa gīkī alī ng'wela.

29Ū mu lūshikū lwa kanaane akūsola mhunda ibīlī, nūūlū ng'hune ibīlī ja ng'hūūlū ūjenha kūlī ngabīji, kū nyango gwiheema lya kwibilingīla.

30Ū ngabīji akwīfunya īmò yajo kūbiza shitambò sha shibi, ī yīngī shitambò sha kūpemva. Ū mu nzīla yenīyo ū ngabīji akūmeegeja isangī kūlī SEEBA, kūlwa būsoso bokwe nguno ya makoye gakwe ga kūfung'wa mininga.

31“A Baisilaeli mukūbalekanya nabo ū būsoso wabo mu nzīla yenīyo, batizūchīla mo ū mu būsoso wabo, na kūlīsosohaja ī lipandī lyane ī lya kwikala, īlo līlī hamò nabo.

32Ī shilagaīlo shenīshi shilī kūlwa būlī ngosha ūyo ūsaata būsaatu wa kūfung'wa būsoso mu mīlī, nūūlū ūyo wisosohaja kūlwa kwilooteela;

33na kūlwa būlī nkīma ūyo alī ng'wikanza lyakwe lya ng'weji, na ose ose, ngosha nūūlū nkīma, ūyo akūfumagwa būsoso mu mīlī gwakwe; nūūlū ngosha ūyo ūlaala na nkīma alī ng'wikanza lyakwe lya būsoso.”

← Chapter 14 Jump to: Chapter 16 →