1 Chronicles 11

Tswana (BAEBELE e e Boitshepo) 1992

← Chapter 10 Jump to: Chapter 12 →

1Foo Baiseraele botlhe ba phuthegela kwa go Dafite kwa Heberone, ba re: “Bona, re lesapo la gago le nama ya gago.

2E rile mo metlheng e e fetileng, e bong ka Saule a sa ntse a le kgosi, ya bo e le wena yo o bolotsang o ba o gorosa Baiseraele; mme Jehofa Modimo wa gago a go raya a re: ‘O tlaa otla batho ba me Baiseraele, o tlaa nna kgosana ya batho ba me Baiseraele.’ ”

3Jalo bagolwane botlhe ba Iseraele ba ya kgosing kwa Heberone; mme Dafite a dira kgolagano nabo mo Heberone fa pele ga Jehofa; mme ba tlotsa Dafite, gore a nne kgosi ya Iseraele, ka fa lefokong la ga Jehofa ka Samuele.

4Dafite le Baiseraele botlhe ba ya Jerusalema (ke one Jebuse); mme Bajebuse, banni ba lefatshe, ba bo ba le gone.

5Banni ba Jebuse ba raya Dafite ba re: “Ga o ketla o tsena mono.” Le fa go ntse jalo Dafite a gapa kago e e thata ya phemelo ya Sione; ke one motse wa ga Dafite.

6Dafite a re: “Le fa e le mang yo o bolayang Bajebuse pele o tlaa nna mogolo le molaodi.” Joabe morwa Seruia a palama pele, a dirwa mogolo.

7Dafite a aga mo kagong e e thata ya phemelo; ke gone ka moo ba go bitsa ba re: Motse wa ga Dafite.

8A aga motse mo tikologong, go tswa Milo go ya fela tikologong. Joabe a tsosolosa motse ntlheng e e setseng.

9Dafite a nna a kokotlegelela pele fela; gonne Jehofa wa masomosome a na nae.

10Jaana ba ke bone bagolo ba diganka tse Dafite o ne a na natso, ba ba itshupileng bathata ntlheng ya gagwe mo bogosing jwa gagwe, ba na le Baiseraele botlhe, go tla ba mo dira kgosi, ka fa lefokong la ga Jehofa ka ga Baiseraele.

11E ke palo ya diganka tse Dafite o ne a na natso: Jašobeame, morwa motho mongwe wa Mohakemone, tlhogo ya ba bararo, o ne a ekela batho ba ba 300 a ba bolaya ka lerumo la gagwe, ka lobaka lo le longwe fela.

12Morago ga gagwe ga bo go le Eleasare, morwa Doto, wa Moahoha, yo e ne e le mongwe wa diganka tse tharo.

13Ene o ne a na le Dafite kwa Pasetamime, mme Bafilisitia ba ne ba phuthegetse tlhabano gone, kwa go ne go na le sebata teng se se emeng barele thata; mme batho ba bo ba tshaba fa pele ga Bafilisitia.

14Ba ema mo gare ga sebata seo, ba se tlhabanela, ba bolaya Bafilisitia; mme Jehofa a ba golola ka phenyo e kgolo.

15Batho ba le bararo mo bagolong ba ba 30 ba ya lefikeng kwa go Dafite, mo logageng lwa Atulame; mme ntwa ya Bafilisitia e ne e thibeletse mo molapong wa Refaime.

16Dafite a bo a le mo kagong ya phemelo, ka lobaka loo, mme setlhopha sa masole a Bafilisitia se le mo Bethelehema.

17Dafite a tlhologelelwa, a re: “Ke eletsa jang mongwe a ka nnosa metsi a sediba sa Bethelehema se se fa kgorong!”

18Mme ba bararo ba thobeselela ntwa ya Bafilisitia, ba ga metsi mo sedibeng sa Bethelehema se se fa kgorong, ba a tsaya ba a isa kwa go Dafite; Dafite a gana go a nwa, a a tshololela Jehofa.

19A re: “A Modimo wa me o go nkiletse, gore ke se ka ka dira selo se; a ke tlaa nwa madi a banna ba, ba ba beileng botshelo jwa bone mo bothateng? Gonne ba a lerile ka go tsenya botshelo jwa bone mo bothateng.” Ke gone ka moo a gana go a nwa. Diganka tse tharo tseo tsa dira dilo tse.

20Abišai monnaa Joabe, e ne e le ene mogolo wa ba bararo gonne o na a ekela batho ba ba 300 lerumo la gagwe, a ba bolaya, mme a nna le leina mo go ba bararo.

21Mo go ba bararo o na a le tlotlego bogolo go ba babedi, mme a dirwa molaodi wa bone; le fa go ntse jalo ga a ka a fitlha mo borarong jwa ntlha.

22Benaia morwa Joiata, morwa monna mongwe wa seganka wa Kabeseele yo o ne a dirile ditiro tsa boganka, a bolaya bomorwa Ariele wa Moabe ba le babedi; le gone a ya a bolaya tau mo gare ga mokole mo lobakeng lwa kapoko.

23A bolaya motho mongwe wa Moegepeto, e le monna yo o godileng thata, yo o boleele bo mabogo matlhano. Moegepeto o ne a tshotse lerumo le le tshwanang le mosipuri wa monyedi; a ya kwa go ene a tshotse thobane fela, a ya a phamola lerumo mo seatleng sa Moegepeto a mmolaya ka lerumo la gagwe.

24Benaia morwa Joiata a dira dilo tse, a nna le leina mo digankeng tse tharo.

25Bonang, o ne a le tlotlego bogolo go ba ba 30, a se ka a fitlha mo borarong jwa ntlha; Dafite a mo dira molaodi wa mophato wa gagwe o o mo dibelang.

26Diganka tsa dintwa ke tse: Asahele monnaa Joabe, Elehanane morwa Doto wa Bethelehema;

27Shamothe wa Moharore, Helese wa Mopelone;

28Ire morwa Ikeše wa Motekowa, Abiesere wa Moanathothe;

29Sibekai wa Mohušathe, Ilai wa Moahoha;

30Maharai wa Monetofathe, Helete morwa Baana wa Monetofathe;

31Ithai morwa Ribai wa Gibea wa bana ba Benjamine, Benaia wa Mopirathone;

32Hurai wa melatswana ya Gaaše, Abiele wa Moarabathe;

33Asemafethe wa Mobaharahume, Eliabe wa Mošaalabone;

34bomorwa Hašeme wa Mogisone, Jonathane morwa Shage wa Moharara,

35Ahiame morwa Sakare wa Moharara, Eliafale morwa Ure;

36Hefere wa Momekerathe, Ahija wa Mopelone;

37Hesero wa Mokaremele, Naarai morwa Esebai;

38Joele morwa rraagwe Nathane, Mibehare morwa Hageri;

39Seleke wa Moamone, Naharai wa Moberothe motshola dibolao wa ga Joabe morwa Seruia;

40Ira wa Moithere, Garebe wa Moithere;

41Uria wa Mohite, Sabate morwa Ahalai;

42Adine morwa Shise wa Morubene; mogolo mongwe mo go Barubene, a na le batho ba le 30;

43Hanane morwa Maaka, le Jehošafate wa Momithene;

44Usia wa Moašeterathe, Shame le Jeiele bomorwa Hothame wa Moaroere;

45Jediaele morwa Shimeri le Jobe monnawe, wa Motise;

46Eliele wa Momahafa, le Jeribai le Jošafa bomorwa Elenaame, le Ithema wa Momoabe,

47Eliele, le Obete, le Jaasiele wa Momesoba.

← Chapter 10 Jump to: Chapter 12 →