Leviticus 4

Sukuma 2019

← Chapter 3 Jump to: Chapter 5 →

1Ū SEEBA ūng'wīla ū Musa gīkī,

2A Baisilaeli bawīlage ī mihayo īyī, ūlū munhū wīta shibi mu mhayo gose gose mu būtūmana, wīta mhayo gūlemejiwe mu shilagīlo shose shose sha ng'wa SEEBA,

3Ūlū ngabīji ūyo abililwe maguta wīta shibi, ūbenheleja a banhū kwingīla mu kwihīga, akwenha ū kū būtongi bo ng'wa SEEBA mūūga ya nzagamba ya ng'ombe, īyo ītī na kabi. Akwīfunya ībize shitambò sha shibi, kūlwa shibi īsho wītaga.

4Ī mūūga ya nzagamba yenīyo akwīyenha kū būtongi bo ng'wa SEEBA, kū nyango gw'iheema lya kwibilingīla. Hūna ūtūūla nkono gwakwe a ha ntwe gwayo, hanuma wīsīnza kū būtongi bo ng'wa SEEBA.

5Hanuma ya henaho, ngabīji ūyo abililwe maguta akūsola mininga gamò, a ga ng'ombe yenīyo; wingīla nago ū ng'wiheema lya kwibilingīla.

6Ūlū ūshika mo akūsombya lwala ū mu mininga geneyo agasaamagūlīle ng'hangala mpungatī kū būtongi bo ng'wa SEEBA, a h'itundubaali ly'isenge ū ng'wipandī lyeela.

7Hūna ū ngabīji ng'wenūyo, akūgabila a mininga gamò ha mapembe ga ng'walīlo gwa kūzuukīja būbbani, ūyo gūlī kū būtongi bo ng'wa SEEBA, ū ng'wiheema lya kwibilingīla. A mininga ga nzagamba yenīyo ayo galasaage, akūgiita ha sī aho gwīmīīlile ū ng'walīlo gwa shitambò sha kūpemva; a ha nyango gw'iheema lya kwibilingīla.

8Hanuma ī nyama ya shitambò yenīyo akūyīngīja pye a maguta ayo gakundīkīgije sha mu nda, na a gangī ayo galīmo.

9Nī mhīgo būbīlī wajo akūjīnja, na a maguta ga ha ngongo, na a yayo gakundīkīgije h'itīma; ī shose shenīshi akūshīnja hamò nī mhīgo.

10Akūgīnja gīt'ūmo bakīngījaga maguta ga ng'ombe ya kūfunyiwa kūbiza shitambò sha būsangī. Ī shenīshi ū ngabīji akūshipemba ha ng'walīlo gwa shitambò sha kūpemva.

11Alīyo ī likūnza lya nzagamba yenīyo nī nyama, pyī nū ntwe na a magūlū, nū būla nū būūshi wayo,

12hū kūhaya pyī ī shilīshiiga a ha nzagamba yenīyo, sha kūtwalwa hanze ya ng'hambī, ipandī lya kwitīla mabu, ūko banhū balemegije kūshika sagala sagala. Akwīpemba ūko gakitīlagwa mabu, ha moto gwa magogo.

13Ūlū pyī ī libità lya Baisilaeli lyīīta shibi mu būtūmana, lyīīta shibi mu mhayo ūyo gūlemegije mu shilagīlo shose shose sha ng'wa SEEBA; nūūlū bakabiza batadeebile gīkī baakenaagūlile, alīyo nahene bakūbalīlwa būhūbi.

14Hūna lūūlū ūlū būshiitegeleja ī shibi īsho baashītile, ī libità lya banhū ī lyose līkwenha mūūga ya nzagamba ya ng'ombe ū kwiheema lya kwibilingīla, ībize shitambò sha shibi.

15A banamhala a batongeeji balyo ī libità bakūtūūla a makono gabo a ha ntwe gwa nzagamba yenīyo, kū būtongi bo ng'wa SEEBA; hūna ī nzagamba īkūsīnzwa kū būtongi bo ng'wa SEEBA.

16Hanuma ngabīji ūyo abililwe maguta, akūsola mininga gamò a ga ng'ombe yenīyo; wingīla nago ū ng'wiheema lya kwibilingīla.

17Ūlū ūshika mo akūsombya lwala ū mu mininga genayo, agasaamagūlīle ng'hangala mpungatī kū būtongi bo ng'wa SEEBA, a h'itundubaali lya h'isenge.

18Mininga gamò akūgabilīja a ha mapembe ga ng'walīlo ūyo gūlī kū būtongi bo ng'wa SEEBA, ū ng'wiheema lya kwibilingīla. A mininga ayo galaasaage akūgiita ha sī, aho gwīmīīlile ū ng'walīlo gwa shitambò sha kūpemva, a ha nyango g'wiheema lya kwibilingīla.

19A maguta gayo akūgīnja pye a gose agapembe ha ng'walīlo.

20Ī nzagamba yenīyo akwīyītīla gīt'ūmo yigelile kwītīlwa nzagamba ya shitambò sha shibi. Ū mu nzīla yenīyo ū ngabīji akūbeeja isangī kūlwa nguno yabo, balekejiwe.

21Hanuma ya yose, akwīsola ī nzagamba wītwaale hanze ya ng'hambī akīpembe moto gīt'ūmo alayītīle ī ya kwandya. Ī shenīshi shilī shitambò sha shibi sh'ibità lya banhū bose.

22Ūlū ntongeeji wīta shibi mu būtūmana, wīta mhayo ūyo gūlemegije mu shilagīlo shose shose sha ng'wa SEEBA Mulungu wakwe, ū ng'wenūyo ng'hūbi.

23Na lūūlū ūlū oolekejiwa ī shibi shakwe ūshideeba, akwenha ngulyati ya mbūli ītī na būka, ībize shitambò shakwe.

24Ūlū ūyenha, akūtūūla nkono gwakwe a ha ntwe gwa mbūli yenīyo, hūna wīsīnza kū būtongi bo ng'wa SEEBA, a h'ipandī īlo shitambò sha kūpemva shikasīnzīlagwa. Ī shenīsho shilī shitambò kūlwa nguno ya shibi.

25Hūna ū ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage akūgiita ha sī, aho gwīmīīlile ū ng'walīlo gwenūyo.

26A maguta a gene akūgapemba pye ha ng'walīlo, gīt'ūmo akūgapembela a maguta ga shitambò sha būsangī. Ū mu nzīla yenīyo ū ngabīji akūbeeja isangī kūlwa nguno ya shibi shakwe ū ntongeeji, alekejiwe.

27Ūlū munhū ūngī ose ose ū ng'wibità lya banhū wīta shibi mu būtūmana, wīta mhayo ūyo gūlemegije mu shilagīlo shose shose sha ng'wa SEEBA, ū ng'wenūyo ng'hūbi.

28Ūlū oolekejiwa ī shibi shakwe ūshideeba, akwenha mbūli ng'hīma ītī na būka, ībize shitambò kūlwa shibi shakwe īsho wītile.

29Ūlū ūyenha, akūtūūla nkono gwakwe a ha ntwe gwa mbūli ya shitambò yenīyo, hūna wīsīnzīla h'ipandī īlo shitambò sha kūpemva shikasīnzīlagwa.

30Hūna ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage akūgiita ha sī, aho gwīmīīlile ū ng'walīlo gwenūyo.

31A maguta akūgīnja pyī, gīt'ūmo gakīngījiagwa ha shitambò sha būsangī; hūna ū ngabīji akūgapemba a ha ng'walīlo, kūlwa nguno ya ng'waso gwa kūnyeja SEEBA. Ū mu nzīla yenīyo ū ngabīji akūbeeja isangī kūlwa nguno yakwe ū munhū ng'wenūyo, alekejiwe.

32Ū nkenaagūji ūlū wenha ng'holo, gīkī ībize shitambò kūlwa shibi shakwe, ni enhage ng'hīma ītī na būka.

33Hūna akūtūūla nkono gwakwe a ha ntwe gwayo, hanuma wīsīnza kūlwa shitambò sha shibi h'ipandī ūko shikasīnzīlagwa shitambò sha kūpemva.

34Hūna ngabīji akūsola mininga gamò a ga shitambò shenīsho ūgabilīja na lwala lwakwe a ha mapembe ga ng'walīlo gwa shitambò sha kūpemva; ayo galaasaage ūgiita ha sī, aho gwīmīīlile ū ng'walīlo gwenūyo.

35Pye a maguta akūgīnja gīt'ūmo gakīngījiagwa a ha ng'holo ya shitambò sha būsangī; hanuma ū ngabīji akūgapemba ha ng'walīlo; higūlya ya shitambò īsho alīfunījiwa SEEBA mu nzīla ya moto. Ū ngabīji akūbeeja isangī kūlwa shibi shakwe ū munhū ng'wenūyo mu nzīla yenīyo, nang'hwe akūlekejiwa.

← Chapter 3 Jump to: Chapter 5 →