Leviticus 14 — Sukuma 2019

2“Ī shilagaīlo īshi shikūtūmama h'ikanza lya kwejiwa kwa munhū ūyo walī nsaatu, ūlū wenhwa kūlī ngabīji.

3Ū ngabīji akūja nang'hwe hanze ya ng'hambī ūūkanola chiza kwenūko. Ū munhū ng'wenūyo ūlū ūbiza wapīlile ū būsaatu wakwe wa kūdūla kūtūlīla na banhū bangī,

4Ū ngabīji akūlagīla jenhwe noni ibīlī mhanga kūlwa kwejiwa kwakwe ūyo walī nsaatu ng'wenūyo; hamò na shipande sha ntī gwa nkoola na būlūba waza n'itambī lya hisopo. Ī noni jene jibize jibalilwe gīkī jilī neela.

5Ū ngabīji akūlagīla īsīnzwe īmò yajo ī noni, īkīngīlījiwe ha nungū ītūūlile higūlya ya minzī gakūselaga.

6Hūna akwīsola ī noni ī mhanga nī shipande sha ntī gwa nkoola, hamò nū būlūba ū waza, nī litambī lya hisopo, ūshidabbya ū mu mininga ga noni īyo yasīnzagwa higūlya ya minzī gakūselaga.

7Ūnseeseebela ng'hangala mpungatī ūyo wenhagwa kwejiwa mu būsaatu wakwe ūbo adūgije kūbatūlīla na banhū bangī; hanuma akūbawīla gīkī welaga. Hūna ī noni ī mhanga akwīlekela īlale īje.

8“Hanuma ya henaho, ū munhū ūyo wizaga kwejiwa akūfula ī shizwalo shakwe, ūjimooga nī nzwīlī jakwe ī jose, hūna ooga na minzī. Kwīngīīla henaho ūbiza wela; adūgije nūūlū kwiza ū mu ng'hambī, gwike akwikala hanze y'iheema lyakwe shikū mpungatī.

9Ū mu lūshikū lwa mpungatī ūjimooga hangī pyī ī nzwīlī jakwe, nī ndezu nū booya wa kū miso, nū būngī pyī ūbo būlī kū mīlī gwakwe. Ūfula hangī nī shizwalo shakwe, ooga na kooga mu minzī, wela.

10“Ū mu lūshikū lwa kanaane akwenha ng'ondi ja ng'holo ibīlī songi, na ng'holo ng'hīma ya ng'waka gūmò, ī jose jibize jitī na būka. Akwenha na kilo idatū ja būsu būnogu būsangije maguta, kūlwa shakwinha sha būsu, na selusi ya liita ya maguta.

11Ū ngabīji ūyo alabinhe a banhū ī mhola ja kwejiwa kwakwe ū munhū ng'wenūyo, akūng'wenha hamò nī shakwinha shakwe kū būtongi bo ng'wa SEEBA, a ha nyango gw'iheema lya kwibilingīla.

12Hūna ū ngabīji akwīsola īmò ya ng'ondi ī songi ījo jenhagwa, wīfunya kūbiza shitambò sha kwihīga, hamò nī nusu liita ya maguta. Akūshiyengeeja kū būtongi bo ng'wa SEEBA shūbiza shakwinha sha kūyengeejiwa.

13Ī ng'ondi akwītwala kwipandī lyeela, ūko jikasīnzīlagwa mitugo ja shitambò sha shibi na shitambò sha kūpemva, ūūkīsīnza kwenūko. Ī shitambò sha kwihīga shibalilwe gīkī ū gwenūyo gūlī ngabo gwa ngabīji, gīt'ūmo shilī ī shitambò sha shibi; nguno shilī sheela no no no.

14“Na lūūlū ū ngabīji akūsola mininga gamò a ga shitambò sha kwihīga ūmilīja ū kū gūtū gwa būlyo ū munhū ūyo wizaga kwejiwa, hamò nū kwikuulume lya nkono gwakwe gwa būlyo, nī lya kū lūpambalà lwa gūgūlū gwa būlyo.

15Hanuma ū ngabīji akūsola maguta magehu ū mu nusu liita ya maguta, ūgasaamīja mu shiganza sha nkono gwakwe gwa lūmoso.

16Hūna ūtūmamīla lwala lwa kwandya ū lwa nkono gwakwe gwa būlyo, ūdabbya ū mu maguta ayo galī ū mu shiganza sha nkono gwakwe gwa lūmoso, ūgasaamula kū būtongi bo ng'wa SEEBA ng'hangala mpungatī.

17A maguta a gamò ayo galī mu nkono gwakwe ū ngabīji, akūūmila ū munhū ūyo aleejiwa; akūūmila kū gūtū gwakwe gwa būlyo, nū kwikuulume lya nkono gwakwe gwa būlyo, nī lya kū lūpambalà lwa gūgūlū gwa būlyo, a higūlya ya mininga ga shitambò sha kwihīga.

18Ayo galasaage ū mu nkono gwakwe ū ngabīji, akūūmila kū ntwe ū munhū ūyo wizaga kwejiwa, ūmeegeja isangī mu gīko kū būtongi bo ng'wa SEEBA.

19“Hanuma ū ngabīji akwīfunya nī ng'holo ya shakwinha sha būkenaagūji, ūbeeja isangī kūlwakwe ū munhū ūyo wizaga kwejiwa kūfuma mu būsoso wakwe. Hūna ū ngabīji akwīsīnza nī ng'holo ya shitambò sha kūpemva,

20wīpemba ha ng'walīlo hamò nī shakwina sha būsu, ūbeeja isangī kūlwa nguno yakwe, ūbiza weejiwa.

21Alīyo ū munhū ng'wenūyo ūlū ng'habī, ūbiza atī na būdūla wa kūfunya ī shenīshi, akūsola ng'ondi īmò songi ya shitambò kūlwa kwihīga. Īkūyengeejiwa kūlwa kūbeeja isangī kū nguno yakwe. Akūfunya na kilo īmò ya būsu būnogu būsangije maguta, kūlwa shakwinha sha būsu; na nusu ya liita ya maguta.

22Akwenha na mhunda ibīlī na ng'hune ibīlī ja ng'hūūlū, shikolo īsho adūgije ū kūshipandīka, īmò īkūbiza kūlwa shitambò sha shibi, ī yīngī kūlwa shitambò sha kūpemva.

23“Ī shenīshi akūshenha ū kūlī ngabīji mu lūshikū lwa kanaane, ūshitūūla ha nyango gwa hiheema lya kwibilingīla, kū būtongi bo ng'wa SEEBA, kūlwa kwejiwa kwakwe.

24Ū ngabīji akwīsola ī ng'ondi ya shitambò sha kwihīga, hamò nī nusu liita ya maguta, ūshiyengeeja kū būtongi bo ng'wa SEEBA kūbiza shakwinha sha kūyengeejiwa.

25Ī ng'holo ya shitambò sha kwihīga wīsīnza, mininga gayo gamò ūgasola, ūmilīja ū kū gūtū gwa būlyo ū munhū ūyo wizaga kwejiwa, hamò nū kwikuulume lya nkono gwakwe gwa būlyo, nī lya kū lūpambalà lwa gūgūlū gwa būlyo.

26Hanuma ū ngabīji akūsaamya maguta magehu mu shiganza sha nkono gwakwe gwa lūmoso.

27Hūna maguta gamò ayo galī ū mu shiganza shakwe, akūgasaamula kū būtongi bo ng'wa SEEBA ng'hangala mpungatī; ūtūmamīla lwala lwa kwandya ū lwa nkono gwakwe gwa būlyo.

28A maguta gamò akūūmila ū kū mapandī ayo wamilījaga a mininga ga ntugo gwa shitambò sha kwihīga, ū kū gūtū gwakwe gwa būlyo, nū kwikuulume lya nkono gwakwe gwa būlyo, nī lya kū lūpambalà lwa gūgūlū gwa būlyo.

29Ayo galasaage ū mu nkono gwakwe ū ngabīji, akūūmila kū ntwe ū munhū ūyo wizaga kwejiwa, ūmeegeja isangī mu gīko kū būtongi bo ng'wa SEEBA.

30Hūna akūjifunya nī mhunda, nūūlū ī ng'hune ibīlī ja ng'hūūlū ījo adūgije ū kwenha ū munhū ng'wenūyo.

31Īmò īkūfunyiwa kūbiza shitambò sha shibi, ī yīngī ībize shitambò sha kūpemva, hamò nī shakwinha sha būsu, ū mu nzīla yenīyo ū ngabīji akūbeeja isangī ū kūlī SEEBA kūlwa nguno yakwe ū munhū ūyo wizaga kwejiwa ng'wenūyo.

32Ī shilagīlo shenīshi shilī kūlwa nguno ya munhū ose ose ūyo alī na būsaatu wa ikūnza lya mīlī ūbo būdūgije kūtūlīla na bangī.”

33Ū SEEBA ūng'īwīla ū Musa nū Alooni gīkī,

34“Ūlū ng'wingīla ū mu sī ya Kanani īyo nalīng'winha kūbiza ying'we, hūna aho mulī ū mu sī yenīyo numba yose yose nūyītūūlīla booba,

35Ū ng'wenekīlī numba yenīyo akūja kūlī ngabīji akang'wīle, ‘Ū mu numba yane naabonile shikolo sha kwikola gītī booba.’

36Ū ngabīji akūlagīla shīnjiwe pyī ī shikolo ū mu numba yenīyo aho ataalī kūja ko kūbūlola ū booba ūbo būlīmo, shitizigela shose shose sha kūkūmbanījiwa ū mu numba yenīyo ūlū yūhayiwa gīkī īlī nsoso. Hanuma ya henaho ū ngabīji hū akūja akīīlole ī numba yenīyo.

37Akūbūlola chiza ū booba ūbo būlī a ha ndugu ja numba yenīyo, ūlū būbiza būlī na matūla tūla gabange lūgogà lūnīlīlīkīīzu nūūlū mabalalūku, nīyo gūūbiza gajile mu gatī, ū mu ndugu jenījo,

38Ū ngabīji akūfuma hanze ūgūlugala ū nyango; ī numba yenīyo yikala gīko shikū mpungatī.

39Ū mu lūshikū lwa mpungatī, ū ngabīji akwiza ho hangī kwīlola ī numba yenīyo. Ū booba ūlū būbiza bongegije kūsambaala a ha ndugu,

40akūlagīla īkandūlwe aho īlī na booba, gīnjiwe a mazengelo gaho, gakaponyiwe hanze ya nzengo, ūko būkaponejiagwa būsoso.

41Nī ndugu ja mu gatī akūbalagīla bajipalagute pye, a gose ayo galīpalagutwa gakaponyiwe hanze ya nzengo, ūko būkaponejiagwa būsoso.

42Hanuma ya henaho bakūsola mazengelo gangī batūūle aho bīnjaga, būteleleja na kūteleleja na malongo mapya.

43“Ī numba ūlū yūmala kūkandūlwa na kwīngījiwa a mazengelo ayo galī na booba, nī ndugu jaayo jūūpalagutwa na kūtelelejiwa būpya, alīyo hūna wilonga hangī dūhū ū booba,

44Ū ngabīji akūja akīlole chiza. Ūlū ūbona gīkī ū booba wasambaalile mo hangī, ū wenūbo būkūbiza booba ūbo būlī na būdūla wa kūkenaagūla; ī numba yenīyo īlī na būsoso.

45Īkwigeleelwa kūkambagūlwa pyī ī yose gete; a mawe gayo, nī mitī yaho, na a maseni ga kwītelelegeja, gabūūchiwe gatwalwe hanze ya nzengo ūko būsoso bakaponejiagwa, gakaponyiwe kwenūko.

46“Ose ose ūyo wingīla ū mu numba yenīyo aho ītaalī īlugalilwe, akūbiza nsoso kūshisha līīmi lyūlibīla.

47Nūūlū ose ose ūyo ūlaala ū mu numba yenīyo, nūūlū kūlīīla mo shilīīwa, akūfula ī shizwalo shakwe.

48“Alīyo ū ngabīji ūyo aliza kwīlola ūlū yamala kūtelelejiwa, ūlū ūsanga gīkī ū booba būtīsambaalīlile ī numba yenīyo, akūbawīla a banhū gīkī ī numba yenīyo ītī na būsoso, nguno boshilile mo ū booba.

49Ū kwīyeeja ī numba yenīyo, akūso la noni ibīlī na shipande sha ntī gwa nkoola, hamò na būlūba waza na hisopo.

50Noni ī yīmò akwīsīnza īīkīngīlīgije ha nungū ītūūlile higūlya ya minzī gakūselaga.

51Hūna akūshisola ī shipande sha ntī gwa nkoola nū būlūba ū waza, hamò nī litambī lya hisopo, nī noni ī mhanga; ūshidabbya ū mu mininga ga noni īyo yasīnzagwa nū mu minzī ayo gakūselaga, wīseeseebela ī numba yenīyo ng'hangala mpungatī.

52Na lūūlū, ī numba yenīyo akūyeeja bo kūtūmamīla a mininga ga noni, na a minzī ayo gakūselaga, hamò nī noni ī mhanga, nū ntī gwa nkoola, nī litambī lya hisopo, nū būlūba ū waza.

53Hanuma ya henaho akwīlekela ī noni ī mhanga īlale hanze ya nzengo. Ī numba yenīyo akwībeegeja isangī mu nzīla yenīyo, nayo īkwejiwa.”

54Ī shenīshi shilī shilagīlo kūlwa nguno ya būsaatu bose bose w'ikūnza ūbo munhū adūgije kūtūlīla na bangī; hamò na gishe,

55na booba wa mu shizwalo na wa mu numba.

56Na kūlwa ibimbà, nūūlū būhele, nūūlū ibalà ibalalūku,

57gīkī ī shikolo shimanīīke ūlū shilī sheela nūūlū shisoso. Ī shoi shilī shilagīlo kūlwa nguno ya booba, na būsaatu w'ikūnza lya mīlī, ūbo munhū ashikile kūtūlīla na banhū bangī.