1 Samuel 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Hui-lī-sū -lâng kā Siōng-tè ê iok-kūi chhiúⁿ--khì, tùi Í-piān Í-siā ūn-khì A-si̍t-tu̍t.

2Hui-lī-sū -lâng kā Siōng-tè ê iok-kūi ūn-khì Tāi-kún ê biō, kā i khǹg tī Tāi-kún ê piⁿ--á.

3Keh-ji̍t thàu-chá A-si̍t-tu̍t -lâng khí--lâi, khòaⁿ-tio̍h Tāi-kún tó tī Siōng Chú ê iok-kūi thâu-chêng, bīn phak tī thô͘-kha; chiū chiong Tāi-kún koh chhāi khí-lâi i ê goân-ūi.

4Koh keh-ji̍t thàu-chá, in khí--lâi, khòaⁿ-tio̍h Tāi-kún koh-chài tó tī Siōng Chú iok-kūi thâu-chêng, bīn phak tī thô͘-kha, thâu kap nn̄g ki chhiú-chiúⁿ lóng tn̄g--khì, lak tī hō͘-tēng téng-bīn; chí-ū chhun Tāi-kún ê seng-khu.

5In-ūi án-ni, Tāi-kún ê chè-si kap só͘-ū ji̍p A-si̍t-tu̍t Tāi-kún -biō ê lâng, kàu kin-á-ji̍t lóng bô ta̍h Tāi-kún -biō ê hō͘-tēng.

6Siōng Chú ê chhiú tāng-tāng phah A-si̍t-tu̍t -lâng kap chiu-ûi ê jîn-bîn, hō͘ in siⁿ to̍k-chhng, koh hō͘ in kiaⁿ.

7A-si̍t-tu̍t -lâng khòaⁿ-tio̍h án-ni chiū kóng, “ Í-sek-lia̍t Siōng-tè ê iok-kūi m̄-thang koh khǹg tī lán chia, in-ūi I ê chhiú tāng-tāng phah lán, mā phah lán ê sîn-bêng Tāi-kún.”

8A-si̍t-tu̍t -lâng chiū phài lâng chhiáⁿ Hui-lī-sū ê siú-léng lâi, mn̄g in, kóng, “Goán tio̍h án-chóaⁿ chhú-lí Í-sek-lia̍t Siōng-tè ê iok-kūi?” In ìn kóng, “Kā Í-sek-lia̍t Siōng-tè ê iok-kūi ūn-khì Ka-te̍k.” In chiū chiong Í-sek-lia̍t Siōng-tè ê iok-kūi ūn--khì.

9Iok-kūi chi̍t-ē ūn kàu hia, ín-khí tōa khióng-hông, in-ūi Siōng Chú ê chhiú kong-kek hit-ê siâⁿ; koh phah siâⁿ-lāi ê lâng, hō͘ siâⁿ-lāi ê lâng bô-lūn tōa-sòe lóng siⁿ to̍k-chhng.

10In chiū chiong Siōng-tè ê iok-kūi sàng-khì Í-kek-lûn. Siōng-tè ê iok-kūi chi̍t-ē kàu Í-kek-lûn, Í-kek-lûn -lâng hoah kóng, “In chiong Í-sek-lia̍t Siōng-tè ê iok-kūi ūn-lâi lán chia, sī beh hāi-sí lán kap lán ê tông-pau.”

11In chiū phài lâng khì chhiáⁿ Hui-lī-sū lóng-chóng ê siú-léng lâi, tùi in kóng, “Kā Í-sek-lia̍t Siōng-tè ê iok-kūi sàng tò-khì goân-lâi ê só͘-chāi, chiah bián i hāi-sí lán kap lán ê tông-pau.” Choân-siâⁿ chhiong-móa sí-bông ê kiaⁿ-hiâⁿ; in-ūi Siōng-tè ê chhiú tāng-tāng phah in.

12Bô sí ê lâng lóng siⁿ to̍k-chhng; choân-siâⁿ thî-khàu ê siaⁿ thàu kàu thiⁿ-téng.

← Chapter 4 Jump to: Chapter 6 →