Leviticus 8

Sukuma 2019

← Chapter 7 Jump to: Chapter 9 →

1Ū SEEBA ūng'wīla ū Musa gīkī,

2“Ng'wenhage ū Alooni na a bitūnja bakwe, nī shizwalo shabo, hamò na a maguta ga kūbitīīla, ūyenhe nī nzagamba ya shitambò sha būkenagūji, nī ng'ondi ījo ibīlī, nī shigabbu sha migatī īyo ītī na shibimbya.

3Hanuma bitanage pye a Baisilaeli bikuminge a ha būtongi wa nyango gw'iheema lya kwibilingīla.”

4Ū Musa wīta gīt'ūmo akalagīīlīlwa na SEEBA, ī libità libilinga a ha nyango gw'iheema lya kwibilingīla.

5Hūna ū Musa ūbawīla a banhū abo baalī bibilinga, “Gūūyū mhayo walagīlile ū SEEBA gīkī gwigelile gwītwe.”

6Na lūūlū ū Musa ūng'wenha ū Alooni na a bitūnja bakwe, ūbooja na minzī.

7Ūnzwalīkīja ū Alooni ī lishadi lyakwe lya nīmo, ūntunga nū ngwasho ū mu nkīmbīlī gwakwe; ūnzwīka nī ng'hanjo ī nguhī, hanuma nī ng'hanjo ya nyagabīji ī ya makono maguhī. Nū ngwasho gwa ha ng'hanjo ya nyagabīji ya makono maguhī ūyo gūbeejiwe na būgaliili no no no ūgūtunga chiza chiza.

8Na a kamfuko ka ha shikuba ūntūūlīla, nī Ulimu nī Tumimu ūshitūūla ū mu kamfuko ka ha shikuba.

9Hanuma ya henaho wītūūla ī ngoofiila a ha ntwe go ng'wa Alooni, nī libalala lya zahabu ī lyeela ūlītūūla a ha būtongi wa ngoofiila, gīt'ūmo SEEBA walī wanagīīlīla dūhū ū Musa.

10Hūna ū Musa ūgasola a maguta ga kūbila, ūlīseeseebela ī lipandī lya kwikala nī shikolo shaamo ī shose, ūsheeja.

11A mininga gamò ūgaseeseebela ha ng'walīlo ng'hangala mpungatī, ūgūbila na maguta ū ng'walīlo nī shikolo sha kūtūmamīla ho pyī ī shose; nī shiseme sha kūkalabīla nī likīndīkīlo lyasho; ūsheeja ī shikolo shenīsho.

12Witīīla maguta magehu a ha ntwe go ng'wa Alooni, ūng'witīīla maguta, ūng'weeja kūlwa nguno ya nīmo.

13Hanuma ya henaho ūbenha na a bitūnja ba ng'wa Alooni, ūbazwalīkīja a mashadi gabo ga milīmo, ūbatunga nī migwasho yabo, hūna ūbatunga shitambaala ū kū mitwe yabo, gīt'ūmo SEEBA walī wanagīīlīla Musa.

14Hūna ūyenha ī nzagamba ya shitambò sha shibi, ū Alooni na a bitūnja bakwe būtūūla a makono gabo a ha ntwe gwayo.

15Ū Musa wīsīnza ī nzagamba yenīyo, ūgasola a mininga gayo magehu ūgabilīja a ha mapembe ga ha ng'walīlo būnè wago, ūgweeja ū ng'walīlo. A mininga ayo gakasaagīīla ūgiita ha sī, aho gwalī gwīmīīlile ū ng'walīlo, ūgwītīla isangī ūgweeja.

16Ū Musa ūgīnja pye a masazu ayo gakabizaga gakundīkīgije sha mu nda, na a yayo gakundīkīgije hitīma, nī mhīgo hamò na a masazu gajo; ī shose shenīshi ūshipemba ha ng'walīlo.

17Alīyo ī nyama ya nzagamba nī likūnza, nū būūshi wayo, ūshipemba moto hanze ya ng'hambī, gīt'ūmo SEEBA walī wanagīīlīla Musa.

18Hanuma ūyeenha nī ng'ondi ya shitambò sha kūpemva, ū Alooni na a bitūnja bakwe būtūūla a makono gabo a ha ntwe gwayo.

19Hūna ū Musa wīsīnza ī ng'ondi yenīyo; a mininga gayo ūgaseeseebela a ha ng'walīlo mhande jago jose.

20Ī ng'ondi wībbutagūla mapingili mapingili; a mapingili genayo ūgoocha mu moto hamò nū ntwe, na masazu gayo.

21Ī sha mu nda nī chūūga ūshooja na minzī. Ī ng'ondi yenīyo wīpemba ha ng'walīlo pyī ī yose, yūbiza shitambò sha kūpemva, sha kwenha ng'waso gwawiza, shakwinha sha kūbeejiwa kū būtongi bo ng'wa SEEBA mu nzīla ya moto, gīt'ūmo SEEBA walī wanagīīlīla Musa.

22Hūna nī ng'ondi ī yīngī ūyeenha, ī ya kūfunyiwa kūlwa kūtūūlwa kwabo ha nīmo; ū Alooni na a bitūnja bakwe bītūūlīla a makono gabo a ha ntwe gwayo.

23Ū Musa wīsīnza, ūsola mininga gayo magehu ūgabila a ha gūtū go ng'wa Alooni ū gwa būlyo, na a h'ikuulume lya nkono gwakwe gwa būlyo, nī likuulume lya lūpambalà lwa gūgūlū gwa būlyo.

24Ū Musa ūbeegeleja na a bitūnja ba ng'wa Alooni, nabo ūbabila a mininga, būlī ng'wene ū kū gūtū gwakwe gwa būlyo, nū kwikuulume lya nkono gwa būlyo, na h'ikuulume lya kū lūpambalà lwa kū gūgūlū gwa būlyo. Nū ng'walīlo ūgūseeseebela a mininga mhande jago jose.

25Ūgasola a maguta ga ng'ondi yenīyo nū nkīla gwayo ū gwizezele, na a masazu pye ayo gakabizaga gakundīkīgije sha mu nda, na a yayo gakundīkīgije h'itīma, nī mhīgo būbīlī wajo na a masazu gajo, nū kūlūmbū kwa būlyo.

26Hūna ū mu shigabbu sha migatī ītī na shibimbya, īsho shalī kū būtongi bo ng'wa SEEBA, ūsola mo ngatī gūmò, ūsola na gūngī gūbeegije na būsu būsangije maguta, na gūngī ng'ūūmu gītī lūgūkūlū; ī shose shenīshi ūshitūūla hamò na a masazu ga ng'ondi, nū kūlūmbū kwa būlyo.

27Hūna ūshitūūla mu makono ga ng'wa Alooni na bitūnja bakwe, būshiyengeeja kū būtongi bo ng'wa SEEBA, shūbiza shakwinha sha kūyengeejiwa.

28Ūshisola hangī ū Musa kūfuma ū mu makono gabo, ūshipemba ha ng'walīlo, a higūlya ya shitambò sha kūpemva; shūbiza shakwinha sha kūfunyiwa kūlwa kūtūūlwa ha nīmo, sha ng'waso gwawiza, shakwinha sha kūfunyiwa kūlwa ng'wa SEEBA mu nzīla ya moto.

29Ū Musa ūshisola nī shiguuku sha ng'ondi yenīyo, īsho walī ahelelilwe wei ng'wenekīlī, nasho ūshiyengeeja kū bū būtongi bo ng'wa SEEBA, shūbiza shakwinha sha kūyengeejiwa, gīt'ūmo SEEBA walī wanagīīlīla dūhū ū Musa.

30Hūna ū Musa ūsola maguta magehu a ga kūbitīīla batūmami, na mininga magehu kūfuma ha ng'walīlo, ūnseeseebela ū Alooni nī shizwalo shakwe; hamò na a bitūnja bakwe nī shizwalo shabo, ūbiza wang'weeja ū Alooni nī shizwalo shakwe, hamò na a bitūnja bakwe, nī shizwalo shabo.

31Hanuma ū Musa ūng'wīla ū Alooni na a bitūnja bakwe, “Ī nyama yenīyī īzugīlagi ha nyango gwa h'iheema lya kwibilingīla, ng'wīlīīle henaho, hamò nī migatī ya mu shigabbu sha migatī ya shakwinha h'ikanza lya kūtūūlwa ha nīmo; h'ūmo nakalagīīlīlwa, gīkī, ‘Ī shenīshi shilī sha kūlyiwa na Alooni na bitūnja bakwe.’

32Hanuma ī nyama īyo īlashiige hamò nū ngatī, ūkūshipemba mu moto.

33Hama yaya ū kwīnga a ha nyango gwa hiheema lya kwibilingīla, kūshisha jishike shikū mpungatī, ījo jihelilwe kūlwikanza lya kūtūūlwa kwing'we ha nīmo; ī likanza lya shikū mpungatī īlo līhelilwe kūlwa kūtūūlwa kwing'we ha nīmo.

34Īyo ng'wītīlagwa leelo yenīyī īlagīlilwe na SEEBA, kūlwa kūmubeegeja isangī.

35A ha nyango gwiheema lya kwibilingīla mukwikala ho shikū mpungatī, līīmi na būjikū, mushikīlīje īyo ayīlagīlile ū SEEBA, mutizūcha; nguno h'ūmo naalagīīlilwe.”

36Ū Alooni na a bitūnja bakwe bakīīta pyī ī yose īyo SEEBA walī wabalagīla mu nzīla ya ng'wa Musa.

← Chapter 7 Jump to: Chapter 9 →