1 Chronicles 10

Tswana (BAEBELE e e Boitshepo) 1992

← Chapter 9 Jump to: Chapter 11 →

1Jaana Bafilisitia ba tlhabana le Baiseraele; mme banna ba Iseraele ba tshaba fa pele ga Bafilisitia, mme ba wa ba bolaetswe mo thabeng ya Gileboa.

2Bafilisitia ba konatelela Saule le bomorwawe ka thata; Bafilisitia ba bolaya Jonathane, le Abinatabe, le Malekišue bomorwa Saule.

3Tlhabano ya pitlaganya Saule thata, bahudi ka bora ba mo tshwara; a nna mo tlalelong ka ntlha ya bahudi ka bora.

4Foo Saule a raya motshola dibolao wa gagwe a re: “Somola tšhaka ya gago o mphololetse ka yone; nka tla ka sotlwa ke ba ba sa rupang ba.” Motshola dibolao wa gagwe a gana; gonne a boifa thata. Ke gone ka moo Saule a tsaya tšhaka ya gagwe a wela mo go yone.

5Ya re motshola dibolao wa gagwe a bona fa Saule a sule, le ene a wela mo tšhakeng ya gagwe a swa.

6Mme Saule a swa le bomorwawe ba bararo; le ba ntlo ya gagwe botlhe ba swa mmogo.

7E rile banna botlhe ba Iseraele ba ba mo molapong ba bona fa go tshajwa, le go re Saule le bomorwawe ba sule, ba tlogela metse ya bone ba tshaba; mme Bafilisitia ba tla ba aga mo go yone.

8Ga dirala ka moso, e rile Bafilisitia ba tla go apola ba ba bolailweng, ba fitlhela Saule le bomorwawe ba ole mo thabeng ya Gileboa.

9Ba mo apola, ba ba ba tsaya tlhogo ya gagwe le dibolao tsa gagwe, ba roma kwa lefatsheng la Bafilisitia tikologong, ba isa mafoko ao mo medimong ya bone ya disetwa, le mo bathong.

10Ba tsenya dibolao tsa gagwe mo ntlong ya medimo ya bone, ba gokela tlhogo ya gagwe mo ntlong ya ga Dagone.

11E rile ba Jabeše-gileate botlhe ba utlwela tsotlhe tse Bafilisitia ba di diretseng Saule,

12foo banna botlhe ba ba diganka ba nanoga, ba ya ba tlosa serepa sa ga Saule, le direpa tsa bomorwawe, ba di isa kwa Jabeše, ba fitlha marapo a bone fa tlase ga mooka mo Jabeše, ba ikitsa go ja ka malatsi a supa.

13Jalo Saule a swela tlolo ya gagwe e o kileng a e direla Jehofa, ka ntlha ya lefoko la ga Jehofa le o se kang a le tshegetsa; le ka gonne o ne a lopa kgakololo mo go mongwe yo o buang le badimo, gore a tle a botse ka gone.

14A se ka a botsa mo go Jehofa; ke gone ka moo a mmolaya, mme a sokololela bogosi kwa go Dafite morwa Jese.

← Chapter 9 Jump to: Chapter 11 →