Leviticus 16

Sukuma 2019

← Chapter 15 Jump to: Chapter 17 →

1Ū SEEBA akalūngalūnga nū Musa aho baacha a bitūnja ba ng'wa Alooni, abo bakacha kūlwa nguno ya kwegeela kū būtongi bo ng'wa SEEBA.

2Ū SEEBA ūng'wīla ū Musa alīhaya, “Ng'wīlage ū nkūlūyo ū Alooni gīkī yaya ū kūja gīt'ūmo atogelilwe wei dūhū ū kū būtongi wa isumbī lya shigongo īlo līlī h'isandīko, kū mpīndo y'isenge, ū kwipandī ī lyeela no no no; ūlū wīta gīko akūcha. Nguno ū nene nakiyoolechaga mu nzīla ya ilunde a higūlya ya isumbī lya shigongo.

3“Ū Alooni ūlū aliza ū ng'wipandī ī lyeelya, shiigelile wize na shikolo īshi, nzagamba ya ng'ombe mūūga, kūlwa shitambò sha shibi, na ng'ondi kūlwa shitambò sha kūpemva.

4Nīyo azwaale ī ng'hanjo ya kitaani nū ng'wenda gwa kitaani ū gwa kūtonja mu gatī, nū ngwaasho gwa kitaani agwitunge ū mu nkīmbīlī gwakwe; nī ngoofiila ya kitaani īzwale. Ī shizwalo shenīshi shilī sheela, na lūūlū aho ataalī ū kūshizwaala, shiigelile ooge mu minzī tame.

5Akūsola ngulyati ibīlī ja mbūli kūfuma ū kū Baisilaeli; īmò kūlwa shitambò sha shibi, yīngī ya shitambò sha kūpemva.

6“Ū Alooni akwīfunya ī nzagamba kūbiza shitambò kūlwa shibi shakwe, abeeje isangī kūlwa nguno yakwe nī kaya yakwe.

7Hanuma ya henaho ū Alooni akūjisola nī mbūli ūjeenha kū būtongi bo ng'wa SEEBA, ha nyango gwiheema lya kwibilingīla.

8Hūna ūjeesela mbale; mbūlī īmò yūbiza kūlwa ng'wa SEEBA, ī yīngī yūbiza ya kūsaamya būbi.

9Ī mbūli īyo īlagwīlwe mbale gīkī ībize kūlwa nguno ya ng'wa SEEBA, ū Alooni akūyenha wīfunye kūlwa shitambò sha shibi.

10Īyo īlaasolwe kūbiza ya kūsaamya būbi, īkūfunyiwa kūlwa ng'wa SEEBA īlī mhanga gīko, ītūmamīlwe kūbeeja isangī mu nzīla ya kūtwalwa kwitogolo kūlwa kūsaamya būbi.”

11“Hūna ū Alooni akūyenha ī nzagamba ya shitambò sha shibi kūlwa nguno yakwe; akwīsīnza wīfunya kūlwa shibi shakwe, ūbeeja isangī kūlwa nguno yakwe nī kaya yakwe.

12Hanuma ya henaho akūsola lyahulīlo, ahule makala ga moto kūfuma ha ng'walīlo, kū būtongi bo ng'wa SEEBA; ūdaha na mapī abīlī ga būbbani wa ng'waso gwawiza būshiwe chiza būnojiwa. Ī shose shenīshi akūja nasho ū kū mpīndo y'isenge.

13Ū būbbani ūbūtūūla a ha moto kū būtongi bo ng'wa SEEBA; ī lyochi īlo līladundumūke līkūlīshīīkīja ī lisumbī lya shigongo īlo līlī h'isandīko lya būkaanīji, atizūcha.

14A mininga ga nzagamba akūsola magehu ūgaseeseebela na lwala lwakwe ha būtongi w'isumbī lya shigongo; gangī ūsaamagūla na lwala lwakwe ng'hangala mpungatī ū kū būtongi walyo ī lisumbī lya shigongo.

15“Hanuma ya henaho akwīsīnza ī mbūli ya shitambò sha shibi īyo yafunyiagwa na banhū; a mininga gayo ūgatwala ū kū mpīndo y'isenge, kwīta gīt'ūmo wagīītīlaga a ga nzagamba, ūlīseeseebela ī lisumbī lya shigongo a ha būtongi walyo, gangī ūgasaamagūlīla ū kū būtongi walyo.

16Ī lipandī īlo līlī lyeela no no no akūlībeegeja isangī mu nzīla yenīyo, kūlwa nguno ya būsoso wa Baisilaeli na būshitiigwa wabo, nūūlū shibi shingī na shingī īsho bakūbiza bashīta. Akūlyītī gīko nī liheema lya kwibilingīla, īlo līlī hamò nabo, mu būsoso wabo.

17Ū ng'wiheema lya kwibilingīla atizūbizamo munhū nūūlū ūmò, kwandīja ikanza īlo Alooni alingīlīle kūbeeja isangī ng'wipandī lyeela no no no, kūshisha afume mo; ūlū wamala kūbeeja isangī kūlwa nguno yakwe wei ng'wenekīlī nī kaya yakwe, na a Baisilaeli a bose.

18“Hūna akūfuma, wiza a ha ng'walīlo ūyo gūlī kū būtongi bo ng'wa SEEBA, nago ūgūbeegeja isangī; ūsola mininga gamò a ga nzagamba na a ga mbūlī ūgabila pye a mapembe ga ng'walīlo gwenūyo.

19Gamò ga mininga genayo ūgūsaamagūlīla ū ng'walīlo gwenūyo na lwala lwakwe ng'hangala mpungatī kūlwa kūgweeja, gwele ū būsoso wa Baisilaeli.

20“Ū Alooni ūlū ūmala ū kūbeeja ī lisangī kūlwa nguno ya ipandī lyeela no no no, nī liheema lya kwibilingīla, nū ng'walīlo, akūyenha nī mbūlī ī mhanga.

21Ūtūūla a makono gakwe būbīlī wago a ha ntwe gwa mbūlī ī mhanga yenīyo, ūbūtambūūla ū būbi wa Baisilaeli ū bose, nū būshitiigwa wabo, pyī ī shibi shabo, ūshitūūla ha ntwe gwayo ī mbūlī yenīyo. Hūna wītūūla mu nkono gwa munhū ūyo ahelilwe kūlwa nīmo gwenūyo, wītwaala kū matogolo.

22Ī mbūlī yenīyo īkūshibūūcha pyī ī shibi shabo, yūja nasho kū matogolo, ūko batīko banhū; ū munhū ng'wenūyo akūīleka kū matogolo kwenūko ī mbūli yenīyo.

23“Hūna ū Alooni akwingīla ū ng'wiheema lya kwibilingīla, ūshizuula ī shizwalo sha kitaani īsho walī wazwalaga aho ataalī kwingīla ū ng'wipandī lyeela no no no, ūshileka ng'wenūmo ī shizwalo shenīsho.

24Ū wei ūja kwipandī lyeela kooga mu minzī, ūzwaala nī shizwalo īsho akatūmamīlaga na kale. Hūna ūja hanze kūfunya shitambò sha kūpemva kūlwa nguno yakwe, na shitambò sha kūpemva kūlwa banhū bose; ūbeeja isangī kūlwa nguno yakwe, na a banhū a bangī pye a bose.

25Na a masazu ga shitambò sha shibi ūgapemba a ha ng'walīlo.

26“Ū munhū ūyo walī watwaalaga mbūli kū matogolo kūlwa kūsaamya būbi, akūfula ī shizwalo shakwe, ooga nū mīlī gwakwe mu minzī, hūna wigeleelwa kwiza ū mu ng'hambī.

27Ī nzagamba ya shitambò sha shibi nī mbūli ya shitambò sha shibi, ī mitugo ījo mininga gaajo gaalī genhagwa ng'wipandī lyeela no no no kūlwa kūbeeja isangī, shiigelile jitwalwe hanze ya ng'hambī kūpemva mu moto, a makūnza gaajo nī nyama, pyī nū būūshi wajo.

28Ū munhū ūyo alīshipemba nang'hwe akūfula ī shizwalo shakwe, nū wei ooga mu minzī ū mīlī gwakwe, hūna wiza ū mu ng'hambī.”

29“Ī shilagīlo shenīshi shilī shing'we mushidime shikū jose; ū mu lūshikū lw'ikūmi lwa ng'weji gwa mpungatī, būlī ūmò wing'we wileche ī sha kūyeja mīlī gwakwe; nūūlū atizigela ose ose wa kūtūmama milīmo, abize myalīlwa mu sī ying'we, nūūlū ngeni ūyo akwikalaga hamò ning'we.

30Nguno ū mu lūshikū lwenūlo līkūbeejiwa isangī kūlwa nguno ying'we, kūlwa kwejiwa kwing'we; mubize beela kūlī SEEBA; mukwejiwa pyī ī shibi shing'we.

31Ū lūshikū lyenūlo īlī Sabato ya kwifuula kwing'we; alīyo shiigeleelilwe kwilecha ī ya kūyeja mīlī; ī shenīshi shilī shilagīlo sha būja na būja, shidimagi shikū jose.

32Ū ngabīji ūyo witīīlwa maguta, ūyo ahelilwe kūdima nīmo gwa būgabīji a ha ng'wanya go ng'wa ise, h'ūyo akūshizwaala ī shizwalo sheela.

33Hū ng'wene akūbeeja isangī kūlwa ipandī lyeela no no no, na kūlwa iheema lya kwibilingīla nū ng'walīlo, na a bagabīji, na a banhū pye a bose.

34Ī shenīshi shilī shilagīlo sha shikū jose kūlwa nguno ying'we. Būlī ng'waka līkūbeejiwa isangī kamò, kūlwa nguno ya shibi sha Baisilaeli pyī ī shose.” Na ng'hana īkīītwa gīt'ūmo SEEBA walī wanagīīlīla ū Musa.

← Chapter 15 Jump to: Chapter 17 →