bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Leviticus 22
Leviticus 22
Sukuma 2019
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 23 →
1
Ū SEEBA ūng'wīla ū Musa,
2
“Ng'wīlage ū Alooni na a bitūnja bakwe gīkī bashikūje ī shakwinha sheela īsho Baisilaeli bakūshifunyaga kūlwa nguno yane; ni bilang'hanage batizūlīsosohaja ī lina lyane īlo līlī lyeela; ū nene nalī SEEBA.
3
Bawīlage gīkī, ‘Ūlū munhū ose ose mu bing'we ūsosohala, alīyo hū wegeela dūhū a ha shakwinha sheela īsho Baisilaeli bakūsheejaga kūlwa ng'wa SEEBA, ū munhū ng'wenūyo shing'wigeleelilwe kūkomanyiwa wīnge ū kū būtongi wane. Ī shilagīlo shenīshi shilī kūlwa nguno ya shibyalīlwe shing'we shose, nī shisho shiliza. Ū nene nalī SEEBA.’
4
Ose ose ū wa mu lūganda lwa Alooni ūlū alī na būsaatu w'ikūnza lya mīlī, nūūlū būsaatu wa kūfung'wa būsoso mu mīlī, yaya ū kūshilya ī shakwinha ī sheela kūshisha apīle. Akūbiza nsoso nūūlū ūkuumya shikolo shose shose īsho shasosohalaga kūlwa kwikuumya na mimba, nūūlū shasosohalaga kūlwa kūkuumiwa na munhū wilooteelaga;
5
nūūlū kūlwa kūkuumya shiinū yose yose īyo īkigweesaga hasī, īyo īdūgije kūnsosohaja munhū, nūūlū wikuumya na munhū ūyo ashikile kūnsosohaja; nūūlū ūmo būlang'wizīīle ū būsoso.
6
Ū wa kūkuumya shikolo shisoso sha mbika yenīyo akūbiza nsoso kūshisha līīmi līlibīle. Yaya ū kūlya shose shose ū mu shakwinha ī sheela kūshisha ooge mu minzī.
7
Ī līīmi ūlū lyūlībīla akūbalwa gīkī welaga; hūna lūūlū kwandīja ikanza lyenīlo adūgije kūshilya ī shakwinha ī sheela, nguno shilī shakūlya shakwe.
8
Alīyo atigeleelilwe kūlya shose shose ūlū ūshisanga shachaaga shoi dūhū, nūūlū shabūlagagwa shiinū; yaya ū kwisosohaja kūlwa nguno yasho. Ū nene nalī SEEBA.
9
A bagabīji ībigeleelilwe kwīdima na welwang'holò pyī īyo nayīhelile, batizingīla mu kwihīga nose bache kūlwa nguno ya kūleka kwīkūja īyo nīhelile nene. Ū nene nalī SEEBA ūyo akabīītaga kūbiza beela a bagabīji.
10
“Ose ose ūyo atī wa mu lūganda lwa bagabīji atazunīlījiwe ū kūshilya ī shakwinha ī sheela; nūūlū ngeni wa ha ng'wa ngabīji yaya, nūūlū ng'witūmamīja wa mheela ūyo alītūmama hoi yaya ū kūshilya.
11
Alīyo ū ngabīji ūlū ūgūla nsese, nūūlū nsese ūbyalīlwa ho a ha kaya, ū nsese ng'wenūyo adūgije ū kūshilya ī shilīwa sha ngabīji.
12
Ū nshīke wa ngabīji ūlū ūtoolwa na ngosha ūyo atī ngabīji, akūbiza wīngaga ū mu būzunīlījiwa wa kūshilya ī shakwinha sheela.
13
Gwike ū nshīke wa ngabīji ūlū ūchīlwa ngoshi, nūūlū ūbūlaga numba, alīyo ūbiza atī na baana, hūna ūshoka ha ng'wa ise kwikala gīt'ūmo wikalīlaga aho ataalī kūtoolwa, ū ng'wenūyo adūgije kūshilya ī shilīwa sha ng'wa ise. Alīyo ī shilīwa shenīsho shitī sha kūlyiwa na ose ose ūyo atazunīlīgije kūshilya.
14
Ūūlū munhū ūhūbīla ūshilya ī shakwinha sheela, akūshilīpa īsho walyaga, ongeja n'īmò ya itanò yasho; ūtwala kūlī ngabīji.
15
“A bagabīji ītabigeleelilwe kūshisosohaja ī shakwinha sheela īsho Baisilaeli bakafunyaga kūlwa ng'wa SEEBA.
16
Yaya ū kūyūbazunīlīja kūshilya ī shakwinha sheela shenīsho hanuma kwingīla mu makoye ga kūlīpa. Ū nene nalī SEEBA, hū nene nakabīītaga a banhū kūbiza beela.”
17
Ū SEEBA ūng'wīla ū Musa,
18
“Ng'wīlage ū Alooni na a bitūnja bakwe, hamò na a Baisilaeli a bose gīkī, ‘Ose ose ū mu bing'we, abize ng'wana byalwa wa mu Isilaeli, nūūlū ngeni ūyo akwikalaga mu Isilaeli, ūlū wenha kū būtongi bo ng'wa SEEBA shakwinha shakwe sha kūpemva kūlwa nguno ya mhayo ūyo wilahīla kūgūshikīlīja, nūūlū shakwinha sha wiyaabī,
19
Ī shakwinha shenīsho shiigelile ībize ng'ombe, nūūlū ng'holo nūūlū mbūli; hama ībize ng'osha ītī na būka, h'īkwanukūlwa kūlwa nguno yakwe.’
20
Yaya ū kwenha shose shose īsho shilī na buka, nguno shitanukūlwa kūlwako.
21
“Ūlū ose ose wenha kūlwa ng'wa SEEBA ng'ombe nūūlū ng'holo nūūlū mbūli kūlwa shakwinha sha būsangī, īkī atogilwe kūshikīlīja mhayo ūyo wilahīla kūgwīta, nūūlū kūfunya shakwinha sha wiyaabī, shiigelile ū ntugo gwenūyo gūbize gūtī na būka nūūlū būlemehazu bose bose, hū shikwanukūlwa ī shakwinha shenīho kūlwa nguno yakwe.
22
Yaya ū kūmfunīja ū SEEBA īyo ībbokulile, nūūlū īlemehalile, nūūlū ībīnzīkile hanhū, nūūlū īlī na madindili, nūūlū būhele, nūūlū īchūūbagūkile. Ī ya gīko ūtizīfunya nūūlū hado a ha ng'walīlo gīkī ībize shakwinha sha kūbeegejiwa SEEBA mu nzīla ya moto.
23
Ī ng'ombe nūūlū ī ng'holo īyo īlemehalile ūdūgije ū kwīfunya gītī shakwinha sha wiyaabī, alīyo ūlū kūshikīlīja mhayo ūyo wisagīja kūgwīta, ū ntugo gwa gīko gūtīko ū kwanukūlwa.
24
Nūūlū ntugo gūsoloolilwe yaya ū kūmfunīja ū SEEBA; ū mhayo gwenūyo yaya gete ū kūgwīta ū mu sī ying'we.
25
Nūūlū kūfuma ū kū bageni yaya ū kwanukūla ntugo gūlī gīko kūlwa kūgūfunya kū būtongi bo ng'wa Mulungu wako kūbiza shakūlya. Ī ja gīko jitanukūlwa nguno jilemehalile, na jiminije.”
26
Ū SEEBA ūng'wīla ū Musa gīkī,
27
“Ī ng'ombe nūūlū ī ng'holo nī mbūli ūlū yūbyalwa, shiigelile yikale na ninayo shikū mpungatī, ūlū yūshisha shikū inaane īdūgije ū kūfunyiwa kūlwa ng'wa SEEBA gītī shakwinha sha kūbeejiwa mu nzīla ya moto.
28
Yaya ū kūsīnza ng'ombe nūūlū ng'holo lūshikū lūmò nū ng'wana wayo.
29
“Ūlū ūfunya shitambò sha kūnūmba SEEBA, shifunyage mu mbika īyo shikwanukūlwa kūlwa nguno yako.
30
Ī nyama yenīyo shiigelile īlyiwe lūshikū lwenūlo dūhū; yaya kwīsaaja nūūlū hado kūshisha ntondo yaho. Ū nene nalī SEEBA.
31
“Shidimagi ī shilagīlo shane, nīyo mushilondeele gete. Ū nene nalī SEEBA.
32
Aya kūlīsosohaja ī lina lyane ī lyeela; a Baisilaeli baniitegeleje gīkī nalī ng'wela. Ū nene nalī SEEBA ūyo akang'wejaga a bing'we.
33
Hū nene nakang'wīnja na mu sī ya Misili gīkī nabize Mulungu wing'we. Ū nene nalī SEEBA.”
← Chapter 21
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 23 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27