2 Kings 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Aur ambiyázádoṉ ne Ilísha‘ se kahá, Dekh, yih jagah jaháṉ ham tere sámne rahte haiṉ, hamáre liye tang hai:

2so ham ko zará Yardan ko jáne de, ki ham waháṉ se ek ek kaṛí leṉ, aur wahíṉ koí jagah banáeṉ jaháṉ ham rah sakeṉ. Us ne jawáb diyá, Jáo.

3Tab ek ne kahá, Mihrbání se apne ḳhádimoṉ ke sáth chal. Us ne kahá, Maiṉ chalúṉgá.

4Chunáṉchi wuh un ke sáth gayá. Aur jab wuh Yardan par pahuṉche to lakṛí káṭne lage.

5Lekin ek kí kulháṛí ká lohá, jab wuh kaṛí káṭ rahá thá, pání meṉ gir gayá: so wuh chillá uṭhá, aur kahne lagá, Háe, mere málik; yih to máṉgá húá thá.

6Mard i Ḳhudá ne kahá, Wuh kis jagah girá? Us ne use wuh jagah dikháí. Tab us ne ek chhaṛí káṭkar us jagah ḍál dí, aur lohá tairne lagá.

7Phir us ne kahá, Apne liye uṭhá le. So us ne háth baṛhákar use uṭhá liyá.

8Aur sháh i Arám sháh i Isráíl se laṛ rahá thá; aur us ne apne ḳhádimoṉ se mashwarat lí, aur kahá ki Maiṉ fuláṉ fuláṉ jagah ḍerá ḍálúṉgá.

9So mard i Ḳhudá ne sháh i Isráíl ko kahlá bhejá, Ḳhabardár, tú fuláṉ jagah se mat guzarná, kyúṉki waháṉ Arámí áne ko haiṉ.

10Aur sháh i Isráíl ne us jagah, jis kí ḳhabar mard i Ḳhudá ne dí thí, aur us ko ágáh kar diyá thá, ádmí bheje, aur waháṉ se apne ko bacháyá; aur yih faqat ek yá do bár hí nahíṉ.

11Is bát ke sabab se sháh i Arám ká dil niháyat bechain húá, aur us ne apne ḳhádimoṉ ko bulákar un se kahá, Kyá tum mujhe nahíṉ batáoge, ki ham meṉ se kaun sháh i Isráíl kí taraf hai?

12Tab us ke ḳhádimoṉ meṉ se ek ne kahá, Nahíṉ, ai mere málik, ai bádsháh, balki Ilísha‘ jo Isráíl meṉ nabí hai, faqat wuhí terí un bátoṉ ko jo tú apní ḳhalwatgáh meṉ kahtá hai sháh i Isráíl ko batá detá hai.

13Us ne kahá, Jákar, dekho, wuh kaháṉ hai, táki maiṉ use pakaṛwá maṉgáúṉ. Aur use yih batáyá gayá, ki Wuh Dútain meṉ hai.

14Tab us ne waháṉ ghoṛoṉ aur rathoṉ, aur ek baṛe lashkar ko rawána kiyá: so unhoṉ ne rátoṉ rát ákar us shahr ko gher liyá.

15Aur jab us mard i Ḳhudá ká ḳhádim subh ko uṭhkar báhar niklá, to dekhá, kí ek lashkar ma‘ ghoṛoṉ aur rathoṉ ke, shahr ke chaugird hai. So us ḳhádim ne jákar us se kahá, Háe, ai mere málik, ham kyá kareṉ?

16Us ne jawáb diyá, Ḳhauf na kar, kyúṉki hamáre sáthwále un ke sáthwáloṉ se ziyáda haiṉ.

17Aur Ilísha‘ ne du‘á kí, aur kahá, Ai Ḳhudáwand, us kí áṉkheṉ khol de, táki wuh dekh sake. Tab Ḳhudáwand ne us jawán kí áṉkheṉ khol díṉ, aur us ne jo nigáh kí, to dekhá ki Ilísha‘ ke girdágird ká paháṛ átashí ghoṛoṉ aur rathoṉ se bhará hai.

18Aur jab wuh us kí taraf áne lage, to Ilísha‘ ne Ḳhudáwand se du‘á kí, aur kahá, Maiṉ terí minnat kartá húṉ, in logoṉ ko andhá kar de. So us ne, jaisá Ilísha‘ ne kahá thá, un ko andhá kar diyá.

19Phir Ilísha‘ ne un se kahá, Yih wuh rásta nahíṉ, aur na yih wuh shahr hai: tum mere píchhe chale áo, aur maiṉ tum ko us shaḳhs ke pás pahuṉchá dúṉgá, jis kí tum talásh karte ho. Aur wuh un ko Sámariya ko le gayá.

20Aur jab wuh Sámariya meṉ pahuṉche, to Ilísha‘ ne kahá, Ai Ḳhudáwand, in logoṉ kí áṉkheṉ khol de táki wuh dekh sakeṉ. Tab Ḳhudáwand ne un kí áṉkheṉ khol díṉ, aur unhoṉ ne jo nigáh kí, to kyá dekhá, ki Sámariya ke andar haiṉ.

21Aur sháh i Isráíl ne un ko dekhkar Ilísha‘ se kahá, Ai mere báp, kyá maiṉ un ko már lúṉ? maiṉ un ko már lúṉ?

22Us ne jawáb diyá, Tú un ko na már: kyá tú un ko már diyá kartá hai jin ko tú talwár aur kamán se asír kar letá hai? tú un ke áge roṭí aur pání rakh, táki wuh kháeṉ píeṉ, aur apne áqá ke pás jáeṉ.

23So us ne un ke liye bahut sá kháná taiyár kiyá: aur jab wuh khá pí chuke, to us ne un ko ruḳhsat kiyá; aur wuh apne áqá ke pás chale gaye. Aur Arám ke jathe Isráíl ke mulk meṉ phir na áe.

24Is ke ba‘d aisá húá ki Bin Hadad sháh i Arám apní sab fauj ikaṭṭhí karke chaṛh áyá, aur Sámariya ká muhásara kar liyá.

25Aur Sámariya meṉ baṛá kál thá: aur wuh use ghere rahe, yaháṉ tak ki gadhe ká sir chándí ke assí sikkoṉ meṉ, aur kabútar kí bíṭ ká ek chautháí paimána chándí ke páṉch sikkoṉ meṉ bikne lagá.

26Aur jab sháh i Isráíl díwár par já rahá thá, to ek ‘aurat ne us kí duháí dí, aur kahá, Ai mere málik, ai bádsháh, madad kar.

27Us ne kahá, ki Agar Ḳhudáwand hí terí madad na kare, to maiṉ kaháṉ se terí madad karúṉ? kyá khalíhán se, yá angúr ke kolhú se?

28Phir bádsháh ne us se kahá, Tujhe kyá húá? Us ne jawáb diyá, Is ‘aurat ne mujh se kahá, ki Apná beṭá de de, táki ham áj ke din use kháeṉ; aur merá beṭá jo hai, so use ham kal kháeṉge.

29So mere beṭe ko ham ne pakáyá, aur use khá liyá: aur dúsre din maiṉ ne us se kahá, Apná beṭá lá, táki ham use kháeṉ; lekin us ne apná beṭá chhipá diyá hai.

30Bádsháh ne us ‘aurat kí báteṉ sunkar apne kapṛe pháṛe: us waqt wuh díwár par chalá játá thá, aur logoṉ ne dekhá ki andarwár us ke tan par ṭáṭ hai.

31Aur us ne kahá, ki Agar áj Sáfat ke beṭe Ilísha‘ ká sir us ke tan par rah jáe, to Ḳhudáwand mujh se aisá balki is se ziyáda kare.

32Lekin Ilísha‘ apne ghar meṉ baiṭhá rahá, aur buzurg log us ke sáth baiṭhe the: aur bádsháh ne apne huzúr se ek shaḳhs ko bhejá; par is se pahle ki wuh qásid us ke pás áe, us ne buzurgoṉ se kahá, Tum dekhte ho, ki us qátilzáde ne merá sir uṛá dene ko ek ádmí bhejá hai? So dekho, jab wuh qásid áe, to darwáza band kar lená, aur mazbútí se darwáze ko us ke muqábil pakṛe rahná; kyá us ke píchhe píchhe us ke áqá ke páṉwoṉ kí áhaṭ nahíṉ?

33Aur wuh un se hanoz báteṉ kar hí rahá thá, ki dekho, wuh qásid us ke pás á pahuṉchá, aur us ne kahá, ki Dekho, yih balá Ḳhudáwand kí taraf se hai: ab age maiṉ Ḳhudáwand kí ráh kyúṉ takúṉ?

← Chapter 5 Jump to: Chapter 7 →