Leviticus 5

Sukuma 2019

← Chapter 4 Jump to: Chapter 6 →

1Ūlū munhū wīta shibi sha kūleka kūgūhaya mhayo, alīyo amanile gīkī ū wa kūbona nūūlū kwigwa mhayo shing'wigeleelilwe agūhaye hape, ū munhū ng'wenūyo akūbalīlwa nsango kūlwa būhūbi wakwe.

2Nūūlū munhū ūkuumya shikolo shose shose shisoso, hamo mimba gwa shiinū ya mu mapoolu, nūūlū īmò ya shisho shikasugagwa na banhū, īsho shitī ng'wigelè lya mitugo, nūūlū shiinū ya kwigwesa hasī yachaaga; ū munhū ng'wenūyo nang'hwe akūbiza wasosohalaga; alī mu kwihīga nūūlū akabiza atamanile gīkī wasosohalaga.

3Nūūlū munhū ūkuumya būsoso bose bose bo kūfuma mulī munhū ūngī; būsoso ūbo būshikile kūnsosohaja, nūūlū akabiza atadeebile, ūlū ūlinda ūgūdeeba ū mhayo gwenūyo, akūbalwa alī mu kwihīga.

4Nūūlū munhū ūlahīla mu kwiyangūhīlīja gīkī akwīta mhayo nebe, gwawiza nūūlū gwabūbi; mhayo gose gose ūyo munhū ūlahīla kūgwīta, alīyo gashi walī ataalī ū kwideedeeng'hanya chiza, nūūlū akabiza alīhaya mhayo ūyo atūgūmanaga, alīyo ūlū ūlinda ūkundūlīlwa witegeleja, akūbalwa alī mu kwihīga.

5Hūna lūūlū ūlū munhū ūgwa mu kwihīga kūlwa mihayo ya mbika gītī jenīji, akūshitambūūla hape ī shibi īsho washītile.

6Ū sango gwa shibi shakwe gūkūbiza kūmfunīja ū SEEBA shitambò sha shibi, ng'holo nūūlū mbūlī ng'hīma kūfuma ng'widaale lyakwe; hūna ngabīji akūbeeja isangī kūlwakwe, kūlwa nguno ya shibi shakwe.

7Alīyo ūlū atī na būdūla wa kūpandīka ng'holo, ū nsango gwa shibi shakwe gūkūbiza kūfunya ng'hūūlū ibīlī kūlwa ng'wa SEEBA, nūūlū ng'hune ibīlī ja mhunda; ī noni jenījo akūjenha, īmò kūlwa shitambò sha shibi, ī yīngī shitambò sha kūpemva.

8Akūshika ang'winhe ngabīji, nang'hwe akwīfunya tame ī ya shitambò sha shibi. Akwīmyoola ī nhingo gūtīnīka ū ntwe gwayo, gwike yaya ū kūgwīnja ho gete.

9A mininga gayo ī noni ya shitambò sha shibi yenīyo, magehu gakūsūlūlūkījiwa mu kabazu ya ng'walīlo. A gangī gūtwinījiwa ha sī aho gwīmīīlile ū ng'walīlo; ī shenīshi shilī shitambò sha shibi.

10Hūna ū ngabīji akwīfunya nī noni ī yīngī, ī ya shitambò sha kūpemva, wīta gīt'ūmo kalī kaīle kaho na kale; ūbeeja isangī kūlwa nguno yakwe, kūlwa būkenaagūji ūbo wītile; nang'hwe akūlekejiwa.

11Alīyo ūlū atūdūla kūpandīka ī ng'hūūlū ibīlī nūūlū ng'hune ibīlī ja mhunda, akwenha kilo īmò ya būsu būnogu, ībize shakwinha shakwe sha shibi īsho wītile. Gwike yaya kūbūtūūlīla maguta nūūlū būbbani, ī shoi shilī shakwinha kūlwa nguno ya shibi.

12Akūweenha kūlī ngabīji īnje būgehu kūlwa kwizūkīja, nang'hwe akūbūpemba ha ng'walīlo, a higūlya ya shitambò īsho shilībeejiwa kūlwa ng'wa SEEBA mu nzīla ya moto, ī shitambò sha kūfunyiwa kūlwa nguno ya shibi.

13Ū ngabīji akūbeeja isangī mu gīko kūlwa nguno yakwe, kūlwa shibi īsho washītile, hūna akūlekejiwa. Ī shakwinha ī shingī īsho shilīshiiga shikūbiza sha kūtūmamīlwa na bagabīji, gīt'ūmo bakīītīlaga mu shitambò sha būsu.

14Ū SEEBA ūng'wīla ū Musa gīkī,

15“Ūlū munhū ūhūbīla mu mhayo nebe hūna ūgwa mu shibi aho atamanile, ūbiza wahūba kūlī SEEBA mu mihayo yose yose ya wela, ū sango gwakwe gūkūbiza kūmfunīja ū SEEBA ng'ondi ya ng'holo ītī na būka, nū mpango gwayo gūbize gwigeleelilwe nī feza ījo jizunīlījiwe, gīt'ūmo īlī shekeli ya ng'wipandī lyeela. Ī shenīshi shilī shitambò sha kwihīga.

16Akūlīpa, nguno ya kūlemeelwa kwīshikīlīja ī mihayo ya wela. Nīyo akongeja n'īmò ya itanò ya mpango gwa shikolo shenīsho, ūng'winha ngabīji pyī ī shose; h'ūyo akwīfunya ī ng'ondi ībize shitambò sha kwihīga, kūlwa kūbeeja isangī nguno yakwe ū ng'hūbi ng'wenūyo alekejiwe.”

17Nūūlū munhū ūgwa mu shibi, wīta mhayo gūlemejiwe mu shilagīlo shose shose sha ng'wa SEEBA, nūūlū akabiza wītaga mu būtūmana, ū ng'wenūyo alī mu kwihīga, akūbalīlwa būhūbi.

18Akwenha kūlī ngabīji shitambò sha kwihīga, ng'ondi ya ng'holo ītī na būka; nū mpango gwayo gwigeleelilwe. Ū mu gīko ū ngabīji akūbeeja isangī kūlwa nguno yakwe, kūlwa būkenaagūji ūbo wawītile mu būtūmana, na akūlekejiwa.

19Ī shenīsho shilī shitambò sha kwihīga; nguno ū munhū ng'wenūyo walī mu kwihīga kū būtongi bo ng'wa SEEBA.

← Chapter 4 Jump to: Chapter 6 →