2 Kings 15

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 14 Jump to: Chapter 16 →

1Sháh i Isráíl Yarubi‘ám ke sattáísweṉ baras se sháh i Yahúdáh Amasiyáh ká beṭá ‘Azariyáh saltanat karne lagá.

2Jab wuh saltanat karne lagá, to solah baras ká thá; aur us ne Yarúshalem meṉ báwan baras saltanat ki. Us kí máṉ ká nám Yakúliyáh thá, jo Yarúshalem kí thí.

3Aur us ne, jaisá us ke báp Amasiyáh ne kiyá thá, ṭhík usí tarah wuh kám kiyá jo Ḳhudáwand kí nazar meṉ bhalá thá.

4Taubhí úṉche maqám ḍháe na gaye; aur log ab tak úṉche maqámoṉ par qurbání karte, aur baḳhúr jaláte the.

5Aur bádsháh par Ḳhudáwand kí aisí már paṛí, ki wuh apne marne ke din tak koṛhí rahá, aur alag ek ghar meṉ rahtá thá. Aur bádsháh ká beṭá Yútám mahall ká málik thá, aur mulk ke logoṉ kí ‘adálat kiyá kartá thá.

6Aur ‘Azariyáh ká báqí kám, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kítab meṉ qalamband nahíṉ?

7Aur ‘Azariyáh apne bápdádá ke sáth so gayá; aur unhoṉ ne use Dáúd ke shahr meṉ us ke bápdádá ke sáth dafn kiyá: aur us ká beṭá Yútám us kí jagah bádsháh húá.

8Aur sháh i Yahúdáh ‘Azariyáh ke aṛtísweṉ sál Yarubi‘ám ke beṭe Zakariyáh ne Isráíl par Sámariya meṉ chha mahíne bádsháhí kí.

9Aur us ne Ḳhudáwand kí nazar meṉ badí kí, jis tarah us ke bápdádá ne kí thí; aur Nabát ke beṭe Yarubi‘ám ke gunáhoṉ se jin se us ne Isráíl se gunáh karáyá báz na áyá.

10Aur Yabís ke beṭe Salúm ne us ke ḳhiláf sázish kí, aur logoṉ ke sámne use márá, aur qatl kiyá, aur us kí jagah bádsháh ho gayá.

11Aur Zakariyáh ke báqí kám Isráíl ke bádsháhoṉ kí tawáríḳh kí kitáb meṉ qalamband haiṉ.

12Aur Ḳhudáwand ká wuh wa‘da jo us ne Yáhú se kiyá yihí thá, ki Chauthí pusht tak tere farzand Isráíl ke taḳht par baiṭheṉge: so waisá hí húá.

13Aur sháh i Yahúdáh ‘Uzziyáh ke untálísweṉ baras Yabís ká beṭá Salúm bádsháhí karne lagá; aur us ne Sámariya meṉ mahína bhar saltanat kí.

14Aur Jádí ká beṭá Manáhim Tirzah se chalá, aur Sámariya meṉ áyá, aur Yabís ke beṭe Salúm ko Sámariya meṉ márá, aur qatl kiyá, aur us kí jagah bádsháh ho gayá.

15Aur Salúm ke báqí kám, aur jo sázish us ne kí, so dekho, wuh Isráíl ke bádsháhoṉ kí tawáríḳh kí kitáb meṉ qalamband haiṉ.

16Phir Manáhim ne Tirzah se jákar Tifsah ko, aur un sabhoṉ ko jo waháṉ the, aur us kí hudúd ko márá: aur márne ká sabab yih thá, ki unhoṉ ne us ke liye pháṭak nahíṉ khole the; aur us ne waháṉ kí sab hámila ‘auratoṉ ko chír ḍálá.

17Aur sháh i Yahúdáh ‘Azariyáh ke untálísweṉ baras se Jádí ká beṭá Manáhim Isráíl par saltanat karne lagá, aur us ne Sámariya meṉ das baras saltanat kí.

18Aur us ne Ḳhudáwand kí nazar meṉ badí kí; aur Nabát ke beṭe Yarubi‘ám ke gunáhoṉ se, jin se us ne Isráíl se gunáh karáyá, apní sárí ‘umr báz na áyá.

19Aur sháh i Asúr Púl us ke mulk par chaṛh áyá. So Manáhim ne hazár qintár chándí Púl ko nazr kí, táki wuh us kí dastgírí kare, aur saltanat ko us ke háth meṉ mustahkam kar de.

20Aur Manáhim ne yih naqdí sháh i Asúr ko dene ke liye Isráíl se ya‘ní sab baṛe daulatmandoṉ se pachás pachás misqál fí kas ke hisáb se jabran lí. So Asúr ká bádsháh lauṭ gayá, aur us mulk meṉ na ṭhahrá.

21Aur Manáhim ke báqí kám, aur sab kuchh jo us ne kiyá, so kyá wuh Isráíl ke bádsháhoṉ kí tawáriḳh kí kitáb meṉ qalamband nahíṉ?

22Aur Manáhim apne bápdádá ke sáth so gayá; aur us ká beṭá Fiqahiyáh us kí jagah bádsháh húá.

23Aur sháh i Yahúdáh ‘Azariyáh ke pachásweṉ sál Manáhim ká beṭá Fiqahiyáh Sámariya meṉ Isráíl par saltanat karne lagá, aur us ne do baras saltanat kí.

24Aur us ne Ḳhudáwand kí nazar meṉ badí kí; wuh Nabát ke beṭe Yarubi‘ám ke gunáhoṉ se jin se us ne Isráíl se gunáh karáyá, báz na áyá.

25Aur Fiqah bin Ramaliyáh ne jo us ká ek sardár thá us ke ḳhiláf sázish kí, aur us ko Sámariya meṉ, bádsháh ke mahall ke muhkam hisse meṉ, Arjúb aur Ariyah ke sáth márá, aur Jili‘ádíoṉ meṉ se pachás mard us ke hamráh the; so wuh use qatl karke us kí jagah bádsháh ho gayá.

26Aur Fiqahiyáh ke báqí kám, aur sab kuchh jo us ne kiyá, Isráíl ke bádsháhoṉ kí tawáríḳh kí kitáb meṉ qalamband haiṉ.

27Aur sháh i Yahúdáh ‘Azariyáh ke báwanweṉ baras se Fiqah bin Ramaliyáh Sámariya meṉ Isráíl par saltanat karne lagá, aur us ne bís baras saltanat kí.

28Aur us ne Ḳhudáwand kí nazar meṉ badí kí; aur Nabát ke beṭe Yarubi‘ám ke gunáhoṉ se, jin se us ne Isráíl se gunáh karáyá, báz na áyá.

29Aur sháh i Isráíl Fiqah ke aiyám meṉ sháh i Asúr Tiglatpilásar ne ákar ‘Aiyún, aur Abíl Bait Ma‘kah, aur Yanúha, aur Qádis, aur Hasúr, aur Jili‘ád, aur Galíl, aur Naftálí ke sáre mulk ko le liyá; aur logoṉ ko asír karke Asúr meṉ le gayá.

30Aur Húsi‘a bin Ailah ne Fiqah bin Ramaliyáh ke ḳhiláf sázish kí, aur use márá aur qatl kiyá, aur us kí jagah ‘Uzziyáh ke beṭe Yútám ke bísweṉ baras bádsháh ho gayá.

31Aur Fiqah ke báqí kám, aur sab kuchh jo us ne kiyá, Isráíl ke bádsháhoṉ kí tawáríḳh kí kitáb meṉ qalamband haiṉ.

32Aur sháh i Isráíl Ramaliyáh ke beṭe Fiqah ke dúsre sál se sháh i Yahúdáh ‘Uzziyáh ká beṭá Yútám saltanat karne lagá.

33Aur jab wuh saltanat karne lagá, to pachchís baras ká thá; us ne solah baras Yarúshalem meṉ saltanat kí: aur us kí máṉ ká nám Yarúsá thá jo Sadoq kí beṭí thí.

34Aur us ne wuh kám kiyá jo Ḳhudáwand kí nazar meṉ bhalá hai: us ne sab kuchh ṭhík waise hí kiyá, jaise us ke báp ‘Uzziyáh ne kiyá thá.

35Taubhí úṉche maqám ḍháe na gaye; log hanoz úṉche maqámoṉ par qurbání karte, aur baḳhúr jaláte the. Ḳhudáwand ke ghar ká báláí darwáza isí ne banáyá.

36Aur Yútám ke báqí kám, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ?

37Un hí dinoṉ meṉ Ḳhudáwand sháh i Arám Razín ko, aur Fiqah bin Ramaliyáh ko, Yahúdáh par chaṛháí karne ke liye bhejne lagá.

38Aur Yútám apne bápdádá ke sáth so gayá; aur apne báp Dáúd ke shahr meṉ apne bápdádá ke sáth dafn húá: aur us ká beṭá Áḳhaz us kí jagah bádsháh húá.

← Chapter 14 Jump to: Chapter 16 →