1 Samuel 3

Chinese TTVR (現代台語譯本羅馬字版)

← Chapter 2 Jump to: Chapter 4 →

1Gín-á Sat-bó-ní siū Í-lī kàu-tō ho̍k-sāi Siōng Chú. Tng-sî chin hán-tit ū tùi Siōng Chú lâi ê sìn-sit, bô siông-siông ū khé-sī.

2Ū chi̍t mî, Í-lī tī ka-kī ê pâng-keng teh khùn; i ê ba̍k-chiu í-keng bū, khòaⁿ bōe bêng.

3Sat-bó-ní tī khǹg Siōng-tè iok-kūi ê tiān-lāi mā teh khùn; thiⁿ iáu-bē kng, Siōng-tè ê teng iáu-teh to̍h.

4Siōng Chú kiò Sat-bó-ní; Sat-bó-ní ìn kóng, “Góa tī chia.”

5I chiū cháu-khì Í-lī hia, kóng, “Góa tī chia, lí kiò góa hō͘ⁿ?” Í-lī kóng, “Góa bô kiò lí, tò-khì khùn.” I chiū khì khùn.

6Siōng Chú koh kiò Sat-bó-ní; Sat-bó-ní khí--lâi, khì Í-lī hia, kóng, “Góa tī chia, lí kiò góa hō͘ⁿ?” I ìn kóng, “Góa ê kiáⁿ, góa bô kiò lí, tò-khì khùn.”

7Hit-chūn Sat-bó-ní m̄ bat Siōng Chú; Siōng Chú ê ōe iáu-bē tùi i khé-sī.

8Siōng Chú tē-saⁿ piàn kiò Sat-bó-ní. Sat-bó-ní khí--lâi, khì Í-lī hia, kóng, “Góa tī chia, lí kiò góa hō͘ⁿ?” Í-lī chiah chai sī Siōng Chú teh kiò gín-á.

9Í-lī chiū kā Sat-bó-ní kóng, “Lí koh khì khùn. I nā koh kiò lí, lí chiū kóng, ‘Siōng Chú ah, chhiáⁿ lí kóng, lí ê lô͘-po̍k teh thiaⁿ.’” Sat-bó-ní chiū koh tò-khì khùn.

10Siōng Chú koh lâi khiā--teh, chhin-chhiūⁿ chêng kúi-nā piàn án-ni kiò, “ Sat-bó-ní, Sat-bó-ní.” Sat-bó-ní ìn kóng, “Chhiáⁿ kóng, lí ê lô͘-po̍k teh thiaⁿ.”

11Siōng Chú kā Sat-bó-ní kóng, “Chù-ì thiaⁿ, góa beh tī Í-sek-lia̍t -lâng tiong-kan chòe chi̍t hāng tāi-chì, hō͘ thiaⁿ--tio̍h ê lâng lóng kiaⁿ-chi̍t-tiô.

12Tī hit-ji̍t, koan-hē Í-lī ê ke góa só͘ kóng ê tāi-chì lóng ōe si̍t-hiān.

13Góa ū kā i kóng, góa beh éng-oán sím-phòaⁿ in chit-ke; i chai i ê kiáⁿ ū hoān eng-kai siū chiù-chó͘ ê chōe, koh bô kā in khiàn-chek.

14Só͘-í góa tùi Í-lī ê ke chiù-chōa, ‘ Í-lī in chit-ke ê chōe ēng seng-lé chè-mi̍h mā bōe-tàng tit-tio̍h sià-bián.’”

15Sat-bó-ní khùn kàu thiⁿ-kng, khui Siōng Chú ê tiān-mn̂g. Sat-bó-ní m̄-káⁿ chiong īⁿ-siōng kā Í-lī kóng.

16Í-lī kiò Sat-bó-ní, kóng, “Góa ê kiáⁿ Sat-bó-ní.” I ìn kóng, “Góa tī chia.”

17Í-lī kóng, “Siōng Chú tùi lí kóng sím-mi̍h? Lí m̄-thang kā góa ún-môa; lí nā chiong I kā lí kóng--ê tùi góa am-khàm chi̍t kù, goān Siōng-tè ka-pē kā lí chek-hoa̍t.”

18Sat-bó-ní chiū chiong hiah-ê ōe lóng kā Í-lī kóng, bô tùi i ún-môa. Í-lī kóng, “I sī Siōng Chú. Siōng Chú ōe chiàu I khòaⁿ-chòe hó--ê khì chòe.”

19Sat-bó-ní chiām-chiām tōa-hàn; Siōng Chú kap i tông-chāi, hō͘ i só͘ kóng ê ōe ta̍k-kù lóng si̍t-hiān.

20Tùi Tān kàu Pia̍t-sī-pa, só͘-ū ê Í-sek-lia̍t -lâng lóng chai Sat-bó-ní khak-si̍t sī Siōng Chú ê sian-ti.

21Siōng Chú kè-sio̍k tī Sī-lô hián-hiān. Siōng Chú tī Sī-lô ēng I ê ōe khé-sī Sat-bó-ní.

← Chapter 2 Jump to: Chapter 4 →