1 Samuel 27

Chinese TTVR (現代台語譯本羅馬字版)

← Chapter 26 Jump to: Chapter 28 →

1Tāi-pi̍t sim-lāi siūⁿ, “Chóng ū chi̍t ji̍t góa ōe sí tī Sò-lô ê chhiú, lêng-khó cháu-lâi Hui-lī-sū -lâng ê tōe, án-ni Sò-lô chiū ōe sí-sim, bōe koh tī Í-sek-lia̍t kéng-lāi chhē góa, góa chiū ōe-tàng thoat-lī i ê chhiú.”

2Tāi-pi̍t chiū chhōa la̍k-pah ê pō͘-hā, kè-khì Ka-te̍k -ông, Má-gô ê kiáⁿ A-kiat hia.

3Tāi-pi̍t kap i nn̄g ê bó͘, chiū-sī Iâ-su-lia̍t -lâng A-hi-loán kap Ná-pà ê ûi-song Ka-bi̍t -lâng Ài-pí-kai, kap Tāi-pi̍t ê pō͘-hā í-ki̍p in ê ka-koàn, lóng tiàm tī Ka-te̍k -ông A-kiat hia.

4Ū lâng kā Sò-lô kóng Tāi-pi̍t í-keng cháu-khì Ka-te̍k, Sò-lô chiū bô koh tui-jip i.

5Ū chi̍t ji̍t, Tāi-pi̍t tùi A-kiat -ông kóng, “Lí nā khòaⁿ góa chòe pêng-iú, chhiáⁿ tī chng-kha sù góa chi̍t ê só͘-chāi thang tòa, lí ê lô͘-po̍k chiū bián kap lí tòa tī kiaⁿ-siâⁿ.”

6Hit-ji̍t, A-kiat -ông chiong Sé-kek-la hō͘ i; in-ūi án-ni, Sé-kek-la sio̍k Iû-tāi -ông, ti̍t-kàu kin-á-ji̍t.

7Tāi-pi̍t tiàm tī Hui-lī-sū -lâng ê tōe, kiōng chi̍t nî sì kò-ge̍h.

8Tāi-pi̍t kap i ê pō͘-hā chiūⁿ-khì kong-táⁿ Ki-su̍t -lâng, Ki-sek -lâng, A-má-le̍k -lâng; chit kúi cho̍k í-keng tī Su-ní kàu Ai-ki̍p hit tiong-kan ê tōe-khu tòa chin kú.

9Tāi-pi̍t bô-lūn kong-chiàm sím-mi̍h só͘-chāi, lâm-lú lóng thâi-sí, bô lâu kah pòaⁿ-ê; koh chhiúⁿ in ê gû, iûⁿ, lû, lo̍k-tô, kap i-ho̍k, tò-tńg-lâi kìⁿ A-kiat.

10A-kiat -ông ta̍k-piàn lóng ōe mn̄g i, “Lín kin-á-ji̍t khì kong-chiàm sím-mi̍h só͘-chāi?” Tāi-pi̍t ōe ìn kóng “Goán khì kong-chiàm Iû-tāi lâm-hng”, á-sī kóng “ Iâ-la-bia̍t -lâng ê lâm-hng”, á-sī kóng “ Ki-nî -lâng ê lâm-hng”.

11Tāi-pi̍t ta̍k-piàn chiong lâm-lú lóng thâi-sí, liân chi̍t ê to bô tòa tńg-khì Ka-te̍k, chiah bián in chiong Tāi-pi̍t só͘ chòe ê tāi-chì pò lâng chai. Tāi-pi̍t tiàm tī Hui-lī-sū -lâng ê tōe ê sî lóng án-ni chòe.

12A-kiat sìn-jīm Tāi-pi̍t, siūⁿ-kóng, “ Tāi-pi̍t hō͘ i ê pún-cho̍k Í-sek-lia̍t -lâng iàm-ò͘ⁿ, só͘-í i ōe éng-oán chòe góa ê lô͘-po̍k.”

← Chapter 26 Jump to: Chapter 28 →