Leviticus 12

Sukuma 2019

← Chapter 11 Jump to: Chapter 13 →

1Ū SEEBA ūng'wīla ū Musa,

2Bawīlage a Baisilaeli gīkī, “Ū nkīma ūlū ūbiza nda hūna ūbyala ng'wana ngosha, akūbalwa kūbiza nsoso kūshisha ikanza lya shikū mpungatī; gīt'ūmo būlī ng'weji akingīlaga ng'wikanza lya kūbalwa gīkī nsoso kūlwa nguno ya mininga ayo gakang'wīngaga.

3Ha lūshikū lwa kanaane ū nīgīnī akūsaalwa.

4Hanuma ya henaho ū nkīma ng'wenūyo akūlindana shikū makūmi adatū n'idatū kūlwa kwejiwa kwakwe kūfuma ū mu makoye gakwe ga mininga. Atazunīlījiwe kūkuumya shikolo shose shose sha kūtūmamīlwa ha kūlamya; nūūlū atazunīlīgije kūja ū kwipandī lyeela, kūshisha ī shikū jakwe ja kwejiwa jishike.

5Alīyo ūlū ūbyala ng'wana nkīma, akūbalwa kūbiza nsoso ikanza lya shikū ikūmi n'inè, gīt'ūmo akabizaga ng'wikanza lyakwe lya būlī ng'weji. Hanuma ūlindana shikū makūmi atandatū n'itandatū kūlwa kwejiwa kwakwe kūfuma ū mu makoye gakwe ga mininga.

6“Ī shikū jakwe ja kwejiwa kūlwa ng'wana ngosha nūūlū ng'wana nkīma ūlū jūshika, akwiza ū kū nyango gw'iheema lya kwibilingīla, wenha ū kūlī ngabīji ng'wana wa ng'holo wa ng'waka gūmò kūlwa shitambò sha kūpemva, na ng'hune ya ng'hūūlū, hamò na mhunda kūlwa shitambò sha shibi.

7Ū ngabīji akūjifunya kūlwakwe ū nkīma ng'wenūyo, kūlwa nguno ya kūmeegeja isangī kūlī SEEBA; hūna akwejiwa īnge ū mu kūkomanyiwa kwakwe kūlwa kwidīka mininga. Ī shenīshi shilī shilagīlo kūlwa nkīma ūlū ūbyala ng'wana ngosha nūūlū nkīma.

8“Ūlū atī na būdūla wa kūpandīka ng'wana wa ng'holo, akwenha mhunda ibīlī nūūlū ng'hune ibīlī ja ng'hūūlū; īmò kūlwa shitambò sha kūpemva, ī yīngī kūlwa shitambò sha shibi. Ū ngabīji akūmeegeja isangī mu nzīla yenīyo, nang'hwe akwejiwa.”

← Chapter 11 Jump to: Chapter 13 →