1 Chronicles 15

Tswana (BAEBELE e e Boitshepo) 1992

← Chapter 14 Jump to: Chapter 16 →

1Dafite a itirela mantlo mo motseng wa ga Dafite; a baakanyetsa letlole la Modimo felo, mme a le tlhomela mogope.

2Foo Dafite a re: “Letlole la Modimo ga le a tshwanela go rwalwa ke ope fa e se ke Balefi fela, gonne ke bone ba Jehofa o ba itshenketseng go tla ba rwala letlole la Modimo, le go mo direla ka bosakhutleng.”

3Mme Dafite a phuthela Baiseraele botlhe kwa Jerusalema, gore go leriwe letlole la ga Jehofa mo felong ga lone, fa o ne a go le baakanyeditse.

4Dafite a phutha bomorwa Arone, le Balefi.

5Ba bomorwa Kohathe: Uriele e le yo mogolo, le bana ba ga rraagwe ba le 120;

6ba bomorwa Merari: Asaia e le yo mogolo, le bana ba ga rraagwe ba le 220;

7ba bomorwa Gerešome: Joele e le yo mogolo le bana ba ga rraagwe ba le 130;

8ba bomorwa Elisafane; Shemaia e le yo mogolo, le bana ba ga rraagwe, ba le 200;

9ba bomorwa Heberone: Eliele e le yo mogolo, le bana ba ga rraagwe, ba le 80;

10ba bomorwa Usiele: Aminatabe a le yo mogolo, le bana ba ga rraagwe, ba le 112.

11Dafite a bitsa baperesiti Satoke le Abiathare, le Balefi, e bong Uriele, le Asaia le Joele, Shemaia, Eliele le Aminatabe.

12Mme a ba raya a re: “Ke lona ditlhogo tsa matlo a borara ba Balefi; iitshepiseng lona le bana ba rraa lona gore lo tle lo ise letlole la ga Jehofa Modimo wa Iseraele, kwa felong fa ke go le baakanyeditseng.

13Gonne e re ka lo se ka lwa le rwala pele, Jehofa Modimo wa rona o ne a re phomegelela, gonne ga re a ka ra mmatla ka fa molaong.”

14Jalo baperesiti le Balefi ba iitshepisa go tla ba isa letlole la ga Jehofa Modimo wa Iseraele.

15Mme bana ba Balefi ba sikara letlole la Modimo mo maruding a bone, disikaro di le mo go lone, jaaka Moše a laotse ka fa lefokong la ga Jehofa.

16Dafite a bua le bagolo ba Balefi, gore ba tlhome bana ba ga rraabo go nna baopedi, ba na le diletso tsa kopelo, disaletere, le diharepe le disemebala, ba dira modumo o mogolo, gore ba tsholetse mantswe ka boitumelo.

17Jalo Balefi ba tlhoma Hemane morwa Joele; le ba bana ba ga rraagwe, Asafe morwa Berekia; le ba bomorwa Merari bana ba ga rraabo, ba tlhoma Ethane morwa Kušaia;

18ba tlhoma nabo bomorwa rraabone ba thulagano ya bobedi, e bong Sekaria, Bene, le Jaasiele, le Shemi-ramothe, le Jehiele, le Uni, le Eliabe, le Benaia, le Maaseia, le Matithia, le Elifelehu, le Mikeneia, le Obete-etome le Jeiele, balebedi ba mejako.

19Jalo baopedi, Hemane le Asafe le Ethane ba tlhongwa, ba na le disemebala tsa kgotlho tsa go dira modumo o mogolo;

20le Sekaria, le Asiele, le Shemi-ramothe, le Jehiele, le Uni, le Eliabe, le Maaseia le Benaia, ba na le disaletere tse di laeletsweng Alamothe; (ke gore Basetsana);

21le Matithia, Elifelehu, le Mikeneia, le Obete-etome, le Jeiele le Asasia, ba na le diharepe tse di laeletsweng Sheminithe, (ekete ke gore, Mantswe a banna) go tla ba tlhabeletsa.

22Kenania, mogolo wa Balefi, o ne a laola kopelo, a ba ruta ka ga kopelo ka a le setswerere.

23Berekia le Elekana ya bo e le balebedi ba mojako ba letlole.

24Shebania le Jošafate, le Nathanele, le Amasai, le Sekaria, le Benaia le Eliesere e le baperesiti, ba letsa dinaka fa pele ga letlole la Modimo. Obete-etome le Jehia e ne e le balebedi ba mojako ba letlole.

25Jalo Dafite le bagolwane ba Iseraele, le balaodi ba dikete, ba ya go ntsha letlole la kgolagano ya ga Jehofa kwa ntlong ya ga Obete-etome ka boitumelo.

26Ga dirala, ya re Modimo o thusa Balefi ba ba rweleng letlole la kgolagano ya ga Jehofa, ba isa ditlhabelo, e bong dikgomo di supa le diphelefu di supa.

27Dafite o ne a apere kobo ya leloba le le boleta, le Balefi botlhe ba ba rweleng letlole, le baopedi, le Kenania mong wa kopelo a bile a na le baopedi; Dafite a apere sekhutlana sa leloba.

28Jalo Baiseraele botlhe ba tsaya letlole la kgolagano ya ga Jehofa ka go thela lošalaba, le ka modumo wa lofare, le ka dinaka le disemebala, ba tsosa modumo o mogolo ka disaletere le diharepe.

29Ga dirala ya re letlole la kgolagano ya ga Jehofa le tla mo motseng wa ga Dafite, Mikale morwadia Saule a bo a lebile ka fensetere, a bona kgosi Dafite a bina a letsa, mme a mo nyatsa mo pelong ya gagwe.

← Chapter 14 Jump to: Chapter 16 →