2 Kings 24

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 23 Jump to: Chapter 25 →

1Usí ke aiyám meṉ sháh i Bábul Nabúkadnazar ne chaṛháí kí, aur Yahúyaqím tín baras tak us ká ḳhádim rahá; tab wuh phirkar us se munharif ho gayá.

2Aur Ḳhudáwand ne Kasdíoṉ ke dal, aur Arám ke dal, aur Moáb ke dal, aur baní ‘Ammon ke dal us par bheje, aur Yahúdáh par bhí bheje, táki use jaisá Ḳhudáwand ne apne bandoṉ nabíoṉ kí ma‘rifat farmáyá thá, halák kar de.

3Yaqínan Ḳhudáwand hí ke hukm se Yahúdáh par yih sab kuchh húá, táki Munassí ke sab gunáhoṉ ke bá‘is jo us ne kiye un ko apní nazar se dúr kare;

4aur un sab begunáhoṉ ke ḳhún ke bá‘is bhí jise Munassí ne baháyá; kyúṉki us ne Yarúshalem ko begunáhoṉ ke ḳhún se bhar diyá thá, aur Ḳhudáwand ne mu‘áf karná na cháhá.

5Aur Yahúyaqím ke báqí kám, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ?

6Aur Yahúyaqím apne bápdádá ke sáth so gayá: aur us ká beṭá Yahúyákín us kí jagah bádsháh húá.

7Aur sháh i Misr phir kabhí apne mulk se báhar na gayá, kyúṉkí sháh i Bábul ne Misr ke nále se daryá e Furát tak sab kuchh jo sháh i Misr ká thá le liyá thá.

8Aur Yahúyákín jab saltanat karne lagá to aṭhárah baras ká thá, aur Yarúshalem meṉ us ne tín mahíne saltanat kí. Us kí máṉ ká nám Nahushtá thá jo Yarúshalemí Ilnátan kí beṭí thí.

9Aur jo jo us ke báp ne kiyá thá, us ke mutábiq us ne bhí Ḳhudáwand kí nazar meṉ badí kí.

10Us waqt sháh i Bábul Nabúkadnazar ke ḳhádimoṉ ne Yarúshalem par chaṛháí kí, aur shahr ká muhásara kar liyá.

11Aur sháh i Bábul Nabúkadnazar bhí jab us ke ḳhádimoṉ ne us shahr ká muhásara kar rakkhá thá, waháṉ áyá.

12Tab sháh i Yahúdáh Yahúyákín apní máṉ aur apne mulázimoṉ, aur sardároṉ aur ‘uhdadároṉ samet nikalkar sháh i Bábul ke pás gayá: aur sháh i Bábul ne apní saltanat ke áṭhweṉ baras use giriftár kiyá.

13Aur wuh Ḳhudáwand ke ghar ke sab ḳhazánoṉ aur sháhí mahall ke sab ḳhazánoṉ ko waháṉ se le gayá, aur sone ke sab bartanoṉ ko jin ko sháh i Isráíl Sulaimán ne Ḳhudáwand ke ghar meṉ banáyá thá us ne káṭkar Ḳhudáwand ke kalám ke mutábiq un ke ṭukṛe ṭukṛe kar diye.

14Aur wuh sáre Yarúshalem ko, aur sab sardároṉ, aur súrmáoṉ ko jo das hazár ádmí the, aur sab dastkároṉ aur lohároṉ ko asír karke le gayá: so waháṉ mulk ke logoṉ meṉ se siwá kaṉgáloṉ ke âur koí báqí na rahá.

15Aur Yahúyákín ko wuh Bábul le gayá, aur bádsháh kí máṉ, aur bádsháh kí bíwiyoṉ aur us ke ‘uhdadároṉ, aur mulk ke raísoṉ ko wuh asír karke Yarúshalem se Bábul ko le gayá.

16Aur sab táqatwar ádmíoṉ ko jo sát hazár the, aur dastkároṉ aur lohároṉ ko jo ek hazár the, aur sab ke sab mazbút aur jang ke láiq the, sháh i Bábul asír karke Bábul meṉ le áyá.

17Aur sháh i Bábul ne us ke báp ke bháí Mattaniyáh ko us kí jagah bádsháh banáyá; aur us ká nám badalkar Sidqiyáh rakkhá.

18Jab Sidqiyáh saltanat karne lagá to ikkís baras ká thá: aur us ne gyárah baras Yarúshalem meṉ saltanat kí. Us kí máṉ ká nám Hamútal thá jo Libnáhí Yarmiyáh kí beṭí thí.

19Aur jo Yahúyaqím ne kiyá thá, usí ke mutábiq us ne bhí Ḳhudáwand kí nazar meṉ badí kí.

20Kyúṉki Ḳhudáwand ke g̣azab ke sabab se Yarúshalem aur Yahúdáh kí yih naubat áí, ki áḳhir us ne un ko apne huzúr se dúr hí kar diyá: aur Sidqiyáh sháh i Bábul se munharif ho gayá.

← Chapter 23 Jump to: Chapter 25 →