2 Kings 11

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 10 Jump to: Chapter 12 →

1Jab Aḳhaziyáh kí máṉ ‘Ataliyáh ne dekhá ki us ká beṭá mar gayá, tab us ne uṭhkar bádsháh kí sárí nasl ko nábúd kiyá.

2Par Yúrám bádsháh kí beṭí Yahúsaba‘ ne jo Aḳhaziyáh kí bahin thí Aḳhaziyáh ke beṭe Yúás ko liyá, aur use un shahzádoṉ se jo qatl húe chupke se judá kiyá; aur use us kí dadá samet bistaroṉ kí koṭhrí meṉ kar diyá, aur unhoṉ ne use ‘Ataliyáh se chhipáe rakkhá; wuh márá na gayá.

3Aur wuh us ke sáth Ḳhudáwand ke ghar meṉ chha baras tak chhipá rahá. Aur ‘Ataliyáh mulk meṉ saltanat kartí rahí.

4Aur sátweṉ baras meṉ Yahoyada‘ ne Káríoṉ aur pahrewáloṉ ke sau sau ke sardároṉ ko bulá bhejá, aur un ko Ḳhudáwand ke ghar meṉ apne pás lákar un se ‘ahd o paimán kiyá, aur Ḳhudáwand ke ghar meṉ un ko qasam khiláí, aur bádsháh ke beṭe ko un ko dikháyá.

5Aur us ne un ko yih hukm diyá, ki Tum yih kám karná, ki tum jo sabt ko yaháṉ áte ho, so tum meṉ se ek tiháí ádmí bádsháh ke qasr ke pahre par raheṉ;

6aur ek tiháí, Súr nám pháṭak par raheṉ, aur ek tiháí us pháṭak par hoṉ jo pahrewáloṉ ke píchhe hai: yúṉ tum mahall kí nigahbání karná aur logoṉ ko roke rahná.

7Aur tumháre do jathe, ya‘ní sab jo sabt ke din báhar nikalte haiṉ, wuh bádsháh ke áspás hokar Ḳhudáwand ke ghar kí nigahbání kareṉ.

8Aur tum apne apne hathyár háth meṉ liye húe bádsháh ko chároṉ taraf se ghere rahná; aur jo koí saffoṉ ke andar chalá áe, wuh qatl kar diyá jáe: aur tum bádsháh ke báhar játe aur andar áte waqt us ke sáth sáth rahná.

9Chunáṉchi sau sau ke sardároṉ ne, jaisá Yahoyada‘ káhin ne un ko hukm diyá thá, waisá hí sab kuchh kiyá: aur un meṉ se har ek ne apne ádmíoṉ ko, jin kí sabt ke din andar áne kí bárí thí, ma‘ un logoṉ ke, jin kí sabt ke din báhar nikalne kí bárí thí, liyá, aur Yahoyada‘ káhin ke pás áe.

10Aur káhin ne Dáúd bádsháh kí barchhiyáṉ aur sipareṉ jo Ḳhudáwand ke ghar meṉ thíṉ sau sau ke sardároṉ ko díṉ.

11Aur pahrewále apne apne hathyár háth meṉ liye húe haikal ke dahine pahlú se lekar báeṉ pahlú tak mazbah aur haikal ke barábar barábar bádsháh ke girdágird khaṛe ho gaye.

12Phir us ne shahzáde ko báhar lákar us par táj rakkhá, aur shahádatnáma use diyá; aur unhoṉ ne use bádsháh banáyá, aur use masah kiyá; aur unhoṉ ne tálíáṉ bajáíṉ, aur kahá, Bádsháh jítá rahe.

13Jab ‘Ataliyáh ne pahrewáloṉ aur logoṉ ká g̣ul suná, to wuh un logoṉ ke pás Ḳhudáwand kí haikal meṉ gayí.

14Aur dekhá ki bádsháh dastúr ke mutábiq sutún ke qaríb khaṛá hai; aur us ke pás hí sardar, aur narsinge haiṉ; aur mamlukat ke sab log ḳhush haiṉ, aur narsinge phúṉk rahe haiṉ: tab ‘Ataliyáh ne apne kapṛe pháṛe, aur chhilláí, G̣adr hai, g̣adr.

15Tab Yahoyada‘ káhin ne sau sau ke sardároṉ ko jo lashkar ke úpar the yih hukm diyá, ki Us ko saffoṉ ke bích karke báhar nikál le jáo, aur jo koí us ke píchhe chale, us ko talwár se qatl kar do; kyúṉki káhin ne kahá ki Wuh Ḳhudáwand ke ghar ke andar qatl na kí jáe.

16Tab unhoṉ ne us ke liye rásta chhoṛ diyá, aur wuh us ráh se gayí, jis se ghoṛe bádsháh ke qasr meṉ dáḳhil hote the: aur wahíṉ qatl húí.

17Aur Yahoyada‘ ne Ḳhudáwand ke aur bádsháh aur logoṉ ke darmiyán ek ‘ahd báṉdhá, táki wuh Ḳhudáwand ke log hoṉ: aur bádsháh aur logoṉ ke darmiyán bhí ‘ahd báṉdhá.

18Aur mamlukat ke sab log Ba‘l ke mandir meṉ gaye, aur use ḍháyá; aur unhoṉ ne us ke mazbahoṉ aur múratoṉ ko bi’lkull chaknáchúr kiyá; aur Ba‘l ke pujárí Mattán ko mazbahoṉ ke sámne qatl kiyá. Aur káhin ne Ḳhudáwand ke ghar ke liye sardároṉ ko muqarrar kiyá.

19Aur us ne sau sau ke sardároṉ, aur Káríoṉ, aur pahrewáloṉ, aur ahl i mamlukat ko liyá; aur wuh bádsháh ko Ḳhudáwand ke ghar se utár láe, aur pahrewáloṉ ke pháṭak kí ráh se bádsháh ke qasr meṉ áe. Aur us ne bádsháhoṉ ke taḳht par julús farmáyá.

20Aur mamlukat ke sab log ḳhush húe, aur shahr meṉ amn ho gayá. Aur unhoṉ ne ‘Ataliyáh ko bádsháh ke qasr ke pás talwár se qatl kiyá.

21Aur jab Yúás saltanat karne lagá, to sát baras ká thá.

← Chapter 10 Jump to: Chapter 12 →