Leviticus 3

Sukuma 2019

← Chapter 2 Jump to: Chapter 4 →

1Ūlū munhū ūfunya ng'ombe yakwe ng'osha nūūlū ng'hīma kūlwa ng'wa SEEBA kūbiza shitambò sha būsangī, akūfunya ītī na būka.

2Hūna akūtūūla nkono a ha ntwe gwa ng'ombe yakwe ya shitambò, hama ayīsīnzīle ha nyango gw'iheema lya kwibilingīla. Hanuma a bitūnja ba ng'wa Alooni a bagabīji, bakūgaseeseebela a mininga gayo a ha ng'walīlo, mhande jago jose.

3Ū kūfuma ū mu shitambò sha būsangī shenīsho, akwenha ū kū būtongi bo ng'wa SEEBA shitambò sha kūbeejiwa mu nzīla ya moto; pye a masazu ayo gakundīkīgije sha mu nda, na a maguta a gangī ayo galīmo.

4Nī mhīgo būbīlī wajo akūjenha, na a maguta ga ha ngongo, na yayo gakundīkīgije h'itīma; ī shose īshi akūshīnja hamò nī mhīgo.

5Hūna a bitūnja ba ng'wa Alooni bakūshitūūla ha ng'walīlo, a higūlya ya shitambò sha kūpemva, īsho shilī ha ng'hwi jilīībaka moto. Bakūshipemba henaho shibize shitambò sha kūfunyiwa mu nzīla ya moto; ī shoi shilī sha ng'waso gwa kūnyeja SEEBA.

6Hama ūlū munhū ūfunya ng'holo kūlwa ng'wa SEEBA gīkī ībize shitambò shakwe sha būsangī, akūfunya ng'osha nūūlū ng'hīma ītī na būka.

7Ī ng'holo īyo alayīfunye akūyenha kū būtongi bo ng'wa SEEBA;

8hūna ūtūūla nkono gwakwe a ha ntwe gwayo ī ng'holo ya shitambò shakwe, hama wīsīnza kū būtongi w'iheema lya kwibilingīla. Hanuma a bitūnja ba ng'wa Alooni bakūgaseeseebela a mininga gayo ha ng'walīlo, mhande jago jose.

9Ū kūfuma ū mu shitambò sha būsangī shenīsho, akwenha kūlwa ng'wa SEEBA shitambò sha kūbeejiwa mu nzīla ya moto; a maguta gayo, nī likīla lyayo pyī ī lyose kūlībbutīla aho lyandīgije, na a masazu a gose ayo gakundīkīgije sha mu nda; na a maguta a gangī ayo galīmo.

10Nī mhīgo būbīlī wajo akūjenha, na a maguta ga ha ngongo, na yayo gakundīkīgije h'itīma; ī shose shenīshi akūshīnja hamò nī mhīgo.

11Ū ngabīji akūshocha ha ng'walīlo ī shenīshi kūlwa shakūlya; shilī shitambò sha kūbeejiwa mu nzīla ya moto, kūlwa ng'wa SEEBA.

12Ī shitambò shakwe ūlū mbūli, akwīyenha kū būtongi bo ng'wa SEEBA;

13hūna ūtūūla nkono gwakwe a ha ntwe gwayo, hama wīsīnza kū būtongi w'iheema lya kwibilingīla. Hanuma a bitūnja ba ng'wa Alooni bakūgaseeseebela a mininga gayo ha ng'walīlo, mhande jago jose.

14Ū kūfuma ū mu shitambò īsho alīfunya, akūbeeja shitambò īshi kūlwa ng'wa SEEBA mu nzīla ya moto, pye a masazu ayo gakundīkīgije sha mu nda, na a maguta a gangī ayo galīmo.

15Nī mhīgo būbīlī wajo, na a maguta ga ha ngongo, na a yayo gakundīkīgije itīma; ī shose īshi akūshīnja hamò nī mhīgo.

16Ū ngabīji akūshocha ī shenīshi ha ng'walīlo kūlwa shakūlya; shilī shitambò sha kūbeejiwa mu nzīla ya moto, kūlwa ng'wa SEEBA.

17Ī shenīshi shilī shilagīlo sha būja na būja kūlwa shibyalīlwe īsho shiliza. Hose hose ūko mulakikale, yaya ū kūgalya a mazezele nūūlū a mininga.

← Chapter 2 Jump to: Chapter 4 →