Leviticus 26

Sukuma 2019

← Chapter 25 Jump to: Chapter 27 →

1“Mutalizūgima kwibeegeja shikolo, nūūlū shiikolile shose shose, sha suso ya kīnhū, nūūlū ya munhū. Yaya nūūlū kwīmīlīja ng'hīngī ya mawe, nūūlū kūtūūla hose hose ū mu sī ying'we iwe lya kwiloleelwa na banhū. Yaya kwinama kū shikolo shilī gīko; ū nene nalī SEEBA Mulungu wing'we.

2Nī shilagīlo shane sha Sabato shidimagi n'ikūjo; hama nī lipandī lyane ī lyeela mulītūūlīle logohano. Ū nene nalī SEEBA.

3“Ūlū ng'ūshimīzīla ū mu malange gane, nī shilagīlo shane ng'ūshilondeela na welwa ng'holò,

4nakūmutūmīla ī mbula mu makanza gayo, nī sī īkūzwisha īsho shiigeli kūzwa; ī mitī ya mu matogolo nayo īkūtwaja a matwajo gayo.

5A makanza ging'we ga kūtūla shilīwa gakwiyingīlīīla na makanza ga kūhūlūla mizabibu; a makanza ga kūhūlūla mizabibu nago gakwiyingīlīīla na makanza ga kūlīma. Nīyo būlī shilīwa īsho mutogilwe mukūpandīka, mukūlya na mukwikala mhola ū mu sī ying'we.

6Nakūmutūūlīla mhola ū mu sī ying'we, mukūlaala na atigela wa kūng'ogohya. Nakūng'wīngīja a mashiinū a makenaagūji ū mu sī ying'we, nūūlū būlūgū būtīkoya ī sī ying'we.

7A banishi bing'we mukūbapyena mubapeeje, na kūbabūlaga.

8Nūūlū banhū batanò dūhū ū mu bing'we bakūpeeja banishi igana; a banhū igana ū mu bing'we bakūpeeja shihūmbī ikūmi. Nīyo mukūbabūlaga no a banishi bing'we.

9Nakūng'wītīla yawiza, na nakūng'wīta mubize bibyaji; nū wingī wing'we nakūbongeja no no no. Nakūlīshikīlīja ī lilagane lyane ū kū bing'we.

10Ī shilīwa shing'we shikūbiza sha kwisanga sanga; nose īkūyūng'wigeleelwa kūshiponya ī sha kale mupandīke ha kūtūūla ī shipya.

11Nakūbeeja wikalo wa kwikala hamò ning'we; nīyo ū kūlī nene mutalasūūka na hado yaya.

12Nakūshimīza hamò ning'we, na nakūbiza Mulungu wing'we, na a bing'we mukūbiza banhū bane.

13Ū nene nalī SEEBA Mulungu wing'we ūyo wang'wenha kūfuma mu sī ya Misili, gīkī ng'oye kūbiza basese kū bana Misili. Nakalībīnzagūla ī lijoki ling'we muyūshimīza ng'wiyagaalūlaga.”

14“Alīyo ūlū ng'ūlema ū kūnidegeleka, nū kwīta pyī ī yose īyo nalīmulagīla,

15nūūlū ng'ūgalema a malange gane, nī shilagīlo shane ng'ūshidalaha, ng'ūlemeelwa ū kwīshikīlīja pyī īyo nalīmulagīla, nī lilagane lyane ng'ūlīkenaagūla,

16yīīyī īyo nakūng'wītīla: Nakūng'wenhela lyogohya lya kūng'wisanganīja, na mabūsaatu gatī ga kūpīla, na saata ja kūmukenaagūja miso na kūgogolohya mibīlī. Ī mbīyū mukūhamba ū mu migūnda ying'we alīyo mukūnogela dalali dūhū, nguno ī shilīwa īsho shilapye shikūlyiwa na banhū bangī.

17Nakūgalūka kūbiza ng'wilwisha wing'we, kūshisha a banishi bing'we bamupyeene kībi kībi; abo bamukolilwe bakūmusuga, na mukūyūpeela sagala nūūlū atīho wa kūmupeeja.

18“Ūlū nūng'winha nsango gīko alīyo ng'wikala mutaalī mulemile ū kūnidegeleka, ū nsango ūyo nakūng'winha kūlwa shibi shing'we nakūgongeja ū būdito ng'hangala mpungatī.

19Nakūng'wīngīja īsho mushisendamīlile, īsho shikang'winhaga nguzu ja kwikumīlīja, nakūgapyagūla a malunde a higūlū īlo līlī higūlya ya sī ying'we, lyeele pe gītī ibbaadi; nī sī ying'we nūyīkalanga yūūkalamuka gītī itale.

20Ī milīmo mukwīta ya kūnogela madūhū, nguno mutūpandīka shose shose ū mu migūnda ying'we; nī mitī ya mu matogolo ītūtwaja a matwajo gayo.

21“Ūlū ng'wikala mutaalī bagang'hanazu, mulemile ū kūnidegeleka, a makoye ga būlūhi wing'we nakūgongeja ng'hangala mpungatī, gadidohe gīt'ūmo shilī ī shibi shing'we.

22Nakūmutūmīla mashiinū makenaagūji gayūbabūlaga a baana bing'we, na kūmukenaagūja ī mitugo jing'we; gakūmugeehya no, ī nzīla jing'we ī ng'humūūku jigayiwe a banhū ba kūjibītīla.

23“Alīyo ūlū nūng'wītīla pyī ī yose īyī hūna ng'wikala mulemile dūhū ū kūgalūka, ng'ūbiza mutaalī munigomelile,

24a henaho lūūlū nene ng'wenekīlī nakwandya kwilwisha ning'we; ū būluhi ūbo nalang'winhe kūlwa shibi shing'we nakūbongeja būdidohe ng'hangala mpungatī.

25Nakwenha būlūgū ū mu sī ying'we kūlwa kūmumalīla shiilī, nguno ya kūlīkenaagūla ī lilagane. Ūlū ng'wilugalīla mu mizengo ying'we gīkī ng'wipīje, nakūmutūmīla mo mahūūya; hama nakūmutūūla mu makono ga banishi bing'we.

26Nakūmutūmīla nzala ng'halī, ī shilīwa shibize sha kwineneela no; bakīma ikūmi bakūyūsangīla kūzuga shilīwa mu liiko līmò. Īsho balashizuge shikūmeganyiwa, būlī ng'wene apandīke kapuli kado ka mu nkono atwale kū ng'wakwe, mukūlya a hene, alīyo mutigūta yaya.

27“Ī mihayo ūlū yūshika gīko alīyo ng'ūbiza mutaalī munigomelile dūhū, mulemile ū kūnidegeleka,

28a henaho nakwilwisha ning'we mu būpelanu būtaale no. Nene ng'wenekīlī nakūgongeja hangī ng'hangala mpungatī ū nsango gwa kūng'winha kūlwa shibi shing'we.

29A baana bing'we, bagosha na bakīma, mukwandya kūyūūbalya nyama.

30A mapandī ging'we ga kūlamīja ayo galī higūlya nakūgasambaagūla, nī myalīlo ying'we ya kūzuukīja būbbani nīīkambagūla; ī mibimba ying'we nakwīlūndīka ha mashiikolile ging'we ga kūlamiwa, ayo gatī na būpanga; nīyo nakūmusūūcha no.

31Ī mizengo ying'we nakūyīta kūbiza ya mapagale, na a mapandī ging'we a meela gabize buyīīkī; nū ng'waso gwa shakwinha shing'we natūgūyegela.

32Ī sī ying'we nakwībipya no, na a banishi bing'we abo balayīdime bakūjinjimala.

33Nakūmusalang'hanīja kū mahanga, alīyo nū kwene nakūmukūūbīja na līlūshū lyane mu nkono. Ī sī ying'we īkūbiza buyīīkī, nī mizengo ying'we īkūbiza ya mapagale gike.

34Hūna a henaho ī sī īkūlīlūmba ī likanza lya kwifuula; nguno ū mu shikū ījo mukūbiza mu sī ya banishi bing'we, ī sī īkwikala buyīīkī yifuule, ījilūmbe ī sabato jayo.

35Ī sī īkwifuula ū ng'wikanza lyose īlo īkūbiza buyīīkī; ū mu shikū jenījo īkūbiza ng'wikanza lya kwifuula, īlo ītalīpandīkile mu sabato jayo ū mu shikū ja kwikala kwing'we mo.

36“Abo balasaage bapanga ū mu bing'we, nakūbatūūlīla ng'holò ya kwikala bakwibakīlaga ū mu sī ya banishi babo; nūūlū bigwa kapalala kasaganya nguno ya lūyaga, bakwibakīla bandye kūpeela gītī balīmpeela mūlagi; bakūja bakūgwaaga sagala gītī balīpeejiwa na munhū.

37Bakwipamagūla no gītī balīmpeela munhū abūūkije lūshū; nūūlū aho atīho ūyo alībapeeja. Na lūūlū mutūdūla ū kūbīīmīla a banishi bing'we.

38Mukūchīla kū mahanga, mumilwe sī ya banishi bing'we.

39Abo balikale bapanga ū mu bing'we bakūshila poole poole; bakūshilīla mu sī ja banishi babo kūlwa nguno ya shibi shabo. Bakūshila poole poole gīko kūlwa nguno ya shibi shabo na sha basaabo.”

40“Alīyo ūlū būshitambūūla ī shibi shabo, nī shibi sha basaabo; būyīhabūla hape ī mihayo īyo baanikenya, nū būlambu wabo wa kūshilema ī shilagilo shane,

41Ūlū būgalūka booya ū kūyīta ī mihayo īyo īkanenheleja nabize ng'wanishi wabo, nose nūūbaponya kūle mu sī ya banishi babo, ī ng'holò jabo ī ngang'hanazu ūlū jūbiza na kwidoohya, nī mheela ya shibi shabo būbiza bayanukūla,

42a henaho lūūlū hū nakūlizūkwa ī lilagane lyane īlo naalagana na Yakobo na Isaka, na Abulahamu; hū nakūyizūkwa nī sī yabo.

43Nguno ī sī yenīyo shiigelile bayīngīle, ījilūmbe ī sabato jayo ū ng'wikanza lya kūbiza buyīīkī, a boi batīīmo. Ū nsango gwenūyo gūkūbagwīīla kūlwa nguno ya shibi shabo na kūlwa kūshilema ī shilagīlo shane na kūgadalaha a malange gane.

44Alīyo nahene nūūlū ū mu yose yenīyī, ūlū balī ū mu sī ya banishi babo, natūūbaponya jigi, nūūlū kūbisuusumūla gete gīkī nabakenaagūle ilalī. Natīīko ū kūlīkenaagūla ī lilagane lyane ū kūbo. Ū nene nalī SEEBA Mulungu wabo.

45Alīyo īkī aboi balī banhū bane, nakūlizūkwa ī lilagane lyane īlo nakabeeja na bakūlūgenji babo, abo nakabīnja mu sī ya Misili, kū būtongi wa mahanga; aho nakahaya gīkī nakūbiza Mulungu wabo. Ū nene nalī SEEBA.”

46A genaya hū a malange na shilagīlo, na katongeelele ako SEEBA akabeeja ha gatī yakwe na Baisilaeli kū lūgūlū lwa Sinai mu būtūmami bo ng'wa Musa.

← Chapter 25 Jump to: Chapter 27 →