Leviticus 6

Sukuma 2019

← Chapter 5 Jump to: Chapter 7 →

1Ū SEEBA ūng'wīla ū Musa gīkī,

2Ūlū munhū wīta shibi, ūng'hūba SEEBA mu nzīla ya kūnyeekeja ng'wiye mu nyasala sala shikolo īsho walī abīkījiwe nūūlū kūbilisīlwa, nūūlū wiba shikolo, nūūlū ūnembalemba ng'wiye ūnsoja shikolo;

3Nūūlū ūbona shikolo sha bangī shijimīīlile hūna ūlomaloma, ūleka ū kūhaya ūko shilī, wandya kwilahīla mihayo ya nyalomolomo, akwītaga ūmo banhū bakīītīlaaga, baagwa mu būhūbi;

4Ū munhū ūlū wīta shibi mu mhayo gwabūbi gwa mbika yenīyo, ūbiza wagwa mu kwihīga, akūshishosha īsho wibile, nūūlū īsho wasolile mu nyasala sala, nūūlū īsho walī wabīkījiwa hūna ūshinyeecha; nūūlū īsho shalī shijimīīlile īsho akashibona;

5nūūlū shose shose īsho akashihaya mu būlomolomo ūlahīla na kūlahīla. Ī shikolo shenīsho akūshishosha mu lūshikū lwa kūshifunya ī shakwinha shakwe sha kwihīga; nīyo shibize gīt'ūmo shaalī aho washisolelaga. Hanuma akongeja n'īmò ya itanò ya mpango gwasho, hūna ūng'winha ū ng'wenekīlī shikolo.

6Ū nsango gwakwe ū munhū ng'wenūyo gūkūbiza kūfunya ng'ondi ya ng'holo kwīnga ng'widaale lyakwe lya mitugo; ībize ītī na būka, nū mpango gwayo gūbize gwigeleelilwe. Akūyenha kūlī ngabīji, īfunyiwe kūlwa ng'wa SEEBA, īfunyiwe kūbiza shakwinha shakwe sha kwihīga.

7Ū mu nzīla yenīyī ū ngabīji akūmeegeja isangī ū kūlī SEEBA alekejiwa ū būhūbi bokwe ū mu yose īyo walī wayīta, yūng'wenheleja kūgwa mu kwihīga.

8Ū SEEBA ūng'wīla ū Musa,

9Shiishi shilagīlo ūg'winhe ū Alooni na a bitūnja bakwe: Ng'wīlage gīkī, “Ī mihayo ya shitambò sha kūpemva īkūja mu kahelele aka. Ī shitambò sha kūpemva, shiigelile kwikala a ha ng'walīlo būjikū pe shilī ha moto, kūshisha ntondo dilū; nū moto gūyūkeeyula gūlībaka ho.

10Na lūūlū ū ngabīji akūzwala ī lishadi lyakwe lya kitaani, nū ng'wenda gwakwe gwa kitaani ū gwa kūtonja mu gatī, hūna akūgīnja a mabu ga shitambò sha kūpemva īsho shajigaga mu moto, ūgasundīla ha mhelo ya ng'walīlo.

11Hanuma akūshizuula ī shizwalo shenīshi ūzwala shingī, hūna ūgasomba a mabu kūja hanze ya ng'hambī, kū ipandī īlo līlemegije banhū kūja ko sagala sagala.

12Ū moto gwa ha ng'walīlo gwiigelile gwikale gūkūbakaga būlī ikanza, gūtizūjima nūūlū hado. Ū ngabīji akūyūgūsoosela būlī lūshikū ī dilū, oongeja mo nī ng'hwi; nī shitambò īsho shilī a ha moto ūshihela hoi chiza chiza, na a masazu ga shitambò sha būsangī ayo galīho, ūgapemba pye gūūjiga gete.

13Ū moto gwa ha ng'walīlo gwigelile gūbake būlī gwa, yaya ū kūgūleka gūkajima nūūlū hado.”

14Ī mihayo ya shitambò sha kūpemva īkūja mu kahelele kaka; a bitūnja ba ng'wa Alooni bakūyūmfunīja SEEBA kū būtongi wa ng'walīlo.

15Ū ngabīji akūsola būsu būnogu būgehu mu nkono gwakwe, hamò na masazu; nū ū būbbani pyī ū bose ūbo būlī a ha shakwinha sha būsu. Hūna ī shikolo shenīsho akūshipemba mu moto gwa ha ng'walīlo; lībize ibbudīka lya shiizūkījo, kūlwa kwenha ng'waso gwawiza gwa kūnyeja SEEBA.

16Īsho shilīshiigīīla shikūbiza sha kūlyiwa na Alooni hamò na bitūnja bakwe; alīyo shilī sha kūlyiwa gīko dūhū, yaya kūsanjiwa na shibimbya, nīyo sha kūlīīlwa ng'wipandī lyeela, mu gwalugwa y'iheema lya kwibilingīla.

17A h'ikanza lya kūzugwa shitizūsanjiwa mo shibimbya na hado yaya. Ī shitambò īsho shikafunyiagwa mu nzīla ya moto nabinhaga boi, kūlwa nguno nasho ī shenīsho shilī sheela no no no, gīt'ūmo shilī shitambò īsho shikafunyiagwa kūlwa shibi, na kūlwa kwihīga.

18Munhū ose ose ū ngosha ū mu kaya ya ng'wa Alooni ū mu shibyalīlwe ī shose īsho shiliza, azunīlījiwe ū kūshilya; ū gwenūyo gūlī ngabo gwakwe ū mu shitambò īsho shikafunyiagwa kūlwa ng'wa SEEBA mu nzīla ya moto. Ose ose ū wa kūshikuumya wigeleelilwe kūbiza ng'wela.

19Ū SEEBA ūng'wīla hangī ū Musa gīkī,

20Īshi h'ī shakwinha īsho Alooni na bitūnja bakwe bakūng'wenhela ū SEEBA, a ha lūshikū lwa kwitīīlwa maguta ga kūtūūlwa a ha nīmo, īmò y'ikūmi ya efa ya būsu būnogu. Ī shenīshi shikūbiza shakwinha sha būsu sha kūfunyiwa būlī lūshikū; nusu yaho dilū, ī nusu ī yīngī mhīndī.

21Bakūbūguulanya na maguta, hūna ī shakwinha shabo sha būsu būshikalanga h'ikalangīlo, hama būshenha shimenyagūlilwe chiza chiza, būshifunya kūlwa ng'wa SEEBA shibize shakwinha sha ng'waso gwawiza.

22Ū ng'witūnja ūyo ahelilwe kūbiza ha nīmo gwa būgabīji hanuma ūlū waacha ū ise, hū ng'wene akūshibeeja ī shakwinha shenīshi. Ū gwenūyū gūlī ngabo go ng'wa SEEBA gwa būlī lūshikū; ī shakwinha shenīshi shilī sha kūpemva shūshila ho gete.

23Būlī shakwinha sha būsu īsho akūfunya ngabīji shiigelile kūpemva shishile ho gete; shitī sha kūlyiwa na munhū ose ose.

24Ū SEEBA ūng'wīla ū Musa,

25Ng'wīlage ū Alooni na a bitūnja bakwe gīkī, “Yīyī mihayo ya kahelele kūlwa shitambò sha shibi. Ī shitambò sha shibi shiigelile shisīnzwe kū būtongi bo ng'wa SEEBA, ng'wipandī īlo shitambò sha kūpemva shikasīnzīlagwa; ī shoi shilī sheela no no no.

26Ū ngabīji wa kūshifunya hū ng'wene ū wa kūshilya, shilī sha kūlīīlwa ng'wipandī lyeela, mu gwalugwa y'iheema lya kwibilingīla.

27Shose shose ī sha kwikuumya nī nyama yenīyo shikūbiza sheela, hama a mininga ga shitambò ūlū gūūsaamukīla ha shizwalo shose shose, shiigelile shifulīlwe ng'wipandī lyeela.

28Ī nungū ja mabūmba ī ja kūtūmamīlwa kwīzuga ī nyama yenīyo shiigelile jibelwe. Alīyo ūlū yūzugīlwa mu shiseme sha shaba, ī shiseme shenīsho ni shiguusagwe mu minzī sheele.

29Ī nyama yenīyo īdūgije kūlyiwa na ngosha ose ose ū wa mu kaya ya ngabīji; ī yoi īlī neela no no no.

30Alīyo būlī shitambò sha shibi īsho mininga gasho gakwenhwa ū ng'wiheema lya kwibilingīla, kūlwa nguno ya kūbeeja isangī ng'wipandī lyeela, ī shenīsho shitizūlyiwa; shilī sha kūpemva mu moto.”

← Chapter 5 Jump to: Chapter 7 →