bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Urdu
/
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
/
Jeremiah 23
Jeremiah 23
Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 24 →
1
Ḳhudáwand farmátá hai, Un charwáhoṉ par afsos jo merí charágáh kí bheṛoṉ ko halák o paráganda karte haiṉ.
2
Is liye Ḳhudáwand, Isráíl ká Ḳhudá, un charwáhoṉ kí muḳhálafat meṉ, jo mere logoṉ kí chaupání karte haiṉ, yúṉ farmátá hai, ki Tum ne mere galle ko paráganda kiyá, aur un ko háṉkkar nikál diyá, aur nigahbání nahíṉ kí; dekho, maiṉ tumháre kámoṉ kí buráí tum par láúṉgá, Ḳhudáwand farmátá hai.
3
Par maiṉ un ko jo mere galle se bach rahe haiṉ, tamám mamálik se jaháṉ jaháṉ maiṉ ne un ko háṉk diyá thá jama‘ kar lúṉgá, aur un ko phir un ke gallaḳhánoṉ meṉ láúṉgá; aur wuh phaleṉge aur baṛheṉge.
4
Aur maiṉ un par aise chaupán muqarrar karúṉgá, jo un ko charáeṉge: aur wuh phir na ḍareṉge, na ghabráeṉge, na gum hoṉge, Ḳhudáwand farmátá hai.
5
Dekh, wuh din áte haiṉ, Ḳhudáwand farmátá hai, ki maiṉ Dáúd ke liye ek sádiq Sháḳh paidá karúṉgá, aur us kí bádsháhí mulk meṉ iqbálmandí aur ‘adálat aur sadáqat ke sáth hogí.
6
Us ke aiyám meṉ Yahúdáh naját páegá, aur Isráíl salámatí se sukúnat karegá: aur us ká nám yih rakkhá jáegá, Ḳhudáwand hamárí sadáqat.
7
Isí liye, dekh, wuh din áte haiṉ, Ḳhudáwand farmátá hai, ki wuh phir na kaheṉge, ki Zinda Ḳhudáwand kí qasam, jo baní Isráíl ko mulk i Misr se nikál láyá;
8
balki, Zinda Ḳhudáwand kí qasam, jo Isráíl ke gharáne kí aulád ko shimál kí sarzamín se aur un sab mamlukatoṉ se jaháṉ jaháṉ maiṉ ne un ko háṉk diyá thá nikál láyá; aur wuh apne mulk meṉ baseṉge.
9
Nabíoṉ kí bábat. Merá dil mere andar ṭúṭ gayá, merí sab haḍḍiyáṉ thartharátí haiṉ; Ḳhudáwand aur us ke pák kalám ke sabab se maiṉ matwálá sá húṉ, aur us shaḳhs kí mánind jo mai se mag̣lúb ho.
10
Yaqínan zamín badkároṉ se pur hai; la‘nat ke sabab se zamín mátam kartí hai; maidán kí charágáheṉ súkh gayíṉ; kyúṉki un kí rawish burí, aur un ká zor náhaqq hai:
11
ki nabí aur káhin donoṉ nápák haiṉ: háṉ, maiṉ ne apne ghar ke andar un kí sharárat dekhí, Ḳhudáwand farmátá hai.
12
Is liye un kí ráh un ke haqq meṉ aisí hogí, jaise táríkí meṉ phisalní jagah: wuh us meṉ ragede jáeṉge, aur waháṉ gireṉge: kyúṉki, Ḳhudáwand farmátá hai, maiṉ un par balá láúṉgá, ya‘ní un kí sazá ká sál.
13
Aur maiṉ ne Sámariya ke nabíoṉ meṉ hamáqat dekhí hai: unhoṉ ne Ba‘l ke nám se nubuwwat kí, aur merí qaum Isráíl ko gumráh kiyá.
14
Maiṉ ne Yarúshalem ke nabíoṉ meṉ bhí ek haulnák bát dekhí; wuh zinákár, jhúṭh ke pairau, aur badkároṉ ke hámí haiṉ, yaháṉ tak ki koí apní sharárat se báz nahíṉ átá: wuh sab mere nazdík Sadúm kí mánind aur us ke báshinde ‘Amúrah kí mánind haiṉ.
15
Isí liye Rabb u’l afwáj nabíoṉ kí bábat yúṉ farmátá hai, ki Dekh, maiṉ un ko nágdauná khiláúṉgá, aur indráyan ká pání piláúṉgá: kyúṉki Yarúshalem ke nabíoṉ hí se tamám mulk meṉ bedíní phailí hai.
16
Rabb u’l afwáj yúṉ farmátá hai, ki Un nabíoṉ kí báteṉ na suno, jo tum se nubuwwat karte haiṉ; wuh tum ko batálat kí ta‘lím dete haiṉ: wuh apne diloṉ ke ilhám bayán karte haiṉ, na ki Ḳhudáwand ke muṉh kí báteṉ.
17
Wuh mujhe haqír jannewáloṉ se kahte rahte haiṉ, Ḳhudáwand ne farmáyá hai, ki Tumhárí salámatí hogí; aur har ek se jo apne dil kí saḳhtí par chaltá hai, kahte haiṉ ki Tujh par koí balá na áegí.
18
Par un meṉ se kaun Ḳhudáwand kí majlis meṉ shámil húá ki us ká kalám sune, aur samjhe? kis ne us ke kalám kí taraf tawajjuh kí, aur us par kán lagáyá?
19
Dekh, Ḳhudáwand ke qahr i shadíd ká túfán járí húá hai, balki túfán ká bagolá, sharíroṉ ke sir par ṭúṭ paṛegá.
20
Ḳhudáwand ká g̣azab phir mauqúf na hogá, jab tak use anjám tak na pahuṉcháe, aur us ke dil ke iráde ko púrá na kare: tum ánewále dinoṉ meṉ use baḳhúbí ma‘lúm karoge.
21
Maiṉ ne in nabíoṉ ko nahíṉ bhejá; par yih dauṛte phire: maiṉ ne in se kalám nahíṉ kiyá, par inhoṉ ne nubuwwat kí.
22
Lekin agar wuh merí majlis meṉ shámil hote, to merí báteṉ mere logoṉ ko sunáte, aur un ko un kí burí ráh se aur un ke kámoṉ kí buráí se báz rakhte.
23
Ḳhudáwand farmátá hai, Kyá maiṉ nazdík hí ká Ḳhudá húṉ, aur dúr ká Ḳhudá nahíṉ?
24
Kyá koí ádmí poshída jagahoṉ meṉ chhip saktá hai, ki maiṉ use na dekhúṉ? Ḳhudáwand farmátá hai. Kyá zamín o ásmán mujh se ma‘múr nahíṉ haiṉ? Ḳhudáwand farmátá hai.
25
Maiṉ ne suná jo nabíoṉ ne kahá jo merá nám lekar jhúṭhí nubuwwat karte aur kahte haiṉ ki Maiṉ ne ḳhwáb dekhá, maiṉ ne ḳhwáb dekhá.
26
Kab tak yih nabíoṉ ke dil meṉ rahegá ki jhúṭhí nubuwwat kareṉ; háṉ, wuh apne dil kí farebkárí ke nabí haiṉ?
27
jo gumán rakhte haiṉ ki apne ḳhwáboṉ se jo un meṉ se har ek apne paṛausí se bayán kartá hai mere logoṉ ko merá nám bhulá deṉ, jis tarah un ke bápdádá Ba‘l ke sabab se merá nám bhúl gaye the.
28
Jis nabí ke pás ḳhwáb hai, wuh ḳhwáb bayán kare; aur jis ke pás merá kalám hai, wuh mere kalám ko diyánatdárí se sunáe. Gehúṉ ko bhúse se kyá nisbat? Ḳhudáwand farmátá hai.
29
Kyá merá kalám ág kí mánind nahíṉ hai? Ḳhudáwand farmátá hai; aur hathauṛe kí mánind jo chaṭán ko chaknáchúr kar ḍáltá hai?
30
Is liye, dekh, maiṉ un nabíoṉ ká muḳhálif húṉ, Ḳhudáwand farmátá hai, jo ek dúsre se merí báteṉ churáte haiṉ.
31
Dekh, maiṉ un nabíoṉ ká muḳhálif húṉ, Ḳhudáwand farmátá hai, jo apní zabán ko isti‘mál karte, aur kahte haiṉ, ki Ḳhudá farmátá hai.
32
Ḳhudáwand farmátá hai, Dekh, maiṉ un ká muḳhálif húṉ, jo jhúṭhe ḳhwáboṉ kí nubuwwat kahte, aur bayán karte haiṉ, aur apní jhúṭhí bátoṉ se aur láfzaní se mere logoṉ ko gumráh karte haiṉ: lekin maiṉ ne na un ko bhejá, na hukm diyá; is liye in logoṉ ko un se hargiz fáida na hogá, Ḳhudáwand farmátá hai.
33
Aur jab yih log, yá nabí, yá káhin tujh se púchheṉ, ki Ḳhudáwand kí taraf se bár i nubuwwat kyá hai? tab tú un se kahná, Kaun sá bár i nubuwwat! Ḳhudáwand farmátá hai, Maiṉ tum ko pheṉk dúṉgá.
34
Aur nabí aur káhin aur logoṉ meṉ se jo koí kahe, Ḳhudáwand kí taraf se bár i nubuwwat, maiṉ us shaḳh sko aur us ke gharáne ko sazá dúṉgá.
35
Cháhiye ki har ek apne paṛausí aur apne bháí se yúṉ kahe, ki Ḳhudáwand ne kyá jawáb diyá, aur Ḳhudáwand ne kyá farmáyá hai?
36
Par Ḳhudáwand kí taraf se bár i nubuwwat ká zikr tum kabhí na karná; is liye ki har ek ádmí kí apní hí báteṉ us par bár hoṉgí; kyúṉki tum ne zinda Ḳhudá, Rabb u’l afwáj, hamáre Ḳhudá ke kalám ko bigáṛ ḍálá hai.
37
Tú nabí se yúṉ kahná, ki Ḳhudáwand ne tujhe kyá jawáb diyá? aur, Ḳhudáwand ne kyá farmáyá?
38
Lekin chúṉki tum kahte ho, Ḳhudáwand kí taraf se bár i nubuwwat; is liye Ḳhudáwand yúṉ farmátá hai, ki Chúṉki tum kahte ho, Ḳhudáwand kí taraf se bár i nubuwwat, aur maiṉ ne tum ko kahlá bhejá, ki Ḳhudáwand kí taraf se bár i nubuwwat na kaho;
39
is liye, dekho, maiṉ tum ko bi’lkull farámosh kar dúṉgá, aur tum ko, aur is shahr ko, jo maiṉ ne tum ko aur tumháre bápdádá ko diyá, apní nazar se dúr kar dúṉgá:
40
aur maiṉ tum ko hamesha kí malámat ká nishána bánáúṉgá, aur abadí ḳhajálat tum par láúṉgá, jo kabhí farámosh na hogí.
← Chapter 22
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 32
Chapter 33
Chapter 34
Chapter 35
Chapter 36
Chapter 37
Chapter 38
Chapter 39
Chapter 40
Chapter 41
Chapter 42
Chapter 43
Chapter 44
Chapter 45
Chapter 46
Chapter 47
Chapter 48
Chapter 49
Chapter 50
Chapter 51
Chapter 52
Chapter 24 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
46
47
48
49
50
51
52