1 Samuel 1

Chinese TTVR (現代台語譯本羅馬字版)

Jump to: Chapter 2 →

1Ū chi̍t ê lâng kiò-chòe Í-lī-ka-ná; i tòa tī Í-hoat-liân soaⁿ-khu, So͘-hut chong-cho̍k teh tòa ê La-má; i sī Í-hoat-liân -lâng, So͘-hut ê goân-sun, Thok-hō͘ ê cheng-sun, Í-lī-hō͘ ê sun, Iâ-lô-hán ê kiáⁿ.

2Í-lī-ka-ná ū nn̄g ê bó͘, chi̍t ê kiò-chòe Hap-ná, chi̍t ê kiò-chòe Pí-nî-ná; Pí-nî-ná ū kiáⁿ-jî, Hap-ná bô kiáⁿ.

3Í-lī-ka-ná ta̍k-nî tùi i ê pún-siâⁿ chiūⁿ-khì Sī-lô kèng-pài Siōng Chú — Bān-kun ê Thóng-sòe, koh tùi I hiàn-chè. Í-lī nn̄g ê kiáⁿ Hô-hut-nî kap Hui-nî-hap tī hia chòe Siōng Chú ê chè-si.

4Í-lī-ka-ná ta̍k-piàn hiàn-chè, lóng pun hiàn-chè ê bah hō͘ i ê bó͘ Pí-nî-ná kap i ê kiáⁿ cha-bó͘-kiáⁿ kok chi̍t hūn.

5M̄-kú Í-lī-ka-ná hō͘ Hap-ná khah hó-hūn, in-ūi i thiàⁿ Hap-ná, khó-sioh Siōng Chú hō͘ i bô siⁿ-kiáⁿ.

6In-ūi Siōng Chú hō͘ i bô siⁿ-kiáⁿ, kap i chòe tùi-thâu ê Pí-nî-ná put-sî kek i, hō͘ i gêng-sim.

7Chit-khoán tāi-chì ta̍k-nî teh hoat-seng. Ta̍k-piàn Hap-ná chiūⁿ-khì Siōng Chú ê chhù ê sî, Pí-nî-ná chiàu-siông án-ni kek i; i chiū thî-khàu, chia̍h bōe lo̍h pn̄g.

8I ê tiōng-hu Í-lī-ka-ná kā i kóng, “ Hap-ná, lí sī-án-chóaⁿ teh háu? Sī-án-chóaⁿ m̄ chia̍h? Sī-án-chóaⁿ teh siong-sim? Ū góa kiám bô pí ū cha̍p ê kiáⁿ khah hó?”

9In tī Sī-lô lim-chia̍h liáu-āu, Hap-ná chiū khiā--khí-lâi; hit-sî chè-si Í-lī chē tī Siōng Chú ê tiān mn̂g-thiāu piⁿ ê chē-ūi.

10Hap-ná ê sim kan-khó͘, tùi Siōng Chú kî-tó, ti̍t-ti̍t lâu ba̍k-sái.

11Hap-ná hē-goān kóng, “Siōng Chú — Bān-kun ê Thóng-sòe, lí nā chin-chiàⁿ koan-sim lí lú-pī ê khó͘-chêng, koàn-kò͘ góa, bô bōe-kì-tit lí ê lú-pī, sù lí ê lú-pī siⁿ chi̍t ê hāu-siⁿ, góa beh kā i chi̍t-sì-lâng hiàn hō͘ Siōng Chú, lóng bōe kā i thì-thâu.”

12Hap-ná tùi Siōng Chú kî-tó bô-thêng, Í-lī chù-ì khòaⁿ i ê chhùi.

13Hap-ná chēng-chēng kî-kiû, chí-ū chhùi-tûn tín-tāng bô chhut-siaⁿ, só͘-í Í-lī siūⁿ-kóng i sī chiú-chùi.

14Í-lī kā i kóng, “Lí beh chùi jōa kú? M̄-thang koh lim lah!”

15Hap-ná ìn kóng, “Sian-siⁿ, góa bô teh chùi; góa sī chi̍t ê chin siong-sim ê cha-bó͘-lâng, po̍h-chiú kāu-chiú lóng bô lim, put-kò sī teh tùi Siōng Chú thò͘-chhut khó͘-chêng.

16M̄-thang khòaⁿ lí ê lú-pī chòe pháiⁿ cha-bó͘. Góa kî-tó bô-thêng, in-ūi chin oàn-thàn, sim kan-khó͘.”

17Í-lī ìn i kóng, “Lí pêng-an tò--khì. Goān Í-sek-lia̍t ê Siōng-tè chiàu lí só͘ kiû--ê sù hō͘ lí.”

18Hap-ná kóng, “Goān lí ê lú-pī tùi lí tit-tio̍h un-hūi.” Hap-ná tò--khì, chia̍h pá liáu-āu, chiū bô koh iu-thâu-kat-bīn.

19Keh-ji̍t in chin chá khí--lâi, kèng-pài Siōng Chú liáu-āu, chiū tò-khì in tī La-má ê chhù. Í-lī-ka-ná kap Hap-ná tâng-pâng; Siōng Chú ōe-kì-tit Hap-ná.

20Hap-ná chiū hoâi-īn, kàu-sî siⁿ chi̍t ê kiáⁿ, kā i hō-miâ kiò-chòe Sat-bó-ní, ì-sù sī, “I sī góa tùi Siōng Chú kiû--lâi-ê.”

21Í-lī-ka-ná kap in choân-ke lóng chiūⁿ-khì Sī-lô, tùi Siōng Chú hiàn nî-chè, koh siā i só͘ hē ê goān.

22M̄-kú Hap-ná bô chiūⁿ--khì, kā i ê tiōng-hu kóng, “Thèng-hāu gín-á tn̄g-lin, góa chiah chhōa i khì hiàn hō͘ Siōng Chú, chi̍t-sì-lâng tòa tī hia.”

23I ê tiōng-hu Í-lī-ka-ná kā i kóng, “Lí nā khòaⁿ-chòe hó chiū án-ni khì chòe, thèng-hāu gín-á tn̄g-lin chiah khì; goān Siōng Chú si̍t-hiān I ê ōe.” Hū-jîn-lâng chiū tī chhù--ni̍h io kiáⁿ kàu i tn̄g-lin.

24Gín-á tn̄g-lin liáu-āu, Hap-ná chiū chhōa i khì Sī-lô Siōng Chú ê chhù; koh tòa chi̍t chiah saⁿ-hè ê gû-káng, cha̍p kong-kun ê iù mī-hún, chi̍t phê-tē ê chiú. Hit-sî gín-á iáu sòe-hàn.

25In chiū thâi hit-chiah gû-káng, chhōa gín-á khì Í-lī hia.

26Hū-jîn-lâng kóng, “Sian-siⁿ, góa khak-si̍t chiū-sī í-chêng khiā tī lí bīn-chêng tùi Siōng Chú kî-tó hit-ê hū-jîn-lâng.

27Góa tùi Siōng Chú kiû chit-ê gín-á, I ū chiàu góa só͘ kiû--ê hō͘ góa;

28só͘-í góa chiong chit-ê gín-á hiàn hō͘ Siōng Chú, hō͘ i chi̍t-sì-lâng ho̍k-sāi Siōng Chú.” In chiū tī hia kèng-pài Siōng Chú.

Jump to: Chapter 2 →