1 Chronicles 12

Tswana (BAEBELE e e Boitshepo) 1992

← Chapter 11 Jump to: Chapter 13 →

1Ba ke bone ba ba ileng kwa go Dafite kwa Sikelage, ka a sa ntse a iphitlhile ka ntlha ya ga Saule morwa Kiše; e le ba ba diganka, bathusi ba gagwe mo ntweng.

2Ba ne ba tlhometse mara, ba itse go konopa ka maje, le go hula metswi ka bora ka letsogo le legolo le ka la molema; e le ba bomorwa rraagwe Saule boo rra Benjamine.

3Yo mogolo e le Ahiesere, gape Joaše, bomorwa Shemaa wa Mogibeathe; le Jesiele, le Pelete bomorwa Asemafethe, le Beraka le Jehu wa Moanathothe,

4le Išemaia wa Mogibeone, seganka mo go ba ba 30, a le molaodi wa ba ba masome mararo; le Jeremia, Jahasiele, Johanane le Josabate wa Mogeterathe;

5Elusai, Jerimothe, Bealia, Shemaria le Shefatia wa Moharufa;

6Elekana le Isešia, Asarele, Joesere le Jašobeame, e le Bakora,

7le Joela le Sebadia bomorwa Jerohame wa Getore.

8Ba Bagate ga itomololela kwa go Dafite kwa kagong ya phemelo mo nageng, diganka tse di pelokgale, e le banna ba ba rutilweng ntwa, ba ba itseng go hema ka thebe le lerumo, ba difatlhogo tsa bone di ne di tshwana jaaka tsa ditau, ba le lobelo jaaka mafele mo dithabeng,

9yo mogolo e le Esere, wa bobedi Obadia, wa boraro Eliabe,

10wa bone Mišemana wa botlhano Jeremia,

11wa borataro Atai, wa bosupa Eliele,

12wa bo 8 Johanane, wa bo 9 Elesabate,

13wa lesome Jeremia, wa 11 Makebanai.

14Bao ba bana ba ga Gate e ne e le balaodi ba ntwa; yo mmotlana mo go bone a le kana ka batho ba le lekgolo, yo mogolo a le kana ka ba le sekete.

15Bao ke bone ba ba kgabagantseng noka ya Joretane ka kgwedi ya ntlha, noka e tletse letsitla; ba leleka batho botlhe ba melapo, ntlheng ya botlhabatsatsi, le ntlheng ya bophirimatsatsi.

16Ga tla bangwe ba bana ba Benjamine le ba Juta kwa go Dafite mo kagong ya phemelo.

17Mme Dafite a tswela go ba kgatlhantsha, a ba raya a re: “Fa lo tsile ka kagiso mo go nna go tlaa lo nthusa, pelo ya me e tlaa gokagana le lona; mme fa lo tsile go nkoka go ntsenya mo seatleng sa baba ba me, ka go se na tshiamololo mo diatleng tsa me, a Modimo wa borraetsho o go lebe o go kgalemele.”

18Foo mowa wa tla mo go Amasai, yo e ne e le mogolo mo go ba ba 30, a re: “Re ba gago Dafite, re ntlheng ya gago wena morwa Jese; kagiso, kagiso e nne le wena, kagiso e nne le bathusi ba gago; gonne Modimo wa gago o a go thusa.” Foo Dafite a ba amogela, a ba dira balaodi ba lesomo.

19Mo go ba Manase le bone ga wela bangwe kwa go Dafite, jale ka a tla le Bafilisitia, ba tla go tlhabana le Saule, mme ba se ka ba ba thusa; gonne e rile barena ba Bafilisitia ba sena go gakololana ba mo naya tsela, ba re: “O tlaa wela kwa go Saule mong wa gagwe, ditlhogo tsa rona di ka tla tsa nna mo bothateng.”

20Ya re a ya kwa Sikelage, ga wela kwa go ene boo rra Manase, e bong Atena, le Josabate, le Jediaele, le Mikaele, le Josabate, le Elihu le Silethai, balaodi ba makgolokgolo a boora Manase.

21Ba thusa Dafite go tlhabana le lesomo la manokwane; gonne botlhe e le diganka tse di pelokgale, e bile e le balaodi ba ntwa.

22Gonne ga nna ga tla batho kwa go Dafite ka malatsi otlhe go tla go mo thusa, ga tsamaya ya nna ntwa e e lesomosomo le legolo, jaaka lesomosomo la Modimo.

23E ke yone palo ya ditlhogo tsa bone ba ba neng ba tlohomeletse ntwa, ba ba tsileng kwa go Dafite, kwa Heberone, go pitikololela bogosi jwa ga Saule kwa go Dafite, ka fa lefokong la ga Jehofa.

24Bana ba Juta ba ba itseng go tshola thebe le lerumo ba le 6 800, ba ba tlhomeletseng ntwa.

25Ba bana ba Simeone, diganka tse di pelokgale tsa ntwa, go no go le ba le 7 100.

26Ba bana ba Lefi 4 600.

27Joiata e ne e le moeteledipele wa ba ntlo ya ga Arone, a na le batho ba le 3 700.

28Le Satoke, lekau le le seganka se se pelokgale, a na le ba ntlo ya ga rraagwe, ba le balaodi ba le 22.

29Ba bana ba Benjamine, bomorwa rraagwe Saule, ba ne ba le 3 000, gonne go tla mo lobakeng loo, bontsi jwa bone ba bo ba ntse ba ngaparetse ntlo ya ga Saule.

30Le ba bana ba Eferaime ba le 20 800, diganka tse di pelokgale, banna ba ba itsegeng mo makgotleng a borraabo.

31Ba ntlhanngwe ya lotso lwa Manase ba le 18 000, ba ba neng ba kaiwa ka leina, gore ba tle go dira Dafite kgosi.

32Mme ga bana ba Isakare, batho ba ba nang le tlhaloganyo ya metlha, go itse se Baiseraele ba tshwanetseng go se dira; ditlhogo tsa bone di le 200; bana ba borraabo botlhe ba le mo taolong ya bone.

33Ba Sebulone ba ba nonofileng go bolola ntwa, ba ba nonofileng go rulaganya ntwa, ba na le dilo dingwe le dingwe tsa ntwa, ba bo ba le 50 000; e le ba ba nonofileng go aba ntwa, ba se pelo e e akabalang.

34Le ba Nafetali go no go le balaodi ba le 1 000, ba na le batho ba le 37 000, ba ba tshotseng thebe le lerumo.

35Le boo rra Dane ba ba nonofileng go aba ntwa, batho ba le 28 600.

36Le Baašere ba ba nonofileng go ya le ntwa, ba nonofile go aba ntwa, ba le 40 000.

37Kwa moseja ga Joretane boora Rubene, le boo rra Gate, le ba ntlhanngwe ya lotso lwa Manase, ba na le dilo dingwe le dingwe tsa ntwa tsa go tlhabana, ba bo ba le 120 000.

38Banna ba, e le banna ba ntwa, ba ba nonofileng go aba ntwa, ba tla ka pelo e e itekanetseng kwa Heberone, go dira Dafite kgosi ya Baiseraele botlhe; le botlhe ba ba setseng ba Iseraele, ba le pelo nngwe fela ya go dira Dafite kgosi.

39Mme ba nna gone le Dafite ka malatsi a le mararo, ba ja ba nwa; gonne ba ga bone ba ne ba ba etleeleditse.

40Gape le ba ba gaufi nabo, e bong go ya go fitlha kwa goora Isakare, le kwa goo rra Sebulone, le kwa goo rra Nafetali, ba tla ba belesitse dijo ka diesele, le ka dikamela, le ka dimmoulo le ka dikgomo; dijo tsa boupe, le mengoloi ya difeige, le marose a ditshwabi tsa mefine, le bojalwa jwa mofine, le lookwane, le dikgomo le dinku ka letlotlo; gonne go no go na le boitumelo mo Iseraele.

← Chapter 11 Jump to: Chapter 13 →