bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Jeremiah 2
Jeremiah 2
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 3 →
1
Phir Ḳhudáwand ká kalám mujh par názil húá, aur us ne farmáyá ki,
2
Tú já aur Yarúshalem ke kán meṉ pukárkar kah, ki Ḳhudáwand yúṉ farmátá hai, ki Maiṉ terí jawání kí ulfat aur tere biyáh kí mahabbat ko yád kartá húṉ; ki tú biyábán ya‘ní banjar zamín meṉ mere píchhe píchhe chalí.
3
Isráíl Ḳhudáwand ká muqaddas aur us kí afzáish ká pahlá phal thá: Ḳhudáwand farmátá hai, Use nigalnewále sab mujrim ṭhahreṉge; un par áfat áegí.
4
Ai ahl i Ya‘qúb, aur ahl i Isráíl ke sab ḳhándáno: Ḳhudáwand ká kalám suno:
5
Ḳhudáwand yúṉ farmátá hai, ki Tumháre bápdádá ne mujh meṉ kaun sí beinsáfí páí, jis ke sabab se wuh mujh se dúr ho gaye, aur butlán kí pairawí karke bátil húe?
6
Aur unhoṉ ne yih na kahá, ki Ḳhudáwand kaháṉ hai, jo ham ko mulk i Misr se nikál láyá, aur biyábán aur banjar aur gaṛhoṉ kí zamín meṉ se ḳhushkí aur maut ke sáye kí sarzamín meṉ se, jaháṉ se na koí guzartá aur na koí búd o básh kartá thá, ham ko le áyá?
7
Aur maiṉ tum ko bág̣oṉwálí zamín meṉ láyá, ki tum us ke mewe aur us ke achchhe phal kháo; lekin jab tum dáḳhil húe, to tum ne merí zamín ko nápák kar diyá, aur merí mírás ko makrúh banáyá.
8
Káhinoṉ ne na kahá, ki Ḳhudáwand kaháṉ hai? aur ahl i sharí‘at ne mujhe na jáná: aur charwáhoṉ ne mujh se sarkashí kí, aur nabíoṉ ne Ba‘l ke nám se nubuwwat kí, aur un chízoṉ kí pairawí kí, jin se kuchh fáida nahíṉ.
9
Is liye, Ḳhudáwand farmátá hai, maiṉ phir tum se jhagṛúṉgá, aur tumháre beṭoṉ ke beṭoṉ se jhagṛá karúṉgá.
10
Kyúṉki pár guzarkar Kittím ke jazíroṉ meṉ dekho, aur Qídár meṉ qásid bhejkar daryáft karo; aur dekho ki aisí bát kahíṉ húí hai?
11
Kyá kisí qaum ne apne ma‘búdoṉ ko, háláṉki wuh ḳhudá nahíṉ, badal ḍálá? par merí qaum ne apne jalál ko befáida chíz se badlá.
12
Ḳhudáwand farmátá hai, Ai ásmáno, is se hairán ho; shiddat se thartharáo, aur bi’lkull wírán ho jáo.
13
Kyúṉki mere logoṉ ne do buráiyáṉ kíṉ; unhoṉ ne mujh áb i hayát ke chashme ko tark kar diyá, aur apne liye hauz khode haiṉ, shikasta hauz jin meṉ pání nahíṉ ṭhahr saktá.
14
Kyá Isráíl gulám hai? kyá wuh ḳhánazád hai? wuh kis liye lúṭá gayá?
15
Jawán sher i babar us par g̣urráe, aur garje: aur unhoṉ ne us ká mulk ujáṛ diyá; us ke shahr jal gaye, waháṉ koí basnewálá na rahá.
16
Baní Núf aur baní Tahfanís ne bhí terí khopṛí phoṛí.
17
Kyá tú ḳhud hí yih apne úpar nahíṉ láí, ki tú ne Ḳhudáwand apne Ḳhudá ko tark kiyá, jab ki wuh terí rahbarí kartá thá?
18
Aur ab Síhor ká pání píne ko Misr kí ráh meṉ tujhe kyá kám? aur daryá e Furát ká pání píne ko Asúr kí ráh meṉ terá kyá matlab?
19
Terí hí sharárat terí tádíb karegí, aur terí bargashtagí tujh ko sazá degí: Ḳhudáwand, Rabb u’l afwáj, farmátá hai, Dekh, aur ján le, ki yih burá aur beniháyat bejá kám hai, ki tú ne Ḳhudáwand apne Ḳhudá ko tark kiyá, aur tujh ko merá ḳhauf nahíṉ.
20
Kyúṉki muddat húí, ki tú ne apne júe ko toṛ ḍálá, aur apne bandhanoṉ ke ṭukṛe kar ḍále; aur kahá, ki Maiṉ tábi‘ na rahúṉgí; háṉ, har ek úṉche paháṛ par aur har ek hare daraḳht ke níche tú badkárí ke liye leṭ gayí.
21
Maiṉ ne to tujhe kámil ták lagáyá, aur ‘umda bíj boyá thá: phir tú kyúṉkar mere liye behaqíqat janglí angúr ká daraḳht ho gayí?
22
Harchand tú apne ko sajjí se dhoe, aur bahut sá sábún isti‘mál kare, taubhí Ḳhudáwand Ḳhudá farmátá hai, Terí sharárat ká dág̣ mere huzúr ‘ayán hai.
23
Tú kyúṉkar kahtí hai, Maiṉ nápák nahíṉ húṉ; maiṉ ne Ba‘lím kí pairawí nahíṉ kí? wádí meṉ apní rawish dekh; aur jo kuchh tú ne kiyá hai ma‘lúm kar: tú tezrau úṉṭní kí mánind hai, jo idhar udhar dauṛtí hai;
24
máda gorḳhar kí mánind, jo biyábán kí ‘ádí hai, jo shahwat ke josh meṉ hawá ko súṉghtí hai: us kí mastí kí hálat meṉ kaun use rok saktá hai? us ke tálib mánda na hoṉge; us kí mastí ke aiyám meṉ wuh use pá leṉge.
25
Tú apne páṉwoṉ ko barahnagí se, aur apne halq ko piyás se bachá; lekin tú ne kahá, ki Kuchh ummed nahíṉ: hargiz nahíṉ; kyúṉki maiṉ begánoṉ par ‘áshiq húṉ, aur un hí ke píchhe jáúṉgí.
26
Jis tarah chor pakṛá jáne par ruswá hotá hai, usí tarah Isráíl ká gharáná ruswá húá; wuh aur us ke bádsháh, aur umará aur káhin, aur nabí;
27
jo lakṛí se kahte haiṉ, ki Tú merá báp hai; aur patthar se, ki Tú ne mujhe janam diyá: kyúṉki unhoṉ ne merí taraf muṉh na kiyá, balki píṭh kí: par apní musíbat ke waqt wuh kaheṉge, ki Uṭhkar ham ko bachá.
28
Lekin tere but kaháṉ haiṉ, jin ko tú ne apne liye banáyá? agar wuh terí musíbat ke waqt tujhe bachá sakte haiṉ, to uṭheṉ: kyúṉki, ai Yahúdáh, jitne tere shahr haiṉ, utne hí tere ma‘búd haiṉ.
29
Tum mujh se kyúṉ hujjat karoge? tum sab ne mujh se bag̣áwat kí hai, Ḳhudáwand farmátá hai.
30
Maiṉ ne befáida tumháre beṭoṉ ko píṭá: wuh tarbiyatpazír na húe: tumhárí hí talwár pháṛnewále sher i babar kí tarah tumháre nabíoṉ ko khá gayí.
31
Ai is pusht ke logo, Ḳhudáwand ke kalám ká liház karo. Kyá maiṉ Isráíl ke liye biyábán yá táríkí kí zamín húá? mere log kyúṉ kahte haiṉ, Ham ázád ho gaye; phir tere pás na áeṉge?
32
Kyá kuṉwárí apne zewar, yá dulhan apní áráish bhúl saktí hai? par mere log to muddat i madíd se mujh ko bhúl gaye.
33
Tú talab i ‘ishq meṉ apní ráh ko kaisí árásta kartí hai! yaqínan tú ne fáhisha ‘auratoṉ ko bhí apní ráheṉ sikháí haiṉ.
34
Tere hí dáman par begunáh miskínoṉ ká ḳhún bhí páyá gayá: tú ne un ko naqab lagáte nahíṉ paḳrá, balki in hí sab bátoṉ ke sabab se.
35
Taubhí tú kahtí hai, Maiṉ bequsúr húṉ; us ká g̣azab yaqínan mujh par se ṭal jáegá. Dekh, maiṉ tujh par fatwá dúṉgá; kyúṉki tú kahtí hai, Maiṉ ne gunáh nahíṉ kiyá.
36
Tú apní ráh badalne ko aisí beqarár kyúṉ phirtí hai? tú Misr se bhí sharminda hogí, jaise Asúr se húí.
37
Waháṉ se bhí tú apne sir par háth rakhkar niklegí: kyúṉki Ḳhudáwand ne un ko jin par tú ne i‘timád kiyá haqír jáná, aur tú un se kámyáb na hogí.
← Chapter 1
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 3 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52