1 Samuel 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Tāi-pi̍t khì Ná-pek kìⁿ chè-si A-hi-bí-le̍k. A-hi-bí-le̍k kiaⁿ-kiaⁿ-hiâⁿ-hiâⁿ chhut-lâi kìⁿ Tāi-pi̍t, tùi i kóng, “Lí ná ka-kī chi̍t ê, bô lâng kap lí tàu-tīn?”

2Tāi-pi̍t ìn kóng, “Ông hō͘ góa chi̍t ê jīm-bū, bēng-lēng kóng chit-ê jīm-bū m̄-thang hō͘ lâng chai. Góa í-keng phài pō͘-hā tī bó͘ chi̍t ê só͘-chāi thèng-hāu góa.

3Taⁿ lí ū sím-mi̍h thang chia̍h, chhiáⁿ lí hō͘ góa gō͘ ê piáⁿ, á-sī pa̍t-hāng chia̍h-mi̍h.”

4Chè-si ìn kóng, “Góa chhiú-lāi bô phó͘-thong ê piáⁿ, chí-ū hun-pia̍t-choh-sèng ê piáⁿ; lí ê pō͘-hā bô chhin-kūn hū-lú chiah thang chia̍h.”

5Tāi-pi̍t kóng, “Chòe-kūn goán lóng bô chhin-kūn hū-lú. Goán chhut-khì chip-hêng jīm-bū ê sî, chiah-ê kun-peng lóng ū kiat-chēng. Liân pêng-siông to án-ni, hô-hòng chit-piàn ê jīm-bū te̍k-pia̍t, kun-peng ê seng-khu koh-khah ū pó-chhî kiat-chēng.”

6Chè-si chiū the̍h hun-pia̍t-choh-sèng ê piáⁿ hō͘ Tāi-pi̍t, in-ūi tī hia bô pa̍t-hāng piáⁿ, chí-ū hiàn-chè ê piáⁿ, sī hiàn sin-piáⁿ ê sî tùi Siōng Chú bīn-chêng ōaⁿ--lo̍h-lâi--ê.

7Hit-ji̍t, tī hia ū chi̍t ê Sò-lô ê jîn-sîn lâu tī Siōng Chú ê bīn-chêng; i sī Í-tong -lâng, kiò-chòe To-ek, sī Sò-lô ê bo̍k-chiá ê chóng-koán.

8Tāi-pi̍t mn̄g A-hi-bí-le̍k kóng, “Lí chia ū chhiuⁿ á-sī to bô? In-ūi ông ê jīm-bū chin kín-kip, góa soah bô tòa to á-sī kî-tha ê bú-khì.”

9Chè-si ìn, “Chia ū chi̍t ki to, sī lí í-chêng tī Í-la ê soaⁿ-kok só͘ thâi-sí ê Hui-lī-sū -lâng Ko-lī-a ê, ēng pò͘ pau--teh, khǹg tī í-hut-tek ê āu-bīn. Lí beh ēng chiū gia̍h--khì; chit-ki í-gōa bô pa̍t-ki.” Tāi-pi̍t kóng, “Chit-ki to hō͘ góa, bô pa̍t-ki pí chit-ki khah hó.”

10Hit-ji̍t Tāi-pi̍t lī-khui, cháu kàu Ka-te̍k -ông A-kiat hia, khì siám-pī Sò-lô.

11A-kiat hiah-ê jîn-sîn tùi i kóng, “Chit-ê kiám m̄-sī Í-sek-lia̍t -kok ê ông Tāi-pi̍t? Kiám m̄-sī chèng hū-lú ná thiàu-bú ná chhiùⁿ kóng ‘ Sò-lô thâi-sí chheng-chheng; Tāi-pi̍t thâi-sí bān-bān’ hit-ê Tāi-pi̍t?”

12Tāi-pi̍t thiaⁿ-tio̍h chiah-ê ōe sim-lāi put-an, chin kiaⁿ Ka-te̍k -ông A-kiat,

13só͘-í tī chèng-lâng bīn-chêng ké khí-siáu, tī siâⁿ-mn̂g ê mn̂g-sìⁿ loān-siá loān-ōe, chhùi-nōa-pho phùn kah kui chhùi-chhiu.

14A-kiat kā i ê jîn-sîn kóng, “Lín khòaⁿ, chit-ê lâng teh khí-siáu. Lín ná kā i chhōa-lâi góa chia?

15Góa chia kiám ū khiàm siáu-lâng? Lín ná kā chhōa--lâi? M̄-thang hō͘ chit-ê lâng ji̍p góa ê chhù.”

← Chapter 20 Jump to: Chapter 22 →